Lukaotem God Witim Heart and Mind

Tru Christian Wei encouragem wei for iusim heart and mind for buildimap faith wea savve mekem God hapi.

TRU NAO, man wea startim Christian Wei, Jesus Christ, teachim iumi for mas lovem God witim “full mind,” or paoa for tingting, and tu witim “full heart” and “full soul.” (Matthew 22:37) Yes, wei for iusim tingting bilong iumi hem important part long worship.

Taem hem askem olketa wea lisin long hem for ting raonem olketa teaching bilong hem, Jesus planti taem sei: “Wanem nao tingting bilong iufala?” (Matthew 17:25; 18:12; 21:28; 22:42) Long sem wei, aposol Peter raet go long olketa wea biliv for ‘wekapem kliafala tingting bilong olketa.’ (2 Peter 3:1) Aposol Paul, wanfala first missionary wea bin travel go long planti ples, encouragem olketa Christian for iusim ‘paoa for tingting stret’ and for “pruvim long [olketa seleva], gudfala and stretfala and perfect will bilong God.” (Romans 12:1, 2) Only thru long kaen careful wei olsem for lukluk long olketa biliv nao bae olketa Christian savve buildimap faith wea mekem God hapi and wea bae fit for winim olketa test wea kamap long laef.—Hebrews 11:1, 6.

For helpem olketa narawan for buildimap kaen faith olsem, olketa firstfala Christian man for preach “iusim olketa Scripture for pullim tingting, [olketa] explainim and pruvim from olketa scripture” samting wea olketa teachim. (Acts 17:1-3) Kaen wei for story olsem showimaot gudfala tingting wea pullim kam olketa wea garem honest heart. Olsem example, samfala pipol long taon bilong Beroea long Macedonia “barava willing tumas for kasem word, and olketa lukluk gud long olketa Scripture evriday for pruvim evri samting hia [wea Paul and olketa fren bilong hem explainim].” (Acts 17:11) Tufala important point hem insaed diswan. First point, olketa long Beroea barava willing for lisin long Word bilong God; mek-tu, olketa no acceptim nomoa samting wea olketa herem, bat olketa pruvim thru long wei for lukluk insaed olketa Scripture. From diswan Christian missionary Luke praisem olketa bilong Beroea long wei wea showimaot respect and kolem olketa sekson wea “tingting strong.” Waswe, iu showimaot wei for tingting strong taem iu lukluk long olketa spiritual samting?

Mind and Heart Waka Tugeta

Olsem iumi lukim finis, insaed tru worship man mas iusim mind and heart. (Mark 12:30) Tingim moa datfala tokpiksa wea first article storyim abaot datfala painter wea iusim rong kala taem hem paintim wanfala haos. Sapos hem bin lisin gud long toktok bilong man wea ownim haos bae hem savve duim datfala waka witim full heart bilong hem and bae hem feel sure hao man wea ownim haos bae hapi long waka bilong hem. Hem semsem tu witim worship bilong iumi.

“Olketa trufala worshiper,” Jesus sei, “bae worshipim Dadi witim spirit and truth.” (John 4:23) From diswan, aposol Paul raet olsem: “Dastawe mifala tu. . . no stop for prea for iufala and ask mekem iufala savve kamap full witim stretfala savve long will bilong hem witim evri wisdom and spiritual savve, mekem iufala savve wakabaot fitim Jehovah witim goal for mekem hem hapi evribit.” (Colossians 1:9, 10) Kaen “stretfala savve” olsem helpem olketa honest wan for iusim full heart and soul taem olketa worship witim full trust from olketa “worshipim samting wea [olketa] savve.”—John 4:22.

Dastawe, Olketa Jehovah’s Witness no baptaesim olketa baby or olketa wea just start for interest bat wea no studyim gud olketa Scripture. Jesus komandim olketa follower bilong hem: “Mek-disaepol long pipol bilong evri nation, . . . teachim olketa for duim evri samting wea mi komandim long iufala.” (Matthew 28:19, 20) Olketa Bible student wea honest savve mekem stretfala disison long saed bilong worship only bihaen olketa kasem stretfala savve abaotem will bilong God. Waswe, iu trae hard for kasem kaen stretfala savve olsem?

For Minim Lord’s Prea

For luksavve hao stretfala savve abaotem Bible hem difren from wei for garem lelebet savve nomoa, iumi bae lukluk long wanem planti kolem Our Father, or Lord’s Prea, wea stap long Matthew 6:9-13.

Planti million pipol savve talem olowe long church example prea bilong Jesus. Bat haomas long olketa nao lanem mining bilong hem, especially first part bilong datfala prea wea storyim nem and Kingdom bilong God? Jesus tingim tufala hia barava important dastawe hem putim olsem first samting insaed datfala prea.

Hem start olsem: “Dadi bilong mifala wea stap long heven, letem nem bilong iu kamap holy.” Lukim hao Jesus sei olketa man mas prea for nem bilong God for kamap holy. For staka pipol, diswan mekem tufala kwestin kamap. First wan, wanem nao nem bilong God? And mek-tu, why nao hem need for kamap holy?

Ansa bilong first kwestin hem stap winim 7,000 taem insaed Bible long languis wea olketa iusim for raetem long firstaem. Wanfala hem long Psalm 83:18: “Mekem pipol savve hao iu wea nem bilong iu Jehovah, iu nomoa Most Hae ovarem full earth.” Exodus 3:15 talem olsem abaotem nem bilong God, Jehovah: “Diswan nao hem nem bilong mi for olowe, and diswan hem memorial for olketa genereson.”a Bat why nao nem bilong God, wea barava klin and holy, need for kamap holy? Bikos olketa bin tokdaonem and tokspoelem start kam long start bilong history bilong olketa man.

Long Eden, God talem Adam and Eve hao bae tufala dae sapos olketa kaikaim datfala frut wea hem stopem. (Genesis 2:17) Satan no fraet for talem samting wea opposite long samting God talem, hem sei long Eve: “Iu bae nating dae.” So, Satan sei God hem laea. Hem no just talem datwan nomoa. Hem go ahed for tokspoelem nem bilong God, hem talem Eve hao God duim samting wea no followim justice, hem hol bak for givim hem barava important savve. “From God hem savve hao long day wea iu kaikai from [tree bilong savve long gud and nogud samting] eye bilong iu bae open and iu bae kamap olsem God, savve long gud and nogud samting.” Lelebet wei for tok laea againstim man tu diswan!—Genesis 3:4, 5.

Wei wea tufala kaikaim datfala frut wea God stopem, Adam and Eve teksaed witim Satan. Start kam long datfala taem olketa man, nomata olketa min for duim or nomoa, addim go moa wei for tokdaonem God long wei wea olketa no followim olketa raeteous standard bilong hem. (1 John 5:19) Pipol still tokspoelem God taem olketa blamem hem for wei wea olketa safa—nomata planti taem diswan kamap from nogud wei bilong olketa seleva. “Mistek bilong man seleva spoelem laef bilong hem, and then hem blamem Lord,” hem nao toktok bilong Proverbs 19:3. (The New English Bible) Waswe, iu luksavve why Jesus, wea barava lovem Dadi bilong hem, prea for nem bilong Hem for kamap holy?

“Letem Kingdom Bilong Iu Kam”

Bihaen hem prea for nem bilong God for kamap holy, Jesus sei: “Letem kingdom bilong iu kam. Letem will bilong iu kamap long earth, olsem long heven.” (Matthew 6:10) Iumi maet ask olsem abaotem disfala toktok: ‘Wanem nao Kingdom bilong God? And hao nao kakam bilong hem join witim wei wea will bilong God bae kamap long earth?’

Long Bible, datfala word “kingdom” minim “rul bilong wanfala king.” So hem stret for ting Kingdom bilong God hem wanfala rul, or gavman bilong God, wea garem wanfala king wea hemseleva nao chusim. Disfala King hem nao Jesus Christ wea resurrect—“King bilong olketa king and Lord bilong olketa lord.” (Revelation 19:16; Daniel 7:13, 14) Profet Daniel raet olsem abaotem datfala Messiah Kingdom bilong God wea stap long hand bilong Jesus Christ: “Long taem bilong olketa king hia [olketa gavman bilong man wea rul distaem] God bilong heven bae startim wanfala kingdom wea bae nating savve finis. And datfala kingdom bae no go long eni narafala pipol. Hem bae smasem and finisim evri kingdom hia, and hemseleva nao bae stap olowe.”—Daniel 2:44.

Tru nao, Kingdom bilong God bae kontrolem full earth, bae hem finisim evri wicked pipol and bae rul ‘for olowe.’ So thru long Kingdom bilong God, Jehovah bae mekem nem bilong hem kamap holy, bae hem klinim from evri laea wei wea Satan and olketa wicked man tokdaonem.—Ezekiel 36:23.

Olsem evri gavman, Kingdom bilong God garem pipol wea stap anda long hem. Hu nao pipol hia? Bible givim ansa: “Olketa wea garem kwaet fasin bae kasem earth, and olketa bae hapi tumas long bigfala peace.” (Psalm 37:11) Jesus tu talem klosap sem samting: “Hapi nao olketa wea garem kwaet fasin, from olketa bae kasem earth.” For sure, olketa hia garem stretfala savve abaotem God, wea hem wanfala mark for kasem laef olowe.—Matthew 5:5; John 17:3.

Waswe, iu savve tingim sapos full earth fulap witim olketa wea garem kwaet fasin wea barava lovem God and lovem each other tu? (1 John 4:7, 8) Hem nao samting wea Jesus prea abaotem taem hem sei: “Letem kingdom bilong iu kam. Letem will bilong iu kamap long earth, olsem long heven.” Waswe, iu minim nao why Jesus teachim olketa follower bilong hem for prea olsem? And moa important, waswe, iu luksavve hao wei wea datfala prea bae fulfill hem maet affectim iu?

Planti Million Distaem Iusim Olketa Scripture for Pullim Tingting

Jesus talem hao wanfala campaign bilong spiritual education bae kamap evriwea long world for talemaot Kingdom bilong God wea klosap for kam. Hem sei: “Olketa bae talemaot disfala gud nius bilong kingdom evriwea long earth for givim witness long evri nation; and then end [bilong disfala world or system distaem] bae kam.”—Matthew 24:14.

Raonem world samting olsem six million Jehovah’s Witness sharem datfala gud nius long olketa neiba bilong olketa. Olketa invaetem iu for lane abaotem God and Kingdom bilong hem taem iu “lukluk gud long olketa Scripture,” witim wei for iusim paoa bilong iu for tingting stret. Sapos iu duim diswan bae hem strongim faith bilong iu and mekem eye bilong iu shaen from iu garem hope bilong laef long wanfala paradaes earth, wea bae “fulap witim savve bilong Jehovah olsem wata hem kavarem sea.”—Isaiah 11:6-9.

[Footnote]

[Box/Piksa long page 8]

FOLLOWIM EXAMPLE BILONG NAMBAWAN TEACHER

Planti taem Jesus teach long wei wea mekhae long olketa main Bible topic. Olsem example, bihaen hem resurrect hem explainim wanem nao waka bilong hem insaed purpose bilong God long tufala disaepol wea konfius lelebet abaotem dae bilong hem. Luke 24:27 sei: “And start from Moses and olketa Profet, hem minim long olketa samting abaotem hemseleva insaed long olketa Scripture.”

Lukim hao Jesus chusim wanfala main topic—“hemseleva,” datfala Messiah—and hem iusim toktok from “olketa Scripture” insaed story bilong hem. So samting Jesus duim, hem joinim tugeta evri Bible scripture wea fitim samting hem storyim, olsem wei for joinim tugeta staka smol piksa for mekem big piksa showaot klia, diswan mekem olketa disaepol for minim klia spiritual truth. (2 Timothy 1:13) From diswan, olketa no kasem savve nomoa bat hem muvim heart bilong olketa. Datfala scripture sei moa: “And olketa sei long each other: ‘Heart bilong iumi interest tumas taem hem toktok witim iumi long road, taem hem barava minim gud olketa Scripture for iumi.’”—Luke 24:32.

Olketa Jehovah’s Witness trae hard for followim example bilong Jesus insaed ministry bilong olketa. Olketa main samting wea olketa iusim for study nao datfala brochure Wanem Nao God Mas Kasem From Iumi? and datfala buk Savvy Wea Lead Go Long Laef Olawe. Olketa garem staka interesting Bible topic, olsem: “Hu Nao God?,” “Why Nao God Letem Yumi for Suffer?,” “Hao Nao Iu Savvy Faendem Tru Religion?,” “Distaem Hem Olketa Last Day!,” and “Buildim Famili wea Honorim God.” Each leson garem staka scripture.

Iu welkam for contactim Olketa Jehovah’s Witness wea stap long community bilong iu or iu savve raet go long address wea stap long page 2 bilong disfala magasin for wanfala free hom Bible study long olketa topic hia and olketa narawan.

[Piksa]

Kasem heart bilong student taem iu story raonem olketa main Bible topic

[Olketa Piksa long page 7]

Waswe, iumi minim datfala example prea bilong Jesus?

“Dadi bilong mifala wea stap long heven, letem nem bilong iu kamap holy . . . ”

“Letem [Messiah] kingdom bilong iu kam . . . ”

“Letem will bilong iu kamap long earth, olsem long heven”