“Garem Love Midolwan Long Iufala Seleva”
“From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.”—JOHN 13:35.
1. Wanem fasin nao Jesus mekhae tumas long hem no longtaem bifor hem dae?
“OLKETA pikinini.” (John 13:33) Datwan nao hem loving toktok wea Jesus kolem long olketa aposol bilong hem long evening bifor hem dae. No eni taem moa insaed Gospel Jesus iusim disfala toktok for showimaot hem kea taem hem story long olketa. Bat, long datfala spesol naet, hem iusim disfala loving toktok for showim deep love wea hem garem for olketa follower bilong hem. Tru nao, Jesus story abaotem love samting olsem 30-fala taem long datfala naet. Why nao hem strongim tumas disfala fasin?
2. Why nao wei for showim love hem barava important for olketa Christian?
2 Jesus explainim why love hem important tumas. Hem sei: “From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.” (John 13:35; 15:12, 17) Wei for olsem follower bilong Christ hem barava join witim wei for showimaot love for olketa brata. Man fit for luksavve long olketa tru Christian, no from spesol kaen kaleko wea olketa werem or samfala difren kastom, bat from kaenfala love wea olketa showim long each other. Wei for garem disfala spesol love hem mek-tu long thrifala main mark wea eni disaepol bilong Christ mas garem wea iumi storyim long start bilong first study article. Wanem nao bae helpem iumi for go ahed for kasem disfala mark?
“Duim Long Wei wea Moa Big”
3. Wanem kaonsel saed long love nao aposol Paul hem givim?
3 Olsem olketa follower bilong Christ long first century, pipol distaem lukim tu disfala spesol love midolwan olketa tru disaepol bilong Christ. Aposol Paul raet olsem for olketa Christian long first century: “Long saed bilong love for olketa brata, iufala no needim mifala for raet kam long iufala, from God nao teachim iufala for lovem each other; and, tru nao, iufala duim long evri brata.” Nomata olsem, Paul sei moa: “Go ahed for duim long wei wea moa big.” (1 Thessalonians 3:12; 4:9, 10) Iumi tu need for followim kaonsel bilong Paul and waka hard for showim love long each other “long wei wea moa big.”
4. Olsem Paul and Jesus talem, iumi shud barava tingim hu?
4 Long sem leta, Paul encouragem olketa brata bilong hem for “tok kaen long olketa soul wea feel sorre” and for “saportim olketa wea wik.” (1 Thessalonians 5:14) Long narataem, hem talem moa long olketa Christian for olketa “wea strong mas acceptim wik point bilong olketa wea no strong.” (Romans 15:1) Jesus tu givim instruction saed long wei for helpem olketa wea wik. Bihaen hem sei hao Peter bae lusim hem long naet wea olketa arrestim hem, Jesus sei long Peter: “Taem iu kam bak, strongim olketa brata bilong iu.” Why nao olsem? Bikos olketa tu bae lusim Jesus so olketa bae needim help. (Luke 22:32; John 21:15-17) Dastawe, Word bilong God talem iumi for mekem grow love bilong iumi for olketa wea wik long spiritual wei and wea maet no kaban witim Christian kongregeson distaem. (Hebrews 12:12) Why nao iumi shud duim olsem? Tufala klia tokpiksa wea Jesus talem givim ansa long diswan.
Wanfala Sheep wea Lus and Wanfala Coin wea Lus
5, 6. (a) Wanem nao tufala short tokpiksa wea Jesus storyim? (b) Wanem nao olketa tokpiksa hia showimaot abaotem Jehovah?
5 For teachim olketa wea lisin long hem abaotem tingting bilong Jehovah long olketa wea lus, Jesus storyim tufala short tokpiksa. Wanfala hem abaotem wanfala shepherd. Jesus sei: “Hu long iufala wea garem wan handred sheep, wea taem wanfala hem lus, bae no leavim naenti-naen long wilderness and go luk aotem datwan wea lus go kasem taem wea hem faendem? And taem hem faendem finis hem karem long shoulder bilong hem and hapi. And taem hem kasem haos hem kolem tugeta olketa fren and neiba and sei long olketa, ‘Hapi witim mi, bikos mi faendem sheep bilong mi wea lus.’ Mi talem iufala, long sem wei tu moa hapi bae kamap long heven taem wanfala sinner hem repent winim naenti-naen raeteous wan wea no need for repent.”—Luke 15:4-7.
6 Mek-tu tokpiksa hem abaotem wanfala woman. Jesus sei: “Woman wea garem tenfala drachma coin, wea sapos wanfala drachma coin hem lus, bae hem laetem wanfala lamp and swipim haos bilong hem and lukluk gud go kasem taem hem faendem. And taem hem faendem hem kolem kam olketa woman wea fren and neiba bilong hem and sei, ‘Hapi witim mi, bikos mi faendem drachma coin wea mi lusim.’ Dastawe, mi talem iufala, olketa angel bilong God hapi taem wanfala sinner hem repent.”—Luke 15:8-10.
7. Wanem nao iumi savve lanem from tokpiksa abaotem sheep wea lus and coin wea lus?
7 Wanem nao iumi savve lanem from olketa short tokpiksa hia? Olketa showim iumi (1) feeling wea iumi shud garem for olketa wea kamap wik and (2) wanem iumi shud duim for helpem olketa. Bae iumi storyim tufala point hia.
Lus bat Garem Hae Price
8. (a) Hao nao datfala shepherd and datfala woman feel taem tufala lusim samting? (b) Hao nao samting wea tufala duim showimaot tingting bilong tufala abaotem samting wea lus?
8 Long tufala tokpiksa hia samting hem lus, bat lukim feeling bilong tufala wea ownim. Datfala shepherd no sei: ‘Wanfala sheep hem no important from mi still garem 99 narawan. Mi no needim datwan wea lus.’ Datfala woman no sei: ‘Mi no warim coin hia. Mi satisfae witim naenfala wea mi garem yet.’ Datfala shepherd luk aotem sheep bilong hem wea lus olsem datfala sheep nomoa only wan wea hem garem. And datfala woman ting long coin bilong hem olsem no eni nara coin moa stap. Long tufala taem hia, samting wea lus hem spesol long mind bilong datwan wea ownim. Wanem nao diswan showimaot?
9. Feeling bilong datfala shepherd and datfala woman piksarem wanem samting?
9 Tingim conclusion bilong Jesus long tufala story hia: “Long sem wei tu moa hapi bae kamap long heven taem wanfala sinner hem repent” and “dastawe, mi talem iufala, olketa angel bilong God hapi taem wanfala sinner hem repent.” Feeling bilong datfala shepherd and datfala woman piksarem long lelebet wei feeling bilong Jehovah and olketa angel long heven. Long sem wei samting wea lus hem spesol long eye bilong datfala shepherd and datfala woman, olketa wea isisi lus and no hipap moa witim pipol bilong God still spesol long eye bilong Jehovah. (Jeremiah 31:3) Olketa hia maet wik long spiritual wei, bat maet datwan no minim olketa bighed. Nomata olketa wik, long samfala wei olketa maet still followim olketa mark bilong Jehovah. (Psalm 119:176; Acts 15:29) So, olsem long bifor, Jehovah no “torowem olketa from front long feis bilong hem.”—2 Kings 13:23.
10, 11. (a) Hao nao iumi want for ting long olketa wea no kaban witim kongregeson distaem? (b) Olsem tufala tokpiksa bilong Jesus showim, hao nao iumi savve showimaot iumi tingim olketa?
10 Olsem Jehovah and Jesus, iumi tu wari long olketa wea wik and no stap long Christian kongregeson. (Ezekiel 34:16; Luke 19:10) Iumi ting long man wea wik long spiritual wei olsem wanfala sheep wea lus—no olsem samwan wea hard for helpem. Iumi no sei: ‘No warim man wea wik. Kongregeson go ahed gud nomoa nomata hem no stap.’ Iumi shud ting long olketa wea isisi go aot bat wea want for kam bak olsem hao Jehovah ting long olketa—olketa spesol.
11 So, hao nao iumi savve showimaot iumi tingim olketa? Tufala tokpiksa bilong Jesus showimaot hao iumi savve duim datwan taem iumi (1) duim samting firstaem, (2) kaen long olketa, and (3) duim samting witim feeling. Iumi bae lukluk long each wan long thrifala hia.
Duim Samting Firstaem
12. Wanem nao toktok “go luk aotem datwan wea lus” showim long iumi abaotem tingting bilong shepherd?
12 Long first tokpiksa, Jesus sei datfala shepherd bae “go luk aotem datwan wea lus.” Datfala shepherd nao duim samting firstaem for go faendem sheep wea lus. Hard samting, danger, and wei wea sheep hia maet stap farawe no stopem hem. Nomoa, datfala shepherd go ahed “go kasem taem hem faendem.”—Luke 15:4.
13. Wanem nao olketa faithful man bifor duim for olketa wik wan, and hao nao iumi savve followim olketa example olsem insaed long Bible?
13 Olsem tu, wei for helpem man wea needim encouragement hem planti taem needim datwan wea moa strong for duim samting firstaem. Olketa faithful man from taem bifor luksavve long diswan. Olsem example, taem Jonathan, son bilong King Saul, luksavve klos fren bilong hem David needim encouragement, Jonathan “getap and go long David long Horesh, mekem hem savve strongim hand bilong hem saed long God.” (1 Samuel 23:15, 16) Planti handred year bihaen, taem Governor Nehemiah lukim hao samfala Jew brata bilong hem feel wikdaon, hem “getap semtaem” and encouragem olketa ‘for tingim Jehovah.’ (Nehemiah 4:14) Iumi distaem tu want for ‘getap’—duim samting firstaem—for strongim olketa wea wik. Bat hu insaed kongregeson nao shud duim olsem?
14. Hu insaed Christian kongregeson nao shud reach aot for olketa wea wik?
14 Olketa Christian elder nao garem main responsibility for “strongim olketa hand wea wik . . . and mekem olketa leg wea seksek olketa strong” and “talem olketa wea wari long heart: ‘Mas strong. No fraet.’ ” (Isaiah 35:3, 4; 1 Peter 5:1, 2) Bat, lukim hao kaonsel bilong Paul for “tok kaen long olketa soul wea feel sorre” and for “saportim olketa wea wik” hem no for olketa elder nomoa. Toktok bilong Paul hem for full “kongregeson bilong olketa long Thessalonica.” (1 Thessalonians 1:1; 5:14) Dastawe, wei for helpem olketa wea wik hem assignment bilong evri Christian. Olsem shepherd insaed datfala tokpiksa, each Christian shud garem feeling for “go luk aotem datwan wea lus.” Man savve barava duim gud diswan sapos hem waka tugeta witim olketa elder. Waswe, iu savve duim samting for helpem wanfala wea wik insaed kongregeson bilong iu?
Kaen Long Olketa
15. Maet why nao datfala shepherd duim samting long wei wea hem duim?
15 Wanem nao datfala shepherd duim taem hem faendem datfala sheep wea lus? “Hem karem long shoulder bilong hem.” (Luke 15:5) Datwan hem loving and important information! Datfala sheep maet wakabaot for samfala day and naet insaed area wea hem no savve, and maet olketa lion ronem hem tu. (Job 38:39, 40) For sure datfala sheep hem wik bikos hem no kaikai. Hem wik tumas for winim olketa samting wea savve stopem hem taem hem trae for kam bak insaed long flock. So, datfala shepherd hem bendaon, isisi liftimap datfala sheep, and karem hem ovarem olketa samting wea stopem hem for go stap moa witim flock. Hao nao iumi savve showimaot kea olsem disfala shepherd?
16. Why nao iumi shud showimaot kaenfala fasin olsem shepherd showimaot long sheep wea go difren?
16 Man wea no kaban witim kongregeson maet taed fogud long spiritual wei. Olsem sheep wea separate from datfala shepherd, man olsem maet go raon olabaot insaed world wea raf. From hem no garem protection bilong datfala flock, wea hem nao Christian kongregeson, hem moa isi for Devil attakim hem, from hem “olsem wanfala lion wea singaot strong, and luk aotem [samwan] for kaikaim.” (1 Peter 5:8) And tu, hem kamap wik from hem no kasem spiritual kaikai. So, maet hem hard for hemseleva winim olketa hard samting wea hem bae feisim taem hem kakam bak long kongregeson. Dastawe, long tokpiksa wei, iumi need for bendaon, isisi liftimap datwan wea wik, and karem hem go bak. (Galatians 6:2) Hao nao iumi savve duim datwan?
17. Hao nao iumi savve followim example bilong aposol Paul taem iumi visitim samwan wea wik?
17 Aposol Paul hem sei: “Hu nao wik, and mi no wik?” (2 Corinthians 11:29; 1 Corinthians 9:22) Paul garem feeling for pipol, olketa wea wik tu. Iumi want for showimaot semkaen feeling for olketa wea wik. Taem iumi visitim wanfala Christian wea wik long spiritual wei, talem hem moa hao Jehovah tinghae tumas long hem and olketa brata and sista bilong hem barava missim hem. (1 Thessalonians 2:17) Talem hem hao olketa stanbae for givim hem saport and willing for kamap “wanfala brata wea born for taem bilong trabol.” (Proverbs 17:17; Psalm 34:18) Toktok bilong iumi wea kam from heart maet isisi encouragem hem gogo hem savve kam bak long flock. Wanem nao next samting iumi shud duim? Tokpiksa bilong woman wea coin bilong hem lus showimaot wanem iumi mas duim.
Duim Samting Witim Feeling
18. (a) Why nao datfala woman insaed tokpiksa hem savve hope hem stap? (b) Wanem hard waka nao woman hia duim, and wanem nao kamaot from datwan?
18 Woman wea lusim datfala coin savve hem no isi for faendem bat hope hem stap. Sapos datfala coin hem foldaon insaed wanfala big field or insaed deep lake wea mud, maet hem ting no eni hope stap for faendem nao. Bat, from hem savve datfala coin hem samwea insaed haos bilong hem, wea hem savve faendem, hem start for barava luk aotem. (Luke 15:8) Firstaem, hem laetem wanfala lamp for mekem haos garem laet. Then, hem iusim brum for swipim floor, and hope for herem noise bilong datfala coin taem hem rola long floor. Last samting, hem lukluk gud long evri kona bilong haos go kasem taem wea laet hia hem shaen go long wanfala silver coin. Hard waka bilong woman hia kasem reward nao!
19. Saed long wei for helpem olketa wea wik, wanem nao olketa leson wea iumi savve lanem from akson bilong woman insaed tokpiksa bilong coin wea lus?
19 Disfala part bilong tokpiksa mekem iumi tingim hao responsibility for helpem wanfala Christian wea wik hem no samting wea hard for iumi duim. Long semtaem, iumi luksavve hao man need for waka hard. Tru nao, aposol Paul sei olsem long olketa elder long Ephesus: “Thru long hard waka iufala mas helpem olketa wea wik.” (Acts 20:35a) Tingim hao datfala woman no faendem coin hia taem hem isisi luk raon long haos bilong hem samfala taem nomoa. Nomoa, hem barava luk aotem gud “go kasem taem hem faendem.” Olsem tu, taem iumi traem best for kasem bak samwan wea wik long spiritual wei, iumi need for duim witim wei for showimaot feeling and garem goal. Wanem nao iumi savve duim?
20. Wanem nao iumi savve duim for helpem olketa wea wik?
20 Hao nao iumi savve helpem man wea wik for buildimap faith and wei bilong hem for tinghae long samting? Wei for studyim wanfala Christian pablikeson wea fitim hem maet samting wea hem needim. Tru nao, wei for conductim wanfala Bible study evri week witim samwan wea wik hem mekem iumi fit for barava helpem hem. Maet service overseer nao best wan for disaedem hu nao for helpem hem. Maet hem givim idea long olketa subject for studyim and wanem pablikeson nao bae barava help. Olsem datfala woman insaed tokpiksa hem faendem datfala coin taem hem iusim olketa gudfala tul, iumi distaem tu garem olketa tul wea helpem iumi for fulfillim responsibility wea God givim for helpem olketa wea wik. Tufala niu tul, or pablikeson bilong iumi, bae barava help long diswan. Tufala nao Worshipim Datfala Only Tru God and Draw Close to Jehovah.a
21. Wei for helpem olketa wea wik hem mekem evriwan kasem wanem blessing?
21 Wei for helpem olketa wea wik givim blessing long evriwan. Datwan wea kasem help hem enjoyim hapi bilong wei for kaban moa witim olketa tru fren. Hapi wea iumi kasem from heart hem only kam from wei for give. (Luke 15:6, 9; Acts 20:35b) Full kongregeson hem grow saed long klos feeling for each other taem each member showimaot loving interest long narawan. And, winim evri samting, honor hem go long tufala loving Shepherd bilong iumi, Jehovah and Jesus, taem feeling bilong tufala for saportim olketa wea wik hem showaot long olketa servant bilong olketa long earth. (Psalm 72:12-14; Matthew 11:28-30; 1 Corinthians 11:1; Ephesians 5:1) Dastawe, iumi garem olketa gudfala reason for go ahed ‘garem love midolwan long iumiseleva’!
[Footnote]
a Olketa Jehovah’s Witness nao pablisim.
Waswe, Iu Savve Explainim?
• Why nao wei for showimaot love hem important for each wan long iumi?
• Why nao iumi shud showimaot love bilong iumi for olketa wea wik?
• Wanem nao iumi lanem from tokpiksa bilong sheep and coin wea lus?
• Wanem nao olketa gudfala samting wea iumi savve duim for helpem samwan wea wik?
[Olketa Piksa long page 16, 17]
Taem iumi helpem olketa wea wik, iumi duim samting firstaem, kaen and garem feeling
[Piksa long page 16, 17]
Wei for helpem olketa wea wik mekem evriwan kasem blessing