Preach for Mek Disaepol
“Taem Priscilla and Aquila herem [Apollos], tufala tekem hem for stap witim tufala and explainim gud go moa wei bilong God long hem.”—ACTS 18:26.
1. Nomata hem “shaen witim spirit,” wanem nao Apollos hem needim?
PRISCILLA and Aquila, wanfala Christian hasband and waef wea stap long first century, lukluk taem Apollos givim tok long wanfala synagogue long taon bilong Ephesus. From hem savve tumas for story and pullim tingting bilong man, pipol wea lisin long Apollos interest tumas long wanem hem talem. Hem “shaen witim spirit,” and “teachim long stretfala wei olketa samting abaotem Jesus.” Nomata olsem, tufala lukim hao Apollos hem “savve nomoa abaotem baptism bilong John.” Samting wea Apollos preachim abaot Christ hem tru bat hem no full story. Problem nao hem no garem full savve abaotem Christ. Apollos needim moa savve abaotem wanem Jesus Christ bae duim insaed long purpose bilong Jehovah.—Acts 18:24-26.
2. Wanem challenge nao Priscilla and Aquila acceptim?
2 Priscilla and Aquila no hol bak for offerim olketa seleva for helpem Apollos for kamap wanfala man wea savve followim “evri samting” wea Christ komandim. (Matthew 28:19, 20) Story hem sei “tufala tekem hem for stap witim tufala and explainim gud go moa wei bilong God long hem.” Hem tru, samfala samting abaotem Apollos maet mekem samfala Christian hol bak for teachim hem. Wanem samting? And wanem nao iumi lanem from wei wea Priscilla and Aquila storyim olketa Scripture witim Apollos? Hao nao wei for lukluk long disfala story from taem bifor bae helpem iumi for tingim moa hao for startim olketa hom Bible study?
Lukluk Long Need Bilong Pipol
3. Why nao savve and ples wea Apollos kam from hem no stopem Priscilla and Aquila for teachim hem?
3 Apollos kam from laen bilong olketa Jew, and hem grow ap long taon bilong Alexandria. Long datfala taem Alexandria hem kapitol taon bilong Egypt and main ples saed long education wea garem wanfala nambawan library. Planti Jew stap long datfala taon, and samfala savveman tu. Dastawe, olketa wakem Greek transleison bilong Olketa Hebrew Scripture long there, and olketa kolem diswan Septuagint. Dastawe Apollos hem “savve gud long olketa Scripture”! Waka bilong Aquila and Priscilla hem for wakem tent. Waswe, wei wea Apollos hem savve tumas for toktok mekem tufala feel olsem tufala no fit for helpem hem? Nomoa. From love muvim tufala, tufala ting long hem olsem wanfala person, tingim need bilong hem, and hao tufala savve helpem hem.
4. Long wea and long wanem wei nao Apollos kasem help wea hem needim?
4 Nomata Apollos hem savve tumas for toktok, hem needim instruction. Help wea hem needim no stap long eni university bat hem stap long olketa member bilong Christian kongregeson. Apollos kasem taem wea hem need for kasem gud samting from stretfala savve bilong arrangement bilong God for salvation. Priscilla and Aquila “tekem hem for stap witim tufala and explainim gud go moa wei bilong God long hem.”
5. Hao nao spiritual saed bilong Priscilla and Aquila?
5 Priscilla and Aquila strong long spiritual wei and garem gud faondeson long faith. Luk olsem tufala hia ‘evritaem redy for givim ansa long eniwan wea askem reason for hope wea tufala garem,’ nomata sapos man hia rich man, poor man, savveman, or slave. (1 Peter 3:15) Aquila and waef bilong hem fit for “iusim word bilong truth long stretfala wei.” (2 Timothy 2:15) Tufala waka hard for studyim olketa Scripture. Apollos hem hapi tumas long instruction wea hem kasem from ‘word bilong God, wea laef and garem paoa,’ and affectim heart.—Hebrews 4:12.
6. Hao nao iumi savve Apollos hem tinghae long help wea hem kasem?
6 Apollos hem tinghae long example bilong tufala hia wea teachim hem and hem kamap moabeta long wei for mek disaepol. Hem iusim gud datfala savve bilong hem long waka for talemaot gud nius, especially long Jew pipol. Apollos hem savve gud long wei for pullim tingting bilong olketa Jew abaotem Christ. From hem “savve gud long olketa Scripture,” hem fit for pruvim long olketa hao evri profet bilong bifor luk forward long kakam bilong Christ. (Acts 18:24, Kingdom Interlinear Translation) Story sei next ples wea Apollos go hem long Achaia, wea “hem barava helpem olketa wea biliv thru long kaeness bilong God wea man no fit for kasem; from witim strong hem pruvim evribit long pablik hao olketa Jew rong, taem hem showimaot thru long olketa Scripture hao Jesus nao datfala Christ.”—Acts 18:27, 28.
Lane From Example Bilong Olketa Nara Teacher
7. Hao nao Aquilla and Priscilla kamap gudfala teacher?
7 Hao nao Aquila and Priscilla kamap gudfala teacher long Word bilong God? For join witim hard waka bilong tufala for study seleva and attendim olketa meeting, wei wea tufala kaban witim aposol Paul hem help long bigfala wei. For 18 month Paul hem stap long haos bilong Priscilla and Aquila long Corinth. Olketa waka tugeta for wakem and fixim olketa tent. (Acts 18:2, 3) Tingim deep spiritual story wea go ahed midolwan long olketa. And wei for kaban witim Paul hem barava apim spiritual saed bilong tufala! Proverbs 13:20 hem sei: “Man wea wakabaot witim wise pipol bae kamap wise.” Wei for kaban witim gud pipol hem helpem spiritual fasin bilong tufala.—1 Corinthians 15:33.
8. Wanem nao Priscilla and Aquila lanem from wei for lukluk long Paul insaed long ministry?
8 Taem Priscilla and Aquila lukluk long Paul taem hem talemaot Kingdom, olketa lukim wei wea hem wanfala gudfala teacher. Story long Acts hem sei Paul “savve givim tok insaed synagogue long evri sabbath and pullim tingting bilong olketa Jew and Greek.” Bihaen, taem Silas and Timothy joinim hem, Paul “hem start for barava busy olowe witim word, witness long olketa Jew for pruvim Jesus hem Christ.” Taem no staka member bilong synagogue showaot interest, Priscilla and Aquila lukim wei wea Paul hem go long nara ples wea moabeta for preach, hem nao wanfala haos wea stap saed long synagogue. Long there Paul helpem Crispus, “bigman bilong synagogue” for kamap wanfala disaepol. Iumi sure Priscilla and Aquila lukim hao taem datfala man hem kamap wanfala disaepol, diswan affectim territory long gudfala wei. Story hem go ahed for sei: “Crispus . . . kamap man wea biliv long Lord, and tu evriwan insaed famili bilong hem. And planti pipol long Corinth herem and start for biliv and baptaes.”—Acts 18:4-8.
9. Hao nao Priscilla and Aquila ting long example bilong Paul?
9 Olketa wea talemaot Kingdom, olsem Priscilla and Aquila, followim example bilong Paul. Aposol hia encouragem olketa nara Christian: “Kamap olketa wea followim example bilong mi, olsem mi followim example bilong Christ.” (1 Corinthians 11:1) Priscilla and Aquila followim example bilong Paul taem tufala helpem Apollos for minim olketa Christian teaching long wei wea moa stret. Then hem tu helpem nara pipol. Luk olsem Priscilla and Aquila help for mek disaepol long Rome, Corinth, and Ephesus.—Acts 18:1, 2, 18, 19; Romans 16:3-5.
10. Wanem nao iu lanem from Acts chapter 18 wea bae helpem iu long waka for mek disaepol?
10 Wanem nao iumi lanem from wei wea iumi lukluk long Acts chapter 18? Well, long sem wei wea Aquila and Priscilla lane from Paul, iumi tu savve kamap moabeta saed long wei for mek disaepol taem iumi followim example bilong olketa gudfala teacher long Word bilong God. Iumi savve kaban witim olketa wea “busy olowe witim word” and wea “witness evribit” long nara pipol. (Acts 18:5, Kingdom Interlinear Translation) Iumi savve lukim hao olketa kasem heart bilong pipol taem olketa iusim savve for pullim pipol. Kaen savve olsem bae helpem iumi for mek disaepol. Taem samwan hem studyim Bible witim iumi, maet iumi talem hem idea for hem invaetem olketa nara member bilong famili or neiba bilong hem for join insaed long study. Or iumi maet askem hem for talem iumi abaotem eniwan moa wea maet iumi savve offerim Bible study long hem.—Acts 18:6-8.
Mekem Olketa Chance Kamap for Mek Disaepol
11. Wea nao iumi savve faendem olketa niu disaepol?
11 Paul and olketa nara Christian luk aotem wei for mek disaepol taem olketa preach from haos tu haos, long market, and taem olketa gogo eniwea—yes, long evri ples pipol stap. From iu wanfala wakman wea strong for talemaot Kingdom and wea trae for mek disaepol, waswe, iu savve mekem field service bilong iu kamap moa big? Waswe, iu savve mekius long olketa chance for luk aotem olketa wea fit and for preach long olketa? Wanem nao samfala wei wea olketa nara pablisa bilong gud nius faendem disaepol? Firstaem bae iumi storyim wei for witness long telephone.
12-14. For showimaot gud samting wea kamaot from wei for witness long telephone, talem experience bilong iuseleva or wanfala long olketa paragraf hia.
12 Taem hem witness from haos tu haos long Brazil, wanfala sista wea bae iumi kolem hem Maria, givim tract long wanfala young woman wea redy for lusim apartment building. Maria iusim title bilong datfala tract olsem introduction and ask, “Waswe, iu laek for savve moa abaotem Bible?” Datfala woman sei: “Mi laekem tumas. Problem nao mi wanfala teacher, and mi teach full-taem.” Maria explainim hao tufala savve iusim telephone for story tugeta abaotem Bible. Datfala woman givim Maria telephone namba, and long datfala sem evening, hem startim study thru long telephone and hem iusim brochure Wanem Nao God Mas Kasem From Iumi?a
13 Taem hem witness long telephone, wanfala full-taem minister long Ethiopia hem sapraes for herem big noise taem hem story long wanfala man. Datfala man askem hem for ring bak moa bihaen. Taem hem ring bak, man hia sei sorre and sei long taem wea sista hia ring kam, hem and waef bilong hem raoa. Datfala sista iusim diswan olsem wanfala chance for point go long wise information wea Bible garem for deal witim olketa famili problem. Hem talem datfala man hao planti famili kasem help finis from Secret for Kasem Hapi Famili, wanfala buk wea olketa Jehovah’s Witness pablisim. Tu-thri day bihaen hem givim man hia datfala buk, sista hia ringim hem moa. Hem sei: “Disfala buk sevem marit bilong mi!” Tru nao, hem bin kolem tugeta evriwan long famili bilong hem for sharem olketa gud point wea hem readim long datfala buk. Hem start for studyim Bible and no longtaem bihaen datfala man start for attendim olketa Christian meeting evritaem.
14 Wanfala woman long Denmark wea startim wanfala Bible study taem hem iusim telephone for witness hem sei: “Service overseer hem encouragem mi for tek part long waka for witness long telephone. Firstaem mi hol bak taem mi sei: ‘Hem no samting mi laek for duim.’ Nomata olsem, wanday mi strongim miseleva and start for ringim namba bilong first haosholder. Sonja hem ansa and bihaen mi story lelebet witim hem, hem agree for kasem samfala Bible literature. Long wanfala evening mifala story abaotem creation, and hem want for readim buk Life—How Did It Get Here? By Evolution or by Creation.b Mi sei hem bae gud sapos mitufala meet and storyim diswan. Hem agree. Sonja hem willing for study taem mi arrive, and start long dat taem mifala study evri week.” Christian sista bilong iumi hem sei: “For planti year mi prea for garem wanfala Bible study, bat mi no expectim for kasem wanfala thru long wei for witness long telephone.”
15, 16. Wanem nao samfala experience wea iu savve wea showimaot gudfala samting wea kamaot from wei for luksavve long olketa difren wei for startim Bible study?
15 Planti pipol kasem gud samting bikos olketa followim olketa idea for witness long pipol long evri ples wea pipol stap. Wanfala Christian woman long United States hem stopem trak bilong hem saed long wanfala trak wea karem kago wea stop long ples for parkim trak. Taem woman insaed long datfala trak luk go long hem, sista hia start for explainim Bible education waka bilong iumi. Datfala woman hem lisin, go aot from datfala trak, and go klosap long car bilong sista hia. Hem sei: “Mi hapi tumas from iu stop for story witim mi. Mi no kasem eni Bible literature bilong iufala for longtaem nao. And tu, mi want for studyim Bible moa. Waswe, iu savve studyim witim mi?” So really, sista bilong iumi nao mekem chance kamap for sharem gud nius witim samwan.
16 Wanfala sista long United States, hem kasem disfala experience taem hem visitim wanfala haos bilong olo pipol: Hem go lukim bigman wea lukaftarem samfala difren samting long datfala ples and hem sei hem laek for volunteer for helpem spiritual saed bilong olketa wea stap long there. Sista bilong iumi sei tu hao hem bae hapi for duim free Bible study evri week witim evriwan wea want for attend. Datfala bigman letem hem for visitim olketa rum bilong olketa wea stap long there. No longtaem bihaen, hem conductim wanfala Bible study thrifala taem evri week witim 26 olo wea stap long there, and wanfala hem attendim olketa meeting evritaem.
17. Planti taem wanem nao gudfala wei for startim hom Bible study?
17 Wei for offerim stret wanfala Bible study hem lead go for samfala wea talemaot Kingdom for kasem gud samting. Wan morning wanfala kongregeson wea garem 105 pablisa duim spesol waka for offerim Bible study long each haosholder wea olketa meetim. Eiti-six pablisa nao join insaed long field service, and bihaen olketa duim preaching waka for tu hour, olketa startim samting olsem 15 niu Bible study.
Go Ahed for Luk Aotem Olketa wea Fit
18, 19. Wanem important instruction from Jesus nao iumi shud tingim evritaem, and for followim datwan iumi shud disaed strong for duim wanem?
18 From iu wanfala for talemaot Kingdom, maet iu want for traem samfala idea long disfala article. Nomata olsem hem gud for tingim tu olketa kastom long ples bilong iu taem iu ting raonem olketa idea for duim witnessing. Winim evri samting, iumi mas tingim instruction bilong Jesus for luk aotem olketa wea fit and helpem olketa for kamap olketa disaepol.—Matthew 10:11; 28:19.
19 For kasem datwan, iumi want for “iusim word bilong truth long stretfala wei.” Iumi savve duim olsem taem iumi iusim Bible for pullim tingting bilong man. Diswan bae helpem iumi for muvim heart bilong olketa wea willing for lisin and muvim olketa for duim samting. Taem iumi depend long Jehovah thru long prea, iumi savve share for helpem samfala kamap olketa disaepol bilong Jesus Christ. And disfala waka hem mekem iumi barava satisfae! So, hem gud for ‘duim best bilong iumi for mekem God appruvim iumi,’ evritaem givim honor long Jehovah olsem olketa wea strong for talemaot Kingdom, wea preach witim goal for mek disaepol.—2 Timothy 2:15.
[Olketa Footnote]
a Olketa Jehovah’s Witness nao pablisim.
b Olketa Jehovah’s Witness nao pablisim.
Waswe, Iu Remember?
• Why nao Apollos need for savve gud go moa long wei bilong God?
• Long olketa wanem wei nao Priscilla and Aquila lane from aposol Paul?
• Wanem nao iu lanem abaotem waka for mek disaepol from Acts chapter 18?
• Hao nao iu savve mekem olketa chance kamap for mek disaepol?
[Piksa long page 18]
Priscilla and Aquila “explainim gud go moa wei bilong God” long Apollos
[Piksa long page 20]
Apollos kamap man wea savve tumas for mek disaepol
[Piksa long page 21]
Paul preach long evri ples wea hem go
[Olketa Piksa long page 23]
Mekem olketa chance kamap for preach