World wea Garem Rong Tingting Abaotem Loyal Fasin
LONG wanfala hot Friday evening long Tel Aviv, Israel, wanfala young man laen ap witim olketa nara young wan aotsaed wanfala naetclub. Seknomoa bigfala bosta kamap midolwan olketa.
Nara suisaed bomber givim laef bilong hem and killim dae 19-fala nara young wan. “Olketa part bilong body stap evriwea, evri young pipol, wea barava young—worse samting wea mi lukim,” wanfala man bilong medical hem talem.
Thurstan Brewin hem talem insaed buk The Lancet: “Olketa fasin wea pipol tinghae long hem, olsem loyal fasin . . . , hem nao mekem moa isi for startim war and moa hard for endim.” Tru nao, history hem fulap witim blood from loyal fasin muvim pipol for killim dae narawan, olsem olketa Crusade bilong Christendom kam kasem nogud kill-kill bilong Nazi Germany.
Moa and Moa Safa From Fasin for No Loyal
Hem klia hao wei for ova tumas for loyal savve spoelem man, bat for short long loyal fasin savve spoelem community. Webster’s New Encyclopedic Dictionary sei loyal fasin hem minim for ‘faithful long wanfala man or goal’ and “savve minim for faithful for hol strong nomata taem man feisim temptation for lusim or denyim.” Nomata staka pipol sei olketa tinghae long diskaen loyal fasin, disfala fasin hem barava short insaed wanfala main samting—famili. Divorce kamap big tumas bikos long wei for satisfaem seleva, olketa hevi and problem bilong evriday, and bigfala wei wea pipol no faithful long marit partner, hem affectim pipol. And olsem hem happen long Tel Aviv, planti taem olketa wea safa nao olketa young wan wea no garem eni blame.
Wanfala report talem olsem: “Planti taem education bilong pikinini safa from wei wea divorce, wei for separate, and wei for garem singol dadi or mami mekem famili no stedy.” Olketa boy wea no garem dadi nao moa isi for safa saed long education and duim suisaed and criminal fasin. Evri year, wan million pikinini long United States lukim dadi and mami divorce, and haf long evri pikinini wea dadi and mami bilong olketa marit long datfala kantri bae safa from wei for divorce bifor olketa kasem 18 year. Olketa report showimaot hao diswan hem semsem for staka young pipol long nara part bilong world.
Loyal Fasin—Standard wea Hae Tumas?
Wei wea loyal fasin hem brekdaon long olketa main area long living hem mekem toktok bilong King David hem barava fitim distaem winim enitaem bifor: “Sevem mi, O Jehovah, from loyal wan hem nomoa nao; from faithful pipol lus nao from olketa son bilong man.” (Psalm 12:1) Why nao fasin for no loyal hem big tumas olsem? Roger Rosenblatt hem raet olsem insaed Time magasin: “Nomata loyal fasin hem nambawan fasin for garem, iumi olketa man wea fulap long olketa wik point hard tumas for keepim disfala fasin from iumi ova tumas long fraet, wei for daotem seleva, selfish, and wei for laek win.” Bible tok stret olsem abaotem taem wea iumi stap insaed: “Man bae lovem seleva, . . . no loyal, no garem love.”—2 Timothy 3:1-5.
Taem iumi tingim bigfala wei wea loyal fasin—or wei for no garem loyal fasin—affectim tingting and samting man duim, maet iumi ask, ‘Hu nao fit for iumi loyal long hem?’ Lukim wanem nextfala article talem abaotem disfala kwestin.
[Piksa Credit Line long page 3]
Photo antap: © AFP/CORBIS