Kwestin From Reader
Jehovah letem wei for garem winim wanfala waef long olketa servant bilong hem bifor, olketa Israelite, bat distaem hem no letem diswan. Waswe, standard bilong hem savve change?
Jehovah hem no changem tingting bilong hem abaotem wei for garem winim wanfala waef. (Psalm 19:7; Malachi 3:6) Hem no part long first arrangement bilong hem for olketa man, and hem no arrangement bilong hem distaem tu. Taem hem creatim Eve olsem waef for Adam, Jehovah talem hao standard bilong hem nao hem wanfala waef for wanfala hasband. “Dastawe man bae lusim dadi and mami bilong hem and hem mas stap witim waef bilong hem and tufala mas kamap wan body.”—Genesis 2:24.
Taem Jesus Christ stap long earth, hem talem moa disfala standard for ansarem olketa wea askem hem abaotem divorce and wei for marit moa. Hem sei: “Waswe, iufala no readim hao man wea creatim tufala firstaem hem mekem tufala man and woman and sei, ‘For disfala reason nao wanfala man bae lusim dadi and mami bilong hem and stap witim waef bilong hem, and tufala bae kamap wanfala body’? So, distaem olketa no tufala bat wanfala body.” Jesus sei moa: “Eniwan wea divorcem waef bilong hem, wea no bikos long fornication, and maritim narawan hem duim adultery.” (Matthew 19:4-6, 9) From diswan, hem klia hao for tekem winim wanfala waef hem adultery.
So why nao God letem wei for garem winim wanfala waef long olketa taem bifor? No forget hao Jehovah no startim disfala wei. Firstfala man wea Bible storyim wea garem winim wanfala waef hem Lamech, wea hem kam from laen bilong Cain. (Genesis 4:19-24) Taem Jehovah bringim kam datfala Flood long taem bilong Noah, Noah and each wan long thrifala son bilong hem garem wanfala waef nomoa. Evriwan wea garem winim wanfala waef finis evribit long datfala Flood.
Planti handred year bihaen, taem Jehovah chusim olketa Israelite olsem pipol bilong hem, samfala garem finis winim wanfala waef, bat staka garem wanfala waef nomoa. God no laekem olketa famili for divaed taem man garem winim wanfala waef. Bat, hem putim strict law for kontrolem diswan.—Exodus 21:10, 11; Deuteronomy 21:15-17.
Iumi lukim wei wea God letem wei for garem winim wanfala waef hem for shortfala taem nomoa, long wanem Jesus talem abaotem firstfala mark bilong Jehovah for marit, and tu, long wanem holy spirit bilong God muvim aposol Paul for raetem. Hem sei: “Letem evri man garem waef bilong hemseleva and evri woman garem hasband bilong hemseleva.” (1 Corinthians 7:2) Holy spirit muvim Paul tu for raetem hao eni man wea kasem appointment olsem wanfala overseer or wanfala ministerial servant insaed Christian kongregeson “mas garem wanfala waef nomoa.”—1 Timothy 3:2, 12; Titus 1:6.
Dastawe, wei wea Jehovah letem wei for garem winim wanfala waef hem finis taem Christian kongregeson hem start long samting olsem 2,000 year bifor. Long datfala taem, standard bilong God saed long marit hem go bak moa olsem long firstaem wea God creatim man and woman: wanfala hasband, wanfala waef. Hem nao standard wea pipol bilong God long full world followim distaem.—Mark 10:11, 12; 1 Corinthians 6:9, 10.