Creation Bilong Jehovah Luk Naes Tumas

“Letem Olketa River Seleva Klapem Hand Bilong Olketa”

SAPOS iu luk long wanfala map bilong earth, and long staka ples bae iu lukim olketa laen wea luk olsem snek long land. Olketa laen hia stap long olketa flat ples, desert, and ples wea garem grass. Olketa tatane thru long olketa valley and bush. (Habakkuk 3:9) Olketa laen hia nao olketa river, hem olketa main samting wea givim laef for disfala earth. Olketa river olsem showimaot wisdom and paoa bilong Jehovah, Creator bilong earth. Taem iumi lukluk long olketa, iumi garem sem feeling olsem man wea raetem psalm wea sing olsem: “Letem olketa river seleva klapem hand bilong olketa; letem evri maunten singaot witim hapi front long Jehovah.”—Psalm 98:8, 9.a

Olketa river join witim history bilong olketa man. Bible storyim fofala big river wea kamaot from wanfala river wea kamaot from Eden. (Genesis 2:10-14) Wanfala ples wea pipol stap long taem bifor kam hem long valley wea kaikai savve grow gud long Tigris and Euphrates river long Middle East. From olketa river olsem Hwang River long China, Ganges and Indus long south Asia, and Nile long Egypt olketa bigfala taon kamap long olketa ples hia.

Dastawe man evritaem sapraes long wei wea olketa river strong, staka and luk naes. Nile bilong Egypt hem ran for samting olsem 6,670 kilometer. River wea big winim eni narawan nao Amazon long South America. Samfala river luk naes from big bilong olketa, bat nomata olsem olketa smol river luk naes tu olsem disfala smol Tone River long Japan wea ran fast.

Wanem nao mekem river for ran? Ansa, hem gravity. Gravity nao pullim wata from hae ples go long low ples. Samfala taem samting wea kamap nao olketa maeti watafol. Bible storyim olketa samting hia wea showimaot paoa and luk naes olsem: “O Jehovah, olketa river mekem noise bilong olketa moa laod; olketa go ahed for mekem noise bilong olketa moa laod.”—Psalm 93:3.

Jehovah askem Job, man wea fraet long God: “Hu nao sendem hevi rain?” (Job 38:25, Contemporary English Version) Evri wata kam from wea? Ansa hem stap insaed wanfala system wea garem planti part wea nem bilong hem nao wata cycle. Wata long earth hem gogo raon thru long paoa bilong sun and gravity. Bihaen wata hem kamap olsem smoke, hem go ap long skae. Gogo, hem kamap cold and strong and hem nao cloud. Then, hem foldaon long earth olsem snow or rain. Big haf bilong wata hem stap long sea, olketa lake, river, ice wea savve isisi muv daon long maunten, ice long North and South pole, and andanit long graon.

Bible story olsem abaotem disfala spesol cycle: “Evri river gogo long sea, bat sea seleva no full. Long ples wea olketa river gogo long hem, long there olketa go bak mekem olketa gogo moa.” (Ecclesiastes 1:7) Jehovah, God bilong barava big wisdom, hem nomoa savve mekem wanfala cycle olsem. Wanem nao bigfala savve olsem talem iumi abaotem disfala God? Hem God bilong nambawan savve and loving kea.—Psalm 104:13-15, 24, 25; Proverbs 3:19, 20.

Nomata staka river stap and olketa big, no planti fresh wata bilong world nao stap insaed olketa river. Nomata olsem, olketa important for laef. Wanfala buk, Water, hem sei: “Sapos man no savve kasem and garem kontrol ovarem wata, nomata laef wea simpol or nomoa bae barava nomoa nao. Wanfala main samting long full history bilong olketa man hem wei wea hem evritaem duim samting for mek sure hem savve kontrolem and kasem wata.”

For planti thousand year, man kasem wata from river for drink and for garden bilong hem. Graon wea stap saed long olketa river hem barava gud for wakem garden. Lukim hao diswan hem showaot long wanfala blessing wea olketa servant bilong Jehovah kasem: “Olketa tent bilong iu luk naes, O Jacob, olketa tabernacle bilong iu, O Israel! Olsem olketa valley wea olketa river ran insaed olketa kamap big, olsem olketa garden wea stap saed long river. Olsem olketa aloe plant wea Jehovah plantim, olsem olketa cedar tree wea stap saed long wata.” (Numbers 24:5, 6) Olketa kaen river olsem help for keepim laef long olketa animal olsem duck and jackal wea iu savve lukim long hia. For tok stret, taem iumi kasem moa savve abaotem olketa river, diswan bae muvim iumi for sei thankiu long Jehovah.

[Footnote]

[Box/Olketa Piksa long page 8]

Iguaçú Falls, wea stap long spialaen midolwan Argentina and Brazil nao wanfala long olketa watafol wea waed winim staka narawan long world. Waed bilong hem winim thri kilometer. Hem stap insaed long naesfala bush, and klosap 300 difren watafol join tugeta for kamap disfala big watafol. Long taem bilong rain, evri second, samting olsem 10,000 cubic meter bilong wata nao kam daon from disfala watafol.

[Piksa long page 9]

Tone River, Japan