Wei for Trae Hard​—Wanem Taem Nao Jehovah Blessim?

“LETEM mi go from laet bilong sun start for showaot.”

“Bae mi holem iu go kasem taem iu blessim mi.”

“Hu nao nem bilong iu?”

“Jacob.”

“Start long disfala taem nem bilong iu bae no Jacob bat Israel, from iu stragol witim God and olketa man and gogo iu win nao.”—Genesis 32:26-28.

Datfala interesting toktok hem kamaot from wanfala barava spesol wei wea 97-year-old Jacob showimaot physical strong wea hem garem olsem wanfala sportsman. Nomata Bible no sei hem wanfala sportsman, hem stragol for full naet witim wanfala angel. Why nao olsem? From Jacob hem wari tumas abaotem promis wea Jehovah mekem long laen dadi bilong hem—spiritual present wea hem bae kasem.

Planti year bifor brata bilong Jacob, Esau, givim hem datfala raet bilong firstborn for wanfala pleit supsup. Distaem olketa talem Jacob hao Esau hem kakam witim 400 man. From hem wari, Jacob laek for mek sure long promis bilong Jehovah for famili bilong hem bae kasem gudfala living long datfala land long narasaed bilong Jordan River. For fitim wanem hem prea for hem, Jacob hem strong for duim samting. Hem sendem olketa kaenfala present long Esau wea klosap for kam. Hem duim samting for defendim hemseleva tu, taem hem divaedem camp bilong hem long tufala sekson and sendem go olketa waef and pikinini bilong hem akrosim Jabbok River long ples wea hem no deep. Then witim wei for barava trae hard and krae, hem forcem hemseleva go moa, taem hem stragol for full naet witim wanfala angel mekem hem “savve askem samting for hemseleva.”—Hosea 12:4; Genesis 32:1-32.

Tingim wanfala example bifor datfala taem, Rachel, mek-tu waef bilong Jacob and wan wea hem barava lovem. Rachel hem savve abaotem promis bilong Jehovah for blessim Jacob. Sista bilong hem Leah, first waef bilong Jacob, bornem fofala son bat Rachel no savve garem pikinini. (Genesis 29:31-35) Winim wei for feel sorre for hemseleva, hem go ahed for askem Jehovah long prea and duim samting followim wanem hem prea abaotem. Olsem granmami bilong hem Sarah duim witim Hagar, Rachel offerim servant bilong hem Bilhah long Jacob olsem nara waef bilong hem mekem, olsem Rachel talem, “Mi, mi tu, savve kasem olketa pikinini thru long hem.”a Bilhah bornem tufala son long Jacob— Dan and Naphtali. Taem Naphtali hem born Rachel talemaot hao hem barava trae hard saed long feeling bilong hem: “Witim wei for barava stragol mi stragol witim sista bilong mi. Gogo mi win nao!” Rachel kasem nara blessing moa for garem tufala son bilong hemseleva, Joseph and Benjamin.—Genesis 30:1-8; 35:24.

Why nao Jehovah blessim wei wea Jacob and Rachel trae hard long physical wei and saed long feeling? Olketa tingim firstaem will bilong Jehovah and barava tinghae long spiritual present bilong olketa. Olketa barava prea strong for hem appruvim olketa and duim samting followim will bilong God and samting olketa prea for hem.

Olsem Jacob and Rachel, planti distaem bae agree hao man mas trae hard sapos hem laek for kasem blessing bilong Jehovah. Planti taem samting wea olketa duim hem witim wei for krae and feel wikdaon. Wanfala Christian mami, Elizabeth, rememberim hao bifor hem mas barava trae hard for attendim olketa Christian meeting evritaem bikos for longfala taem nao hem no attend. Hem wanfala challenge, from hem garem faevfala smol boy, hasband wea no biliv, and mas draev for 30 kilometer for kasem Kingdom Hall. “For kasem olketa meeting evritaem barava needim fasin for bossim seleva, wea mi savve diswan hem gud for mi and olketa son bilong mi. Hem helpem olketa for luksavve hao diswan hem samting wea barava fitim man for aftarem.” Jehovah blessim wei wea hem trae hard. Thrifala son bilong hem serve insaed Christian kongregeson, tufala long full-taem ministry. From hem hapi long wei wea olketa muv ahed long spiritual wei, hem sei: “Olketa winim mi long hao olketa grow long spiritual wei.” Diswan hem nambawan blessing for wei wea hem trae hard!

Jehovah Blessim Wei for Barava Trae Hard

Tru nao, olketa reward kamaot from wei for trae hard and hard waka. Haomas iumi trae hard long wanfala project or assignment, bae affectim haomas nao iumi feel satisfae and kasem samting from datwan. Hem nao wei wea Jehovah wakem iumi. King Solomon hem raet: “Evri man shud kaikai and drink and lukim gud samting from evri hard waka bilong hem. Hem nao present from God.” (Ecclesiastes 3:13; 5:18, 19) Bat, for kasem wanfala blessing from Jehovah, iumi mas mek sure iumi waka hard for samting wea important. Olsem example, waswe, hem fitim for iumi expectim blessing bilong Jehovah sapos iumi no lukaotem olketa spiritual samting firstaem? Waswe, wanfala Christian wea dedicate savve hope for Jehovah appruvim hem sapos hem acceptim wanfala waka wea mekem hem planti taem missim wei for kaban witim olketa brata and kasem olketa instruction wea buildimap faith long olketa Christian meeting?—Hebrews 10:23-25.

Maet wanfala man no savve “lukim gud samting” sapos hem iusim full laef bilong hem for aftarem wanfala laef waka or gudfala living bat no duim olketa spiritual samting. Jesus storyim samting wea bae kamaot from wei for aftarem samting wea no important long tokpiksa bilong hem abaotem man wea plantim seed. Abaotem seed wea hem “plantim midolwan long nila gras,” Jesus explainim hao “diswan nao herem word, bat wari bilong disfala system and giaman paoa bilong olketa richfala samting stopem datfala word for grow gud, and hem no garem frut.” (Matthew 13:22) Paul givim warning abaotem semkaen trap and talem hao olketa wea aftarem material samting bae “foldaon insaed test and trap and wei for barava wantem olketa samting wea krangge and kosim pain, wea gogo barava spoelem man.” Wanem nao cure for kaen living olsem wea bae spoelem man long spiritual wei? Paul hem sei moa: ‘Ranawe from olketa samting hia and putim hope bilong iu, no long riches wea bae finis, bat long God, wea givim iumi evri samting for mekem iumi hapi.’—1 Timothy 6:9, 11, 17.

Nomata iumi wanem age or haomas year iumi servem Jehovah finis, iumi evriwan savve kasem gudfala samting sapos iumi followim wei wea Jacob and Rachel barava trae hard. From olketa laekem tumas for Jehovah appruvim olketa, olketa nating forgetim spiritual present bilong olketa, nomata samfala taem olketa mas insaed samting wea barava mekem olketa feel wiki and fraet. Distaem, olketa hevi and hardfala samting wea iumi mas feisim maet mekem iumi fraet, feel nogud, and maet for garem sorre feeling tu. Diswan savve mekem iumi want for givap long disfala stragol and kamap man wea Satan spoelem olsem planti narawan. Maet hem iusim eni samting for kasem goal bilong hem, olsem hapitaem, sport and samting wea man interest for duim evritaem, and waka for garem planti material samting. Satan promisim hao man bae kasem gud samting from olketa samting hia bat klosap evritaem man no kasem nao. Planti taem, olketa wea Satan giamanim or switim for busy long olketa samting hia faendem hao diswan no mekem olketa feel satisfae. Olsem Jacob and Rachel bifor, hem important for iumi mekem grow spirit for stragol againstim and win ovarem olketa trik bilong Satan.

Devil laekem iumi for feel olsem ‘no eni wei for iumi win nao, no eni hope, no eni ansa stap and hem iusles for duim eni samting.’ Dastawe hem barava important for no givap and sei ‘no eniwan lovem mi’ and ‘Jehovah hem forgetim mi.’ Kaen tingting olsem bae spoelem iumi. Waswe, diswan showimaot hao iumi givap nao, and finis long disfala stragol for kasem wanfala blessing? No forgetim, Jehovah hem blessim wei wea iumi barava trae hard.

Go Ahed for Stragol for Blessing Bilong Jehovah

Wei wea iumi stap gud long spiritual wei hem depend long bigfala wei long hao iumi minim tufala main truth abaotem laef bilong iumi olsem servant bilong Jehovah. (1) Evriwan kasem olketa problem, sik, or hardfala samting, and (2) Jehovah hem lisin long singaot bilong olketa wea prea strong long hem for help and blessing bilong hem.—Exodus 3:7-10; James 4:8, 10; 1 Peter 5:8, 9.

Nomata wanem hardfala living iu garem or feeling for no fit for deal witim datwan, no foldaon long datfala “sin wea isi for kasholem iumi”—short long faith. (Hebrews 12:1) Go ahed for stragol go kasem taem wea iu kasem wanfala blessing. Go ahed for patient, and remember olo Jacob wea stragol for full naet mekem hem savve kasem wanfala blessing. Olsem wanfala man wea plantim seed and weit for taem bilong harvest, long patient wei, lukaotem blessing bilong Jehovah long olketa spiritual samting iu duim, nomata maet iu tingse samting iu duim hem smol nomoa. (James 5:7, 8) And evritaem rememberim toktok bilong man wea raetem psalm: “Olketa wea plantim seed witim krae bae harvest witim hapi singaot.” (Psalm 126:5; Galatians 6:9) Standap strong, and go ahed for stap witim olketa wea stragol.

[Footnote]