Jehovah Hem Sef Ples Bilong Iumi

“From iu sei: ‘Jehovah hem sef ples bilong mi,’ . . . no eni trabol bae kasem iu.”—PSALM 91:9, 10.

1. Why nao iumi savve sei Jehovah hem sef ples bilong iumi?

JEHOVAH hem trufala sef ples for pipol bilong hem. Sapos iumi loyal evribit long hem, iumi maet ‘kasem hevi long evri kaen wei, bat iumi no brek daon evribit; konfius, bat no barava lus hope; kasem persecution, bat no stap seleva; olketa torowem iumi go daon, bat no finis evribit.’ Why nao olsem? Bikos Jehovah givim iumi “paoa wea winim wanem iumi garem.” (2 Corinthians 4:7-9) Tru nao, Father bilong iumi long heven helpem iumi for aftarem living wea followim hem, and iumi savve tingting strong long toktok bilong man wea raetem psalm: “From iu sei: ‘Jehovah hem sef ples bilong mi,’ iu mekem Most Hae seleva hem ples bilong iu for stap; no eni trabol bae kasem iu.”—Psalm 91:9, 10.

2. Wanem nao iumi savve talem abaotem Psalm 91 and samting hem promisim?

² Maet Moses nao raetem olketa toktok hia bilong Psalm 91. Toktok wea kam firstaem long Psalm 90 sei hem nao raetem, and Psalm 91 wea kam bihaen no garem eni toktok wea sei difren man nao raetem datwan. Maet olketa singim Psalm 91 long antiphonic wei; wea minim, wanfala singsing seleva firstaem (91:1, 2), and then choir sing bihaen (91:3-8). Maet wanfala singsing seleva bihaen (91:9a) and wanfala grup sing bihaenem hem (91:9b-13). Then wanfala seleva maet singim olketa lastfala word (91:14-16). Nomata wanem, Psalm 91 promisim sef living long spiritual wei for olketa anointed Christian olsem wanfala sekson and promisim semkaen samting long olketa loyal fren bilong olketa olsem wanfala sekson.a Iumi bae lukluk long disfala psalm olsem evri servant bilong Jehovah.

Sef Insaed ‘Secret Ples Bilong God’

3. (a) Wanem nao “secret ples bilong Most Hae”? (b) Wanem nao iumi kasem taem iumi “stap anda long shadow bilong Olmaeti Wan”?

³ Man wea raetem psalm sing olsem: “Eniwan wea stap long secret ples bilong Most Hae bae stap anda long shadow bilong Olmaeti Wan. Mi bae sei long Jehovah: ‘Iu nao sef ples and strong ples bilong mi, God bilong mi, wea mi trustim.’” (Psalm 91:1, 2) Datfala “secret ples bilong Most Hae” hem wanfala tokpiksa ples wea protectim iumi, and diswan barava tru for olketa anointed wan, wea Devil barava targetim olketa. (Revelation 12:15-17) Hem bae distroem iumi evriwan sapos iumi no garem protection olsem olketa wea stap witim God olsem olketa spiritual guest. Taem iumi “stap anda long shadow bilong Olmaeti Wan,” iumi kasem shade, or shadow bilong God wea protectim iumi. (Psalm 15:1, 2; 121:5) No eni nara ples hem moa sef or moa strong winim Sovereign Lord bilong iumi, Jehovah.—Proverbs 18:10.

4. Wanem nao olketa trap wea “man for kasholem bird,” Satan, hem iusim, and hao nao iumi ranawe?

⁴ Man wea raetem psalm sei moa: “Hemseleva [Jehovah] bae sevem iu from trap bilong man for kasholem bird, from olketa sik wea mekem iu safa.” (Psalm 91:3) Man for kasholem bird long Israel bifor hem planti taem iusim olketa trap for kasholem olketa bird. Wanfala long olketa trap bilong datfala “man for kasholem bird,” Satan, hem nao wicked organization and olketa “kleva trik.” (Ephesians 6:11, footnote) Olketa trap wea haed stap long road wea iumi followim for pullim iumi for duim wicked fasin and mekem iumi nogud long spiritual wei. (Psalm 142:3) Bat, from iumi rejectim fasin wea no raeteous, ‘soul bilong iumi hem olsem wanfala bird wea ranawe from datfala trap.’ (Psalm 124:7, 8) Iumi tinghae tumas long wei wea Jehovah sevem iumi from datfala wicked “man for kasholem bird”!—Matthew 6:13.

5, 6. Wanem nao “sik” wea kosim wei for “safa,” bat why nao pipol bilong Jehovah no foldaon long datwan?

⁵ Man wea raetem psalm storyim “olketa sik wea mekem iu safa.” Olsem wanfala nogud bigfala sik, wanfala samting nao kosim “safa” for olketa man and for pipol wea saportim olmaeti rul bilong Jehovah. Man wea raetem history, Arnold Toynbee raet olsem: “Start long end bilong World War II, wei for mekhae long kantri hem mekem planti niu independent kantri kamap . . . Tingting bilong olketa man distaem hem barava divaedem pipol.”

⁶ Insaed olketa year wea go pas, samfala ruler mekem moa big wei for divaed evriwea long world. Olketa askem tu pipol for givim honor long olketa or long samfala image or saen. Bat Jehovah nating letem faithful pipol bilong hem foldaon long kaen “sik” olsem. (Daniel 3:1, 2, 20-27; 6:7-10, 16-22) Olsem wanfala loving famili evriwea long world, iumi worshipim Jehovah nomoa, keepim wei for no teksaed wea followim Scripture, and luksavve evribit hao “long evri nation man wea fraet long [God] and duim raeteous fasin nao hem acceptim.” (Acts 10:34, 35; Exodus 20:4-6; John 13:34, 35; 17:16; 1 Peter 5:8, 9) Nomata iumi “safa” taem iumi kasem persecution olsem olketa Christian, iumi hapi and stap sef long spiritual wei “insaed secret ples bilong Most Hae.”

7. Hao nao Jehovah protectim iumi “witim wing bilong hem”?

⁷ From iumi garem Jehovah olsem sef ples bilong iumi, iumi kasem comfort from olketa toktok hia: “Witim wing bilong hem bae hem kavarem iu, and andanit long wing bilong hem bae iu stap sef. Trufala fasin bilong hem bae kamap olsem bigfala shield and strongfala wall.” (Psalm 91:4) God protectim iumi, olsem dadi or mami bird hem protectim olketa pikinini bilong hem. (Isaiah 31:5) ‘Witim wing bilong hem bae hem kavarem iumi.’ Wanfala bird hem kavarem olketa young wan bilong hem witim wing bilong hem, hem protectim olketa from nara animal wea maet kaikaim olketa. Olsem olketa baby bird, iumi stap sef anda long tokpiksa wing bilong Jehovah bikos iumi go insaed trufala Christian organization bilong hem.—Ruth 2:12; Psalm 5:1, 11.

8. Hao nao “trufala fasin” bilong Jehovah hem wanfala bigfala shield and strongfala wall?

⁸ Iumi trust long “trufala fasin,” or faithful fasin. Hem olsem wanfala bigfala shield bilong taem bifor, wea planti taem garem sheip olsem door and fit for kavarem full body bilong man. (Psalm 5:12) Wei for trustim protection olsem hem mekem iumi no fraet. (Genesis 15:1; Psalm 84:11) Olsem faith bilong iumi, trufala fasin bilong God hem wanfala bigfala shield wea protectim iumi from olketa spia bilong fire bilong Satan and nogud samting wea olketa enemy duim. (Ephesians 6:16) Hem wanfala strongfala wall tu, wanfala big hip graon wea iumi savve stand strong bihaenem.

‘Iumi Bae No Fraet’

9. Why nao naetaem hem savve wanfala taem wea man fraetem, bat why nao iumi no fraet?

⁹ Bikos long protection bilong God, man wea raetem psalm sei olsem: “Iu bae no fraetem eni nogud samting long naet, or arrow wea flae long daytaem, or nogud sik wea gogo raon long darkness, or wei for distroe wea spoelem samting long midol day.” (Psalm 91:5, 6) From pipol savve duim planti nogud samting long taem wea hem dark, naetaem hem savve wanfala taem wea man fraetem. Insaed spiritual darkness wea kavarem earth distaem, olketa enemy bilong iumi planti taem duim haed samting for trae spoelem spiritual fasin bilong iumi and stopem preaching waka bilong iumi. Bat ‘iumi no fraetem eni nogud samting long naet’ bikos Jehovah protectim iumi.—Psalm 64:1, 2; 121:4; Isaiah 60:2.

10. (a) Wanem nao maet “arrow wea flae long daytaem” hem minim, and wanem nao iumi duim taem iumi kasem datwan? (b) Wanem nao “nogud sik wea gogo raon long darkness,” and why nao iumi no fraetem?

¹⁰ “Arrow wea flae long daytaem” maet minim toktok for spoelem man. (Psalm 64:3-5; 94:20) Taem iumi no givap for talemaot trufala information, kaen wei olsem for againstim holy service bilong iumi hem iusles. And tu, iumi no fraetem “nogud sik wea gogo raon long darkness.” Diswan hem wanfala tokpiksa sik wea kamaot from disfala world wea anda long paoa bilong Satan, and wea barava sik saed long fasin and religion. (1 John 5:19) Hem mekem nogud samting kamap saed long mind and heart, mekem pipol no savve long Jehovah, olketa purpose bilong hem, and olketa loving samting wea hem provaedem. (1 Timothy 6:4) Midolwan long disfala darkness, iumi no fraet, bikos iumi enjoyim bigfala spiritual laet.—Psalm 43:3.

11. Wanem nao happen long olketa wea kasem ‘wei for spoelem samting long midol day’?

¹¹ “Wei for distroe wea spoelem samting long midol day” hem no mekem iumi fraet tu. “Midol day” maet minim savve bilong disfala world. Olketa wea followim tingting bilong world abaotem material samting olketa distroe long spiritual wei. (1 Timothy 6:20, 21) Taem iumi strong for talemaot message bilong Kingdom, iumi no fraetem eni enemy, bikos Jehovah Protectim iumi.—Psalm 64:1; Proverbs 3:25, 26.

12. Planti thousand “foldaon” long saed bilong hu nao, and long wanem wei?

¹² Man wea raetem psalm go ahed for sei: “Wan thousand bae foldaon long saed bilong iu and ten thousand long raet hand bilong iu; hem bae no kam klosap long iu. Eye bilong iu nomoa bae iu lukluk go and lukim panis bilong olketa wicked wan.” (Psalm 91:7, 8) Bikos olketa fail for mekem Jehovah sef ples bilong olketa, planti “foldaon” long spiritual wei long ‘saed bilong iumi.’ Hem olsem “ten thousand” foldaon long “raet hand” bilong olketa spiritual Israelite bilong distaem. (Galatians 6:16) Bat nomata iumi olketa anointed Christian or olketa fren bilong olketa wea dedicate, iumi stap sef insaed “secret ples” bilong God. Iumi ‘lukluk go and lukim panis bilong olketa wicked wan,’ wea kasem trabol saed long bisnis, religion, and nara wei.—Galatians 6:7.

‘No Eni Trabol Bae Kasem Iumi’

13. Wanem nao olketa trabol wea no kasem iumi, and why nao olsem?

¹³ Nomata sef living bilong disfala world hem brekdaon, iumi putim God firstaem and kasem encouragement from toktok bilong man for raetem psalm: “From iu sei: ‘Jehovah hem sef ples bilong mi,’ iu mekem Most Hae seleva hem ples bilong iu for stap; no eni trabol bae kasem iu, and no eni samting for spoelem iu bae go klosap long tent bilong iu.” (Psalm 91:9, 10) Tru nao, Jehovah hem sef ples bilong iumi. And tu, iumi mekem Most Hae God ‘ples bilong iumi for stap,’ ples wea iumi stap sef. Iumi praisem Jehovah olsem Sovereign bilong Universe, ‘stap’ long hem olsem datwan wea keepim iumi sef, and talemaot gud nius abaotem Kingdom bilong hem. (Matthew 24:14) So, ‘no eni trabol bae kasem iumi’—no eni trabol wea disfala psalm storyim finis. Nomata taem iumi kasem olketa trabol olsem earthquake, cyclone, flood, bigfala hangre, and nogud samting bilong war, olketa samting hia no distroem faith bilong iumi or sef spiritual ples bilong iumi.

14. Olsem olketa servant bilong Jehovah, why nao olketa nogud trabol no kasem iumi?

¹⁴ Olketa anointed Christian olsem olketa stranger wea stap insaed olketa tent wea stap separate from disfala system. (1 Peter 2:11) ‘No eni samting for spoelem olketa bae go klosap long tent bilong olketa.’ Nomata iumi hope for stap long heven or long earth, iumi no part bilong world, and olketa nogud trabol bilong hem no affectim iumi olsem dirty fasin, wei for lovem tumas material samting, giaman religion, and wei for worshipim “wild animal” and “image” bilong hem, United Nations.—Revelation 9:20, 21; 13:1-18; John 17:16.

15. Long wanem wei nao iumi kasem help bilong olketa angel?

¹⁵ Taem hem storyim protection wea iumi kasem, man wea raetem psalm sei moa: “Hem [Jehovah] bae givim olketa angel bilong hem wanfala komand for saed bilong iu, for protectim iu long evri wei bilong iu. Olketa bae karem iu long hand bilong olketa, mekem leg bilong iu no banga long eni ston.” (Psalms 91:11, 12) Olketa angel kasem paoa for protectim iumi. (2 Kings 6:17; Psalm 34:7-9; 104:4; Matthew 26:53; Luke 1:19) Olketa protectim iumi ‘long evri wei bilong iumi.’ (Matthew 18:10) Iumi kasem lead and protection bilong olketa angel taem iumi talemaot Kingdom and no stambol long spiritual wei. (Revelation 14:6, 7) Nomata ‘olketa ston’ olsem taem olketa tambuim waka bilong iumi no mekem iumi foldaon and mekem God no appruvim iumi.

16. Hao nao attak bilong “young lion” and “cobra” hem difren, and wanem nao iumi duim taem tufala attak?

¹⁶ Man wea raetem psalm go ahed for sei: “Antap long young lion and cobra iu bae wakabaot; iu bae step antap long young lion and bigfala snek.” (Psalms 91:13) Olsem wanfala young lion hem attak stret, samfala enemy bilong iumi showimaot long pablik wei wea olketa againstim iumi taem olketa putim olketa law for stopem preaching waka bilong iumi. Bat tu, olketa attak wea iumi seke long hem, hem olsem wanfala cobra wea baetem man from ples wea haed. Samfala taem olketa bigman bilong church attakim iumi haed thru long pipol wea mekem law, olketa judge, and nara pipol. Bat witim saport bilong Jehovah and long peace, iumi lukaotem justice long olketa kot, long wei for “defendim and iusim law for protectim gud nius.”—Philippians 1:7; Psalm 94:14, 20-22.

17. Hao nao iumi step antap long “young lion”?

¹⁷ Man wea raetem psalm hem storyim wei for step antap long “young lion and bigfala snek.” Wanfala young lion savve raf fogud, and bigfala snek hem big fogud. (Isaiah 31:4) Nomata hao raf nao datfala young lion taem hem attak stret, long tokpiksa wei iumi step antap long hem taem iumi obeyim God and no olketa man or organization wea olsem lion. (Acts 5:29) So, datfala “lion” wea maet spoelem iumi hem no mekem iumi garekil long spiritual wei.

18. “Datfala bigfala snek” maet mekem iumi tingim hu nao, and wanem nao iumi need for duim sapos hem attakim iumi?

¹⁸ Insaed Greek Septuagint, datfala “bigfala snek” olketa transleitim olsem “wanfala dragon.” Diswan maet mekem iumi tingim “datfala bigfala dragon . . . , datfala firstfala snek, datwan wea olketa kolem Devil and Satan.” (Revelation 12:7-9; Genesis 3:15) Hem olsem wanfala bigfala animal wea savve smasem and swallowim samting hem attakim. (Jeremiah 51:34) Taem Satan trae for trapim iumi, smasem iumi witim olketa hevi bilong disfala world, and swallowim iumi, iumi mas mekem iumiseleva kamap free and step antap long datfala “bigfala snek.” (1 Peter 5:8) Datfala anointed remnant mas duim diswan sapos olketa want for share for fulfillim Romans 16:20.

Jehovah—Givim Salvation for Iumi

19. Why nao iumi ran go long Jehovah olsem sef ples?

¹⁹ Man wea raetem psalm talemaot toktok bilong God for man wea worship long trufala wei: “From hem lovem mi, mi bae sevem hem. Mi bae protectim hem bikos hem savve long nem bilong mi.” (Psalm 91:14) Datfala toktok “mi bae protectim hem” really minim, “mi bae putim hem long hae ples,” wea hard for kasem. Olsem olketa wea worshipim Jehovah, hem kamap olsem sef ples bilong iumi bikos ‘iumi lovem hem.’ (Mark 12:29, 30; 1 John 4:19) From datwan, God ‘provaedem ples for ranawe’ from olketa enemy bilong iumi. Hem bae nating distroem iumi. Bat, iumi bae sev bikos iumi savve long nem bilong God and singaot long hem long faith. (Romans 10:11-13) And iumi disaed strong for ‘wakabaot long nem bilong Jehovah for olowe.’—Micah 4:5; Isaiah 43:10-12.

20. Long end bilong Psalm 91, wanem nao Jehovah promisim for faithful servant bilong hem?

²⁰ Psalm 91 hem finis witim disfala toktok bilong Jehovah abaotem faithful servant bilong hem: “Hem bae singaot long mi, and mi bae ansarem hem. Mi bae stap witim hem long taem bilong trabol. Mi bae sevem hem and givim hem glory. Mi bae mekem hem stap for longfala taem, and hem bae lukim hao mi nao sevem hem.” (Psalm 91:15, 16) Taem iumi singaot long Jehovah insaed prea wea fitim will bilong hem, hem ansarem iumi. (1 John 5:13-15) Iumi kasem finis staka hard taem from wei wea Satan muvim pipol for againstim iumi. Bat datfala toktok “mi bae stap witim hem long taem bilong trabol” hem redyim iumi for moa test wea bae kamap long future and mekem iumi sure hao God bae strongim iumi taem disfala wicked system hem distroe.

21. Hao nao anointed sekson kasem glory finis?

²¹ Nomata attak bilong Satan hem big fogud, full sekson bilong olketa anointed wan midolwan iumi bae kasem glory long heven long taem Jehovah markem—bihaen “longfala taem” long earth. Tru nao, wei wea God sevem olketa anointed wan hem mekem olketa kasem spiritual glory. And hem bigfala honor for leadim olketa Witness bilong Jehovah long earth insaed olketa last day distaem! (Isaiah 43:10-12) Bigfala wei wea Jehovah sevem pipol bilong hem bae happen long bigfala war bilong Armageddon taem hem vindicatem olmaeti rul bilong hem and mekhae long holy nem bilong hem.—Psalm 83:18; Ezekiel 38:23; Revelation 16:14, 16.

22. Hu nao bae ‘lukim salvation from Jehovah’?

²² Nomata iumi anointed Christian or fren bilong olketa wea dedicate, iumi luk go long God for salvation. Long taem bilong “bigfala day bilong Jehovah wea fit for mekem man fraet,” olketa wea loyal for servem God bae sev. (Joel 2:30-32) Iumi wea part long “big crowd” wea bae laef go insaed long niu world bilong God and wea stap faithful long lastfala test bae ‘stap for longfala taem’—laef wea no savve finis. Hem bae resurrectim planti million tu. (Revelation 7:9; 20:7-15) Jehovah bae hapi tumas for ‘mekem iumi lukim salvation’ thru long Jesus Christ. (Psalm 3:8) From iumi garem olketa nambawan hope front long iumi, iumi shud go ahed for lukluk long God for help long wei for kaontem olketa day bilong iumi for givim glory long hem. Long toktok and samting iumi duim, iumi go ahed for pruvim hao Jehovah hem sef ples bilong iumi.

[Footnote]

Hao Nao Bae Iu Ansa?

• Wanem nao “secret ples bilong Most Hae”?

• Why nao iumi no fraet?

• Hao nao ‘no eni trabol bae kasem iumi’?

• Why nao iumi savve sei Jehovah hem salvation bilong iumi?

[Piksa long page 17]

Waswe, iu savve long wanem wei nao trufala fasin bilong Jehovah hem bigfala shield for iumi?

[Olketa Piksa long page 18]

Jehovah helpem olketa servant bilong hem for duim ministry bilong olketa nomata olketa kasem wei for againstim olketa and attak

[Credit Line]

Cobra: A. N. Jagannatha Rao, Trustee, Madras Snake Park Trust