Why Mekem Grow Gud Fasin?

WANFALA Japanese man wea no olo tumas, Kunihito, muv go long United States no longtaem go nomoa.a Tu-thri week bihaen hem kasem there, hem feisim wanfala samting wea klosap spoelem waka bilong hem. Kunihito storyim: “Taem boss bilong mi askem mi sapos mi savve duim wanfala waka, mi feel sure mi fit for duim. Bat, from mi growap kam for tingim fasin for no ova tumas olsem gud fasin, mi ansa: ‘Mi no sure mi savve duim, bat bae mi traem best bilong mi.’ Long boss bilong mi wea man bilong America, diswan here olsem mi no fit and no sure. Bihaen mi savve long diswan, mi luksavve mi need for mekem samfala change.”

Maria, wea stap long New York City, hem top college student wea evritaem hapi for helpem olketa nara student long sem class. Juan, nara student tu hem askem help bilong Maria. Bat hem trae hard tu long Maria. Nomata Maria laek keepim klin fasin, hem foldaon long wei wea Juan switim hem and duim dirty fasin.

For showimaot gud fasin long world distaem wea olabaot and no klin hem barava wanfala challenge. So why mekem grow gud fasin? Bikos gud fasin mekem God hapi and staka long iumi laek for God hapi long iumi.

Word bilong God, Bible, encouragem olketa wea readim for mekem grow gud fasin. Olsem example, aposol Paul raet: “Evri gud samting and evri samting wea fit for praisem, go ahed for tingim evri samting hia.” (Philippians 4:8) And aposol Peter encouragem iumi for ‘waka hard for joinim gud fasin go long faith.’ (2 Peter 1:5) Bat wanem nao gud fasin? Iu savve teachim insaed classroom? Hao nao iumi savve mekem grow?

[Footnotes]