Report Bilong Olketa wea Talemaot Kingdom
Gud Samting Kamaot From Patient Fasin and Wei for No Givap
JESUS CHRIST talemaot hao long olketa last day “love bilong planti pipol bae kamap cold.” From diswan, evriwea long world distaem, pipol no interest long gud nius bilong Kingdom. Samfala barava heitim religion.—Matthew 24:12, 14.
Nomata olsem, witim faith and patient fasin, olketa Kingdom pablisa win for feisim disfala challenge olsem disfala experience from Czech Republic showimaot.
Tufala Witness story long wanfala woman wea stap bihaen door wea sat. Bihaen lelebet taem, datfala door open, wanfala hand nomoa kamaot and holem kwiktaem olketa Wastaoa and Wekap! magasin wea tufala Witness hia offerim. Hem sei “thankiu,” and satem door. Olketa Witness no sure, “Waswe, bae iumi kol bak?” Wanfala long olketa, wea hem wanfala pioneer, or full-taem minister, disaed for go bak, bat sem samting happen moa, and diswan go ahed for wan year.
From hem disaed hem shud changem story bilong hem, datfala pioneer prea long Jehovah for help. Next taem hem go givim olketa magasin, hem askem olketa kaenfala kwestin long datfala woman: “Waswe, iu olraet? Waswe, iu enjoy for readim olketa magasin?” Firstaem, no eni ansa, bat bihaen samfala visit moa, datfala woman start for fren lelebet. Wantaem hem openem door big, bat hem story for shortfala taem nomoa.
From hem lukim woman hia no willing for story front long door, datfala pioneer disaed for raetem wanfala leta for explainim purpose bilong olketa visit hia and for offerim wanfala hom Bible study. Bihaen wan year and haf bilong patient fasin, datfala pioneer win for startim wanfala Bible study witim datfala haosholder. Hem sapraes bat hem hapi taem datfala woman talem hem bihaen: “Mi biliv long God from taem wea iu start for givim mi olketa magasin.”
Tru tumas, hapi samting savve kamaot from patient fasin and wei for no givap insaed long Kingdom preaching and waka for mek disaepol.—Matthew 28:19, 20.