War Bae Finis

‘Mifala 12 year nomoa. Mifala no savve changem politik and war, bat mifala laek for laef! Mifala weit for peace. Waswe, bae diswan happen taem mifala laef yet?’—Olketa pikinini long class faev

‘Mifala laek for go long skul and for visitim olketa fren and famili and no fraet nogud samwan kasholem mifala. Mi hope gavman bae lisin. Mifala laekem wanfala laef wea moabeta. Mifala laekem peace.’—Alhaji, 14 year

TOKTOK hia wea muvim feeling bilong man hem showimaot hope wea stap long heart bilong olketa young wan wea safa for planti year from olketa civil war. Samting wea olketa laekem nomoa hem for garem normal laef. Bat for mekem hope kamap tru hem no isi samting. Waswe, bae enitaem iumi lukim wanfala world wea no garem war?

Insaed olketa year wea just go pas, planti kantri evriwea long world trae for finisim samfala civil war thru long wei for forcem pipol wea faet for saenem olketa peace agreement. Samfala kantri provaedem peace-keeping force for saportim olketa kaen agreement olsem. Bat no staka kantri garem selen or feeling for laek lukaftarem olketa farawe kantri wea pipol long there garem bigfala heit and wei for no garem trust wea mekem olketa agreement midolwan olketa sekson wea faet hem isi tumas for brek. Planti taem, faet hem savve start moa just tu-thri week or month bihaen olketa saenem agreement for stop sutsut. Olsem datfala Stockholm International Peace Research Institute hem talem, “peace hem hard samting for kasem taem olketa wea faet laek for go ahed and fit for go ahed for faet.”

Long semtaem, olketa problem olsem saed long faet wea spoelem planti ples long disfala earth hem remindim olketa Christian abaotem wanfala Bible profesi. Buk bilong Revelation storyim wanfala hardfala taem wea wanfala tokpiksa man long horse hem bae “tek aotem peace from earth.” (Revelation 6:4) Disfala wei wea Bible storyim finis hao war bae go ahed hem part bilong wanfala saen wea showimaot iumi distaem stap insaed taem wea Bible kolem “olketa last day.”a (2 Timothy 3:1) Bat, Word bilong God promisim long iumi hao peace bae kamap bihaen olketa last day hia.

Long Psalm 46:9 Bible explainim hao for kasem real peace, war mas finis, no long wanfala ples long earth nomoa, bat evriwea long earth. And tu, datfala sem psalm barava tok klia abaotem wei for distroem olketa samting for faet wea olketa iusim long taem bilong Bible—datfala bow and spia. And distaem tu, sapos olketa man laek for stap long peace bae olketa mas distroem evri samting for faet wea staka stap distaem.

Bat, really, fasin for heit and greedy fasin nao mekem olketa war kamap worse, no olketa bullet and gun. Fasin for kavet, or greedy fasin, hem nao main samting wea kosim war, and fasin for heit hem savve lead go long raf fasin. For aotem olketa feeling olsem wea savve distroem man, pipol need for changem tingting bilong olketa. Olketa need for lanem olketa wei bilong peace. Dastawe, profet Isaiah long bifor hem sei hao war bae finis only taem olketa “no lanem war moa.”—Isaiah 2:4.

Bat, long distaem iumi stap insaed world wea teachim olketa full grown man and pikinini, no hao peace nao important, bat hao war nao garem glory. Sorre tumas, olketa teachim pikinini tu hao for killim man.

Olketa Lane for Killkill

Taem hem 14 year, Alhaji hem finis from army. Hem ten year nomoa taem olketa army wea againstim gavman kasholem hem and trainim hem for faet long wei for iusim wanfala AK-47 gun. Bihaen olketa forcem hem for kamap wanfala soldia, hem savve go for stealim kaikai and bonem olketa haos. And tu hem killim and katem nogud olketa pipol. Distaem, hem hard for Alhaji forgetim war and for change for no garem laef olsem soldia. Abraham, nara pikinini soldia, hem tu lane for killkill and hem no laek for givim bak gun bilong hem. Hem sei: “Sapos olketa sei for mi go bak and mi mas lusim gun bilong mi, mi no savve wanem nao mi bae duim, hao nao bae mi kasem kaikai.”

Winim 300,000 pikinini soldia—olketa boy and girl—olketa still go ahed for faet and dae insaed olketa civil war wea no savve end wea go ahed for happen long earth bilong iumi. Wanfala leader bilong wanfala army wea againstim gavman hem explainim olsem: “Olketa boy soldia obeyim olketa komand; olketa no wari for go bak long waef or famili; and olketa no savve fraet.” Nomata olsem, olketa pikinini hia wantem and fit for kasem wanfala laef wea moabeta.

Long olketa rich kantri, kaen nogud samting olsem wei for iusim pikinini olsem soldia maet hem hard for man tingim. Nomata olsem, planti pikinini long olketa rich kantri olketa lane insaed haos bilong olketa hao for faet. Long wanem wei?

Olsem example tingim José wea kam from southeast Spain. Hem wanfala teenager wea enjoy for lanem karate. Samting wea hem barava lovem tumas hem nao wanfala longfala sword bilong olketa long Japan wea dadi bilong hem peim olsem Christmas present for hem. And hem lovem tumas olketa video game, especially olketa wea garem raf fasin insaed. Long April 1, 2000, hem act followim raf fasin wea man insaed olketa video game duim. Hem killim dae dadi, mami, and sista bilong hem witim datfala sem sword wea dadi bin givim hem. Hem sei long olketa police: “Mi want for stap seleva; Mi no wantem parents bilong mi for faendem mi.”

Taem hem koment abaotem hapitaem wea garem raf fasin insaed, man for raet and wea insaed army Dave Grossman hem sei: “Iumi kasem wanfala taem wea man no garem eni feeling, wea wei for mekem man feel pain and safa hem samting for hapitaem long hem: for kasem hapi winim wei for heitim. Iumi lane for killkill, and iumi lane for laekem datwan.”

Tufala evriwan Alhaji and José lane for killkill. Tufala no plan for kamap man for killim dae narawan, bat training bilong tufala nomata hem difren hem spoelem tingting bilong tufala. Kaen training—nomata hem for pikinini or for full grown man—hem savve plantim seed bilong raf fasin and war.

Lanem Peace, No War

Peace for olowe kanduit stap sapos pipol go ahed lane for killkill. Planti handred year go finis, profet Isaiah raet olsem: “Sapos nomoa iufala barava obeyim olketa komandment bilong [God]! Then peace bilong iufala bae kamap olsem wanfala river.” (Isaiah 48:17, 18) Taem pipol kasem stretfala savve abaotem Word bilong God and lane for lovem law bilong God, raf fasin and war bae kamap samting for heitim. Nomata distaem, parents savve mek sure olketa game wea pikinini bilong olketa pleim hem no mekhae long raf fasin. Olketa full-grown man savve lane for winim fasin for heit and greedy. Olketa Jehovah’s Witness faendem planti taem hao Word bilong God hem garem paoa for changem fasin bilong man.—Hebrews 4:12.

Tingim example bilong Hortêncio. Taem hem young olketa forcem hem for kamap wanfala soldia. Hem sei training bilong army hem for “putim insaed heart feeling for laek killim dae nara pipol and for no fraet for kill.” Hem faet insaed wanfala civil war long Africa wea go ahed for longfala taem. Hem agree: “War affectim fasin bilong mi. Nomata distaem mi still rememberim evriting wea mi duim. Mi feel nogud tumas long samting wea olketa forcem mi for duim.”

Taem wanfala nara soldia hem tok long Hortêncio abaotem Bible, hem kasem heart bilong hem. Promis bilong God long Psalm 46:9 wea sei bae hem finisim evrikaen wei for war hem barava here gud long hem. Taem hem go ahed for studyim Bible moa, feeling for laek faet hem katdaon. No longtaem bihaen, olketa aotem hem and tufala nara fren bilong hem from army, and olketa dedicatem laef bilong olketa long Jehovah God. Hortêncio explainim olsem: “Truth bilong Bible helpem mi for lovem enemy bilong mi. Mi luksavve hao taem mi faet insaed war, mi really sin againstim Jehovah, from God sei iumi shud no killim dae neiba bilong iumi. For showimaot disfala love, mi mas changem tingting bilong mi and no ting long pipol olsem enemy bilong mi.”

Kaen laef story olsem showimaot hao, tru nao, Bible education hem apim peace. Iumi no sapraes long diswan. Profet Isaiah hem sei wei for kasem education from God and peace tufala join tugeta. Hem sei: “Evri son bilong iu bae kamap pipol wea Jehovah teachim, and peace bilong olketa son bilong iu bae kamap big.” (Isaiah 54:13) Datfala sem profet hem lukim finis tu hao pipol bilong evri nation bae go long klin worship bilong Jehovah God for lanem olketa wei bilong hem. Wanem nao kamaot from diswan? “Bae olketa mas hammerim sword bilong olketa for kamap hou and spia bilong olketa for kamap naef for katem tree. Nation bae no iusim sword againstim narafala nation, and olketa bae no lanem war moa.”—Isaiah 2:2-4.

For fitim disfala profesi, Olketa Jehovah’s Witness duim wanfala education waka evriwea long world wea helpem finis planti million pipol for winim fasin for heit wea hem nao main samting wea kosim olketa war bilong man.

Wanfala Promis for World Peace

Witim wei for provaedem education, God putim finis wanfala gavman, or “kingdom,” wea fit for mekem peace kamap evriwea long world. Important samting tu hem wei wea Bible storyim datfala Ruler wea God chusim, Jesus Christ, hem datfala “Prince Bilong Peace.” Hem promisim iumi tu hao “bigfala rul bilong hem olsem prince and peace bae no savve finis.”—Isaiah 9:6, 7.

Wanem promis nao iumi garem wea showimaot hao rul bilong Christ bae win for aotem evrikaen wei for war? Profet Isaiah sei moa: “Strong bilong Jehovah bilong olketa army bae duim diswan.” (Isaiah 9:7) God hem garem feeling for duim and hem fit for mekem kamap peace wea bae stap for olowe. Jesus hem trustim evribit disfala promis. Dastawe hem teachim olketa wea followim hem for prea for Kingdom bilong God for kam and for will bilong God for kamap long earth. (Matthew 6:9, 10) Taem datwan kasem ansa, war bae no stap moa for spoelem disfala earth.

[Footnote]

[Piksa long page 7]

Bible education apim tru peace