Hao Samfala Kasem Olketa Ansa
PLANTI million pipol prea. Samfala barava bilivim hao prea bilong olketa kasem ansa. Olketa narawan no sure sapos God herem prea bilong olketa. And samfala moa luk aotem ansa bat olketa no ting for askem God thru long prea.
Bible showimaot hao tru God hem “Man wea herem prea.” (Psalm 65:2) Sapos iu prea, waswe, iu sure iu prea long datfala tru God? Waswe, bae hem ansarem kaen prea bilong iu?
For planti pipol evriwea long earth, ansa hem yes! Hao nao olketa kasem ansa? Wanem nao olketa lanem?
God—Hu Nao Hem?
Wanfala skul teacher long Portugal wea kasem education from olketa nun and priest hem barava bilivim and followim religion bilong hem. Taem church hem change and lusim olketa biliv wea bifor olketa sei hem important, hem mekem hem konfius. From hem travel long nara kantri hem lukim samfala difren kaen wei for worship, and diswan mekem hem start for ting maet no wanfala tru God nomoa stap. Hao nao hem shud worship? Taem hem askem priest bilong hem abaotem samfala samting long Bible, hem no kasem ansa, and diswan mekem hem feel nogud.
Catholic church hem givimaot wanfala pepa long taon bilong datfala skul teacher for warnim olketa Catholic wea stap long there for no story witim Olketa Jehovah’s Witness. Bat olketa kwestin bilong hem still stap. Wanday, taem olketa Witness kam long door bilong hem, hem lisin long olketa and hem showaot hem interest long samting wea hem herem. Diswan hem firstaem for hem story witim olketa.
For kasem ansa for planti kwestin wea hem garem, disfala woman start for studyim Bible witim olketa Witness. Each week, hem redyim olketa kwestin for askem olketa. Hem laek for savve nem bilong God, sapos wanfala tru God nomoa stap, sapos hem acceptim wei for iusim image insaed worship, and planti moa samting. Hem lukim hao evri ansa wea hem kasem kam from Bible and no tingting bilong man seleva, so hem sapraes and hapi tumas long samting wea hem lanem. Gogo, hem kasem ansa for planti kwestin bilong hem. Distaem, hem worshipim Jehovah witim spirit and truth, wea hem samting Jesus Christ sei “olketa trufala worshiper” bae duim.—John 4:23.
Long Sri Lanka, wanfala famili evritaem readim Bible tugeta, bat olketa no savve kasem ansa for planti kwestin wea olketa tingim hem important. Nomata olketa needim help, priest bilong olketa no savve provaedem datwan. Bat, Olketa Jehovah’s Witness visitim datfala famili and givim olketa samfala Bible literature wea barava helpem olketa. Bihaen, taem Olketa Jehovah’s Witness ansarem olketa Bible kwestin long wei wea mekem datfala famili satisfae, olketa agree for duim Bible study. Olketa barava interest long samting olketa lanem insaed datfala study.
Nomata olsem, from hem followim teaching bilong church from taem hem pikinini yet, datfala waef faendem hard for acceptim hao Dadi bilong Jesus Christ hem nao “datfala only tru God,” olsem wanem Jesus seleva talem. (John 17:1, 3) Hem bin lanem teaching wea sei Jesus hem semsem witim Father and hao disfala teaching hem wanfala “secret” wea man mas no kwestinim. From hem garem honest heart and from no eni wei moa stap, hem prea long Jehovah, hem iusim nem bilong hem, and askem hem for showim hem hu nao Jesus. Then hem lukluk gud moa long olketa scripture wea story abaotem diswan. (John 14:28; 17:21; 1 Corinthians 8:5, 6) Hem olsem eye bilong hem wea blind hem open nao, hem lukim klia hao Jehovah—datfala Creator bilong heven and earth and datfala Dadi bilong Jesus Christ—hem nao datfala tru God.—Isaiah 42:8; Jeremiah 10:10-12.
Wei for Safa—Why?
Wei wea datfala man Job hem safa hem barava nara wei. Evri pikinini bilong hem dae insaed wanfala big wind, and hem kamap poor tumas. Hem safa tu from wanfala sik wea mekem hem pain tumas and hem kasem hevi from olketa giaman fren bilong hem. Midolwan evriting hia, Job hem talem samfala toktok wea no stret. (Job 6:3) Bat God tingim samting wea happen. (Job 35:15) Hem savve wanem nao insaed heart bilong Job and hem provaedem kaonsel wea Job needim. Hem duim sem samting for pipol distaem tu.
Long Mozambique, Castro hem just ten year nomoa taem mami bilong hem dae. Hem barava sorre tumas. Hem ask olsem: “Why nao hem mas dae and lusim mifala?” Nomata dadi and mami bilong hem biliv long God, hem barava konfius nao. Wanem nao bae mekem mind and heart bilong hem satisfae? Hem kasem comfort taem hem readim smol Bible bilong hem long Chichewa languis and for story raonem diswan witim olketa brata bilong hem wea big winim hem.
Gogo, Castro start for minim dat mami bilong hem dae, no from God no followim justice, bat from wei wea iumi man no perfect. (Romans 5:12; 6:23) Samting wea barava comfortim hem nao promis bilong Bible abaotem resurrection wea mekem hem feel sure hem bae lukim moa mami bilong hem. (John 5:28, 29; Acts 24:15) Sorre tumas from fofala year bihaen, dadi bilong hem dae tu. Bat long datfala taem Castro savve deal witim wei wea hem lusim dadi bilong hem. Distaem, hem lovem Jehovah and loyal for iusim laef bilong hem insaed service bilong God. Evriwan wea savve long hem isi for lukim hao hem barava hapi.
Planti pipol wea lusim samwan wea olketa lovem kasem comfort from olketa sem Bible truth wea givim comfort long Castro. Samfala wea kasem olketa nogud hard taem from samting wea wicked pipol duim ask olsem Job: “Why nao olketa wicked go ahed for laef ?” (Job 21:7) Taem pipol really lisin long ansa wea God talem insaed Word bilong hem, olketa lanem dat wei wea God deal witim samting hem bae mekem olketa kasem gud samting.—2 Peter 3:9.
Barbara, wea growap long United States, no experiencem olketa nogud samting insaed war. Bat hem growap long taem wea planti kantri long world go ahed for faet. Olketa report abaotem olketa nogud samting wea happen insaed war hem kamap long nius evriday. Taem hem go ahed skul, hem konfius from hem lanem hao olketa samting insaed history happen long wei wea olabaot. Wanem nao mekem olsem? Waswe, God kea abaotem samting wea happen? Hem biliv God hem stap, bat feeling bilong hem for God hem change olowe.
Bat, gogo tingting bilong Barbara abaotem laef hem change taem hem start for kaban witim Olketa Jehovah’s Witness. Hem lisin and studyim Bible witim olketa. Hem attendim olketa meeting long Kingdom Hall. And wantaem hem attendim wanfala bigfala convention bilong olketa. Nara samting tu, taem hem askem kwestin, hem lukim hao olketa nara Witness no talem olketa difren ansa. Winim datwan, evri Witness talem sem samting bikos tingting bilong evriwan hem garem faondeson long Bible.
Olketa Witness point go long pruv insaed Bible wea showimaot world hem stap anda long paoa bilong Devil Satan, wea hem nao ruler, and hao world showimaot spirit bilong hem. (John 14:30; 2 Corinthians 4:4; Ephesians 2:1-3; 1 John 5:19) Olketa explainim hao Bible talem finis hao olketa samting wea mekem hem konfius bae happen. (Daniel, chapter 2, 7, and 8) God hem talem finis hao olketa samting hia bae happen from hem savve lukim future sapos hem chus for duim datwan. Samfala samting, God nao mekem kamap. Olketa nara samting God letem nomoa for happen. Olketa Witness showim Barbara hao Bible talem finis tu olketa gud samting and nogud samting wea bae happen long taem bilong iumi and hem explainim tu mining bilong olketa samting hia. (Matthew 24:3-14) Olketa showim hem tu hao Bible promisim wanfala niu world wea raeteous fasin bae stap and wei for safa bae finis nao.—2 Peter 3:13; Revelation 21:3, 4.
Gogo, Barbara start for minim hao nomata Jehovah God no mekem olketa man for safa, hem no stopem wei for safa thru long wei for forcem olketa man for obeyim olketa komandment bilong hem sapos olketa les for duim. (Deuteronomy 30:19, 20) God mekem olketa arrangement for mekem iumi savve laef olowe and hapi, bat hem givim iumi chance distaem for showimaot sapos iumi bae live followim olketa raeteous wei bilong hem. (Revelation 14:6, 7) Barbara disaed for lane abaotem wanem God mas kasem from iumi and for live followim datwan. Hem faendem tu midolwan long Olketa Jehovah’s Witness kaen love wea Jesus sei olketa tru follower bilong hem bae garem.—John 13:34, 35.
Iu tu savve kasem gud samting from olketa arrangement wea helpem hem.
Laef wea Garem Mining
Nomata olketa wea luk olsem laef bilong olketa hem gud nomoa, olketa tu maet luk aotem ansa for olketa samting wea mekem olketa konfius. Olsem example, Matthew, wanfala young man long Britain, hem barava laek for faendem datfala tru God and purpose bilong laef. Dadi bilong hem dae taem Matthew hem 17 year. Bihaen datwan, Matthew kasem university degree saed long music. Then hem start for feelim hao wei for aftarem material samting hem iusles. Hem lusim hom bilong hem and go stap long London, and long there hem start for iusim olketa drug, go long naet club, lukluk long star for talem future, duim spiritism, and joinim lotu bilong Zen Buddhism and olketa narakaen teaching—evriting hia hem from hem luk aotem wanfala laef wea bae mekem hem satisfae. From no eni wei stap nao hem singaot long God for helpem hem faendem truth.
Tufala day bihaen, Matthew meetim wanfala fren bilong hem and explainim problem bilong hem. Datfala man hem bin study witim Olketa Jehovah’s Witness. Taem Matthew readim 2 Timothy 3:1-5, hem sapraes tumas hao Bible barava storyim samting wea happen long world. Taem hem readim datfala Sermon Long Maunten, diswan barava muvim heart bilong hem. (Matthew, chapter 5-7) Firstaem, hem hol bak from hem readim samfala buk wea tok spoelem Olketa Jehovah’s Witness, bat gogo hem disaed for attendim olketa meeting long wanfala Kingdom Hall wea stap klosap.
Matthew enjoyim samting wea hem herem and hem start for studyim Bible witim wanfala elder long kongregeson. Hem kwiktaem luksavve hao samting hem lanem hem nao samting wea hem luk aotem, diswan hem ansa long datfala firstfala prea bilong hem long God. Hem kasem olketa gud samting taem hem lusim wei for duim samting wea hem mekem Jehovah no hapi. Taem hem mekem grow gudfala wei for fraet long God, diswan muvim hem for changem laef bilong hem for followim olketa komandment bilong God. Matthew lanem hao kaen laef olsem garem really mining.—Ecclesiastes 12:13.
Wei wea Matthew and olketa narawan wea iumi read abaotem insaed disfala article olketa kasem laef wea mekem olketa satisfae, no kamap from God markem finis. Nomata olsem, olketa lane hao Jehovah God garem loving purpose wea evriwan wea hapi for obeyim olketa komandment bilong hem savve share insaed. (Acts 10:34, 35) Insaed datfala purpose hem laef olowe insaed wanfala world wea no eni war, sik and hangre, and dae tu. (Isaiah 2:4; 25:6-8; 33:24; John 3:16) Waswe, hem nao samting wea iu laekem? Sapos olsem, iu savve lane moa abaotem wei for faendem key for kasem laef wea satisfae taem iu attendim olketa meeting wea garem faondeson long Bible long olketa Kingdom Hall bilong Olketa Jehovah’s Witness. Mifala hapi for invaetem iu for duim datwan.
[Piksa long page 7]
Strong for prea long God long wei wea iusim nem bilong hem
[Piksa long page 7]
Studyim Bible witim olketa wea really teachim samting wea stap insaed
[Olketa Piksa long page 7]
Attendim olketa meeting long Kingdom Hall
[Piksa Credit Line long page 4]
Man wea wakabaot: Chad Ehlers/Index Stock Photography