Standap Evribit Witim Biliv wea Strong

“Wanfala Nambawan Project”

FROM start long history bilong Olketa Jehovah’s Witness long distaem, olketa barava interest long wanfala profesi bilong Jesus Christ: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.” (Matthew 24:14) Taem 1914—start bilong “olketa last day”—kam klosap, olketa tru Bible Student startim witim strong biliv wanfala Bible education waka raonem earth wea big winim enitaem bifor.—2 Timothy 3:1.

For kasem goal for talemaot gud nius long full earth, olketa servant bilong Jehovah iusim wanfala wei wea niu, spesol, and klia. For lane moa abaotem diswan, letem iumi go bak long wanfala taem bifor.

Niu Wei for Talemaot Gud Nius

Hem January 1914. Tingim sapos iu sidaon witim 5,000 pipol long wanfala dark hall long New York City. Front long iu wanfala big movie piksa hem stap. Wanfala man wea garem white hair hem showaot long piksa. Iu lukim finis samfala movie wea no garem saond, bat long disfala movie disfala man hem toktok, and iu herem toktok bilong hem. Iu lukim firstaem wea olketa showim samting spesol, and garem message wea difren. Man wea toktok hem Charles Taze Russell, first president bilong Watch Tower Society, and nem bilong show hem “Photo-Drama of Creation.”

C. T. Russell luksavve hao movie piksa bae gudfala wei for kasem staka pipol. So long 1912, hem start for redyim “Photo-Drama of Creation.” Gogo hem kamap wanfala show wea eit hour long and iusim slide foto and movie piksa, witim color piksa and saond tu.

Hem garem fofala haf, and disfala “Photo-Drama” showim history from taem bilong creation go kasem taem evri purpose bilong Jehovah for disfala earth and man hem fulfill long end bilong Thousand Year Rul Bilong Christ. Hem bihaen staka year bifor olketa bisnis mek profit long kaen movie olsem. Bat, planti million pipol lukim “Photo-Drama of Creation” free nomoa!

Olketa recordim samfala naes music and 96 tok for iusim long “Photo-Drama.” Olketa wakem olketa spesol slide foto long olketa naes piksa wea showimaot world history. And tu olketa need for mekem planti handred niu painting and drawing. Samfala long olketa slide foto and movie piksa hem long color wea olketa isisi paintim witim hand. And diswan olketa duim winim wanfala taem bikos gogo, olketa wakem 20-fala set wea garem fofala haf insaed. Diswan mekem hem fit for showim disfala “Photo-Drama” long 80 difren ples long wanfala day!

Waka Bilong Olketa wea Showim

Wanem nao waka bilong olketa wea showim disfala “Photo-Drama”? Wanfala Bible Student Alice Hoffman sei: “Drama hem start witim wanfala movie piksa bilong Brata Russell. Taem hem start for showaot long piksa and mouth bilong hem start for muv, wanfala recording long voice bilong hem bae start . . . and mifala hapi for lisin long voice bilong hem.”

Saed long samfala spesol foto, Zola Hoffman rememberim: “Mi sidaon and barava sapraes taem mifala lukim olketa day bilong creation. Olketa lily flaoa isisi open front long eye bilong mifala.”

Man wea laekem tumas music Karl F. Klein bilong Governing Body bilong Olketa Jehovah’s Witness sei: “Long semtaem olketa piksa showaot, naesfala music go ahed tu, olsem olketa tune wea garem nem Narcissus and Humoreske.”

Samfala nara samting for rememberim happen tu. Clayton J. Woodworth Jr. rememberim hao, “samfala fani samting savve kamap samfala taem. Long wanfala taem recording hem pleim ‘Ranawe Olsem Wanfala Bird Long Maunten Bilong Iu,’ and long piksa hem showim wanfala barava bigfala gigantosaurus, wanfala bigfala animal wea stap laef bifor long Flood”!

Witim disfala “Photo-Drama of Creation,” olketa wakem tu olketa set bilong “Eureka Drama.” (Lukim box.) Wanfala garem olketa recording bilong olketa tok, and olketa music tu. Narawan garem olketa recording and olketa slide foto. Nomata “Eureka Drama” no garem movie piksa, olketa interest tumas long hem long olketa area wea no staka pipol stap.

Strong Tul for Witnessing

Kasem end long 1914, winim 9,000,000 pipol long North America, Europe, and Australia lukim finis “Photo-Drama.” Nomata olketa Bible Student no staka, olketa biliv strong long wei for talemaot gud nius witim disfala niu wei. Olketa hapi for givim selen wea olketa needim for haerem olketa ples wea fitim for showim. So hem nao hao “Photo-Drama of Creation” duim wanfala big waka long pipol wea lukim for savve long Word bilong God and olketa purpose bilong hem.

Long wanfala leta long C. T. Russell, wanfala young wan raet olsem: “Datfala first visit long Drama bilong iu hem changem laef bilong mi; or, fitim for mi sei, hem changem savve bilong mi long Bible.” Narawan sei: “Klosap faith bilong mi foldaon insaed long kwiksand and mi feel olsem ‘Photo-Drama of Creation’ wea iu showim long hia last summer, hem sevem mi. . . . Distaem mi garem peace wea world no savve givim and mi hard for changem for eni samting.”

Demetrius Papageorge, wanfala member bilong hedquarter bilong Society sei: “Datfala ‘Photo-Drama’ hem wanfala nambawan project, taem iumi tingim hao olketa Bible Student no staka and selen wea olketa garem hem no staka tu. Hem mas really garem spirit bilong Jehovah bihaenem!”

[Box/Olketa Piksa long page 8, 9]

Datfala “Eureka Drama”

Eit-fala month bihaen firstaem wea olketa showim “Photo-Drama,” Society lukim need for provaedem narawan olsem wea olketa kolem “Eureka Drama.” Taem olketa go ahed for showim full “Photo-Drama” long olketa bigfala taon, olketa showim disfala “Eureka” long olketa vilij and bush ples for talemaot sem message. Olketa sei wanfala “Eureka Drama” givim “olketa sista spesol chance” for preach. Why nao olsem? Bikos hevi bilong machine for pleim recording hem 14 kilogram nomoa. Bikos for showim, iu bae need for karem wanfala machine olsem.