Iu Savve Biliv Long Wanfala Paradaes Earth
INSAED history, planti million pipol bilivim hao olketa bae lusim earth and go long heven. Samfala ting hao hem no plan bilong Creator for earth kamap ples for iumi stap olowe long hem. Pipol wea no biliv long wei for enjoyim laef barava ova tumas long diswan. For planti long olketa hia, disfala earth and olketa material samting hem nogud—hem stopem man for really satisfae long spiritual wei and for kam klos long God.
Maet pipol wea garem olketa idea hia no savve long wanem God talem abaotem paradaes earth or olketa min for no laek savve. For tok stret, distaem planti pipol no interest for faendaot wanem God muvim olketa man for recordim long Word bilong hem, Bible, abaotem disfala subject. (2 Timothy 3:16, 17) Bat, hem wise for trustim Word bilong God and no followim olketa idea bilong olketa man. (Romans 3:4) Tru nao, hem barava important for iumi duim olsem, from Bible warnim iumi hao wanfala wicked creature wea iumi no savve lukim wea garem paoa hem blindim pipol long spiritual wei and distaem “giamanim olketa man long earth.”—Revelation 12:9; 2 Corinthians 4:4.
Why Nao Pipol Konfius?
Planti difren idea abaot soul nao kosim pipol for konfius abaotem purpose bilong God for earth. Planti bilivim hao iumi garem soul wea no savve dae—samting wea separate from body bilong man and wea go ahed for laef bihaen man dae. Olketa narawan bilivim hao soul stap firstaem bifor God creatim body bilong man. Olsem wanfala buk talem, Greek savveman Plato garem tingting hao soul “stap prisoner insaed body olsem wanfala panis for olketa sin wea hem duim taem hem long heven.” Olsem tu, Origen, savveman bilong religion long mek-thri century sei “olketa soul sin [long heven] bifor olketa join witim wanfala body” and olketa “kamap prisoner [insaed datfala body long earth] olsem panis for sin bilong olketa.” And planti million pipol bilivim hao earth hem ples for testim man long gogo bilong hem for kasem heven.
Planti difren idea tu stap abaotem wanem happen long soul taem man dae. Olsem buk History of Western Philosophy, sei, pipol bilong Egypt garem tingting hao “olketa soul bilong pipol wea dae go long wanfala world bilong olketa spirit.” Bihaen, olketa savveman argue hao olketa soul bilong pipol wea dae no go daon insaed dark world bilong olketa spirit bat go ap long wanfala haefala ples bilong olketa spirit. Greek savveman Socrates bilivim hao taem man dae, soul bilong hem “go long [wanfala] ples wea man no savve lukim . . . and stap laef witim olketa god.”
Wanem Nao Bible Talem?
No eni ples insaed Word bilong God, Bible, sei olketa man garem soul wea no savve dae. Readim Genesis 2:7. Hem sei: “Jehovah God hem wakem man from dust bilong graon and blowim wind bilong laef go insaed long nose bilong hem, and man hem kamap wanfala living soul.” Diswan hem klia and man fit for minim. Taem God creatim firstfala man, Adam, Hem no putim samting wea man no savve lukim insaed long hem. Nomoa, from Bible sei “man hem kamap wanfala living soul.” Man no garem wanfala soul. Hem nao soul.
Taem Jehovah creatim earth and olketa man, hem no purpose bilong hem for man dae. Purpose bilong God hem for olketa man laef olowe long earth insaed Paradaes. Only reason Adam dae hem bikos hem no obeyim law bilong God. (Genesis 2:8, 15-17; 3:1-6; Isaiah 45:18) Waswe, taem firstfala man dae, hem go long ples bilong olketa spirit? Nomoa! Hem—datfala soul Adam—go bak long dust wea God iusim for creatim hem.—Genesis 3:17-19.
Iumi evriwan kasem sin and dae from laen dadi bilong iumi Adam. (Romans 5:12) Olsem Adam, taem iumi dae, iumi no stap nao. (Psalm 146:3, 4) Tru nao, long evri 66 buk bilong Bible, hem nating joinim toktok “no savve dae” or “laef olowe” witim datfala word “soul.” Bible talem klia hao soul—datfala man—savve dae. Soul savve dae.—Ecclesiastes 9:5, 10; Ezekiel 18:4.
Waswe, Olketa Material Samting Hem Nogud?
Waswe long disfala idea wea olketa material samting and earth hem nogud? Pipol wea followim Manichaeism, wanfala muvment bilong religion wea wanfala man wea nem bilong hem Mani startim long Persia long mek-thri century nao garem disfala tingting. The New Encyclopædia Britannica sei: “Manichaeism start from wei wea olketa man kasem wei for safa.” Mani bilivim hao for kamap wanfala man “hem no natural, no fitim, and hem barava nogud.” Hem garem tingting tu hao only wei for go aot from disfala “wei for safa” hem for soul ranawe from body, lusim disfala earth, and kasem spiritual laef long world bilong olketa spirit.
Long wei wea difren, Bible talem iumi hao long tingting bilong God “evri samting wea hem wakem” taem hem creatim earth and man hem “gud tumas.” (Genesis 1:31) Long datfala taem, no eniting stap for blokem wei wea man savve fren witim God. Adam and Eve enjoyim klos wei for fren witim Jehovah, olsem datfala perfect man Jesus Christ enjoyim barava klos wei for fren witim Dadi bilong hem long heven.—Matthew 3:17.
Sapos first parents bilong iumi, Adam and Eve no sin, tufala bae garem klos wei for fren witim Jehovah God for olowe long wanfala paradaes earth. Tufala startim laef long Paradaes, from Bible talem iumi: “Jehovah God wakem wanfala garden long Eden, long east saed, and long there hem putim man wea hem wakem.” (Genesis 2:8) Jehovah creatim Eve insaed datfala paradaes garden. Sapos Adam and Eve no sin, tufala and olketa perfect pikinini savve waka tugeta witim hapi go kasem taem full earth kamap paradaes. (Genesis 2:21; 3:23, 24) Datfala Paradaes earth bae hom bilong olketa man for olowe.
Why Nao Samfala Go Long Heven?
‘Bat,’ maet iu sei, ‘Bible story abaotem pipol wea go long heven, hem tru?’ Hem tru. Bihaen Adam sin, Jehovah garem purpose for startim wanfala Kingdom long heven wea samfala laen pikinini bilong Adam bae “rul olsem olketa king ovarem earth” witim Jesus Christ. (Revelation 5:10; Romans 8:17) Olketa bae resurrect for laef olowe long heven. Namba bilong olketa hem 144,000, and olketa first wan long disfala namba hem olketa first-century disaepol bilong Jesus wea faithful.—Luke 12:32; 1 Corinthians 15:42-44; Revelation 14:1-5.
Bat, hem no purpose bilong God long firstaem for olketa raeteous man lusim earth and go long heven. For tok stret, taem Jesus stap long earth, hem sei: “No eni man hem go ap long heven bat man wea kamdaon from heven, Son bilong man.” (John 3:13) Thru long datfala “Son bilong man,” Jesus Christ, God provaedem wanfala ransom wea mekem wei for laef olowe for olketa wea showimaot faith long sakrifaes bilong Jesus. (Romans 5:8) Bat long wea nao planti million man hia bae laef olowe?
Purpose Bilong God Long Firstaem Bae Fulfill
Nomata God plan for tekem samfala from olketa man for rul witim Jesus Christ long Kingdom long heven, diswan no minim evri gud pipol go long heven. Jehovah creatim earth for kamap Paradaes hom for olketa man. Klosap nao, purpose bilong God long firstaem bae fulfill.—Matthew 6:9, 10.
Anda long rul bilong Jesus Christ and olketa wea rul witim hem long heven, peace and hapi bae go ahed long earth. (Psalm 37:9-11) Pipol wea God rememberim bae resurrect and enjoyim perfect health. (Acts 24:15) Thru long wei wea olketa faithful long God, olketa man wea obeyim God bae kasem samting wea first parents bilong iumi lusim—perfect laef for olowe long wanfala paradaes earth.—Revelation 21:3, 4.
No enitaem Jehovah God fail for fulfillim purpose bilong hem. Thru long profet bilong hem Isaiah, hem sei: “Olsem big rain hem kamdaon, and snow, from heven and hem no go bak long datfala ples sapos hem no barava tuwetem earth and mekem samting start for grow, wea givim seed long man wea plantim and bred long man wea kaikaim, toktok bilong mi wea go aot from mouth bilong mi bae kamap tru. Hem bae no kam bak nating long mi, bat hem bae barava duim wanem mi laekem, and hem bae barava win long wanem mi sendem hem for duim.”—Isaiah 55:10, 11.
Long Bible buk bilong Isaiah, iumi lukim wanem kaen laef bae kamap long datfala Paradaes earth. No eni man long Paradaes bae sei: “Mi sik.” (Isaiah 33:24) Olketa animal and man bae stap gud tugeta. (Isaiah 11:6-9) Pipol bae buildim olketa haos wea luk naes and stap insaed, plantim garden and kaikaim and kasem wei for satisfae. (Isaiah 65:21-25) And tu, God “bae finisim dae for olowe, and Sovereign Lord Jehovah bae aotem krae from evri feis.”—Isaiah 25:8.
Klosap nao, olketa man wea obey bae enjoyim nambawan living hia. Olketa “bae kamap free from wei for slave bilong sin and kasem datfala nambawan freedom olsem olketa pikinini bilong God.” (Romans 8:21) Hem bae naes tumas for stap laef olowe long datfala Paradaes earth wea God promisim! (Luke 23:43) Iu bae fit for stap long Paradaes sapos distaem iu duim samting followim stretfala savve from Bible and showimaot faith long Jehovah God and Jesus Christ. And iu savve barava sure hao hem stret for biliv long wanfala paradaes earth.
[Olketa Piksa long page 5]
God creatim Adam and Eve for laef olowe long wanfala paradaes earth
[Olketa Piksa long page 7]
Long datfala Paradaes earth . . .
pipol bae buildim haos
pipol bae plantim grape plantation
Jehovah bae blessim olketa
[Piksa Credit Line long page 4]
U.S. Fish & Wildlife Service, Washington, D.C./NASA