Deal Witim “Wanfala Nila Long Body”

“Kaeness bilong mi wea man no fit for kasem hem inaf for iu.”—2 CORINTHIANS 12:9.

1, 2. (a) Why nao iumi shud no konfius from iumi feisim olketa test and problem? (b) Why nao iumi savve strong taem iumi feisim olketa test?

“EVRIWAN wea laek for live followim wei for lovem God and join witim Christ Jesus bae kasem persecution tu.” (2 Timothy 3:12) Why nao olsem? Bikos Satan sei selfish reason nao muvim man for servem God, and hem laek tumas for pruvim diswan. Wantaem Jesus talem disfala warning long olketa faithful aposol bilong hem: “Satan hem want for separatem iufala olsem wheat.” (Luke 22:31) Jesus savve gud hao God letem Satan for testim iumi thru long olketa nogud problem. Tru, datwan no minim evri hard samting wea iumi feisim long living hem kam stret from Satan or olketa demon bilong hem. (Ecclesiastes 9:11) Bat, Satan hem strong for iusim eni samting insaed paoa bilong hem for brekem faithful fasin bilong iumi.

² Bible sei iumi shud no konfius long olketa test bilong iumi. Nomata wanem samting kasem iumi, iumi shud no sapraes or tingim olsem samting wea iumi no expectim. (1 Peter 4:12) Tru nao, “semkaen wei for safa hem kasem full sekson bilong olketa brata bilong [iumi] long world.” (1 Peter 5:9) Distaem, Satan hem putim barava bigfala hevi long evri servant bilong God. Devil hapi tumas for lukim iumi safa from planti problem wea olsem nila. For duim datwan, hem iusim system bilong hem for joinim or mekem moa big eni ‘nila insaed body bilong iumi.’ (2 Corinthians 12:7) Nomata olsem, olketa attak bilong Satan no need for brekem faithful fasin bilong iumi. Long sem wei wea Jehovah bae “openem wei” for iumi stand strong long test, bae hem duim olsem tu taem iumi feisim olketa problem wea olsem nila long body.—1 Corinthians 10:13.

Hao for Deal Witim Nila

3. Wanem nao ansa bilong Jehovah taem Paul askem hem for aotem datfala nila from body bilong hem?

³ Aposol Paul askem God for aotem datfala nila from body bilong hem. “Thrifala taem nao mi askem Lord for tekaotem disfala samting from mi.” Wanem nao ansa bilong Jehovah for samting wea Paul askem? “Kaeness bilong mi wea man no fit for kasem hem inaf for iu; bikos paoa bilong mi kamap perfect long man wea wik.” (2 Corinthians 12:8, 9) Bae iumi lukluk long disfala ansa and lukim hao hem savve helpem iumi for deal witim eni problem wea olsem nila wea givim iumi pain.

4. Wanem nao olketa wei wea Paul kasem gudfala samting from kaenfala fasin bilong Jehovah wea man no fit for kasem?

⁴ Lukim wei wea God encouragem Paul for tinghae long kaeness wea man no fit for kasem wea hem kasem finis thru long Christ. Tru nao, Paul kasem blessing long planti wei. Nomata hem strong for againstim olketa follower bilong Jesus, long loving wei Jehovah givim hem privilege for olsem wanfala disaepol. (Acts 7:58; 8:3; 9:1-4) From datwan, Jehovah kaen tumas for givim Paul planti barava spesol assignment and privilege. Leson hem klia for iumi. Nomata living barava hard, iumi still garem planti blessing wea iumi savve sei thankiu for olketa. Iumi shud nating letem olketa test mekem iumi forgetim gudfala fasin bilong Jehovah hem big tumas.—Psalm 31:19.

5, 6. (a) Hao nao Jehovah teachim Paul hao paoa bilong God hem “kamap perfect long man wea wik”? (b) Hao nao example bilong Paul pruvim Satan hem man for laea?

⁵ Kaeness bilong Jehovah wea man no fit for kasem hem inaf long narafala wei. Paoa bilong God hem barava inaf for helpem iumi go thru olketa test bilong iumi. (Ephesians 3:20) Jehovah teachim Paul hao paoa bilong God hem “kamap perfect long man wea wik.” Hao nao olsem? Long loving wei hem givim Paul evri strong wea hem needim for deal witim test bilong hem. From diswan, fasin wea Paul showimaot for go ahed strong and wei for trust evribit long Jehovah showim long evriwan hao paoa bilong God hem win long disfala man wea wik and garem sin. Tingim hao diswan hem affectim Devil, wea sei olketa man servem God only taem living hem gud and no garem problem. Faithful fasin bilong Paul hem olsem wei for slapem feis bilong datfala man for tokspoelem man!

⁶ Paul, wea saed witim Satan bifor for faet againstim God, hem wanfala praodfala man for persecutim olketa Christian, hem strongfala Pharisee, wea maet bin enjoyim isi living from hem born insaed rich famili. Bat Paul hem servem Jehovah and Christ olsem man wea “low tumas long olketa aposol.” (1 Corinthians 15:9) From datwan, hem hambol for stap anda long paoa bilong Christian governing body long first century. And hem go ahed strong for faithful nomata hem kasem nila long body. Satan hem kros tumas taem olketa test long living no mekem strong bilong Paul for wikdaon. No enitaem Paul hem forgetim hope for share insaed Kingdom bilong Christ long heven. (2 Timothy 2:12; 4:18) No eni nila, nomata haomas pain datwan givim hem, savve daonem strong bilong hem. Letem strong bilong iumi tu go ahed olsem! Taem hem strongim iumi long olketa test bilong iumi, Jehovah apim iumi thru long privilege for help for pruvim hao Satan hem man for laea.—Proverbs 27:11.

Olketa Samting Jehovah Provaedem Barava Important

7, 8. (a) Thru long wanem nao Jehovah givim paoa long olketa servant bilong hem distaem? (b) Why nao wei for readim Bible evriday and study hem important tumas for deal witim nila long body bilong iumi?

⁷ Distaem, Jehovah givim paoa long olketa faithful Christian thru long holy spirit, Word bilong hem, and olketa Christian brata bilong iumi. Olsem aposol Paul, iumi savve torowem hevi bilong iumi long Jehovah insaed prea. (Psalm 55:22) Nomata God maet no aotem olketa test bilong iumi, hem savve givim iumi wisdom for deal witim olketa, nomata olketa test wea barava hard tumas tu. Jehovah savve givim iumi strong—givim iumi “paoa wea winim wanem iumi garem”—for helpem iumi go ahed strong.—2 Corinthians 4:7.

⁸ Hao nao iumi kasem help olsem? Iumi mas waka hard for studyim Word bilong God, from long there nao iumi bae faendem toktok bilong comfort. (Psalm 94:19) Insaed Bible, iumi readim toktok wea garem feeling bilong olketa servant bilong God taem olketa askem hem for help. Ansa bilong Jehovah, wea planti taem hem toktok bilong comfort, hem samting for iumi ting raonem. Wei for study bae strongim iumi mekem “paoa wea winim wanem iumi garem hem bilong God and no bilong iumiseleva.” Long sem wei wea iumi need for kaikaim physical kaikai evriday for strong, iumi mas kaikaim word bilong God evriday tu. Waswe, iumi duim diswan? Sapos olsem, bae iumi lukim hao from iumi kasem “paoa wea winim wanem iumi garem” datwan nao helpem iumi for go ahed strong nomata wanem kaen tokpiksa nila kasem iumi distaem.

9. Hao nao olketa elder savve saportim olketa wea deal witim olketa problem?

⁹ Olketa Christian elder wea fraet long God savve “kamap olsem wanfala ples for haed from wind” or “wanfala ples for haed from bigfala rain,” wea minim, olketa protectim iumi from olketa wari and problem. Olketa elder wea laek for kamap olsem datfala tokpiksa askem Jehovah long hambol wei for givim olketa “tongue bilong olketa wea lane finis,” mekem olketa bae savve hao for ansarem olketa wea safa witim toktok wea fitim. Toktok bilong olketa elder savve olsem rain wea isisi foldaon wea comfortim spirit bilong iumi long hard taem long living. Taem olketa “tok kaen long olketa soul wea feel sorre,” olketa elder savve barava saportim olketa spiritual brata and sista bilong olketa wea maet feel taed or wiki bikos long nila long body.—Isaiah 32:2; 50:4; 1 Thessalonians 5:14.

10, 11. Hao nao olketa servant bilong God savve encouragem olketa narawan wea kasem hardfala test?

¹⁰ Evri servant bilong Jehovah olketa part long disfala Christian famili wea garem wan mind. Tru nao, iumi “olketa member bilong evriwan wanwan,” and iumi “garem kaon for lovem narawan.” (Romans 12:5; 1 John 4:11) Hao nao iumi peim disfala kaon? Long 1 Peter 3:8, hem sei long wei for “showim feeling long narawan, garem love olsem brata, [and tu] garem fasin for kea,” long olketa wea olsem brata thru long sem faith witim iumi. Iumi evriwan savve givim spesol kea long olketa wea mas deal witim nogud nila long body, nomata olketa young or olo. Long wanem wei?

¹¹ Iumi shud trae for feelim hao olketa safa. Sapos iumi no garem feeling, or no kea, maet nomata iumi no min for duim, iumi mekem wei wea olketa safa kamap moa worse. Wei wea iumi luksavve long olketa test bilong olketa fit for muvim iumi for careful long samting iumi talem, hao iumi talem, and wanem iumi duim. Wei wea iumi luk long gud saed and encouragem olketa savve katem daon pain bilong datfala nila wea kasem olketa. Long wei olsem iumi savve showaot iumi help for strongim olketa.—Colossians 4:11.

Hao Samfala Bin Deal Witim and Win

12-14. (a) Wanem nao wanfala Christian duim for deal witim cancer? (b) Hao nao olketa spiritual brata and sista bilong disfala woman saportim and encouragem hem?

¹² Taem iumi klosap long end bilong olketa last day distaem, olketa “pain bilong trabol” kamap moa big evriday. (Matthew 24:8) So, olketa test bae affectim evriwan long earth, main wan nao olketa faithful servant bilong Jehovah, wea trae for duim will bilong hem. Olsem example, tingim wanfala Christian wea insaed full-taem ministry. Olketa faendem cancer long sista hia so olketa mas katemaot salivary and lymphatic gland bilong hem. Taem hem and hasband herem hem garem disfala sik, tufala stretawe tan long Jehovah thru long strongfala prea. Hem sei tufala feelim barava spesol peace. Nomata olsem, hem mas feisim planti nogud and gud taem especially taem hem deal witim samting wea kamaot from datfala treatment.

¹³ For deal witim diswan, sista hia faendemaot staka information abaotem cancer. Hem askem olketa doctor bilong hem. Insaed Wastaoa, Wekap!, and olketa nara Christian pablikeson, hem faendem samfala laef story abaot hao difren wan deal witim sik hia saed long feeling. Hem readim tu olketa Bible scripture wea showimaot wei wea Jehovah saportim pipol bilong hem long hard taem, and olketa nara gudfala information.

¹⁴ Wanfala article wea storyim wei for deal witim sorre feeling hem talem disfala wise toktok: “Man wea stap seleva bae lukaotem selfish feeling bilong hemseleva.” (Proverbs 18:1) Datfala article givim disfala advaes: “No stap seleva.”a Sista hia hem sei: “Planti talem mi hao olketa prea for mi; olketa narawan ringim mi. Tufala elder visit planti taem for faendaot hao nao mi. Pipol givim mi olketa flaoa and planti card. Samfala redyim kaikai tu. And tu, planti volunteer for tekem mi go for kasem treatment.”

15-17. (a) Hao nao wanfala Christian deal witim olketa hard samting wea kamaot from accident? (b) Wanem saport nao olketa insaed kongregeson givim?

¹⁵ Wanfala woman wea servem Jehovah for longtaem long New Mexico, U.S.A., hem insaed long tufala trak accident. Nek and shoulder bilong hem garekil, and diswan mekem big go moa sik wea hem bin garem for winim 25 year saed long olketa join long body. Hem sei: “Nek bilong mi no strong and mi hard tumas for karem eni samting wea hevi winim 2 kilogram. Bat wei for prea strong long Jehovah hem barava helpem mi. And tu olketa article insaed Wastaoa wea iumi bin studyim. Wanfala study wea abaotem Micah 6:8 storyim hao wei for hambol for wakabaot witim God hem minim for savve long wanem iu no fit for duim. Diswan helpem mi for luksavve hao nomata wanem kasem mi, mi shud no feel wikdaon, nomata mi no spendem tumas taem long ministry olsem mi laekem. For servem hem from stretfala samting muvim iu nao hem important samting.”

¹⁶ Sista hia sei tu: “Olketa elder evritaem praisem mi taem mi duim best for attendim olketa meeting and go aot long field ministry. Olketa young wan savve kam and huggim mi. Olketa pioneer minister patient tumas witim mi and planti taem changem plan bilong olketa long day wea mi feel sik tumas. Taem weather hem no mas gud, olketa savve tekem mi go long return visit or invaetem mi for sidaon witim olketa long Bible study bilong olketa. And from mi no savve karem preaching basket, olketa nara pablisa putim literature bilong mi insaed basket bilong olketa taem mi go long preaching waka.”

¹⁷ Lukim hao olketa kongregeson elder and nara brata and sista helpem tufala sista hia for deal witim sik wea olsem nila. Olketa givim help wea fitim need saed long spiritual and physical wei, and long feeling. Waswe, datwan encouragem iu for givim help long olketa nara brata and sista wea kasem olketa problem? Iufala olketa young wan tu savve helpem olketa insaed kongregeson bilong iufala wea stragol witim olketa nila long body.—Proverbs 20:29.

18. Wanem wei for encouragem iumi nao insaed long olketa laef story wea Wastaoa and Wekap! magasin pablisim?

¹⁸ Wastaoa and Wekap! magasin pablisim staka laef story and experience bilong olketa Witness wea bin deal witim, and go ahed for deal witim olketa problem long living. Taem iu evritaem readim diskaen article, bae iu lukim hao planti spiritual brata and sista bilong iu raonem world kasem hard taem, lusim samwan olketa lovem long disaster, and stap long danger ples wea war go ahed. Olketa narawan garem nogud sik. Planti no savve duim olketa simpol samting long living wea olketa wea healthy duim and no need for tingim. Sik bilong olketa barava mekem olketa kasem test, especially taem olketa no savve share long Christian waka followim hao olketa laekem. Olketa thankiu tumas for help and saport wea olketa brata and sista bilong olketa, young and olo, givim long olketa!

Fasin for Go Ahed Strong Givim Hapi

19. Why nao Paul fit for hapi nomata hem kasem olketa nila olsem test and wik point?

¹⁹ Paul hapi for lukim hao God strongim hem. Hem sei: “Mi bae hapi tumas for tok praod abaotem olketa wik point bilong mi, mekem paoa bilong Christ savve stap olsem wanfala tent ovarem mi. Dastawe mi hapi long olketa wik point, long toktok wea spoelem mi, long taem bilong need, long persecution and hardfala samting, for Christ. Bikos taem mi wik, hem nao taem wea mi garem paoa.” (2 Corinthians 12:9, 10) From olketa samting wea hemseleva kasem, Paul savve sei: “Mi tok olsem no from mi needim samting, bikos mi lanem finis, nomata wanem living mi garem, for hapi nomoa nomata wanem mi garem. Mi savve hao nao for short long samting, mi savve hao nao for garem planti. Long evri samting and long evri wei mi lanem secret long hao nao for fulap and hao nao for hangre, hao nao for garem planti samting and hao nao for garem need. Long evri samting mi kasem strong from datwan wea givim paoa long mi.”—Philippians 4:11-13.

20, 21. (a) Why nao planti kasem hapi taem olketa ting raonem olketa “samting wea eye no lukim”? (b) Wanem nao samfala “samting wea eye no lukim” wea iu hope for lukim insaed Paradaes earth?

²⁰ So, sapos iumi go ahed strong for deal witim tokpiksa nila long body, iumi savve kasem bigfala hapi for showim evriwan hao paoa bilong Jehovah hem kamap perfect long man wea wik. Paul hem raet olsem: “Iumi no givap . . . Man wea hem iumi long insaed hem kamap niu moa evriday. Bikos nomata olketa hardfala taem hem for lelebet taem nomoa, diswan hem wakem wanfala glory for iumi wea hem barava winim eni samting moa and hem for olowe; taem iumi go ahed for lukluk . . . long samting wea eye no lukim. From samting wea eye . . . no lukim stap for olowe.”—2 Corinthians 4:16-18.

²¹ Planti pipol bilong Jehovah distaem hope for stap insaed Paradaes earth and enjoyim olketa blessing wea hem promisim. Olketa blessing hia olsem “samting wea eye no lukim” distaem. Nomata olsem, barava klosap nao iumi bae lukim olketa blessing hia witim eye bilong iumiseleva, yes, and enjoyim olketa for olowe. Wanfala blessing hia bae hem wei for no garem eni problem moa wea olsem nila! Son bilong God bae “brekem olketa waka bilong Devil” and “finisim datwan wea garem wei for kosim dae.”—1 John 3:8; Hebrews 2:14.

22. Wanem samting nao iumi sure long hem and disaed strong for duim?

²² So, nomata wanem nila wea stap long body hem mekem iumi feel pain tuday, no givap long wei for deal witim. Olsem Paul, iumi bae garem strong from Jehovah, wea willing tumas for givim paoa long iumi. Taem iumi stap insaed Paradaes earth, bae iumi blessim God bilong iumi Jehovah evriday for evri nambawan samting wea hem duim for iumi.—Psalm 103:2.

[Footnote]

Hao Nao Bae Iu Ansa?

• Why and hao nao Devil trae for brekem faithful fasin bilong olketa tru Christian?

• Hao nao paoa bilong Jehovah “kamap perfect long man wea wik”?

• Hao nao olketa elder and narawan encouragem olketa wea kasem problem wea givim pain long olketa?

[Piksa long page 18]

Thrifala taem Paul prea for God aotem nila from body bilong hem