Kwestin From Reader
Waswe, man mas keepim spesol promis wea hem mekem long God nomata wanem?
Long Bible, wanfala spesol promis hem serious promis wea man talem long God for duim samting, offerim samting, or duim wanfala waka, or for stap klia from wanfala samting nomata hem no rong. Bible storyim olketa spesol promis wea pipol mekem for duim samting bat wea minim God mas firstaem duim samting. Olsem example, Hannah, mami bilong profet Samuel, “hem talem wanfala spesol promis and sei: ‘O Jehovah bilong olketa army, sapos . . . iu no forgetim slave girl bilong iu and givim wanfala baby boy long slave girl bilong iu, mi bae givim hem long Jehovah for full laef bilong hem, and no eni razor bae kasem hed bilong hem.’” (1 Samuel 1:11) Bible sei olketa spesol promis hem samting wea man willing for duim. Waswe, man mas keepim spesol promis wea hem mekem long God nomata wanem?
King Solomon long Israel bifor sei: “Taem iu mekem wanfala spesol promis long God, no hol bak for keepim. . . . Samting iu promisim, keepim. Moabeta for iu no mekem spesol promis winim wei for mekem spesol promis and no keepim.” (Ecclesiastes 5:4, 5) Law wea Israel kasem thru long Moses sei: “Long taem iufala mekem spesol promis long Jehovah God bilong iufala, iufala mas no slow for keepim, bikos Jehovah God bilong iufala bae expectim iufala for keepim, and long saed bilong iufala hem bae wanfala sin.” (Deuteronomy 23:21) Hem klia, for mekem spesol promis long God hem serious samting. Gudfala reason nao shud muvim man for mekem diskaen promis, and hem mas sure hem fit for keepim. Sapos nomoa, hem moabeta for hem no mekem. Bat waswe, man mas keepim evri spesol promis hem mekem nomata wanem?
Waswe sapos man mekem spesol promis and bihaen faendaot diswan no followim will bilong God? Waswe sapos hem wanfala promis wea bae kosim dirty fasin for mix witim trufala worship? (Deuteronomy 23:18) No eni daot stap hao man no need for keepim kaen spesol promis olsem. Anda long Law bilong Moses, dadi or hasband bilong wanfala woman wea mekem spesol promis savve finisim datfala promis.—Numbers 30:3-15.
Tingim tu sapos wanfala man mekem spesol promis long God for stap singol bat gogo hem faendem hard for keepim. Hem luksavve bihaen hao, for keepim datfala spesol promis, hem bae putim hemseleva insaed danger for brekem law bilong God saed long klin fasin. Waswe, hem mas trae hard for keepim datfala promis? Maet hem moabeta for no keepim datfala spesol promis and barava begim God for mercy and forgiveness winim wei for foldaon long dirty fasin. Hemseleva nomoa savve disaed long diswan. No eni nara man fit for disaed for hem.
Waswe sapos man mekem spesol promis and bihaen, hem luksavve hem no tingting gud abaotem firstaem? Waswe, hem shud trae yet for keepim datfala promis? Hem no isi for Jephthah keepim spesol promis wea hem mekem long God, bat hem willing for keepim. (Judges 11:30-40) Sapos man no keepim spesol promis, diswan savve lead go long wei wea God kamap “kros” and evri gud waka bilong man bae kamap samting nating long God. (Ecclesiastes 5:6) Wei for ting nating for keepim wanfala spesol promis savve kosim God for no hapi moa long iumi.
Jesus Christ hem sei: “Just letem Yes bilong iufala minim Yes, No, minim No; from samting wea ovarem diswan hem kam from wicked wan.” (Matthew 5:37) Wanfala Christian bae want for no just keepim spesol promis bilong hem long God, bat tu for pruvim hao evri toktok bilong hem long God and olketa man, olketa fit for trustim. Waswe sapos hem faendem hard for keepim wanfala agreement wea hem mekem witim wanfala man, wea agreement hem firstaem luk stret bat distaem hem luk krangge? Hem shud no ting nating long kaen samting olsem. Bat bihaen gudfala wei for story tugeta, nara man maet disaed for aotem responsibility from hem for keepim datfala agreement.—Psalm 15:4; Proverbs 6:2, 3.
Long saed long olketa spesol promis and evri nara samting, wanem nao shud main goal bilong iumi? Iumi mas evritaem lukaotem wei for keepim gudfala wei for fren witim Jehovah God.
[Olketa Piksa long page 30, 31]
Hannah nating hol bak for keepim spesol promis bilong hem
[Olketa Piksa long page 31]
Nomata hem no isi, Jephthah keepim spesol promis wea hem mekem