Olketa Principle Bilong God Savve Helpem Iu

MASBI iu luksavve finis hao olketa animal followim nomoa wei bilong olketa. Olketa wakem staka machine for followim instruction. Bat God wakem olketa man for followim olketa principle. Hao nao iu savve sure long diswan? Well, Jehovah, Man Wea Startim evri raeteous principle, hem talem taem hem wakem first man and woman: “Letem iumi wakem man long image bilong iumi, long wei wea olsem iumi.” Disfala Creator hem wanfala spirit; hem no garem physical body olsem iumi, so iumi “image” bilong hem long wei wea iumi savve showimaot olketa fasin bilong hem. Olketa man fit for mekem laef bilong olketa for followim olketa principle, hem nao, wanem olketa seleva markem olsem stretfala fasin. Jehovah raetem staka long olketa principle hia insaed Word bilong hem.—Genesis 1:26; John 4:24; 17:17.

‘Bat Bible garem staka handred principle,’ samwan maet sei. ‘Hem hard tumas for mi savve long evriwan long olketa.’ Hem tru. Bat tingim disfala tru samting: Evri principle bilong God hem gud, bat samfala moa important winim narawan. Iu savve lukim diswan long Matthew 22:37-39, wea Jesus showimaot hao, midolwan olketa komandment long Law Bilong Moses and olketa principle wea join witim, samfala moa important winim narawan.

Olketa wanem principle nao moa important? Olketa main principle bilong Bible hem olketa wea barava affectim wei wea iumi fren witim Jehovah. Sapos iumi followim olketa principle hia, Creator bae kamap main paoa wea affectim compass bilong iumi saed long fasin. Witim diswan, olketa principle wea affectim wei wea iumi fren witim nara pipol tu stap. For followim olketa hia bae helpem iumi for stand strong againstim wei for mista-mi.

Bae iumi start witim wanfala barava important truth insaed Bible. Wanem nao datfala truth, and hao nao hem affectim iumi?

“Most Hae Ovarem Full Earth”

Olketa Holy Scripture talem klia hao Jehovah hem Nambawan Creator bilong iumi, God Olmaeti. No eniwan semsem olsem hem or tekem ples bilong hem. Diswan hem wanfala key truth insaed long Bible.—Genesis 17:1; Ecclesiastes 12:1.

Wanfala long olketa wea raetem buk bilong Psalms sei olsem abaotem Jehovah: “Iu nomoa Most Hae ovarem full earth.” King David bilong bifor hem sei: “Bilong iu nao kingdom, O Jehovah, Datwan wea liftim iuseleva hae olsem hed ovarem evri samting.” And datfala profet Jeremiah hem raet: “No eniwan olsem iu long eni wei, O Jehovah. Iu nambawan, and nem bilong iu hem maeti long bigfala wei.”—Psalm 83:18; 1 Chronicles 29:11; Jeremiah 10:6.

Hao nao iumi shud followim olketa truth olsem abaotem God long living evriday?

Hem klia hu nao shud important long living bilong iumi—Creator and man wea Givim Laef long iumi. So waswe, hem fitim for againstim wei for laek main man—wanfala wei wea maet moa strong long samfala winim narawan? Wanfala wise principle for leadim iumi hem for “duim evri samting for glory bilong God.” (1 Corinthians 10:31) Profet Daniel showim gud example long diswan.

History showim hao King Nebuchadnezzar bilong Babylon wantaem wari long wanfala dream and givim komand for olketa minim dream bilong hem. Evri narawan olketa no savve, bat Daniel minim stret long king dream bilong hem. Waswe, Daniel tek praise for diswan? Nomoa, hem givim glory long “God wea stap long heven wea hem nao Man for Showimaot olketa secret.” Daniel go ahed for sei: “Hem no thru long eni wisdom wea stap long mi wea ovarem eni narawan wea laef nao disfala secret showaot long mi.” Daniel hem man wea followim principle. Dastawe iumi no sapraes hao buk bilong Daniel storyim hem thrifala taem olsem samwan wea “barava spesol” long eye bilong God.—Daniel 2:28, 30; 9:23; 10:11, 19.

Iu bae kasem gud samting taem iu followim Daniel. For followim example bilong Daniel, samting wea disaedem sapos iu bae win hem wanem nao muvim iumi. Hu nao shud kasem honor for wanem iu duim? Nomata wanem kamap, iu savve duim samting followim disfala barava important Bible principle—Jehovah hem Sovereign Lord. Wei wea iu duim olsem bae mekem iu “barava spesol” long eye bilong hem.

Distaem bae iumi ting raonem tufala main principle wea iumi savve followim saed long wei for fren midolwan olketa man. From evriwea pipol go ahed for mekhae tumas long seleva, wei for fren midolwan olketa man hem barava bigfala challenge.

“Witim Hambol Mind”

Olketa wea putim olketa seleva firstaem savve hard for satisfae. Staka long olketa laekem laef wea moabeta, and olketa laekem distaem nao. Long olketa, hambol fasin hem wiki. Olketa tingim patient fasin olsem samting wea difren man nomoa fit for showimaot. Olketa willing for duim eni samting for kasem bignem. Waswe, iu ting eni wei moa stap for iu followim wea difren from diswan?

Olketa servant bilong God feisim kaen wei olsem evriday, bat hem shud no affectim olketa. Olketa mature Christian acceptim principle hao hem “no wan wea praisem hemseleva nao olketa appruvim, bat man wea Jehovah nao praisem.”—2 Corinthians 10:18.

Wei for followim principle long Philippians 2:3, 4 bae help. Disfala scripture encouragem iu for “no duim eni samting thru long wei for raoa or for tinghae long seleva, bat witim hambol mind tingim narafala pipol olsem hae winim iufala.” Long wei olsem iu bae ‘no interest long olketa samting bilong iuseleva nomoa, bat interest long olketa samting bilong narafala pipol tu.’

Samwan witim stretfala tingting abaotem hemseleva and wea talem balance tingting abaotem hemseleva hem Gideon, wanfala judge midolwan olketa Hebrew bifor. Hem nating trae for kamap leader bilong Israel. Bat, taem olketa markem hem for datfala waka, Gideon talemaot wei wea hem no fit. Hem sei: “Thousand man bilong mi nao barava smol long Manasseh, and mi nao barava smol wan long haos bilong dadi bilong mi.”—Judges 6:12-16.

And tu, bihaen Jehovah mekem Gideon win, olketa man bilong Ephraim laek raoa witim hem. Wanem nao Gideon duim? Waswe, disfala win mekem hem praod long hemseleva? Nomoa. Hem missim trabol long wei for ansa long kwaet wei. “Markem samting wea iufala duim, wanem nao mi duim?” Gideon garem hambol tingting.—Judges 8:1-3.

Hem tru, olketa samting wea happen long Gideon happen longtaem bifor. Nomata olsem, wei for ting raonem story hia savve helpem iumi. Iu savve lukim hao, from Gideon live followim tingting wea barava difren from kaen tingting wea big distaem, hem kasem gud samting.

Kaen tingting distaem for mekhae long seleva hem savve giamanim wei wea iumi ting long iumiseleva. Olketa Bible principle savve stretem diskaen rong tingting, wea teachim iumi trufala position bilong iumi front long Creator and nara pipol.

Thru long wei for followim olketa Bible principle, iumi winim wei for mista-mi wea big distaem. Olketa feeling bae no bossim iumi. Taem iumi lane moa abaotem olketa raeteous principle, bae iumi savve gud moa long wan wea Startim olketa. Yes, hem barava gud samting for lukluk gud long olketa principle bilong God taem iumi readim Bible. —Lukim box.

Jehovah wakem olketa man moa hae winim olketa animal, wea followim nomoa wei bilong olketa. For followim will bilong God hem minim wei for followim olketa principle bilong hem. Long disfala wei compass bilong iumi saed long fasin savve go ahed for waka gud, wanfala compass wea bae leadim iumi go insaed niu system wea God wakem. Bible givim iumi reason for expectim hao klosap nao niu system bae kamap evriwea long world and “raeteous fasin bae stap” long hem.—2 Peter 3:13.

[Box/Piksa long page 6]

Samfala Bible Principle wea Savve Help

Insaed Famili:

“Letem man go ahed for lukaotem, no gudfala samting for hemseleva, bat for narafala man.”—1 Corinthians 10:24.

“Love . . . no lukaotem samting bilong hemseleva nomoa.”—1 Corinthians 13:4, 5.

“Letem evriwan long iufala wanwan lovem waef bilong hem olsem hemseleva.”—Ephesians 5:33.

“Iufala waef, stap anda long hasband bilong iufala.”—Colossians 3:18.

“Lisin long dadi bilong iu wea mekem iu kamap, and no spoelem mami bilong iu from hem olo distaem.”—Proverbs 23:22.

Long Skul, Waka, or Bisnis:

“Jehovah barava heitim scale wea raverave . . . Wicked man hem mekem false wages.” —Proverbs 11:1, 18.

“Letem man wea steal no steal moa, bat letem hem duim hard waka.”—Ephesians 4:28.

“Sapos eniwan no laek for waka, no letem hem kaikai.”—2 Thessalonians 3:10.

“Nomata wanem iufala duim, duim witim full-soul for Jehovah.”—Colossians 3:23.

“Mifala want for duim evri samting long honest wei.”—Hebrews 13:18.

Wei for Tingim Selen:

“Man wea hariap for kasem riches bae no free from blame olowe.”—Proverbs 28:20.

“Man wea lovem silver bae no satisfae witim silver.”—Ecclesiastes 5:10.

Wei for Lukluk Long Seleva:

“For pipol for aftarem glory bilong olketa seleva, waswe, diswan hem glory?”—Proverbs 25:27.

“Letem wanfala stranger, and no mouth bilong iuseleva, praisem iu.”—Proverbs 27:2.

“Mi talem iufala evriwan for no tinghae tumas long seleva winim wanem hem fitim.”—Romans 12:3.

“Sapos man tingse hem samting taem hem samting nating, hem giamanim mind bilong hemseleva.”—Galatians 6:3.

[Piksa long page 5]

Daniel givim God praise wea Hem fit for kasem

[Piksa long page 7]

For deal witim pipol followim olketa principle bilong God hem mekem grow hapi and gudfala wei for fren midolwan pipol

[Piksa Credit Line long page 7]

U.S. Fish & Wildlife Service, Washington, D.C./Robert Bridges