Standap Evribit Witim Biliv wea Strong
‘Lukim! Datfala Big Crowd!’
HEM wanfala kwestin wea mekem olketa servant bilong Jehovah konfius for planti year. For longtaem nao olketa iusim Bible for trae for faendem ansa. Datfala subject hem kosim staka story for kamap. Bat gogo olketa faendem ansa long Bible, and hem barava mekem olketa wea hipap long convention long Washington, D.C., long year 1935 for seke fogud.
Olketa storyim wanfala kwestin wea kamap evritaem: Hu nao datfala “bigfala sekson” (King James Version), or “big crowd” (New World Translation), wea Revelation 7:9 storyim? Waswe, disfala sekson wea biliv bae stap long heven?
Kwestin wea Stap Longtaem
From taem bilong aposol John kasem taem bilong iumi, olketa Christian konfius abaotem hu nao datfala “bigfala sekson.” Olketa Bible Student ting long datfala bigfala sekson olsem mek-tu sekson wea go ap long heven, sekson wea garem savve long truth bilong Bible bat no duim staka samting for talemaot datwan.
Nomata olsem, samfala wea kaban witim olketa anointed Christian kamap barava strong long preaching waka. Olketa no garem eni hope for go long heven. Tru nao, hope bilong olketa hem fitim pablik tok “Planti Million wea Stap Laef Distaem Bae Nating Dae,” wea pipol bilong Jehovah storyim from 1918 go kasem 1922. Sekson hia bae kasem blessing bilong laef olowe long earth.
English Wastaoa bilong October 15, 1923, storyim tokpiksa bilong Jesus abaotem olketa sheep and goat and hem sei: “Olketa sheep nao evri pipol bilong olketa nation, no olketa wea spirit anointim bat olketa wea laekem raeteous fasin, wea luksavve long Jesus Christ olsem Lord and luk forward and hope for taem wea moabeta anda long rul bilong hem.”—Matthew 25:31-46.
Moa Laet Sut Aot
Long year 1931, Vindication, Buk Wan, storyim Ezekiel chapter 9 and showimaot olketa wea garem mark long forhed for sev taem world hem finis olketa olsem olketa sheep long tokpiksa bilong Jesus. Vindication, Buk Thri (wea olketa pablisim long 1932), storyim stretfala heart bilong man wea no Israelite, Jehonadab, wea go insaed long chariot bilong King Jehu bilong Israel and go for lukim strong bilong Jehu for finisim pipol wea worshipim olketa giaman god. (2 Kings 10:15-28) Datfala buk hem sei: “Jehonadab hem stand for or piksarem datfala sekson bilong pipol long earth [wea] no followim organization bilong Satan, wea stand for saed bilong raeteous fasin, and Lord bae keepim olketa long taem bilong Armageddon, mekem olketa go thru long datfala trabol, and givim olketa laef olowe long earth. Olketa hia nao datfala ‘sheep’ sekson.”
Long 1934, English Wastaoa talemaot klia hao olketa Christian witim hope for stap long earth shud mekem dedication long Jehovah and baptaes. Laet abaotem disfala sekson wea bae stap long earth hem barava shaen moa braet!—Proverbs 4:18.
Wei for Minim Samting Hem Sut Aot
Wei for minim Revelation 7:9-17 hem redy for sut aot long big wei. (Psalm 97:11) Wastaoa hem talemaot hao plan hem go ahed for wanfala convention kamap long May 30 go kasem June 3, 1935, long Washington, D.C., U.S.A., wea olketa hope bae “barava givim comfort and help” for olketa wea Jehonadab piksarem. And datwan nao samting wea happen!
Long wanfala tok “Datfala Bigfala Sekson,” wea 20,000 pipol wea kam long convention herem, J. F. Rutherford storyim pruv from Bible hao “nara sheep” bilong distaem hem semsem witim datfala “big crowd” bilong Revelation 7:9. (John 10:16) Long end bilong disfala tok, speaker hem ask olsem: “Evriwan wea garem hope for laef olowe long earth, plis iufala savve standap?” Taem bigfala sekson bilong olketa long audience standap, Rutherford sei: “Lukim! Datfala bigfala sekson!” Evriwan stap kwaet and then bigfala singaot kamap. Long next day, 840 niu Witness bilong Jehovah baptaes, planti long olketa part bilong datfala big crowd.
Wanfala Spesol Sekson Stap
Bifor 1935, planti long olketa wea acceptim message bilong Bible and showimaot strong long waka for preachim gud nius talemaot wei wea olketa interest for stap olowe long Paradaes earth. Olketa no laek for go long heven, bikos God no givim olketa hope for laef long heven. Wei wea olketa sei olketa part bilong big crowd bilong nara sheep showimaot hao kasem 1935, wei for hipimap 144,000 anointed Christian hem klosap finis nao.—Revelation 7:4.
Taem World War II hem start, Satan datfala Devil barava strong for stopem wei for hipimap olketa bilong datfala big crowd. Waka for preachim Kingdom hem tambu long planti kantri. Long datfala nogud taem, and no longtaem bifor hem dae long January 1942, J. F. Rutherford sei: “Hem luk olsem datfala ‘bigfala sekson’ maet no big tumas.”
Bat bikos long blessing bilong God, evri samting barava difren. From olketa “standap evribit witim biliv wea strong,” datfala anointed sekson and olketa fren bilong olketa, datfala nara sheep, go ahed for fulfillim komand wea olketa kasem for mek-disaepol. (Colossians 4:12; Matthew 24:14; 28:19, 20) Kasem 1946, namba bilong Olketa Jehovah’s Witness wea preach evriwea long world hem 176,456—planti long olketa bilong datfala big crowd. Long year 2000, winim 6,000,000 Witness nao faithful for servem Jehovah insaed 235 kantri—wanfala barava big crowd! And namba hem go ahed for grow.