Mas Hapi Witim Hapi God

“Lastfala samting olketa brata, go ahed for hapi, . . . and God bilong love and peace bae stap witim iufala.”—2 CORINTHIANS 13:11.

1, 2. (a) Why nao laef bilong planti no garem inaf hapi? (b) Wanem nao hapi, and hao nao iumi savve mekem grow?

LONG olketa hard taem distaem, no planti samting stap for pipol hapi long hem. Taem bigfala trabol kasem olketa or samwan wea olketa lovem, maet olketa feel olsem Job, man wea stap bifor wea hem sei: “Man, wea born from woman, garem shortfala laef and fulap witim trabol.” (Job 14:1) Olketa Christian kasem tu olketa wari and hevi bilong “nogud taem wea hard for deal witim,” and iumi no sapraes hao long samfala taem samfala faithful servant bilong Jehovah wikdaon.—2 Timothy 3:1.

² Nomata olsem, olketa Christian savve hapi nomata taem olketa kasem test. (Acts 5:40, 41) For minim hao hem savve olsem, tingim firstaem wanem nao hapi. Samfala talemaot mining bilong hapi olsem “feeling wea kamaot from man kasem or expectim gud samting.”a So, sapos iumi tek taem for tingim olketa blessing bilong iumi distaem and long semtaem ting raonem olketa blessing wea weitim iumi long niu world bilong God, iumi savve hapi.

3. Why nao hem fitim for sei evriwan garem samfala reason for hapi?

³ Evriwan garem samfala blessing for hapi long hem. Wanfala famili hed maet finis from waka. From datwan, hem wari. Hem laek for provaed for olketa wea hem lovem. Bat, sapos hem strong long body and garem gudfala health, hem savve hapi long datwan. Sapos hem faendem waka, hem bae fit for waka hard. Nara example, wanfala Christian woman maet seknomoa kasem wanfala nogud sik. Bat, hem sei thankiu long olketa fren and famili member wea lovem, saportim and helpem hem for deal witim sik bilong hem witim honor and strong. And evri tru Christian, nomata wanem nao kasem olketa, savve hapi long privilege for savve long Jehovah, “disfala hapi God,” and Jesus Christ, “datfala hapi and only Ruler.” (1 Timothy 1:11; 6:15) Yes, Jehovah God and Jesus Christ barava hapi. Olketa keepim hapi bilong olketa nomata living long earth distaem hem barava difren from wanem Jehovah laekem long firstaem. Example bilong olketa savve teachim iumi planti samting abaotem hao for keepim hapi bilong iumi.

Olketa Nating Lusim Hapi Bilong Olketa

4, 5. (a) Wanem nao Jehovah duim taem olketa first man go againstim hem? (b) Long wanem wei nao Jehovah keepim tingting wea lukim gud saed long olketa man?

⁴ Long garden bilong Eden, Adam and Eve garem perfect health and wanfala perfect mind. Olketa garem gudfala waka for duim and naesfala ples for duim long hem. Winim evri samting, olketa garem privilege for story evritaem witim Jehovah. Hem purpose bilong God for olketa enjoyim wanfala hapi future. Bat firstfala dadi and mami bilong iumi no satisfae witim olketa gud present hia, olketa stealim tambu frut from “tree bilong savve long gud and nogud samting.” Disfala wei for no obey, redyim faondeson bilong wei for no hapi wea iumi, wea laen bilong olketa, experiencem distaem.—Genesis 2:15-17; 3:6; Romans 5:12.

⁵ Bat, Jehovah no letem fasin for no thankiu bilong Adam and Eve for stealim hapi bilong hem. Hem sure heart bilong samfala pikinini bilong tufala bae muvim olketa for servem hem. From hem barava sure, hem announcem purpose bilong hem for baem bak olketa pikinini bilong Adam and Eve wea obey bifor tufala bornem firstfala pikinini bilong olketa! (Genesis 1:31; 3:15) Long olketa handred year wea kam bihaen, staka man wakabaot followim wei bilong Adam and Eve, bat Jehovah no rejectim famili bilong man from wei for no obey hem kamap big tumas. Winim datwan, hem interest for lukluk strong long olketa man and woman wea ‘mekem heart bilong hem hapi,’ olketa wea trae hard for mekem hem hapi from olketa lovem hem.—Proverbs 27:11; Hebrews 6:10.

6, 7. Wanem samting nao helpem Jesus for stap hapi?

⁶ Waswe long Jesus—hao nao hem keepim hapi bilong hem? Olsem wanfala maeti spirit long heven, Jesus garem evri chance for lukim wanem olketa man and woman long earth duim. Wei wea olketa no perfect hem showaot klia, bat Jesus lovem olketa. (Proverbs 8:31) Bihaen, taem hem kam long earth and “stap midolwan” long man, tingting bilong hem long man hem no change. (John 1:14) Wanem nao helpem perfect Son bilong God for keepim gudfala tingting olsem abaotem human famili wea sin?

⁷ First samting, Jesus hem balance long wanem hem expectim from hemseleva and olketa narawan. Hem savve hem bae no changem full world. (Matthew 10:32-39) So hem hapi taem wanfala honest man acceptim message bilong Kingdom. Nomata samfala taem fasin and wei bilong olketa disaepol bilong hem no fitim, Jesus savve hao heart bilong olketa laek for duim will bilong God, and diswan mekem hem lovem olketa. (Luke 9:46; 22:24, 28-32, 60-62) Interesting samting, long prea long Father bilong hem long heven, Jesus storyim gudfala wei bilong olketa disaepol kasem datfala taem: “Olketa obeyim word bilong iu.”—John 17:6.

8. Talem samfala wei wea iumi savve followim Jehovah and Jesus saed long wei for keepim hapi bilong iumi.

⁸ Iumi no daot, hao iumi evriwan bae kasem gud samting sapos iumi lukluk gud long example bilong Jehovah God and Jesus long diswan. Waswe, iumi savve followim Jehovah evribit, maet long wei for no wari tumas taem samting no followim wanem iumi planim? Waswe, iumi savve followim moa klos example bilong Jesus long wei for keepim gudfala tingting abaotem living bilong iumi long disfala taem, and balance long wanem iumi expectim long iumiseleva and olketa narawan? Letem iumi lukim hao for followim long gudfala wei samfala long olketa principle hia saed long waka wea olketa strong Christian evriwea tinghae long hem—field ministry.

Keepim Gudfala Tingting Abaotem Ministry

9. Hao nao Jeremiah kasem bak hapi bilong hem, and hao nao example bilong hem savve helpem iumi?

⁹ Jehovah laekem iumi for hapi long service bilong hem. Hapi bilong iumi shud no depend long samting wea kamaot from wanem iumi duim. (Luke 10:17, 20) Profet Jeremiah preach for planti year long territory wea no eni gud samting kamaot from hem. Taem hem tingim nomoa wei wea pipol no acceptim message, hapi bilong hem lus nao. (Jeremiah 20:8) Bat taem hem ting raonem why nao message hem gud, hapi bilong hem kam bak moa. Jeremiah sei long Jehovah: “Mi faendem olketa toktok bilong iu, and mi start for kaikaim; and toktok bilong iu mekem heart bilong mi singaot and hapi; from olketa kolem nem bilong iu long mi, O Jehovah.” (Jeremiah 15:16) Yes, Jeremiah hapi long privilege for preachim word bilong God. Iumi savve olsem tu.

10. Hao nao iumi savve keepim hapi bilong iumi long ministry nomata sapos no eni gud samting kamaot long disfala taem?

¹⁰ Nomata planti pipol fail for lisin long gud nius, iumi garem evri reason for hapi taem iumi duim field ministry. Remember hao Jehovah hem barava sure samfala man bae change for servem hem. Olsem Jehovah, iumi shud no lus hope hao samfala bae gogo lukim kwestin long hu nao fit for rul long universe and acceptim Kingdom message. Iumi mas no forget hao living bilong pipol savve change. Taem olketa lusim samwan or samting, or kasem wanfala big trabol wea olketa no expectim, nomata man wea satisfae bae start for tingting strong long mining bilong laef. Bae iu stap taem man olsem ‘luksavve long spiritual need bilong hem’? (Matthew 5:3) Tru nao, maet samwan long territory bilong iu redy for lisin long gud nius long nextfala visit bilong iu!

11, 12. Wanem nao happen long wanfala taon, and wanem nao iumi savve lanem from datwan?

¹¹ Pipol wea stap long territory bilong iumi savve change tu. Tingim disfala example. Long wanfala smol taon, samfala young famili fren gud tugeta. Taem Olketa Jehovah’s Witness visit, olketa kasem sem ansa long evri haos, “Mifala no interest!” Sapos samwan showimaot interest long Kingdom message, then olketa neiba kwiktaem spoelem wei for interest long olketa Witness. Tru nao, wei for preach long there hem wanfala challenge. Nomata olsem, olketa Witness go ahed nomoa for duim preaching waka. Wanem nao kamaot from diswan?

¹² Gogo, planti long olketa pikinini long datfala taon big kam, marit, and then garem haos bilong olketa seleva long there. Taem olketa luksavve wei bilong laef bilong olketa no kasem trufala hapi, samfala long olketa start for lukaotem truth. Olketa faendem taem olketa lisin gud long gud nius wea olketa Witness talemaot. So dastawe bihaen samfala year, datfala smol kongregeson start for grow. Tingim hapi bilong olketa Kingdom pablisa wea no givap! Letem wei for no givap for sharem Kingdom message bringim hapi for iumi tu!

Olketa wea Biliv Olsem Iu Bae Saportim Iu

13. Long hu nao iumi savve luk go taem iumi wikdaon?

¹³ Taem olketa hevi kamap moa big or iu kasem wanfala big trabol long laef bilong iu, wea nao iu savve go for kasem comfort? Staka million servant wea dedicate long Jehovah go firstaem long Jehovah long prea, then long olketa Christian brata and sista. Taem hem long earth, Jesus seleva tinghae long saport bilong olketa disaepol bilong hem. Long naet bifor hem dae, hem storyim olketa olsem “olketa wea stap witim mi long olketa test bilong mi.” (Luke 22:28) Hem tru, olketa disaepol no perfect, bat loyal fasin bilong olketa hem comfortim Son bilong God. Iumi tu savve kasem strong from olketa wea worship witim iumi.

14, 15. Wanem nao helpem wanfala hasband and waef for deal witim dae bilong son bilong tufala, and wanem nao iu lanem from experience bilong tufala?

¹⁴ Tufala Christian Michel and Diane lanem hao saport bilong olketa brata and sista hem important tumas. Olketa faendaot son bilong tufala, Jonathan, wanfala Christian wea fulap witim laef and hope, garem wanfala brain tumor. Olketa doctor trae hard for sevem hem, bat gogo sik bilong hem kamap nogud and leit long wanfala aftanun, hem dae nao. Michel and Diane barava sorre fogud. Olketa luksavve hao Service Meeting, wea olketa markem for datfala evening, hem klosap finis. Bat, from olketa barava needim comfort, olketa askem elder wea stap witim olketa for kam witim olketa long Kingdom Hall. Olketa kasem there taem kongregeson announcem dae bilong Jonathan. Bihaen long meeting, olketa brata and sista raonem tufala and huggim and talem toktok for comfortim tufala taem olketa krae. Diane hem ting go bak: “Mifala feel emti taem mifala kasem hall, bat mifala kasem bigfala comfort from olketa brata—olketa barava strongim mifala! Nomata olketa no savve tekawe pain bilong mifala, olketa helpem mifala for deal witim disfala bigfala hevi!”—Romans 1:11, 12; 1 Corinthians 12:21-26.

¹⁵ Disfala wei for safa mekem Michel and Diane kam moa klos long olketa brata and sista bilong olketa. And hem mekem tufala moa klos. Michel hem sei: “Mi lane for garem moa love for waef bilong mi. Long samfala taem wea mifala wikdaon, mifala story long each other abaotem Bible truth and hao Jehovah hem strongim mifala.” Diane talem tu: “Kingdom hope hem garem moa mining for mifala distaem.”

16. Why nao hem important for letem olketa brata savve long need bilong iumi?

¹⁶ Yes, olketa Christian brata and sista bilong iumi savve kamap olsem “help for strongim” iumi long olketa hard taem bilong laef and helpem iumi for keepim hapi bilong iumi. (Colossians 4:11) Tru, olketa no savve luksavve long tingting bilong iumi. So, taem iumi needim saport, hem gud for letem olketa savve. Then iumi savve showimaot trufala wei for tinghae long eni comfort wea olketa brata fit for provaedem, and for tingim diswan olsem hem kam from Jehovah.—Proverbs 12:25; 17:17.

Lukluk Long Kongregeson Bilong Iu

17. Wanem nao olketa challenge wea wanfala singol mami feisim, and hao nao iumi ting long pipol olsem hem?

¹⁷ Taem iu luk moa klos long olketa wea biliv olsem iu, iu bae lane hao for tinghae go moa long olketa and kasem hapi from wei for kaban witim olketa. Lukluk long kongregeson bilong iu. Wanem nao iu lukim? Eni singol mami stragol for bringimap pikinini bilong hem long wei bilong truth? Iu enitaem tingim nambawan example wea hem showimaot? Trae for tingim samfala problem wea hem feisim. Wanfala singol mami Jeanine talemaot samfala: wei for feel lonely, wei wea samfala man long waka enikaen tumas, and wei for garem lelebet selen nomoa. Bat samting wea hard winim olketa hia, hem sei, hem wei for kea for feeling bilong pikinini bilong hem, from feeling bilong each pikinini hem difren. Jeanine talem nara problem: “Hem wanfala big challenge for missim wei for tingting for mekem son bilong iu hed long haos olsem for changem hasband. Mi garem wanfala dota, and hem hard for remember for no putim hevi long hem long wei for talem olketa problem bilong mi long hem.” Olsem staka thousand singol mami wea fraet long God, Jeanine waka full-taem and lukaftarem famili bilong hem. Hem studyim Bible tu witim olketa pikinini, trainim olketa long ministry, and tekem olketa long olketa kongregeson meeting. (Ephesians 6:4) Jehovah mas hapi tumas taem hem evriday lukim waka bilong disfala famili for keepim faithful fasin! Waswe, hem no mekem heart bilong iumi hapi for garem kaen famili olsem midolwan long iumi? Barava nao.

18, 19. Givim example long hao iumi savve ting moa hae long olketa member long kongregeson.

¹⁸ Luk moa long kongregeson bilong iu. Maet iu lukim olketa faithful widow man or woman wea “nating savve miss” long olketa meeting. (Luke 2:37) Olketa savve feel lonely samfala taem? Yes. Olketa barava missim marit partner bilong olketa! Bat olketa go ahed busy long service bilong Jehovah and garem interest long narafala pipol. Balance, gudfala fasin bilong olketa add go long hapi bilong kongregeson! Wanfala Christian wea serve long full-taem ministry for winim 30 year talem: “Wanfala samting wea mekem mi barava hapi hem for lukim olketa olo brata and sista wea winim staka test and go ahed for servem Jehovah long faithful wei!” Yes, olketa olo Christian midolwan long iumi savve encouragem tumas olketa young wan.

¹⁹ Waswe long olketa niu wan wea just start for kaban witim kongregeson? Waswe, iumi no feel gud taem iumi herem olketa talemaot faith bilong olketa long olketa meeting? Tingim haomas nao olketa muv ahed from taem olketa start for studyim Bible. Jehovah mas hapi tumas long olketa. Waswe long iumi? Iumi talemaot long olketa hao iumi hapi long olketa and praisem waka bilong olketa?

20. Why nao iumi savve sei evri kongregeson member garem important part for duim insaed kongregeson?

²⁰ Waswe, iu marit, singol, or wanfala singol parent? Iu wanfala boy or girl wea no garem dadi or mami, or wanfala widow man or woman? Iu wanfala wea kaban witim kongregeson for staka year or wanfala wea just start for kaban nomoa? Feel sure hao faithful example bilong iu hem encouragem mifala evriwan. And taem iu join insaed wanfala Kingdom singsing, taem iu givim wanfala ansa or tok long Theocratic Ministry Skul, samting iu duim hem add go long hapi bilong iumi. Winim datwan, hem mekem heart bilong Jehovah hapi.

21. Iumi garem olketa reason for duim wanem, bat olketa wanem kwestin nao kamap?

²¹ Yes, nomata long olketa hard taem, iumi savve hapi taem iumi worshipim hapi God bilong iumi. Iumi garem planti reason for followim encouragement bilong Paul: “Go ahed for hapi, . . . and God bilong love and peace bae stap witim iufala.” (2 Corinthians 13:11) Bat, waswe sapos wanfala natural disaster kasem iumi, persecution, or hardfala taem saed long selen? Iumi savve keepim hapi bilong iumi nomata long kaen taem olsem? Disaed seleva taem iumi lukluk long nextfala article.

[Footnote]

Waswe, Iu Savve Ansa?

• Hao nao samfala talemaot mining bilong hapi?

• Hao nao wei for keepim gudfala tingting helpem iumi for stap hapi?

• Wanem nao savve helpem iumi for garem gudfala tingting abaotem territory bilong kongregeson bilong iumi?

• Long olketa wanem wei nao iu tinghae long olketa brata and sista long kongregeson bilong iumi?

[Olketa Piksa long page 10]

Pipol long territory bilong iumi savve change

[Piksa long page 12]

Wanem challenge nao olketa long kongregeson bilong iu feisim?