Waswe, Wei wea Iu Teach Hem Kasem Frut?

DADI and mami, olketa elder, and olketa wea talemaot gud nius—evriwan hia mas olketa teacher. Dadi and mami teachim pikinini, olketa elder teachim olketa member bilong Christian kongregeson, and olketa wea preachim gud nius teachim olketa wea interest. (Deuteronomy 6:6, 7; Matthew 28:19, 20; 1 Timothy 4:13, 16) Wanem nao iu savve duim for mekem wei wea iu teach kasem frut? Wanfala wei hem for followim example and teknik bilong olketa gudfala teacher wea Word bilong God story abaotem. Ezra hem wanfala teacher olsem.

Lane From Example Bilong Ezra

Ezra hem wanfala priest from laen bilong Aaron wea stap long Babylon samting olsem 2,500 year go finis. Long year 468 B.C.E., hem go long Jerusalem for mekem klin worship kamap strong midolwan olketa Jew wea stap long there. (Ezra 7:1, 6, 12, 13) Diswan minim hem mas teachim Law bilong God long olketa pipol. Wanem nao Ezra duim for mek sure wei wea hem teach hem kasem frut? Hem duim samfala important step. Lukim olketa step hia wea stap long Ezra 7:10:

“Ezra nao [1] redyim heart bilong hem [2] for lukluk long law bilong Jehovah and [3] for duim and [4] for teachim rul and justice long Israel.” Iumi lukluk lelebet long each wan long olketa step hia for lane from olketa.

“Ezra Nao Redyim Heart Bilong Hem”

Long sem wei wea wanfala farmer iusim hou for redyim firstaem graon bifor hem plantim seed, thru long wei for prea Ezra redyim heart bilong hem for herem word bilong God. (Ezra 10:1) Diswan minim hem ‘tanem heart bilong hem’ for lisin long teaching bilong Jehovah.—Proverbs 2:2.

Olsem tu, Bible storyim King Jehoshaphat wea “redyim heart bilong [hem] for lukaotem tru God.” (2 Chronicles 19:3) Long difren wei, wanfala genereson bilong olketa Israelite “wea nating redyim heart bilong olketa” olketa “praod and bighed.” (Psalm 78:8) Jehovah lukluk long “secret man bilong heart.” (1 Peter 3:4) Tru nao, “hem bae teachim olketa hambol wan long wei bilong hem.” (Psalm 25:9) Dastawe hem important tumas for olketa wea teach distaem for followim example bilong Ezra taem olketa prea for mekem heart bilong olketa kamap stretfala!

“For Lukluk Long Law Bilong Jehovah”

For kamap wanfala teacher wea fit, Ezra lukluk long Word bilong God. Sapos iu go for lukim wanfala doctor, waswe, bae iu lisin gud and mek sure iu minim evri samting wea hem talem? Yes, bae iu duim olsem, from health bilong iu stap long danger. Dastawe, hem moa important for lisin gud long olketa samting wea Jehovah talem long iumi, thru long Word bilong hem, Bible, and thru long “faithful and wise slave.” For tok stret, kaonsel bilong hem savve givim laef! (Matthew 4:4; 24:45-47) Tru, doctor savve talem rong samting, bat “law bilong Jehovah hem perfect.” (Psalm 19:7) No enitaem bae iumi need for askem tingting bilong narawan.

Bible buk bilong Chronicles (wea firstaem Ezra raetem olsem wanfala volume nomoa) showimaot hao Ezra hem wanfala student wea study gud. For raetem olketa buk hia, hem iusim planti nara raeting.a Olketa Jew, wea just arrive from Babylon, olketa needim story abaotem history bilong nation bilong olketa. Olketa no savve gud abaotem day wea religion bilong olketa keepim, service insaed long temple, and waka bilong olketa Levite. Olketa record bilong laen dadi bilong olketa hem important. Ezra mekem klia olketa samting hia. Go kasem taem wea Messiah hem kam, olketa Jew bae stap olsem wanfala nation wea garem land, temple, sekson bilong olketa priest, and governor. From information wea Ezra hipimap, olketa keepim wan mind and tru worship.

Waswe, wei wea iu study hem olsem Ezra? Wei for waka hard for studyim Bible bae helpem iu for teachim Bible long gudfala wei.

“Lukluk Long Law Bilong Jehovah” Olsem Wanfala Famili

Wei for lukluk long law bilong Jehovah hem no for taem wea man study seleva nomoa. Famili study hem gudfala chance for duim diswan tu.

Jan and Julia, wanfala hasband and waef long Netherlands, read big long tufala boy bilong tufala from taem tufala born. Distaem, Ivo hem 15 year and Edo hem 14 year. Wanfala taem evri week olketa still garem famili study. Jan hem sei: “Main goal bilong mifala hem no for storyim planti information long study bat for tufala boy minim samting mifala studyim.” Hem sei moa: “Tufala duim planti research. Tufala chekim olketa word and pipol insaed Bible wea tufala no savve—taem wea olketa stap, hu nao olketa, wanem nao waka bilong olketa, and kaen samting olsem. From taem tufala lane for read, tufala lukluk insaed olketa buk olsem Insight on the Scriptures, olketa dictionary, and encyclopedia. Diswan mekem mifala barava enjoyim famili study. Tufala evritaem willing for study.” Nara spesol samting tu, tufala boy hia kam first distaem long class saed long subject bilong languis.

John and Tini, nara hasband and waef long Netherlands, study witim son bilong tufala Esli (wea distaem hem 24 year and pioneer long nara kongregeson), and dota bilong tufala, Linda (distaem hem 20 year and hem maritim wanfala gud young brata). Olketa no study insaed wanfala buk and duim olsem kwestin and ansa, bat tufala changem famili study for fitim age and need bilong tufala pikinini. Wanem teknik nao tufala iusim?

John sei son and dota bilong hem chusim wanfala interesting subject from “Kwestin From Reader” (from Wastaoa) and “Tingting Bilong Bible” (from Wekap!). Bihaen, olketa storyim information wea olketa redyim, wea mekem evriwan garem barava interesting story. Long disfala wei, olketa young wan hia kasem savve long wei for duim research and for storyim samting wea olketa faendemaot. Waswe, iu “lukluk insaed law bilong Jehovah” witim olketa pikinini bilong iu? Diswan hem bae mekem wei bilong iu for teach kamap moabeta and bae helpem olketa pikinini bilong iu for kamap gudfala teacher tu.

“For Duim”

Ezra duim samting wea hem lanem. Olsem example, taem hem stap yet long Babylon, maet hem garem isi living. Nomata olsem, taem hem luksavve hem savve helpem pipol bilong hem, hem lusim isi living bilong Babylon for go long farawe taon bilong Jerusalem, wea living hem hard, planti problem and danger stap. Tru tumas, Ezra hem no hipimap savve bilong Bible nomoa bat hem stanbae for duim samting wea hem lanem tu.—1 Timothy 3:13.

Bihaen, taem Ezra stap long Jerusalem, hem showimaot moa hao hem duim samting wea hem lanem and teachim. Diswan showaot klia taem hem herem wei wea olketa Israelite man maritim olketa heathen woman. Record bilong Bible showim long iumi hao hem ‘brekem kaleko and coat bilong hem and aotem samfala hair from hed and beard bilong hem and sidaon kwaet go kasem evening.’ Hem feel ‘shame tumas for apim feis bilong hem’ long Jehovah.—Ezra 9:1-6.

Wei wea hem studyim Law bilong God barava affectim hem! Ezra garem klia tingting long olketa nogud samting wea bae kamaot from wei wea pipol hia no obey. Namba bilong olketa Jew wea go bak hem smol nomoa. Sapos olketa maritim pipol aotsaed, gogo bae olketa join witim olketa heathen nation wea stap raonem olketa, and hem isi for klin worship lus nao from earth!

Gud samting, example wea Ezra showim saed long wei for fraet and strong hem muvim olketa Israelite for stretem gogo bilong olketa. Olketa sendem go bak olketa waef from difren ples. Insaed thrifala month, evri samting stret moa. Wei wea Ezra seleva loyal long Law bilong God hem barava mekem wei wea hem teach kasem frut.

Sem samting hem fitim distaem. Wanfala Christian dadi hem sei: “Olketa pikinini no savve duim samting wea iu talem; olketa duim samting wea iu duim!” Sem principle hem fitim Christian kongregeson. Olketa elder wea showimaot gudfala example fit for sure kongregeson bae followim samting wea olketa teachim.

“For Teachim Rul and Justice Long Israel”

Narafala reason stap wea mekem wei wea Ezra teach hem kasem frut. Hem no teachim olketa idea bilong hemseleva, bat hem teachim “rul and justice.” Hem teachim olketa rul, or law bilong Jehovah. Diswan hem responsibility bilong hem olsem wanfala priest. (Malachi 2:7) Hem teachim tu justice, and showimaot example bilong samting wea hem teachim taem hem followim samting wea stret and no teksaed, hem followim wanfala standard. Taem olketa wea garem paoa showimaot justice, diswan mekem strong kamap and gudfala samting kamaot from datwan. (Proverbs 29:4) Long sem wei tu, olketa Christian elder, dadi and mami, and olketa wea talemaot Kingdom wea savve gud long Word bilong God bae buildimap wei for strong long spiritual wei taem olketa teachim rul and justice bilong Jehovah insaed long kongregeson, insaed famili, and long olketa wea interest.

Waswe, iu agree hao wei wea iu teach savve kamap moabeta taem iu followim evribit example bilong Ezra wea faithful? So, ‘redyim heart bilong iu, lukluk long law bilong Jehovah, duim samting followim, and teachim rul and justice bilong Jehovah.’—Ezra 7:10.

[Footnote]

[Box/Piksa long page 22]

WANEM NAO MEKEM WEI WEA EZRA TEACH HEM KASEM FRUT?

1. Hem redyim heart bilong hem for kamap stretfala

2. Hem lukluk insaed long Law bilong Jehovah

3. Hem showim gud example for duim samting hem lanem

4. Hem waka hard for teachim tingting bilong Scripture