Kwestin From Reader
Waswe, hem fitim Bible principle for wanfala Christian putim hand bilong hem long Bible and promis for talem tru samting long kot?
Each man mas mekem disison bilong hemseleva long disfala samting. (Galatians 6:5) Bible no tambuim wei for promis for talem tru samting long kot.
Wei for promis for talem tru samting hem samting wea pipol evriwea duim. Olsem example, olketa bilong Greece bifor savve apim hand bilong olketa or tasim wanfala altar taem olketa promis for talem tru samting. Taem wanfala man bilong Rome wea serve long kot mekem promis for talem tru samting, hem holem ston long hand and promis olsem: “Sapos mi min for giaman, taem hem [Jupiter] sevem disfala taon witim strong taoa, letem [datfala god] Jupiter aotem evri gudfala samting from mi, long sem wei wea mi torowe disfala ston.”—Cyclopedia of Biblical, Theological, and Ecclesiastical Literature, by John McClintock and James Strong, Volume VII, page 260.
Wei for duim diskaen samting showimaot wei wea olketa man tingse wanfala god wea moa hae stap wea lukluk long olketa and wea olketa mas givim ansa long hem. Start kam bifor, olketa tru worshiper bilong Jehovah luksavve hao hem savve long samting wea olketa talem and duim. (Proverbs 5:21; 15:3) Hem olsem God stap long there taem olketa mekem promis for talem tru samting, or hem olsem wanfala witness. Olsem example, Boaz, David, Solomon, and Zedekiah duim diswan. (Ruth 3:13; 2 Samuel 3:35; 1 Kings 2:23, 24; Jeremiah 38:16) And tu, olketa worshiper bilong tru God savve letem nara pipol mekem olketa promis for talem tru samting. Diswan nao samting wea happen long Abraham and Jesus Christ.—Genesis 21:22-24; Matthew 26:63, 64.
Samfala taem man wea promis for talem tru samting front long Jehovah duim diswan witim akson. Abram (Abraham) talem king bilong Sodom: “Mi liftimap hand bilong mi for mekem promis long Jehovah Most Hae God, Man wea Wakem heven and earth.” (Genesis 14:22) Wanfala angel wea tok long profet Daniel “apim raet [hand] and left [hand] bilong hem long heven and promis long Man wea laef for olowe.” (Daniel 12:7) Olketa nara scripture storyim hao God apim hand bilong hem long tokpiksa wei for mekem promis.—Deuteronomy 32:40; Isaiah 62:8.
Bible no tambuim wei for mekem promis for talem tru samting. Nomata olsem, wanfala Christian no need for mekem promis for pruvim evri samting wea hem talem. Jesus hem sei: “Just letem Yes bilong iufala minim Yes, No, minim No.” (Matthew 5:33-37) Disaepol James talem semkaen toktok. Taem hem sei “no mekem promis,” hem givim warning againstim wei for no mekem promis long olketa samting wea no important. (James 5:12) Jesus and James nating talem hao hem rong for mekem promis for talem tru samting long kot.
Bat, waswe, sapos olketa askem wanfala Christian long kot for mekem promis hao toktok bilong hem tru? Hem maet feel hem savve mekem promis olsem. Sapos hem no duim diswan, olketa maet letem hem talemaot for sei hem no laea.—Galatians 1:20.
Sapos wei for apim hand or holem Bible taem man mekem promis hem samting wea evriwan insaed kotrum mas followim, wanfala Christian maet chus for obeyim datwan. Maet hem tingim olketa example insaed Bible abaotem wei for promis for talem tru samting witim wanfala akson. For wanfala Christian, samting wea moa important winim wei for duim akson taem man mekem promis hem wei wea hem rememberim hao hem mekem promis front long God for talem tru samting. Kaen promis olsem hem serious samting. Sapos wanfala Christian feelim hao hem savve and shud ansarem wanfala kwestin wea olketa askem long hem long samting olsem, then hem shud remember hao hem mekem promis for talem tru samting, tru nao, samting wea wanfala Christian want for duim evritaem.