“Word Bilong God Barava Garem Big Paoa!”
“WORD bilong God hem laef and garem paoa for duim samting.” (Hebrews 4:12) Pruv wea showimaot Word bilong God garem bigfala paoa hem 2003 Calendar of Jehovah’s Witnesses wea storyim sixfala laef story from raonem world. Anda long heding “Before and After,” kalenda hia showim hao education waka bilong Olketa Jehovah’s Witness hem helpem pipol for kamap moabeta saed long fasin, lusim nogud living bilong olketa, strongim famili living bilong olketa, and mekem grow klos wei for fren witim God.
Mifala kasem finis samfala leta for sei thankiu for disfala 2003 kalenda. Long hia hem samfala long olketa:
“Disfala kalenda hem pruvim long olketa tru Christian hao olketa nara pipol stap wea olsem olketa, wea bin faet strong for faith. Distaem olketa savve lukim olketa piksa for remindim olketa long olketa change wea samfala mekem finis.”—Steven, United States.
“Mi barava laek for raetem lelebet toktok hia for talem iufala hao disfala 2003 kalenda hem muvim heart bilong mi. No enitaem bifor wanfala kalenda hem duim olsem long mi. Bae mi karem olketa laef story hia long witnessing bag bilong mi mekem mi showim pipol really example and olketa nambawan pruv bilong wei wea Bible savve changem man.”—Marc, Belgium.
“Datfala kalenda barava muvim mi. Taem mi readim and lukim hao Jehovah hem changem pipol hia, hem barava muvim feeling bilong mi. From diswan, mi kasem strong for go ahed for mekem olketa change long living bilong miseleva. Winim enitaem bifor, mi feel olsem part bilong wanfala famili bilong olketa brata evriwea long world.”—Mary, United States.
“Wei wea pipol stap nogud long spiritual wei hem mekem Jesus feel sorre for olketa. Thankiu for wei wea iufala followim example bilong Christ thru long wei for raetem olketa laef story insaed 2003 kalenda. No enitaem bifor kalenda bin mekem mi krae.”—Cassandra, United States.
“Taem mi 11 year, mi start for smoke; then mi iusim drug. Staka taem mi tingting for endim laef bilong mi. Taem mi savve long Jehovah, mi kasem help for finis from olketa wei hia. Disfala kalenda hem important tumas long mi. Olketa example bilong olketa brata and sista bilong mi from raonem world hem strongim mi. Distaem mi savve hem no miseleva nomoa wea stragol witim diswan and barava important samting hem love for Jehovah and for servem hem witim full heart.”—Margaret, Poland.
“Word bilong God barava garem big paoa! Taem mi kasem datfala 2003 kalenda, mi stragol for no krae. Olketa experience hia, witim olketa piksa, barava strongim faith.”—Darlene, United States.
“Living bilong samfala long olketa pipol hia bifor hem semsem witim living bilong mi bifor. Jehovah hem givim mi strong for lusim olketa rabis fasin wea luk hard tumas for winim. Thankiu tumas for olketa laef story hia.”—William, United States.