Mekem Wei wea Iu Muv Ahed Showaot Klia
“Ting raonem evri samting hia; tingting strong long olketa, mekem wei wea iu muv ahed savve showaot klia long evriwan.”—1 TIMOTHY 4:15.
1. Hao nao iu savve wanfala frut hem ripe and redy for kaikaim?
TINGIM long mind bilong iu wanfala frut wea iu laekem tumas—pineapple, mango, melon, or narawan. Waswe, iu savve taem hem ripe and redy for kaikaim? Barava nao. Smel, color, and lukluk bilong hem showim bae iu enjoy for kaikaim. Taem iu baetem firstaem, maet iu breath big witim hapi. Hem teist gud tumas! Hem swit tumas! Iu barava enjoyim.
2. Hao nao wei for mature hem showaot, and hao nao diswan affectim wei for fren witim nara pipol?
2 Disfala simpol bat naesfala samting hem semsem tu witim olketa nara part long laef. Tingim disfala example, olsem taem frut hem ripe, wei for mature long spiritual wei hem showaot tu long olketa difren wei. Iumi luksavve long wei wea man hem mature taem iumi lukim hem showimaot fasin for luksavve, wisdom, and samfala fasin moa. (Job 32:7-9) Pipol savve enjoyim wei for kaban and waka witim man wea showimaot kaen fasin olsem long tingting and samting wea hem duim.—Proverbs 13:20.
3. Samting wea Jesus talem abaotem pipol long taem bilong hem showimaot wanem samting abaotem wei for mature?
3 Long narasaed, man maet mature long physical wei, bat toktok and fasin bilong hem showaot hem no mature long feeling and spiritual wei. Olsem example, taem hem story abaotem bighed pipol long taem bilong hem, Jesus Christ sei: “John hem kam and hem no kaikai or drink bat pipol sei, ‘Hem garem wanfala demon’; Son bilong man hem kam and hem kaikai and drink, bat pipol sei, ‘Lukim! Wanfala man for kaikai tumas and drinkim tumas wine.’” Nomata olketa pipol hia mature long physical wei, Jesus sei olketa followim wei bilong “olketa smol pikinini”—olketa nating mature. Dastawe hem sei: “Nomata olsem, wisdom kamap raeteous thru long olketa waka bilong hem.”—Matthew 11:16-19.
4. Wanem nao olketa wei wea showimaot wei for muv ahed and mature?
4 From toktok bilong Jesus, iumi savve lukim sapos man hem garem trufala wisdom—wanfala saen bilong wei for mature—from samting wea hem duim and samting wea kamaot from datwan. Lukim kaonsel wea Paul givim long Timothy abaotem diswan. Bihaen hem listim olketa samting wea Timothy shud aftarem, Paul hem sei: “Ting raonem evri samting hia; tingting strong long olketa, mekem wei wea iu muv ahed savve showaot klia long evriwan.” (1 Timothy 4:15) Tru nao, wei wea wanfala Christian muv ahed for kamap mature hem “showaot klia,” or isi for luksavve. Wei for mature olsem Christian hem olsem wanfala laet wea shaen, hem no samting wea hard for lukim or fasin wea haed. (Matthew 5:14-16) So, bae iumi lukluk long tufala main wei wea showaot wei for muv ahed and mature: (1) grow long savve, wei for minim samting, and wisdom; (2) showimaot frut bilong spirit.
Wan Mind Insaed Long Faith and Savve
5. Wanem nao mining bilong wei for mature?
5 Planti dictionary explainim wei for mature olsem wei for grow evribit, for full-grown, and kasem barava top mark. Wanfala frut, olsem iumi storyim finis, hem mature, or ripe, taem hem grow evribit and lukluk, color, smel, and teist bilong hem kasem taem wea man laek tumas for kaikaim. So, wei for mature hem semsem witim wei for barava nambawan, full evribit, and perfect tu.—Isaiah 18:5; Matthew 5:45-48; James 1:4.
6, 7. (a) Wanem nao showaot Jehovah hem interest tumas for evriwan wea worshipim hem for kamap mature long spiritual wei? (b) Wei for mature long spiritual wei hem join long klos wei witim wanem?
6 Jehovah God hem interest tumas for evriwan wea worshipim hem for muv ahed for kamap mature long spiritual wei. For kasem datwan, hem givim olketa nambawan samting insaed long Christian kongregeson. Aposol Paul raet olsem for olketa Christian long Ephesus: “Hem givim samfala olsem aposol, samfala olsem profet, samfala olsem pipol for talemaot gud nius, samfala olsem shepherd and teacher, for stretem olketa holy wan, for duim waka bilong minister, for buildimap body bilong Christ, go kasem taem wea iumi evriwan kasem wan mind insaed long datfala faith and insaed long stretfala savve bilong Son bilong God, olsem wanfala full-grown man, and kasem full size wea fitim Christ; mekem iumi no stap olsem baby olowe, wea seksek olabaot olsem wave long sea karem go and kam from evri kaen teaching wea olsem wind wea kamaot from giaman wei bilong olketa man, from olketa kleva for duim rong samting.”—Ephesians 4:11-14.
7 Long olketa verse hia, Paul explainim hao samfala long olketa reason why God provaedem planti spiritual samting insaed kongregeson hem for mekem evriwan shud ‘kasem wan mind insaed long faith and insaed long stretfala savve,’ kamap “wanfala full-grown man,” and “kasem full size wea fitim Christ.” Only sapos iumi olsem nao bae iumi sef from wei for olabaot from olketa giaman idea and teaching olsem olketa spiritual baby. So iumi lukim hao wei for kasem “wan mind insaed long faith and insaed long stretfala savve bilong Son bilong God” hem barava join witim wei for kamap mature Christian. Hem gud for iumi followim olketa point insaed long datfala kaonsel bilong Paul.
8. For kasem “wan mind” long faith and stretfala savve hem needim wanem?
8 First samting, wanfala mature Christian mas garem wan mind evribit witim olketa brata saed long faith and savve, bikos hem mas keepim datfala “wan mind.” Hem no apim or sei olketa mas followim tingting bilong hem or garem idea bilong hemseleva saed long savve bilong Bible. Bat, hem garem full trust long truth wea Jehovah God showimaot thru long Son bilong hem, Jesus Christ, and datfala “faithful and wise slave.” Long wei for evritaem kasem spiritual kaikai wea kam “long barava taem”—thru long olketa Christian pablikeson, meeting, assembly, and convention—iumi savve sure hao iumi keepim wei for “wan mind” long faith and savve witim olketa nara Christian.—Matthew 24:45.
9. Talemaot mining bilong toktok “datfala faith” wea Paul iusim insaed leta bilong hem for olketa long Ephesus.
9 Mek-tu samting, disfala toktok “datfala faith” hem no minim strong biliv wea each Christian garem, bat hem minim evri samting insaed long biliv bilong iumi, “waed and long and hae and deep” bilong hem. (Ephesians 3:18; 4:5; Colossians 1:23; 2:7) Tru nao, hao nao wanfala Christian savve kamap wan mind witim olketa nara brata sapos hem bilivim or acceptim wanfala part nomoa bilong “datfala faith”? Diswan minim iumi mas no satisfae long wei for savve long olketa main teaching bilong Bible nomoa or garem lelebet savve bilong truth. Bat, iumi shud interest for mekius long evri samting wea Jehovah provaedem thru long organization bilong hem for dig deep insaed long Word bilong hem. Iumi mas waka hard for kasem stretfala and full savve long will and purpose bilong God. Insaed diswan hem for iusim taem for readim and studyim Bible and olketa Bible buk, prea long God for help and lead, evritaem attendim olketa Christian meeting, and share evribit long waka for preaching Kingdom and mek-disaepol.—Proverbs 2:1-5.
10. Wanem nao mining bilong toktok “go kasem taem wea iumi evriwan kamap,” olsem long Ephesians 4:13?
10 Mek-thri samting, Paul introducem datfala goal wea garem thrifala part witim disfala toktok “go kasem taem wea iumi evriwan kamap.” Wanfala buk wea storyim Bible givim mining bilong “iumi evriwan” olsem “no evriwan, wanwan, bat evriwan tugeta.” Datwan minim each wan long iumi shud waka hard for aftarem goal bilong wei for kamap mature Christian witim full sekson bilong olketa brata. The Interpreter’s Bible sei olsem: “Man wea stap separate from olketa narawan no savve kasem full spiritual mark, long sem wei wea wanfala part bilong body no savve kamap mature sapos full body no grow long healthy wei.” Paul talem moa olketa Christian long Ephesus hao “witim olketa holy wan” olketa shud trae for minim full faith.—Ephesians 3:18a.
11. (a) Wanem nao wei for muv ahed long spiritual wei hem no minim? (b) Wanem nao iumi need for duim mekem iumi muv ahed?
11 Hem klia from toktok bilong Paul hao wei for muv ahed long spiritual wei no minim for fulimap mind bilong iumi witim savve nomoa. Christian wea mature hem no iusim savve bilong hem for mekem nara pipol tinghae long hem. Bat long wei wea difren, Bible sei: “Road bilong olketa raeteous wan hem olsem braet laet wea kamap moa strong go kasem taem bilong full daylaet.” (Proverbs 4:18) Yes, “road” nao hem kamap moa braet, no man wanwan. Sapos iumi evritaem go ahed for kasem wei for minim Word bilong God wea kamap moa braet wea Jehovah givim long pipol bilong hem, bae iumi muv ahed long spiritual wei. Long hia, wei for go ahed hem minim for muv ahed, and datwan hem samting wea iumi evriwan savve duim.—Psalm 97:11; 119:105.
Showimaot “Frut Bilong Spirit”
12. Why nao wei for showimaot frut bilong spirit hem important for muv ahed long spiritual wei?
12 Nomata wei for iumi “kasem wan mind insaed long faith and insaed long stretfala savve” hem important, hem barava important tu for showimaot frut bilong spirit bilong God long evri part long living bilong iumi. Why nao olsem? Bikos olsem iumi lukim finis, wei for mature hem no samting wea stap insaed iumi or samting wea haed, bat hem showaot long olketa fasin wea savve helpem and strongim nara pipol. Tru, wei wea iumi trae hard for muv ahed long spiritual wei hem no for mekem iumi garem samfala spesol fasin wea mekem pipol apim iumi. Bat, taem iumi grow long spiritual wei, followim hao spirit bilong God hem lead, wei for ting long samting and samting iumi duim bae change long nambawan wei. Aposol Paul hem sei: “Go ahed for wakabaot long spirit and iufala bae no duim eni samting wea body kavetem.”—Galatians 5:16.
13. Wanem change nao showaot klia hao man hem muv ahed?
13 Then Paul go ahed for listim “olketa waka bilong body” wea staka and “showaot klia.” Bifor man hem tinghae long olketa mark bilong God, living bilong hem followim olketa wei bilong world and maet fulap witim samfala samting wea Paul talemaot: “fornication, fasin wea no klin, olabaot fasin, worshipim idol, spiritism, fasin for heit, faet, jealous fasin, fasin for kros, raoa, and fasin for divaed, kavet, drunk, wild party, and samting olsem.” (Galatians 5:19-21) Bat taem datfala man hem muv ahed long spiritual wei, hem isisi winim olketa nogud “waka bilong body” hia and changem witim “olketa frut bilong spirit.” Disfala change wea pipol lukim hem showaot klia hao datfala man hem muv ahed for olsem mature Christian.—Galatians 5:22.
14. Explainim tufala toktok hia “olketa waka bilong body” and “olketa frut bilong spirit.”
14 Iumi shud tingting long tufala toktok hia, “olketa waka bilong body” and “olketa frut bilong spirit.” “Olketa waka” nao samting wea kamaot from wanem man hem duim. Datwan minim olketa samting wea Paul listim olsem olketa waka bilong body hem olketa samting wea kamaot from wanem man min for duim or taem body wea sin muvim man for duim samting. (Romans 1:24, 28; 7:21-25) Long narasaed, datfala toktok “olketa frut bilong spirit” minim olketa fasin insaed datfala list no kamaot from man seleva trae for buildimap fasin bilong hem, bat samting wea kamaot from spirit bilong God waka long man. Long sem wei wea wanfala tree bae garem frut sapos man lukaftarem gud, wanfala man bae showimaot frut bilong spirit tu taem holy spirit waka gud long laef bilong hem.—Psalm 1:1-3.
15. Why nao hem important for lukluk gud long evri part long “olketa frut bilong spirit”?
15 Narafala point for tingim hem wei wea Paul iusim datfala word “frut” for minim evri gudfala fasin wea hem listim. Spirit hem no mekem grow olketa difren frut for iumi chusim which wan nao iumi laekem. Evri fasin wea Paul listim—love, hapi, peace, patient for safa, kaenfala fasin, gudfala fasin, faith, kwaet fasin, and fasin for kontrolem seleva—olketa important, and sapos evriwan join tugeta datwan mekem man fit for kasem niu Christian fasin. (Ephesians 4:24; Colossians 3:10) So, nomata samfala long olketa fasin hia showaot moa klia long living bilong iumi from wei wea olketa fitim fasin and feeling bilong iumiseleva, hem important for iumi lukluk gud long evri fasin wea Paul storyim. Taem iumi duim olsem, iumi savve showimaot long bigfala wei moa fasin bilong Christ insaed long living bilong iumi.—1 Peter 2:12, 21.
16. Wanem nao goal bilong iumi for aftarem wei for olsem mature Christian, and hao nao iumi savve kasem datwan?
16 Important leson wea iumi savve lanem from story bilong Paul hem hao taem iumi aftarem wei for olsem wanfala mature Christian, goal bilong iumi hem no for kasem bigfala savve or for mekem grow olketa spesol fasin. Goal bilong iumi hem for kliarem wei for spirit bilong God waka insaed laef bilong iumi. Haomas iumi letem tingting and samting iumi duim for followim spirit bilong God, hem tu haomas iumi mature long spiritual wei. Hao nao iumi savve kasem disfala goal? Iumi mas openem heart and mind bilong iumi for spirit bilong God affectim hem. Diswan minim for evritaem attendim and tekpart long olketa Christian meeting. Iumi shud evritaem study and ting raonem Word bilong God tu, letem olketa principle bilong hem leadim wei wea iumi deal witim nara pipol and samting iumi chusim and disaedem. Sapos olsem, wei wea iumi muv ahed bae showaot klia.
Muv Ahed for Mekem God Kasem Glory
17. Hao nao wei for muv ahed hem join witim wei for givim glory long Father bilong iumi long heven?
17 Gogo, wei wea iumi muv ahed hem givim glory and praise, no long iumi, bat long Dadi bilong iumi long heven, Jehovah, wea mekem iumi fit for kamap mature long spiritual wei. Long naet bifor Jesus hem dae, hem talem olketa disaepol: “Father bilong mi hem kasem glory from diswan, hem nao wei wea iufala go ahed for garem planti frut and pruvim iufala olketa disaepol bilong mi.” (John 15:8) From frut bilong spirit and samting wea kamaot from ministry bilong olketa abaotem Kingdom, olketa disaepol givim glory long Jehovah.—Acts 11:4, 18; 13:48.
18. (a) Wanem hapi harvest nao hem go ahed distaem? (b) Wanem nao tufala challenge wea disfala harvest mekem kamap?
18 Distaem, blessing bilong Jehovah hem stap long pipol bilong hem taem olketa join insaed long spiritual harvest evriwea long world. For samfala year finis, samting olsem 300,000 niu wan evri year dedicatem olketa seleva long Jehovah and showimaot dedication hia taem olketa baptaes long wata. Diswan mekem iumi hapi and tu hem mekem heart bilong Jehovah hapi fogud. (Proverbs 27:11) Bat, for diswan go ahed for givim hapi and praise long Jehovah, evri niu wan olsem need for “go ahed for wakabaot long wan mind witim [Christ], garem rut and go ahed for grow long hem and kamap strong long faith.” (Colossians 2:6, 7) Diswan mekem tufala challenge kamap for pipol bilong God. Long wansaed, sapos iu wanfala wea just baptaes, waswe, bae iu acceptim datfala challenge for iuseleva ‘showimaot wei wea iu muv ahed long evriwan’? Long narasaed, sapos iu insaed truth for longtaem lelebet, waswe, bae iu willing for acceptim responsibility for lukaftarem spiritual saed bilong olketa niu wan? Long tufala evriwan, need hem stap for go ahed for kamap mature.—Philippians 3:16; Hebrews 6:1.
19. Olketa wanem privilege and blessing nao bae iu kasem sapos iu mekem wei wea iu muv ahed hem showaot klia?
19 Olketa nambawan blessing stap for evriwan wea waka hard for mekem wei wea olketa muv ahed hem showaot klia. Tingim toktok bilong Paul bihaen hem encouragem Timothy for muv ahed: “Lukluk gud evritaem long iuseleva and teaching bilong iu. Followim olketa samting hia, sapos iu duim olsem iu bae sevem iuseleva and olketa wea lisin long iu.” (1 Timothy 4:16) Taem iu waka hard for mekem wei wea iu muv ahed hem showaot klia, iu tu savve share long privilege for givim glory long nem bilong God and kasem olketa blessing bilong hem.
Waswe, Iu Remember?
• Wanem nao olketa wei wea iumi savve showimaot wei for mature long spiritual wei?
• Wanem kaen savve and wei for minim samting nao showaot man hem mature?
• Hao nao wei for showimaot “olketa frut bilong spirit” showaot man muv ahed long spiritual wei?
• Wanem nao tufala challenge wea iumi shud acceptim taem iumi muv ahed for kamap mature?
[Piksa long page 13]
Wei for ripe, or mature, hem isi for luksavve
[Piksa long page 15]
Iumi muv ahed long spiritual wei taem iumi go ahed for kasem truth wea kamaot
[Piksa long page 17]
Prea helpem iumi for showimaot “olketa frut bilong spirit”