“Lukim! Diswan Nao God Bilong Iumi”
Information insaed tufala study article hia kam from buk Draw Close to Jehovah, wea release long olketa distrik convention wea kamap evriwea raonem world long 2002/03.—Lukim article “Hem Fulimap Emti Spes Insaed Heart Bilong Mi,” long page 20.
“Lukim! Diswan nao God bilong iumi. Iumi hope long hem, and hem bae sevem iumi. Diswan hem Jehovah.”—ISAIAH 25:9.
1, 2. (a) Wanem nao Jehovah kolem datfala laen dadi Abraham, and wanem nao diswan maet mekem iumi for laek savve abaotem? (b) Hao nao Bible strongim long iumi hao iumi savve fren gud witim God?
“FREN bilong mi.” Hem nao hao Jehovah, Creator bilong heven and earth, hem kolem datfala laen dadi Abraham. (Isaiah 41:8) Tingim—wanfala man enjoyim wei for fren witim Sovereign Lord bilong universe! Maet iu laek savve, ‘Waswe, mi savve klos olsem long God?’
2 Bible strongim long iumi hao iumi savve kamap klos fren bilong God. Abraham hem garem disfala klos wei for fren bikos hem “putim faith long Jehovah.” (James 2:23) Distaem tu, Jehovah hem “fren klos witim olketa wea raeteous.” (Proverbs 3:32) Long James 4:8, Bible encouragem iumi: “Kam klos long God, and hem bae kam klos long iufala.” Hem klia, sapos iumi tekem olketa step for kam klos long Jehovah, hem bae duim olsem tu. Tru nao, hem bae kam klos long iumi. Bat waswe, disfala toktok from God minim iumi—olketa man wea sin, wea no perfect—mas tekem first step? Nomoa. Wei for fren klos witim Jehovah hem kamap only bikos loving God bilong iumi hem tekem tufala important step.—Psalm 25:14.
3. Jehovah tekem wanem tufala step for mekem iumi enjoyim wei for fren witim hem?
3 First step, Jehovah arrange for Jesus “givim soul bilong hem olsem ransom for baem bak planti pipol.” (Matthew 20:28) Datfala ransom sakrifaes mekem iumi fit for kam klos long God. Bible hem sei: “Saed long iumi, iumi love, bikos hem lovem iumi firstaem.” (1 John 4:19) Tru nao, from God “lovem iumi firstaem,” hem putim faondeson for iumi savve kamap fren bilong hem. Mek-tu step, Jehovah showim hemseleva long iumi. Eni wei for fren hem kamaot from wei for savve gud long man, for laekem and tinghae long fasin bilong hem. Tingim wanem nao diswan minim. Sapos Jehovah hem God wea haed, wea hard for man savve long hem, iumi bae kanduit klos long hem. Bat, winim wei for haedem hemseleva, Jehovah laekem iumi for savve long hem. (Isaiah 45:19) Insaed Word bilong hem, Bible, hem showim hemseleva long wei wea iumi fit for minim—wea pruvim hao hem lovem iumi, and, hao hem laekem iumi for savve and lovem hem olsem Dadi bilong iumi long heven.
4. Hao nao bae iumi feel abaotem Jehovah taem iumi savve gud long olketa fasin bilong hem?
4 Waswe, enitaem iu lukim wanfala smol pikinini hem pointim dadi bilong hem long olketa fren bilong hem and witim hapi hem praod for sei, “Dadi bilong mi nao datwan”? Olketa worshiper bilong Jehovah garem evri reason for garem datfala sem feeling abaotem Jehovah. Bible profesi abaotem wanfala taem wea faithful pipol bae sei: “Lukim! Diswan nao God bilong iumi.” (Isaiah 25:8, 9) Taem iumi kasem moa savve abaotem olketa fasin bilong Jehovah, iumi bae feelim wei wea iumi garem Dadi and klos Fren wea winim evriwan. Tru nao, wei for minim olketa fasin bilong Jehovah givim iumi planti reason for kam klos long hem. So bae iumi lukluk long hao Bible showimaot olketa main fasin bilong Jehovah—paoa, justice, wisdom, and love. Long disfala article, iumi bae storyim first thrifala long olketa fasin hia.
“Bigfala Paoa”
5. Why nao Jehovah seleva nomoa fit for garem nem “Olmaeti Wan,” and hem iusim bigfala paoa bilong hem long olketa wanem wei?
5 Jehovah garem “bigfala paoa.” (Job 37:23) Jeremiah 10:6 hem sei: “No eniwan olsem iu long eni wei, O Jehovah. Iu nambawan, and nem bilong iu hem maeti long bigfala wei.” No eniwan hem olsem Jehovah wea garem paoa evribit. Dastawe hem nomoa garem nem “Olmaeti Wan.” (Revelation 15:3) Jehovah iusim bigfala paoa bilong hem for create, distroe, protectim, and mekem samting kamap gud moa. Tingim tufala example nomoa—paoa bilong hem for creatim samting and protectim pipol bilong hem.
6, 7. Haomas paoa nao sun garem, and wanem important truth nao diswan showimaot?
6 Taem iu standap aotsaed long wanfala hot day, wanem nao iu feelim long skin bilong iu? Hot bilong sun. Bat, really samting wea iu feelim hem kam from paoa bilong Jehovah for creatim samting. Haomas paoa nao sun garem? Long midol bilong sun, hot bilong hem, hem samting olsem 15 million degree Celsius. Sapos iu tekem wanfala smol pis olsem hed bilong wanfala nila aot from midol bilong sun and putim hia long earth, iu bae need for standap 140 kilometer awe from datwan mekem hem no bonem iu! Evri second, sun hem givim aot energy wea semsem olsem taem planti handred million nuclear bomb olketa bosta. Nomata olsem, earth hem go raonem datfala maeti fire long barava stretfala distance. Sapos hem klosap tumas, wata wea stap long earth bae change for kamap air; sapos hem farawe tumas, evri wata bae kamap ice. Wei for stap klosap tumas or farawe tumas bae mekem no eniting fit for laef long planet bilong iumi.
7 Nomata laef bilong olketa hem depend evribit long sun, planti pipol ting nating long hem. So, olketa missim leson wea iumi savve lanem from sun. Psalm 74:16 sei olsem abaotem Jehovah: “Iu nao redyim datfala samting wea shaen, datfala sun.” Yes, sun hem givim glory long Jehovah, “Datwan wea Wakem heven and earth.” (Psalm 146:6) Bat sun hem wanfala nomoa long staka creation wea teachim iumi abaotem bigfala paoa bilong Jehovah. Taem iumi savve long moa samting abaotem paoa bilong Jehovah for creatim samting, iumi bae ting moa hae long Hem.
8, 9. (a) Wanem tokpiksa nao showimaot Jehovah willing for protectim and kea for olketa wea worshipim hem? (b) Long taem bilong Bible, wanem kaen kea nao shepherd savve givim long olketa sheep bilong hem, and wanem nao diswan teachim iumi abaotem Nambawan Shepherd bilong iumi?
8 Jehovah iusim tu bigfala paoa bilong hem for protectim and kea for olketa servant bilong hem. Bible iusim samfala naesfala klia tokpiksa for storyim promis bilong Jehovah for protectim pipol bilong hem. Olsem example, tingim Isaiah 40:11. Long there, Jehovah storyim hemseleva olsem wanfala shepherd and pipol bilong hem olsem olketa sheep. Scripture hem sei : “Olsem wanfala shepherd hem bae shepherdim olketa sheep bilong hem. Hem bae hipimap olketa pikinini sheep long hand bilong hem; and hem bae karem olketa klosap long heart bilong hem. Hem bae lukaftarem gud olketa wea still susu.” Waswe, iu savve lukim diswan long mind bilong iu?
9 Sheep no savve lukaftarem hemseleva. Long taem bilong Bible, shepherd mas no fraet for protectim sheep bilong hem from olketa wild dog, bear, and lion. (1 Samuel 17:34-36; John 10:10-13) Bat samfala taem wei for protectim olketa sheep hia minim for kaen and isisi. Olsem example, taem wanfala sheep bornem pikinini farawe from ples wea flock hem stap, hao nao bae shepherd protectim datfala baby sheep? Hem bae karem, maet for tu-thri day, “klosap long heart bilong hem”—insaed kaleko bilong hem. Bat, hao nao bae wanfala pikinini sheep gogo end ap klosap long heart bilong shepherd? Datfala pikinini sheep maet go long shepherd, and pressim hemseleva long leg bilong hem. Nomata olsem, datfala shepherd nao mas bendaon, pikimap datfala pikinini sheep, and putim klosap long heart bilong hem. Datwan hem barava naesfala wei for storyim willing wei wea Nambawan Shepherd bilong iumi hem protectim and kea for olketa servant bilong hem!
10. Wanem protection nao Jehovah provaedem distaem, and why nao kaen protection olsem hem moa important?
10 Jehovah hem duim moa samting winim wei for promis for protectim iumi nomoa. Long taem bilong Bible, hem showimaot long mirakol wei hao hem fit for “sevem pipol wea garem fasin for lovem God from test.” (2 Peter 2:9) Waswe long distaem? Iumi savve hem no iusim paoa bilong hem for protectim iumi from evri trabol distaem. Nomata olsem, hem provaedem samting wea moa important—spiritual protection. Loving God bilong iumi hem protectim iumi long spiritual wei taem hem givim iumi wanem iumi needim for stand strong long olketa test and for protectim wei for fren witim hem. Olsem example, Luke 11:13 hem sei: “Sapos iufala, nomata iufala wicked pipol, savve hao for givim gudfala present long olketa pikinini bilong iufala, Father bilong iufala long heven bae barava givim holy spirit long olketa wea askem hem!” Datfala strongfala spirit savve helpem iumi for deal witim eni test or problem wea iumi feisim. (2 Corinthians 4:7) So Jehovah keepim iumi laef, no for lelebet taem nomoa, bat for olowe. Sapos iumi tingim datwan, bae iumi ting long eni wei for safa long disfala system olsem hem “for lelebet taem and no big tumas.” (2 Corinthians 4:17) Iumi barava laek for kam klos long wanfala God wea iusim paoa bilong hem long loving wei for helpem iumi!
“Jehovah Hem Lovem Justice”
11, 12. (a) Why nao justice bilong Jehovah mekem iumi feel klos long hem? (b) Wanem nao David luksavve long hem saed long justice bilong Jehovah, and hao nao diswan hem comfortim iumi?
11 Jehovah hem duim wanem hem stret and no favorim eniwan, and hem duim diswan evritaem. Justice bilong Jehovah hem no fasin wea no showimaot feeling for narawan wea mekem iumi fraet long hem, bat hem naesfala fasin wea mekem iumi feel klos long Jehovah. Bible storyim long kliafala wei hao disfala fasin hem muvim heart bilong man. Bae iumi lukim thrifala wei wea Jehovah showimaot justice bilong hem.
12 Firstaem, justice bilong Jehovah muvim hem for showim faithful and loyal fasin long olketa servant bilong hem. David wea raetem psalm hem minim and experiencem disfala saed bilong justice bilong Jehovah. From samting wea David experiencem and from hem lukluk gud long olketa wei bilong God, wanem nao David luksavve long hem? Hem sei: “Jehovah hem lovem justice, and hem bae no lusim olketa loyal wan bilong hem. Hem bae gardim olketa for olowe.” (Psalm 37:28) Datwan hem barava givim comfort! No enitaem God bilong iumi bae lusim olketa wea loyal long hem. So, iumi savve depend long loving kea bilong hem and wei wea hem fren witim iumi. Diswan bae olsem bikos long Justice bilong hem!—Proverbs 2:7, 8.
13. Hao nao wei wea Jehovah tingim olketa wea safa hem showaot klia insaed Law wea hem givim long Israel?
13 Mek-tu, justice bilong God hem barava tingim need bilong olketa wea safa. Interest wea Jehovah garem for olketa wea safa hem showaot klia long Law wea hem givim long Israel. Olsem example, Law mekem spesol arrangement for lukaftarem olketa pikinini wea no garem dadi and mami and olketa widow. (Deuteronomy 24:17-21) From hem luksavve hao laef hem savve hard tumas for olketa famili olsem, Jehovah seleva olsem dadi bilong olketa kamap Judge and Datwan wea Protectim olketa. (Deuteronomy 10:17, 18) Hem warnim olketa Israelite hao sapos olketa treatim nogud olketa woman and pikinini wea no savve defendim seleva, hem bae barava herem krae bilong olketa hia. Hem sei long Exodus 22:22-24: “Kros bilong mi bae barava kamap big.” Nomata kros hem no wanfala main fasin bilong Jehovah, wei for min for duim samting wea no followim justice savve muvim hem for feelim kros wea raeteous, especially sapos man duim long olketa wea isi for spoelem.—Psalm 103:6.
14. Wanem nambawan pruv nao showimaot Jehovah no teksaed?
14 Mek-thri, long Deuteronomy 10:17, Bible strongim long iumi hao Jehovah “no favorim eniwan and no acceptim bribe.” Olketa riches or lukluk bilong man no affectim Jehovah, wea difren from planti man wea garem paoa. Hem no saedem or favorim eniwan. Wanfala nambawan pruv wea showimaot Jehovah no teksaed hem diswan: Chance for kamap olketa tru worshiper bilong hem, witim hope for laef olowe, hem no for tu-thri spesol pipol nomoa. Bat, Acts 10:34, 35 hem sei: “God hem no saed witim eniwan, bat long evri nation man wea fraet long hem and duim raeteous fasin nao hem acceptim.” Disfala hope hem open for evriwan nomata wanem living olketa garem, kala skin, or kantri olketa stap insaed. Datwan hem barava trufala justice! Yes, wei for minim gud justice bilong Jehovah mekem iumi feel klos long hem!
“Wisdom . . . Bilong God Hem Deep Tumas!”
15. Wanem nao wisdom, and hao nao Jehovah showimaot?
15 Samting aposol Paul lukim muvim hem for talemaot toktok long Romans 11:33: “Wisdom and savve . . . bilong God hem deep tumas!” Taem iumi ting raonem olketa difren saed bilong bigfala wisdom bilong Jehovah, diswan mekem iumi ting moa hae long hem. Bat, hao nao bae iumi explainim disfala fasin? Wisdom hem iusim savve, fasin for luksavve, and fasin for minim samting, for kasem samting wea man wantem. Taem Jehovah iusim bigfala savve bilong hem and deepfala wei for minim samting, hem evritaem mekem olketa best disison, and duim wanem hem disaedem long best wei.
16, 17. Hao nao olketa creation bilong Jehovah pruvim bigfala wisdom bilong Hem? Givim example.
16 Wanem nao samfala pruv wea showimaot Jehovah garem bigfala wisdom? Psalm 104:24 hem sei: “Olketa waka bilong iu planti tumas, O Jehovah! Evriwan long olketa iu wakem long wisdom. Earth hem fulap witim olketa samting wea iu wakem.” Tru nao, taem iumi lanem moa samting abaotem olketa creation bilong Jehovah, iumi sapraes tumas long wisdom bilong Hem. Tingim diswan, olketa scientist lanem staka samting taem olketa studyim olketa creation bilong Jehovah! Wanfala part bilong engineering hem biomimetics, wea olketa trae for copyim olketa design bilong creation.
17 Olsem example, maet iu savve lukim haos bilong spider. Hem barava nambawan samting saed long design. Nomata olketa smol string bilong hem, olketa moa strong winim olketa smol string insaed kaleko for stopem bullet. Wanem nao diswan minim? Tingim sapos spiderweb hem kamap big olsem fishing net long olketa fishing ship. Spiderweb olsem fit for stopem wanfala passenger plane wea flae full speed! Tru nao, Jehovah wakem evriting “long wisdom.”
18. Hao nao wisdom bilong Jehovah hem showaot long wei wea hem iusim olketa man for raetem Word bilong hem Bible?
18 Nambawan pruv bilong wisdom bilong Jehovah hem stap insaed Word bilong hem Bible. Wisefala kaonsel insaed showim long iumi best wei bilong living. (Isaiah 48:17) Bat iumi savve lukim nambawan wisdom bilong Jehovah long wei wea olketa raetem Bible. Hao nao olsem? From hem wise, Jehovah chusim olketa man for raetem Word bilong hem. Sapos hem iusim olketa angel for raetem Word bilong hem, waswe, Bible bae olsem wan wea iumi garem distaem? Hem tru, olketa angel savve storyim Jehovah from deepfala wei wea olketa minim and savve long hem and talemaot love wea olketa garem for hem. Bat waswe, bae iumi fit for really minim tingting bilong olketa perfect spirit creature wea garem savve, experience, and wea strong bilong olketa hem moa hae winim iumi?—Hebrews 2:6, 7.
19. Wanem example nao showimaot wei for iusim olketa man for raetem Bible hem mekem Bible barava muvim feeling and pipol laek tumas for readim?
19 From olketa man nao raetem, Bible barava savve muvim feeling and pipol laek tumas for readim. Olketa man wea raetem garem olketa feeling olsem iumi. From olketa no perfect, olketa feisim olketa test and hevi wea iumi tu feisim. Samfala long olketa raetem feeling and wei for stragol wea olketa seleva experiencem. (2 Corinthians 12:7-10) So olketa raetem toktok wea no eni angel fit for talem. Olsem example, tingim toktok bilong David long Psalm 51. Toktok long start bilong disfala chapter sei David raetem disfala psalm bihaen hem duim bigfala sin. Hem talemaot wanem hem stap long heart bilong hem, talemaot bigfala sorre and begim God for forgivim hem. Verse 2 and 3 sei: “Wasim mi evribit from rong bilong mi, and klinim mi from sin bilong mi. From mi savve long olketa rong bilong mi, and sin bilong mi stap front long mi evritaem.” Lukim verse 5: “Lukim! Mi born kam long sin witim pain, and mami bilong mi karem mi witim sin.” Verse 17 sei moa: “Olketa sakrifaes long God hem wanfala spirit wea brek, wanfala heart wea brek and pisis, O God, iu bae no lukdaonem.” Waswe, iu savve feelim bigfala sorre bilong man wea raetem diswan? Man wea no perfect nomoa savve talemaot olketa feeling olsem!
20, 21. (a) Nomata olketa man nao raetem Bible, why nao iumi fit for sei Bible garem wisdom bilong Jehovah? (b) Wanem nao bae iumi storyim insaed next article?
20 Thru long wei wea hem iusim olketa man wea no perfect, Jehovah provaedem wanem iumi needim—wanfala buk wea “kam from God” bat wea man savve isi for minim. (2 Timothy 3:16) Tru nao, holy spirit directim olketa wea raetem Bible. So wisdom bilong God nao olketa raetem and no bilong olketa seleva. Man fit for trustim datfala wisdom evribit. From wisdom hia hem barava hae winim wisdom bilong iumiseleva, long loving wei God encouragem iumi: “Trustim Jehovah witim full heart bilong iu and no depend long savve bilong iuseleva. Long evri samting iu duim, lisin long hem, and hemseleva nao bae stretem gogo bilong iu.” (Proverbs 3:5, 6) Taem iumi followim wise disfala advaes, iumi bae kamap moa klos long God bilong iumi wea wise evribit.
21 Datfala fasin bilong Jehovah wea nambawan and barava pullim man long hem nao hem love. Iumi bae storyim hao Jehovah showimaot love insaed next article.
Waswe, Iu Savve Remember?
• Olketa wanem step nao Jehovah tekem for mekem iumi fit for fren gud witim hem?
• Wanem nao samfala example bilong paoa bilong Jehovah for creatim and protectim pipol bilong hem?
• Jehovah showimaot justice bilong hem long olketa wanem wei?
• Hao nao wisdom bilong Jehovah showaot from creation bilong hem and from Bible?
[Piksa long page 10]
Olsem shepherd wea karem pikinini sheep klos long heart bilong hem, Jehovah kea for olketa sheep bilong Hem long wei wea kaen and isisi
[Piksa long page 13]
Wei wea olketa raetem Bible showimaot wisdom bilong Jehovah