“Kam Klos Long God, and Hem Bae Kam Klos Long Iufala”
Bifor and Bihaen—Hao Bible Changem Wanfala Man
MUSIC kamap barava important samting long laef bilong Rolf-Michael. Hem laekem tumas olketa drug. Olsem wanfala young wan long Germany, hem drinkim tumas alcohol and iusim evritaem LSD, cocaine, hashish, and samfala drug moa wea savve affectim mind.
Taem hem trae for tekem haed samfala drug go insaed wanfala kantri long Africa, olketa arrestim hem and putim hem long prison for 13-fala month. Datwan givim hem taem for tingting abaotem really purpose long laef.
Rolf-Michael and waef bilong hem, Ursula, barava strong for luk aotem truth and mining bilong laef. Nomata samfala samting happen saed long olketa church wea sei olketa Christian wea mekem tufala feel nogud, tufala garem strong feeling for laek savve long God. Bat tufala garem olketa kwestin wea olketa difren kaen grup bilong religion no savve givim eni gud ansa for hem. Nara samting moa, olketa religion hia nating givim eni strong reason for changem living bilong olketa.
Gogo, Rolf-Michael and Ursula meetim Olketa Jehovah’s Witness. Bihaen tufala studyim Bible, disfala kaonsel barava muvim Rolf-Michael: “Kam klos long God, and hem bae kam klos long iufala.” (James 4:8) Hem barava want for ‘lusim oldfala fasin wea living bilong hem bifor hem followim and werem niufala fasin, wea God wakem fitim will bilong Hem long trufala raeteous fasin and loyal fasin.’—Ephesians 4:22-24.
Hao nao bae Rolf-Michael werem datfala niufala fasin? Hem lukim long Bible hao “thru long stretfala savve” fasin bilong wanfala man fit “for kamap niu fitim image bilong Datwan wea creatim,” hem nao, Jehovah God.—Colossians 3:9-11.
Taem hem start for kasem stretfala savve, Rolf-Michael trae for stretem living bilong hem for fitim olketa principle long Word bilong God. (John 17:3) Hem hard for Rolf-Michael finis for iusim olketa drug, bat hem luksavve hao hem barava important for go long Jehovah thru long prea and kasem help bilong hem. (1 John 5:14, 15) Hem kasem help tu from wei for kaban long klos wei witim olketa wea kamap Witness bilong Jehovah, wea waka hard for duim will bilong God.
For savve hao world bae finis and olketa wea duim will bilong God bae stap olowe helpem hem tu. Datwan helpem hem for chusim, no wei for lovem world wea for short taem nomoa, bat blessing for olowe wea hem nao for fren long klos wei witim loving God, Jehovah. (1 John 2:15-17) Samting wea barava muvim heart bilong Rolf-Michael hem datfala toktok bilong Proverbs 27:11: “Kamap wise, son bilong mi, and mekem heart bilong mi hapi, mekem mi givim ansa long wan wea tok spoelem mi.” Witim feeling for tinghae hem sei: “Disfala verse hem showimaot deep bilong love bilong Jehovah, from hem givim chance long olketa man for mekem heart bilong hem hapi.”
Planti handred thousand kasem gud samting thru long wei for followim olketa Bible principle, olsem Rolf-Michael, waef bilong hem and thrifala pikinini bilong tufala. Insaed olketa kongregeson bilong Olketa Jehovah’s Witness raonem world pipol olsem stap. Sorre tumas, long samfala kantri pipol sei olketa Witness hem wanfala danger sect wea savve divaedem olketa famili. Samting wea happen long Rolf-Michael pruvim hao datwan hem no tru.—Hebrews 4:12.
Rolf-Michael sei Matthew 6:33, wea encouragem iumi for tingim firstaem olketa spiritual samting, hem nao “compass” bilong famili bilong hem, wea leadim olketa long stretfala wei. Hem and famili bilong hem barava thankiu long Jehovah for hapi famili laef wea olketa garem olsem olketa Christian. Olketa agree witim toktok bilong man wea raetem psalm wea sing: “Wanem nao bae mi peim bak long Jehovah for evri gud samting wea hem duim long mi?”—Psalm 116:12.
[Blurb long page 9]
God givim olketa man chance for mekem heart bilong hem hapi
[Box long page 9]
Olketa Bible Principle wea Help
Samfala Bible principle wea muvim planti for lusim wei for depend long smoke, alcohol, and drug hia hem:
“O Iufala wea lovem Jehovah, heitim nogud samting.” (Psalm 97:10) Bihaen man sure hao olketa samting hia barava nogud, and mekem grow wei for barava heitim olketa, hem bae faendem moa isi for duim wanem God hapi long hem.
“Man wea wakabaot witim wise pipol bae kamap wise, bat man wea kaban witim stupid pipol bae kasem trabol.” (Proverbs 13:20) For rejectim olketa drug and olketa nara samting wea man depend long hem, man need for chusim gud olketa wea hem kaban witim. For mekem grow wei for fren witim olketa Christian bae saportim disison bilong hem for stap klia long olketa samting hia.
“No wari long eni samting, bat long evri samting thru long prea and wei for barava ask witim wei for sei thankiu, talem evri samting long God; and peace bilong God wea winim evri tingting bilong man bae protectim heart and tingting bilong iufala thru long Christ Jesus.” (Philippians 4:6, 7) Man no savve kasem kaen peace olsem long mind and heart thru long olketa samting olsem drug. And wei for depend long Jehovah thru long prea bae helpem man for deal witim olketa problem bilong laef and no depend long olketa drug.