Wei for Disaed—Wanfala Challenge Iumi No Savve Missim
EMPEROR bilong France long mek-19 century, Napoleon Bonaparte, sei: “For savve hao for disaedem samting hem hard tumas, bat, sapos wanfala man savve duim datwan, hem samting wea garem barava hae price.” Iu maet agree long datfala toktok, bikos pipol laek for kontrolem laef bilong olketa seleva. Nomata olsem, pipol savve hao samfala taem wei for disaedem samting hem barava hard.
Nomata hem isi or hard, no eniwan savve missim wei for disaedem samting. Evriday iumi mas disaedem samting. Bihaen iumi wekap long morning, iumi mas chusim kaleko for werem, kaikai for kaikaim, and hao for deal witim olketa nara samting insaed datfala day. Planti disison hia no important tumas. Iumi no need for ting raonem gud firstaem bifor iumi disaed. And iumi no wari tu sapos hem wisefala disison or nomoa.
Long narasaed, samfala disison savve affectim man long bigfala wei. Planti young pipol long world tuday mas disaed wanem waka olketa bae chusim. Olketa maet mekem disison saed long education wea olketa needim and for kasem moa education or nomoa. Gogo, planti long olketa bae disaed for marit or stap singol. Olketa wea chus for marit mas disaed olsem: ‘Waswe, mi full-grown and mature for marit? Wanem kaen partner nao mi needim?’ Disfala disison for chusim wanfala partner savve barava affectim full laef bilong man.
Long saed bilong olketa samting wea barava important, hem important for iumi disaed long wisefala wei, from iumi kasem hapi taem iumi duim olsem. Samfala pipol maet ting olketa fit nomoa for disaedem samting seleva and rejectim help bilong eniwan. Waswe, diswan hem wise? Iumi bae faendaot.
[Piksa Credit Line long page 3]
Napoleon: From the book The Pictorial History of the World