‘God, Why Nao Iu Letem Diswan Happen?’
RICARDO rememberim yet datfala taem wea hem sidaon witim waef bilong hem, Maria, long rum for weitim doctor.a Tufala evriwan feel fraet for readim result bilong medical chekap bilong Maria. Then, Ricardo openem envelope, and tufala kwiktaem readim datfala report. Tufala lukim word “cancer” and start for krae from tufala luksavve long mining bilong diswan.
Ricardo ting bak: “Doctor hem barava kaen, bat from hem luksavve hao serious nao sik bilong Maria hem go ahed for talem mitufala for mas trust long God.”
Bifor Maria start for kasem radiation treatment, doctor bilong hem lukim hao raet leg bilong Maria savve muv, wea Maria no min for muvim. Moa test showimaot hao cancer hem kasem brain nao. Bihaen wan week bilong radiation treatment nomoa, Maria kamap haf dead and hem dae tufala month bihaen. Ricardo hem sei: “Mi hapi hao hem no safa moa, bat from mi missim hem tumas gogo mi laek dae tu. Staka taem nao mi krae and askem God: ‘Why nao iu letem diswan happen?’”
Staka Kwestin Kamap Taem Trabol Kamap
Olsem Ricardo, staka pipol evriwea long world mas feisim wei for safa. Staka taem, olketa wea no garem blame nao safa. Tingim bigfala sorre wea kamaot from olketa faet wea gogo ahed wea spoelem pipol. Or tingim pain wea staka kasem from rape, wei for spoelem pikinini, raf fasin insaed famili, and olketa nara nogud samting man duim. Long history, luk olsem no eni spialaen stap saed long wei wea olketa man and woman no followim justice and willing for givim pain long each other. (Ecclesiastes 4:1-3) And tu, pipol safa from olketa natural disaster or sik saed long feeling, mind, and body. So iumi no sapraes hao staka pipol askem kwestin, “Why nao God letem diskaen wei for safa for go ahed?”
Nomata pipol wea biliv strong saed long religion tu faendem hard for deal witim wei for safa. Maet iu tu bin tingting raonem reason why wanfala loving God wea garem paoa evribit savve go ahed for letem olketa man for safa. Disfala kwestin wea staka askem mas kasem ansa wea mek sense and wea tru bifor man garem peace long mind and fren witim God. Bible hem provaedem ansa olsem. Plis ting raonem wanem hem talem insaed nextfala article.
[Footnote]
a Mifala changem olketa nem.
[Olketa Piksa long page 3]
Doctor go ahed for talem mitufala for mas trust long God