Olketa Elder Trainim Narawan for Karem Lod

LONG olketa kongregeson bilong Olketa Jehovah’s Witness evriwea long world, bigfala need stap for olketa man wea fit for serve olsem overseer. Thrifala main reason nao stap for diswan.

First reason, Jehovah hem go ahed for fulfillim promis bilong hem for mekem “wan wea no mas big bae kamap wanfala maeti nation.” (Isaiah 60:22) Thru long kaeness bilong hem wea man no fit for kasem, klosap wan million niu disaepol baptaes olsem Olketa Jehovah’s Witness insaed thrifala year wea go pas. Need hem stap for olketa man wea fit for helpem olketa niu wan hia muv ahed for kamap mature Christian.—Hebrews 6:1.

Mek-tu, samfala wea serve olsem olketa elder for planti year finis mas kat daon long waka insaed kongregeson from olketa olo or maet from olketa garem problem saed long health.

Mek-thri, planti strong Christian elder distaem serve olsem member bilong wanfala Hospital Liaison Komiti, Regional Building Komiti, or Assembly Hall Komiti. Samfala faendem hao olketa mas finis for lukaftarem samfala responsibility long kongregeson for mekem laef bilong olketa moa balance.

Hao nao for kasem bigfala need for samfala moa wea fit? Training nao important. Bible encouragem olketa Christian overseer for trainim olketa “faithful man, wea, bihaen, olketa bae fit for teachim olketa narawan.” (2 Timothy 2:2) Datfala toktok “for train” minim for teachim samwan mekem hem kamap fit, kasem mark, and savve gud. Bae iumi lukim hao olketa elder savve trainim olketa nara man wea fit.

Followim Example Bilong Jehovah

Jesus Christ hem barava fit, kasem mark, and savve gud long waka bilong hem—and iumi no sapraes long datwan! Jehovah God seleva trainim hem. Wanem nao mekem disfala training program barava win? Jesus talem thrifala samting, olsem record long John 5:20 hem talem: “Father hem [1] lovem son and [2] showim hem evri samting wea hem duim, and hem bae showim hem [3] olketa waka wea moa big winim diswan.” Wei for lukluk gud long each wan long olketa samting hia bae helpem iumi for minim gud disfala subject abaotem training.

Tingim hao firstaem Jesus hem sei: “Father hem lovem Son.” Start kam from creation, Jehovah and Son bilong hem barava fren gud long klos wei. Proverbs 8:30 helpem iumi for minim datfala wei for fren: “Then mi [Jesus] stap witim hem [Jehovah God] olsem nambawan wakman, and mi nao datwan wea hem laekem tumas evriday, mi hapi for stap front long hem evritaem.” No eni daot stap long mind bilong Jesus hao Jehovah ‘laekem hem tumas.’ And Jesus nating haedem hapi wea hem feelim taem hem waka witim Father bilong hem. Hem barava gud tumas taem wanfala loving wei for fren hem stap midolwan olketa Christian elder and olketa wea olketa trainim!

Mek-tu samting wea Jesus talem hem hao Father “showim hem evri samting wea hem duim.” Toktok hia strongim wanem Proverbs 8:30 hem talem, hem nao, wei wea Jesus “stap witim” Jehovah taem hem go ahed for creatim universe. (Genesis 1:26) Olketa elder savve followim datfala nambawan example taem olketa waka klos witim olketa ministerial servant, and showim olketa hao for duim waka bilong olketa long gudfala wei. Bat, no olketa niufala ministerial servant nomoa evritaem needim training. Waswe long olketa faithful brata wea reach aot for waka bilong overseer for planti year finis bat wea no kasem appointment? (1 Timothy 3:1) Olketa elder shud givim kliafala kaonsel long olketa man olsem mekem olketa savve wanem nao for waka long hem.

Olsem example, wanfala ministerial servant maet man wea fit for trustim, followim taem, and duim waka bilong hem long gudfala wei. Maet hem teach long gudfala wei tu. Long planti wei hem maet duim barava nambawan waka insaed kongregeson. Bat maet hem nating luksavve hao hem savve lelebet raf long wei wea hem deal witim olketa narafala Christian. Olketa elder need for showimaot “kwaet fasin wea bilong wisdom.” (James 3:13) Hem bae helpem datfala ministerial servant for wanfala elder story witim hem and talem klia datfala problem, givim hem olketa kliafala example, and givim samfala idea for helpem hem kamap moabeta. Sapos long careful wei elder hem givim ‘kaonsel bilong hem witim salt,’ iumi sure hao datfala brata bae hapi for kasem datfala kaonsel. (Colossians 4:6) Tru nao, datfala ministerial servant bae mekem hem moa isi for datfala elder givim kaonsel long hem sapos hem willing for herem and acceptim.—Psalm 141:5.

Long samfala kongregeson, olketa elder go ahed for givim gudfala training long olketa ministerial servant. Olsem example, olketa tekem olketa ministerial servant wea fit taem olketa visitim olketa wea sik or olo. Long disfala wei olketa ministerial servant kasem experience long shepherding waka. Bat, staka samting stap wea wanfala ministerial servant savve duim for muv ahed long spiritual wei.—Lukim box long daon wea garem title “Samting wea Olketa Ministerial Servant Savve Duim.”

Mek-thri samting wea mekem training bilong Jesus hem barava gud hem wei wea Jehovah trainim hem witim goal for future. Jesus talem hao Father bae showim Son “olketa waka wea moa big winim diswan.” Savve wea Jesus kasem taem hem stap long earth helpem hem for mekem grow olketa fasin wea hem bae needim for duim olketa assignment long future. (Hebrews 4:15; 5:8, 9) Olsem example, klosap nao Jesus bae kasem wanfala barava important assignment—hem nao for resurrectim and judgem planti billion pipol wea dae finis!—John 5:21, 22.

Taem olketa elder trainim olketa ministerial servant, olketa shud tingim olketa need long future. Nomata luk olsem inaf elder and ministerial stap for lukaftarem olketa need distaem, waswe, bae hem inaf sapos wanfala niu kongregeson kamap? Waswe, sapos tu-thri niu kongregeson hem start. Insaed long thrifala year wea go pas, winim 6,000 niu kongregeson stap evriwea long world. Diswan needim barava bigfala namba bilong olketa elder and ministerial servant for kea for olketa niu kongregeson hia!

Olketa elder, waswe, iufala followim example bilong Jehovah long wei for mekem grow wei for fren gud witim olketa man wea iu trainim? Iu showim olketa hao for duim waka bilong olketa? Iu tingim need long future? Planti pipol bae kasem olketa richfala blessing sapos iumi followim example bilong wei wea Jehovah trainim Jesus.

No Fraet for Givim Responsibility

Olketa elder wea getius for garem planti important responsibility maet hol bak for givim samfala waka hia long narawan. Maet olketa bin trae for duim, bat brata wea olketa givim waka long hem no duim long gudfala wei. So maet olketa garem tingting olsem, ‘Sapos mi laekem disfala waka for win, miseleva nao mas duim.’ Bat waswe, tingting olsem fitim will bilong Jehovah, wea showaot insaed Bible, hao olketa man wea no savve gud shud kasem training from olketa wea garem moa savve?—2 Timothy 2:2.

Aposol Paul feel nogud taem wanfala long olketa wea travel witim hem, John Mark, hem lusim assignment bilong hem long Pamphylia and go bak hom. (Acts 15:38, 39) Nomata olsem, Paul no letem datwan mekem hem feel wikdaon and no trainim olketa narawan. Hem chusim narafala young brata, Timothy, and trainim hem for duim missionary waka.a (Acts 16:1-3) Wei wea pipol long Beroea barava againstim olketa missionary, mekem hem hard tumas for Paul stap long there. So hem markem Silas, wanfala mature brata wea olo, and Timothy, for lukaftarem datfala niu kongregeson. (Acts 17:13-15) Iumi sure hao Timothy lanem staka samting from Silas. Bihaen, taem Timothy hem redy for kasem moa responsibility, Paul sendem hem long Thessalonica for encouragem kongregeson long there.—1 Thessalonians 3:1-3.

Wei wea Paul and Timothy waka tugeta hem no olsem wei for duim bisnis. Tufala barava fren gud tugeta. Taem hem raet go long kongregeson long Corinth, Paul tok abaotem Timothy, wea hem plan for sendem hem long there, olsem “pikinini wea hem lovem and wea faithful insaed long Lord.” Hem sei moa: “[Timothy] bae talem iufala olketa wei bilong mi saed long Christ Jesus.” (1 Corinthians 4:17) Timothy acceptim training wea hem kasem from Paul, and hem kamap fit for duim olketa assignment bilong hem. Planti young brata gogo kamap ministerial servant wea savve, elder, or maet traveling overseer from olketa kasem gudfala training from olketa older man wea interest for helpem olketa, olsem Paul hem duim long Timothy.

Olketa Elder, Trainim Narawan!

No eni daot stap hao profesi long Isaiah 60:22 hem go ahed for fulfill distaem. Jehovah mekem “wan wea no mas big kamap wanfala maeti nation.” For nation hia go ahed for stap “maeti,” hem mas organize gud. Olketa elder, bae hem gud for iufala tingim olketa wei wea iu savve givim extra training long olketa brata wea fit for kasem. Mek sure each ministerial servant hem savve wanem hem need for duim for muv ahed. And iufala brata wea baptaes, iusim gud eni help wea iu kasem for kamap moabeta. Iusim gud olketa chance for kasem moa savve. Bae Jehovah barava blessim kaen loving program olsem for givim training.—Isaiah 61:5.

[Footnote]

[Box long page 30]

Wanem Olketa Ministerial Servant Savve Duim

Nomata olketa elder shud trainim olketa ministerial servant, olketa ministerial servant savve duim planti samting for helpem olketa seleva for muv ahed long spiritual wei.

—Olketa Ministerial servant shud waka hard for duim assignment bilong olketa long gudfala wei. Olketa mas man wea evritaem duim study. Long bigfala wei, wei wea man muv ahed hem depend long study and wei wea hem followim samting hem lanem.

—Taem wanfala ministerial servant prepare for givim tok long wanfala Christian meeting, hem shud no hol bak for askem wanfala elder wea fit for helpem hem redyim datfala information.

—And tu, ministerial servant savve askem wanfala elder for lukluk gud long hao hem givim tok bilong hem and for givim hem kaonsel long hao for kamap moabeta.

Olketa ministerial servant shud lukaotem, acceptim, and followim kaonsel from olketa elder. Long disfala wei, wei wea olketa muv ahed bae “showaot klia long evriwan.”—1 Timothy 4:15.