Hao Wanfala Son Helpem Dadi Bilong Hem

JAMES, from England, wea winim 30 year, hem disable long mind and hem garem lelebet autisim. Nomata olsem, for planti year hem attendim olketa meeting bilong Olketa Jehovah’s Witness witim mami and sista bilong hem. Bat, dadi bilong hem no really interest long biliv bilong olketa. Wan evening bihaen meeting wea garem demonstration long hao for invaetem man long Memorial bilong dae bilong Christ, James kwiktaem ran go long rum bilong hem. Mami bilong hem wari lelebet so hem go bihaenem hem and lukim hem go ahed for pullimaot olketa oldfala Wastaoa and Wekap! magasin. Hem chusim wanfala wea garem invitation bilong Memorial long last page and ran go long dadi bilong hem. Firstaem hem point go long piksa and then hem point long dadi and sei “Iu!” Mami and dadi luk long each other and sapraes tumas from olketa luksavve hao James trae for invaetem dadi for go long Memorial. Dadi sei maet bae hem attendim.

Long evening bilong Memorial, James go long cupboard bilong dadi and chusim wanfala longkwi, tekem go long dadi, and mekem akson for showimaot hem laekem dadi for mas werem. Dadi sei bae hem no go long meeting. So, James and mami bilong hem go seleva long Kingdom Hall.

Bat, bihaen datfala taem, James no willing for mami redyim hem for go attendim olketa kongregeson meeting, hem laek for stap long haos witim dadi. Gogo wan Sunday morning, James les moa for mami redyim hem for go meeting. Bat mami barava sapraes tumas taem dadi bilong James hem tan go long James and sei: “James, sapos mi go meeting tuday, bae iu willing for go tu?” James barava hapi. Hem go huggim dadi bilong hem and sei “Yes!” and then thrifala evriwan go long Kingdom Hall.

Start long datfala taem, Dadi bilong James hem go ahed for attendim evri Sunday meeting and gogo hem sei hao for hem muv ahed hem mas attendim olketa nara meeting tu. (Hebrews 10:24, 25) So hem duim datwan, and tu month bihaen hem start for studyim Bible evritaem. Hem muv ahed kwiktaem, changem samfala samting long laef bilong hem, and no longtaem bihaen hem start for share insaed Kingdom preaching waka. Wan year bihaen hem start for studyim Bible, hem dedicatem laef bilong hem long Jehovah and showimaot diswan long wei for baptaes long wata. Distaem hem serve olsem wanfala ministerial servant long kongregeson. So full famili nao servem Jehovah witim wan mind distaem.