Hao for Strongim Marit Bilong Iu

TINGIM wanfala haos wea olketa no keepim gud. Paint hem aot, ruf nogud, and raonem haos hem bushes tu. Hem klia hao haos hia kamap nogud from raf weather insaed olketa year wea go pas, and from pipol no keepim gud. Waswe, fitim for bonem haos hia? Maet nomoa. Sapos faondeson and walling hem strong, haos savve kamap gud bak moa.

Waswe, haos hia mekem iu tingim marit bilong iu? Insaed olketa year wea go pas, maet long tokpiksa wei, raf weather affectim marit bilong iu. Maet wanfala long iutufala or iutufala evriwan lelebet garem blame for wei for no keepim gud marit bilong iutufala. Maet iu feel olsem Sandy. Bihaen 15 year bilong marit, hem sei: “Only samting mitufala semsem long hem, hem wei wea mitufala marit long each other. And datwan no inaf.”

Nomata sapos marit bilong iu kamap olsem, no kwiktaem sei marit shud finis nomoa. Marit bilong iu savve kamap gud bak moa. Diswan depend long bigfala wei long hao big nao wei wea iutufala want for strongim bak and keepim gud marit bilong iutufala. Feeling for keepim gud datfala marit savve help for mekem marit stedy long olketa hardfala taem. Bat wanem nao feeling for want for keepim gud wanfala marit? And hao nao Bible savve helpem iu for strongim disfala feeling?

Feeling for Want for Keepim Gud Marit Hem Minim Responsibility

Feeling for want for keepim gud marit hem join witim “wei for savve iu mas duim samting or garem feeling for mas duim.” Olsem example, wanfala carpenter maet feel hem mas fulfillim wanfala kontrak for buildim wanfala haos. Maet hem no savve long man wea givim hem datfala waka. Bat, hem feel hem mas fulfillim evriting insaed datfala kontrak.

Nomata marit hem no bisnis kontrak, wei wea iu disaed strong and barava want for keepim gud marit hem minim iu mas garem tu feeling for fulfillim datfala responsibility. Iu and marit partner bilong iu promis finis front long God and pipol for stap tugeta, nomata wanem happen. Jesus hem sei: “Man wea creatim tufala firstaem hem mekem tufala man and woman and sei, ‘For disfala reason nao man bae lusim dadi and mami bilong hem and stap witim waef bilong hem.’ ” Jesus sei moa: “Samting wea God joinim tugeta no eni man mas divaedem.” (Matthew 19:4-6) So taem olketa problem kamap, iu and marit partner bilong iu shud disaed strong for fulfillim promis wea iutufala talem long each other.a Wanfala waef sei: “Marit bilong mitufala start for kamap gud only bihaen mitufala finis for tingim divorce olsem wanfala wei for stretem.”

Bat feeling for keepim gud marit hem no just for fulfillim responsibility. Wanem moa hem insaed diswan?

Wei for Waka Gud Tugeta Strongim Feeling for Want for Keepim Gud Marit

Feeling for want for keepim gud marit hem no minim tufala marit partner bae agree witim each other evritaem. Taem raoa kamap, tufala shud want for stretem problem no just from tufala mas keepim marit promis bat bikos tufala want for mekem narawan hapi. Abaotem hasband and waef, Jesus hem sei: “Olketa no tufala bat wanfala body.”

Wanem nao hem minim for iu “wanfala body” witim marit partner bilong iu? Aposol Paul raet hao “olketa hasband mas lovem waef bilong olketa olsem olketa seleva.” (Ephesians 5:28, 29) So “wanfala body” hem minim tu wei for kea for hapi bilong marit partner bilong iu long sem wei iu kea for hapi bilong iuseleva. Pipol wea marit need for changem wei for tingting; winim wei for garem tingting “bilong mi” or “mi,” olketa need for garem tingting “bilong mitufala” or “mitufala.” Woman for givim kaonsel hem raet: “Tufala marit partner mas finis for garem tingting and feeling olsem singol pipol and start for olsem marit pipol.”

Waswe, iu and marit partner bilong iu “marit long tingting and feeling”? Hasband and waef savve marit for staka year bat no “wanfala body” saed long tingting and feeling. Hem tru, diswan savve happen, bat buk Giving Time a Chance hem sei: “Marit hem minim wei for sharem laef. So marit bae barava hapi and strong taem tufala duim and sharem planti samting tugeta.”

Samfala hasband and waef wea no hapi insaed marit stap tugeta for olketa pikinini bilong olketa or saed long selen. Olketa narawan no givap from divorce hem againstim biliv bilong olketa or from olketa fraetem wanem pipol bae tingim sapos olketa separate. Wei wea man no givap olsem hem gud, bat remember, goal bilong iu hem no for garem marit wea no finis nomoa, bat wea garem love insaed.

Wei for No Selfish Strongim Feeling for Want for Keepim Gud Marit

Bible talem finis hao insaed “olketa last day” pipol bae “lovem seleva.” (2 Timothy 3:1, 2) Olsem profesi hia talem, pipol distaem mekhae long wei for satisfaem seleva. Insaed staka marit, pipol tingim wei for givim olketa seleva and no expectim eniting bak minim man hem wik. Bat, insaed wanfala strong marit, tufala evriwan bae showimaot spirit for sakrifaesim seleva. Hao nao iu savve duim olsem?

Winim wei for ask, ‘Wanem nao mi kasem from disfala marit?’ askem iuseleva, ‘Wanem nao mi duim for strongim marit bilong mi?’ Bible hem sei olketa Christian shud “no interest long olketa samting bilong [olketa] seleva nomoa, bat interest long olketa samting bilong narafala pipol tu.” (Philippians 2:4) Taem iu ting raonem Bible principle hia, ting raonem gud wanem nao iu duim insaed week wea go pas. Haomas taem nao iu kaen long marit partner from iu laek mekem hem hapi? Taem partner bilong iu laek story, waswe, iu lisin—nomata iu no mas interest for lisin? Haomas samting nao iu duim wea hem really samting wea partner bilong iu nao interest long hem?

Taem iu ting raonem olketa kwestin olsem, no wari sapos partner bilong iu no luksavve long gud samting iu duim. Wanfala buk sei: “Insaed staka marit, wei for duim gud samting bae muvim narawan for duim sem samting bak, so duim best bilong iu for duim gud samting firstaem and diswan bae encouragem marit partner for duim sem samting bak.” Wei for sakrifaesim seleva savve strongim marit bilong iu bikos hem showimaot iu tinghae long marit bilong iu and laek for keepim gud.

Hem Important Tumas for Tingim Marit Olsem Samting for Olowe

Jehovah God tinghae long loyal fasin. Tru nao, Bible sei: “Iu [Jehovah] bae duim samting long loyal wei long man wea loyal.” (2 Samuel 22:26) For stap loyal long God hem join witim wei for stap loyal long marit arrangement wea hem startim.—Genesis 2:24.

Sapos iu and marit partner bilong iu loyal long each other, iutufala bae kasem gud feeling hao marit bilong iutufala bae no savve finis. Taem iu tingim future, iu lukim iutufala tugeta. Hem hard for tingim hao maet iutufala savve lusim each other long future, and tingting olsem mekem marit stap strong. Wanfala waef sei: “Nomata taem mi kros fogud long [hasband bilong mi] and mi barava feel nogud long samting wea happen midolwan mitufala, mi savve marit bilong mitufala bae no finis. Mi wari abaotem hao for mitufala fren gud bak. Mi nating daot hao mitufala bae gud bak moa—Mi just no savve hao for duim datwan long datfala taem.”

Saed long wei for want for keepim marit gud, important samting nao hem for ting long marit olsem samting for olowe, bat sorre tumas, staka marit short long diswan. Long taem tufala raoa, maet hasband or waef singaot, “Mi bae lusim iu!” or, “Mi bae faendem samwan wea tinghae long mi!” Hem tru, staka taem man no really min for talem toktok olsem. Nomata olsem, Bible sei tongue savve “fulap witim olketa poison for killim man dae.” (James 3:8) For singaot and sei iu bae lusim partner sapos hem no duim samting, hem olsem iu sei: ‘Mi no ting long marit bilong iumi tufala olsem samting for olowe. Mi savve lusim iu enitaem.’ For givimaot message olsem savve spoelem marit.

Taem iu ting long marit olsem samting for olowe, iu garem tingting for stap witim marit partner bilong iu nomata wanem hard samting kamap. Diswan bae help long nara wei tu. Hem bae mekem moa isi for iu and marit partner bilong iu for acceptim olketa wik point and mistek and for go ahed for patient witim each other and willing for forgivim each other. (Colossians 3:13) Wanfala buk sei: “Insaed gudfala marit, chance stap for iutufala fail, and for marit stap strong nomata datwan kamap.”

Long wedding day bilong iu, iu talem promis, no long marit arrangement, bat long wanfala person—marit partner bilong iu. Diswan shud barava affectim tingting and samting iu duim olsem marit man. Waswe, iu agree hao iu shud stap witim marit partner bilong iu no from iu biliv strong long wei wea marit hem holy nomoa bat tu, from iu lovem datwan iu maritim?

[Footnote]

[Box/Piksa long page 5]

Wanem Iu Savve Duim Distaem

Hao strong nao feeling bilong iutufala for laek keepim gud marit? Maet iu ting hem need for kamap moabeta. For strongim wei wea iu want for keepim gud marit, traem olketa idea hia:

● Lukluk gud long iuseleva. Askem iuseleva: ‘Waswe, mi marit long tingting and feeling, or mi still ting and duim samting olsem singol man?’ Faendaot hao nao marit partner bilong iu ting long iu long diswan.

● Readim article hia witim marit partner bilong iu. Then, long naesfala wei, story tugeta abaotem olketa wei wea iu savve strongim wei wea iutufala laek keepim gud marit bilong iutufala.

● Duim tugeta olketa samting wea savve strongim wei wea iutufala laek keepim gud marit bilong iutufala. Olsem example: Lukim olketa wedding foto bilong iutufala and olketa nara taem wea naes for rememberim. Duim olketa samting wea iutufala savve enjoy for duim taem iutufala fren yet or taem iutufala just marit. Studyim tugeta olketa article from Wastaoa and Wekap! wea join witim marit.

[Box/Piksa long page 6]

Insaed Marit, Wei for Want for Keepim Gud Marit Hem Minim . . .

● Responsibility “Samting iu promisim, duim. Moabeta for iu no mekem spesol promis winim wei for mekem spesol promis and no keepim.”—Ecclesiastes 5:4, 5.

● Waka Tugeta “Tufala hem moabeta winim wanfala . . . From sapos wanfala long tufala hem foldaon, narawan savve helpem partner bilong hem for standap.”—Ecclesiastes 4:9, 10.

● Sakrifaesim Seleva “Moa hapi kamaot from wei for give winim wei for kasem.”—Acts 20:35.

● Ting Long Hem Olsem for Olowe “Love . . . hem stand strong long evri samting.”—1 Corinthians 13:4, 7.

[Olketa Piksa long page 7]

Taem marit partner bilong iu laek story, waswe, iu lisin?