Lukaftarem Olketa Olo—Wanfala Christian Responsibility

“Nomata man kamap olo mi no change; and mi bae sapotim man wea garem gray hair.”—ISAIAH 46:4.

1, 2. Hao nao wei wea Dadi bilong iumi long heven lukaftarem iumi hem difren from wei wea parents lukaftarem iumi?

PARENTS wea garem love lukaftarem pikinini bilong olketa taem olketa baby, pikinini, and teenager. Nomata taem olketa young wan kamap full-grown and garem famili bilong olketa seleva, dadi and mami bilong olketa go ahed for helpem and sapotim olketa long loving wei.

² Spialaen hem stap saed long wanem parents savve duim for pikinini bilong olketa, bat Dadi bilong iumi long heven hem evritaem fit for givim loving help and sapot long olketa faithful servant bilong hem. Taem Jehovah story long pipol wea hem chusim bifor, hem sei: “Nomata man kamap olo mi no change; and mi bae sapotim man wea garem gray hair.” (Isaiah 46:4) Toktok hia barava encouragem olketa olo Christian! Jehovah no savve lusim olketa wea go ahed for stap loyal long hem. Bat, hem promis for strongim, sapotim, and leadim olketa long laef bilong olketa, nomata taem olketa olo tu.—Psalm 48:14.

3. Wanem nao bae iumi storyim long disfala article?

³ Long wanem wei nao iumi savve followim loving kea wea Jehovah showimaot for olketa olo? (Ephesians 5:1, 2) Bae iumi lukluk long olketa wei wea olketa full-grown pikinini, kongregeson overseer, and olketa Christian wanwan savve lukaftarem olketa olo member bilong olketa brata evriwea long world.

Responsibility Bilong Iumi Olketa Pikinini

4. Wanem responsibility nao olketa Christian pikinini garem long parents bilong olketa?

⁴ “Honorim dadi and mami bilong iufala.” (Ephesians 6:2; Exodus 20:12) Taem aposol Paul talem disfala simpol toktok wea important tumas from Hebrew Scripture, hem remindim olketa full-grown pikinini abaotem responsibility wea olketa garem for parents bilong olketa. Bat wanem nao toktok hia minim saed long wei for kea for olketa olo? Wanfala example from taem bifor bae help for ansarem disfala kwestin.

5. (a) Wanem nao showimaot Joseph hem no forgetim olketa famili responsibility bilong hem? (b) Wanem nao hem minim for honorim parents bilong iumi, and wanem gudfala example nao Joseph showimaot saed long diswan?

⁵ For winim 20 year, Joseph hem no lukim olo dadi bilong hem, Jacob. Nomata olsem, Joseph no stop for lovem Jacob. Taem Joseph hem talemaot klia hu nao hem long olketa brata bilong hem, hem ask olsem: “Waswe, dadi bilong mi laef yet?” (Genesis 43:7, 27; 45:3) Long datfala taem, land bilong Canaan hem kasem bigfala hangre. Dastawe Joseph sendem message go long dadi bilong hem and sei: “Kam long mi. No delay. And iu mas stap long land bilong Goshen, and iu mas stap klosap long mi . . . And mi bae givim iu kaikai long there.” (Genesis 45:9-11; 47:12) Tru tumas, for givim honor long parents wea olo hem minim tu for protectim olketa and sapotim olketa long material wei taem olketa no fit for lukaftarem olketa seleva. (1 Samuel 22:1-4; John 19:25-27) Joseph hapi tumas for acceptim datfala responsibility.

6. Hao nao Joseph showimaot trufala love for dadi bilong hem, and hao nao iumi savve followim example bilong hem?

⁶ From Jehovah blessim hem, Joseph kamap wanfala barava rich man wea garem bigfala paoa long Egypt. (Genesis 41:40) Bat hem no ting long hemseleva olsem hem important tumas or busy tumas dastawe hem no need for showimaot honor long dadi bilong hem wea 130 year. Taem hem herem Jacob (or Israel) hem kakam, “Joseph askem olketa for redyim chariot bilong hem and go for meetim dadi bilong hem Israel long Goshen. Taem hem kasem hem hem holem hem and hem go ahed krae.” (Genesis 46:28, 29) Disfala welkam hem no for showimaot respect nomoa. Joseph barava lovem olo dadi bilong hem and hem no shame for showim love bilong hem. Sapos iumi garem parents wea olo, waswe, iumi tu showim love bilong iumi long olketa?

7. Why nao Jacob laek for olketa berem hem long Canaan?

⁷ Love wea Jacob garem for Jehovah hem stap strong go kasem end long laef bilong hem. (Hebrews 11:21) From faith bilong hem long olketa promis bilong God, Jacob ask for olketa mas berem hem long Canaan. Joseph givim honor long dadi bilong hem taem hem followim wanem hem askem, nomata datwan kostim staka selen and hem no isi for duim.—Genesis 47:29-31; 50:7-14.

8. (a) Wanem nao main samting wea muvim iumi for lukaftarem olo parents? (b) Wanem nao wanfala full-taem servant duim for lukaftarem olo parents bilong hem? (Lukim box long page 17.)

⁸ Wanem nao muvim Joseph for lukaftarem dadi? Nomata hem garem love and feeling for tinghae long Jacob wea bornem and lukaftarem hem, Joseph garem tu strongfala feeling for laek mekem Jehovah hapi. Iumi tu shud olsem. Paul hem raet olsem: “Sapos wanfala widow woman garem pikinini or granpikinini, letem olketa nao lanem fasin for lovem God firstaem insaed long famili bilong olketa seleva and for go ahed for peim bak samting wea olketa kasem from dadi and mami and grandadi and granmami, from God hem hapi long diswan.” (1 Timothy 5:4) Tru tumas, love for Jehovah and wei for fraet long hem witim respect bae muvim iumi for lukaftarem olo parents nomata wanem challenge iumi feisim for duim olsem.a

Hao Olketa Elder Showimaot Olketa Kea

9. Hu nao Jehovah markem for lukaftarem sheep bilong hem, and olketa olo Christian tu?

⁹ Klosap long end long laef bilong hem, Jacob story abaotem Jehovah olsem “datfala tru God wea lukaftarem mi long full laef bilong mi kam kasem tuday.” (Genesis 48:15) Distaem, Jehovah shepherdim olketa servant bilong hem long earth thru long olketa Christian overseer or elder, anda long lead bilong Son bilong hem, Jesus Christ, “datfala chief shepherd.” (1 Peter 5:2-4) Hao nao olketa overseer savve followim Jehovah taem olketa lukaftarem olketa olo insaed kongregeson?

10. Wanem nao olketa bifor duim for givim help long material wei for olketa olo Christian? (Lukim box long page 19.)

¹⁰ No longtaem bihaen Christian kongregeson start, olketa aposol appointim “sevenfala man wea fit . . . wea fulap witim spirit and wisdom” for lukaftarem wei for “givimaot kaikai evriday” long olketa poor Christian widow woman. (Acts 6:1-6) Bihaen, Paul givim instruction long Timothy for putim olketa olo widow woman wea showimaot gudfala example long list bilong olketa wea fit for kasem help long material wei. (1 Timothy 5:3, 9, 10) Long sem wei, olketa kongregeson overseer distaem willing for arrangem gudfala help for olketa olo Christian taem need kamap for duim olsem. Nomata olsem, moa samting hem insaed long wei for lukaftarem olketa olo wea faithful.

11. Wanem nao Jesus talem abaotem datfala poor widow woman wea givim smol contribution?

¹¹ Klosap long end bilong ministry bilong hem long earth, Jesus sidaon long temple and “lukim wei wea pipol putim selen insaed long box.” Then hem lukim samwan. Datfala story sei: “Wanfala poor widow woman hem kam and putim tufala smolfala coin, wea kost bilong olketa barava smol.” Jesus kolem kam olketa disaepol bilong hem and sei: “Tru nao mi talem iufala, disfala poor widow hem putim moa selen winim evriwan wea putim selen insaed long box; from olketa putim samting wea leftova, bat nomata hem poor tumas, hem putim evri samting wea hem garem, full living bilong hem.” (Mark 12:41-44) Saed long selen wea hem givim, contribution bilong datfala widow hem smol nomoa, bat Jesus savve wei wea Dadi bilong hem long heven tinghae tumas long kaen wei for showimaot love olsem witim full soul. Nomata datfala poor widow woman hem olo, Jesus no ting smol long samting wea hem duim.

12. Hao nao olketa elder showaot olketa tinghae long olketa samting wea olketa olo Christian duim?

¹² Olsem Jesus, olketa Christian overseer no ting smol long samting wea olketa olo duim for sapotim tru worship. Olketa elder garem staka reason for praisem olketa olo for share bilong olketa insaed long ministry, wei wea olketa tekpart long olketa meeting, gudfala wei wea olketa helpem kongregeson, and wei wea olketa go ahed strong. Trufala toktok for encouragem olketa olo savve helpem olketa for “garem reason for hapi” long holy service bilong olketa. Diswan bae mekem olketa no feel wikdaon from wei for markem olketa seleva witim wanem olketa nara Christian fit for duim or samting wea olketa duim bifor.—Galatians 6:4.

13. Wanem nao olketa wei wea olketa elder savve iusim savve bilong olketa olo?

¹³ Olketa elder luksavve long important sapot bilong olketa olo Christian taem olketa iusim savve bilong olketa. Maet samfala taem olketa savve iusim olketa olo wea showimaot gud example long olketa demonstration or interview. Wanfala elder sei: “Olketa long audience barava lisin gud taem mi interviewim wanfala olo brata or sista wea bringimap olketa pikinini insaed long truth.” Olketa elder long nara kongregeson sei wanfala pioneer sista wea 71 year hem win for helpem olketa pablisa for go olowe long field service. Hem encouragem olketa tu for duim olketa “main samting,” olsem readim Bible and text evriday and then ting raonem samting wea olketa readim.

14. Hao nao wanfala body of elders showimaot olketa tinghae long wanfala olo overseer?

¹⁴ Olketa elder tinghae tu long waka bilong olketa olo wea serve olsem overseer. No longtaem go nomoa, José, wea hem 70 year and serve olsem elder for staka year, kasem bigfala operation. From hem needim longfala taem for kamap gud bihaen datwan, hem tingting for lusim privilege bilong hem for serve olsem presiding overseer long kongregeson. José hem sei: “Samting wea olketa nara elder talem hem mekem mi sapraes. Olketa no acceptim idea bilong mi bat olketa ask wanem help nao mi needim for mekem mi go ahed for lukaftarem olketa responsibility bilong mi.” From wanfala young elder helpem hem, José hem fit for go ahed for serve olsem presiding overseer, and diswan hem wanfala blessing for kongregeson. Nara elder long sem kongregeson sei: “Olketa brata tinghae tumas long waka bilong José olsem wanfala elder. Olketa lovem and respectim hem from savve wea hem garem and example bilong faith wea hem showimaot. Hem mekem kongregeson bilong mifala kamap moabeta.”

Lukaftarem Each Other

15. Why nao evri Christian shud interest long living bilong olketa olo wea stap witim olketa?

¹⁵ Hem no olketa wea garem olo dadi and mami and olketa elder nomoa wea shud tingim olketa olo. Taem hem markem Christian kongregeson olsem body bilong man, Paul hem raet olsem: “God nao joinim olketa part bilong body tugeta, givim moa honor long olketa part wea no garem honor, mekem no eni wei for divaed mas kamap long body, bat olketa part bilong hem mas kea for narawan long sem wei.” (1 Corinthians 12:24, 25) Narafala transleison hem sei: “Evri difren part bilong [body] hem for lukaftarem olketa nara part.” (Knox) For Christian kongregeson waka tugeta, each member mas tingim olketa narawan wea biliv, wea minim olketa olo tu.—Galatians 6:2.

16. Hao nao iumi savve showimaot interest long olketa olo taem iumi attendim olketa Christian meeting?

¹⁶ Olketa Christian meeting nao gudfala chance for showimaot interest long olketa olo. (Philippians 2:4; Hebrews 10:24, 25) Waswe, iumi mek taem for story witim olketa olo long olketa meeting? Fitim for iumi ask abaotem health bilong olketa, bat hem gud tu for iumi “givim wanfala spiritual present,” maet storyim wanfala naesfala experience or Bible point. From olketa olo maet no savve muv raon tumas, iumi showimaot kaenfala fasin taem iumi go long olketa and no ting olketa nao bae kam long iumi. Sapos olketa no savve herehere gud, maet iumi need for tok isisi and talem klia olketa word. And for iumi and olketa olo really kasem ‘encouragement,’ iumi mas lisin gud long samting wea hem talem.—Romans 1:11, 12.

17. Hao nao iumi savve showimaot iumi tingim olketa olo wea stap nomoa long haos?

¹⁷ Waswe sapos samfala olo no savve attendim olketa Christian meeting? James 1:27 showim hao responsibility bilong iumi hem “for lukaftarem olketa pikinini wea no garem dadi and mami and olketa widow woman wea kasem hardfala taem.” Wanfala mining bilong Greek word wea olketa transleitim “for lukaftarem” hem “for visit.” (Acts 15:36) And olketa olo enjoyim tumas taem wea iumi go visitim olketa! Taem hem stap insaed prison long Rome long samting olsem 65 C.E., “olo man” Paul hem stap seleva. Hem laek tumas for lukim Timothy wea bin waka witim hem and hem raet olsem: “Traem best bilong iu for kam kwiktaem long mi.” (Philemon 9; 2 Timothy 1:3, 4; 4:9) Nomata olketa no really stap long prison, samfala olo stap nomoa long haos from olketa problem saed long health. Maet hem olsem olketa sei, ‘Plis, duim best bilong iu for visitim mi.’ Waswe, iumi duim diswan?

18. Wanem gudfala samting nao savve kamaot taem iumi visitim olketa olo?

¹⁸ No ting smol long gudfala samting wea kamaot from wei for visitim wanfala olo spiritual brata or sista. Taem wanfala Christian wea nem bilong hem Onesiphorus kasem Rome, hem traem best for luk aotem Paul, hem faendem hem, and bihaen hem ‘helpem hem staka taem.’ (2 Timothy 1:16, 17) Wanfala olo sista sei: “Mi savve laek tumas for stap witim olketa young wan. Best samting nao hem wei wea olketa deal witim mi olsem wanfala member long famili bilong olketa. Datwan barava encouragem mi.” Nara olo Christian sei: “Mi thankiu tumas taem samwan sendem mi wanfala card, ringim mi for tu-thri minute nomoa, or visitim mi lelebet. Datwan barava strongim mi.”

Jehovah Givim Reward Long Olketa wea Kea

19. Wanem nao olketa blessing wea kamaot from wei for kea for olketa olo?

¹⁹ Wei for kea long olketa olo hem givim staka blessing. Wei for kaban witim olketa olo and kasem gud samting from savve bilong olketa hem wanfala spesol privilege. Olketa wea kea long olketa olo kasem moa hapi wea kamaot from wei for give, and tu feeling for duim samting and deep peace from olketa fulfillim Bible responsibility bilong olketa. (Acts 20:35) And tu, olketa wea kea for olketa olo no need for wari nogud olketa seleva nao no kasem kea taem olketa olo. Word bilong God promisim iumi: “Soul wea give long bigfala wei bae kamap fat, and man wea willing for watarem narawan bae olketa willing for watarem hem tu.”—Proverbs 11:25.

20, 21. Hao nao Jehovah ting long olketa wea kea for olketa olo, and wanem nao iumi shud disaed strong for duim?

²⁰ Jehovah givim reward long olketa pikinini wea fraet long God, olketa overseer, and nara Christian wea no selfish for lukaftarem need bilong olketa olo brata and sista. Kaen spirit olsem hem followim samting wea disfala proverb talem: “Man wea showimaot kaenfala fasin long poor man hem give long Jehovah, and Hem bae peim bak kaenfala fasin bilong hem.” (Proverbs 19:17) Sapos love muvim iumi for kaen and helpem olketa wea poor, God ting long diswan olsem hem garem kaon long iumi and hem bae peim bak witim olketa blessing. Hem peim bak iumi tu taem iumi kea long loving wei for olketa olo brata and sista bilong iumi, wea staka long olketa ‘poor long samting bilong world bat rich saed long faith.’—James 2:5.

²¹ Pei wea God givim hem big tumas! Laef olowe tu insaed datwan. For staka servant bilong Jehovah, olketa bae laef olowe insaed wanfala paradaes earth, wea olketa samting bilong sin bae no stap and olketa olo wea faithful bae kasem bak strong bilong taem wea olketa young. (Revelation 21:3-5) Taem iumi weitim datfala nambawan taem, iumi want for go ahed for fulfillim Christian responsibility bilong iumi for kea long olketa olo.

[Footnote]

Wanem Nao Olketa Ansa Bilong Iu?

• Hao nao olketa pikinini savve givim honor long parents wea olo?

• Hao nao olketa elder showimaot wei for tinghae long olketa olo brata and sista insaed kongregeson?

• Wanem nao olketa Christian wanwan savve duim for showimaot trufala interest long olketa olo?

• Wanem nao olketa blessing wea kamaot from wei for lukaftarem olketa olo Christian?

[Box long page 17]

Taem Parents Bilong Hem Needim Help

Philip hem waka olsem wanfala volunteer long construction long Liberia long 1999 taem hem herem nius hao dadi bilong hem sik big. From hem savve mami bilong hem no savve deal witim diswan seleva, hem disaed for go bak hom for organizem wei for lukaftarem dadi bilong hem.

Philip hem sei: “Hem no isi for go bak, bat mi tingim hao parents bilong mi nao first responsibility bilong mi.” Insaed next thrifala year, hem muvim parents bilong hem go long wanfala haos wea fitim and witim help bilong olketa brata long kongregeson, hem mekem haos bilong tufala for fitim need bilong dadi bilong hem.

Distaem mami bilong Philip hem moa fit for deal witim bigfala sik bilong dadi bilong hem. No longtaem go nomoa, Philip hem fit for acceptim invitation for waka olsem wanfala volunteer long branch office bilong Olketa Jehovah’s Witness long Macedonia.

[Box long page 19]

Olketa Luksavve Long Wanem Hem Needim

Taem Ada, wanfala Christian long Australia wea 85 year hem no savve lusim haos bilong hem from nogud health, olketa elder long kongregeson arrange for givim help. Olketa organizem wanfala grup bilong olketa brata and sista wea savve helpem hem. Olketa brata and sista hia hapi for duim olketa waka olsem for klinim haos, waswas, kuki, and nara samting.

For klosap 10 year finis olketa givim help hia. Kam kasem distaem, winim 30 Witness bilong Jehovah nao help for lukaftarem Ada. Olketa go ahed for visitim hem, readim olketa Bible pablikeson long hem, story abaotem spiritual gogo bilong olketa difren wan insaed kongregeson, and prea evritaem witim hem.

Wanfala Christian elder long kongregeson sei: “Olketa wea lukaftarem Ada ting long wei for helpem hem olsem wanfala privilege. Faithful service bilong hem insaed olketa year wea go pas hem muvim staka, and hem hard tumas for olketa no givim hem wanem hem needim.”

[Piksa long page 16]

Waswe, iumi showimaot love long planti wei for parents wea olo?

[Olketa Piksa long page 18]

Evriwan insaed kongregeson savve showimaot love for olketa olo brata and sista