Waswe, Samting wea Kasem Iu Nao Kontrolem Laef Bilong Iu?
STAKA wari and problem hem kamap evriwea long olketa “nogud taem” distaem. (2 Timothy 3:1) Samfala problem no stap for longtaem so gogo olketa bae finis. Olketa narawan go ahed for planti month or year tu. From diswan, planti garem feeling olsem David, man wea raetem psalm, taem hem singaot olsem long Jehovah: “Olketa wari long heart bilong mi kamap staka; O plis aotem mi from olketa hevi wea stap antap long mi.”—Psalm 25:17.
Waswe, iu stragol witim olketa bigfala problem? Sapos olsem, iu savve faendem help and encouragement insaed Bible. Iumi bae lukluk long laef bilong tufala faithful servant bilong Jehovah wea win taem tufala feisim olketa problem: Joseph and David. Taem iumi lukluk long wanem olketa duim taem olketa feisim trabol, iumi bae savve lanem olketa leson wea bae helpem iumi taem iumi kasem olketa semkaen challenge distaem.
Feisim Olketa Bigfala Challenge
Taem Joseph hem 17 year hem garem big problem insaed famili bilong hem. Olketa big brata bilong hem lukim hao Jacob, dadi bilong olketa, “lovem [Joseph] winim olketa brata bilong hem.” From datwan, “olketa start for heitim hem, and olketa no tok kaen long hem.” (Genesis 37:4) Iumi savve tingim hao diswan mas mekem Joseph barava wari and kasem hevi. Gogo, from olketa brata bilong Joseph barava heitim hem olketa sellim hem olsem wanfala slave.—Genesis 37:26-33.
Taem Joseph hem slave long Egypt, hem mas againstim olketa fasin bilong waef bilong masta bilong hem wea trae hard long hem saed long sex. Disfala woman kros taem Joseph les long hem so hem laea and sei Joseph trae for rapem hem. So Joseph mas “go long olketa long prison haos,” wea “olketa taemap leg bilong hem witim chain, soul bilong hem go insaed olketa iron chain.” (Genesis 39:7-20; Psalm 105:17, 18) Diswan masbi barava hard taem! For samting olsem 13 year, Joseph stap olsem slave or prisoner bikos pipol no followim justice, insaed diswan hem famili bilong hem.—Genesis 37:2; 41:46.
David, wanfala young man wea stap long Israel bifor, hem tu feisim olketa test. For samfala year, David mas ranawe olowe olsem wanfala animal wea olketa huntim, from King Saul laek for killim hem. Laef bilong David stap long danger evritaem. Long wanfala taem, hem go long Ahimelech wanfala priest for tekem kaikai. (1 Samuel 21:1-7) Taem Saul savve hao Ahimelech hem helpem David, hem orderim dae bilong Ahimelech and evri priest and olketa famili bilong olketa. (1 Samuel 22:12-19) Tingim go hao David mas sorre fogud from olketa hia dae bikos long hem.
Tingim olketa year wea Joseph and David mas stand strong nomata olketa kasem trabol and pipol deal witim olketa nogud. Taem iumi lukluk long hao tufala feisim hard taem olsem, iumi savve lanem olketa nambawan leson. Iumi bae lukluk long thrifala wei wea iumi fit for followim tufala hia.
Lusim Wei for Keepim Kros and Feel Nogud
First samting, olketa faithful man hia nating keepim kros and feel nogud. Taem Joseph stap long prison, maet bae hem isi for hem tingting raonem nogud samting wea olketa brata bilong hem duim long hem and from diswan hem savve tingim samting wea hem bae duim for pei bak long olketa sapos hem lukim olketa moa. Hao nao iumi savve Joseph stap klia long kaen nogud tingting olsem? Tingim samting wea hem duim taem hem garem chance for pei bak long olketa brata bilong hem taem olketa kam for peim grain long Egypt. Disfala story sei: “[Joseph] tanawe from olketa and start for krae. . . . Bihaen datwan Joseph givim komand, and [olketa servant bilong hem] go and fulimap olketa container bilong [olketa brata bilong hem] witim grain. And tu olketa putim bak selen bilong each wan long basket bilong hemseleva and kasem kaikai wea olketa needim for gogo bilong olketa.” Bihaen, taem Joseph sendem olketa brata bilong hem for go tekem kam dadi bilong olketa long Egypt, hem encouragem olketa witim toktok olsem: “No kros long each other taem iufala gogo.” Thru long toktok and fasin, Joseph showimaot hao hem nating letem wei for keepim kros and feel nogud for spoelem laef bilong hem.—Genesis 42:24, 25; 45:24.
David tu hem nating keepim wei for feel nogud long King Saul. Tufala taem nao David garem chance for killim dae Saul. Bat, taem olketa man bilong David encouragem hem for duim olsem, hem sei: “Mi kanduit, long saed bilong Jehovah, for duim disfala samting long lord bilong mi, anointed wan bilong Jehovah, long wei for duim samting againstim hem, bikos hem nao anointed wan bilong Jehovah.” David leavim evriting long Jehovah, hem talem olketa man bilong hem: “From Jehovah hem laef, Jehovah seleva nao bae deal witim hem, or day bilong hem bae kam and bae hem mas dae, or bae hem go long faet, and bae hem mas finis long there.” Bihaen, David raetem wanfala sorre singsing taem Saul and son bilong Saul, Jonathan, dae. Olsem Joseph, David nating letem wei for keepim kros for spoelem hem.—1 Samuel 24:3-6; 26:7-13; 2 Samuel 1:17-27.
Waswe, iumi keepim feeling for kros and feel nogud taem eniwan spoelem iumi? Diswan isi for happen. Sapos iumi letem olketa feeling bilong iumi for bossim iumi, maet diswan bae spoelem iumi winim nogud samting wea pipol duim long iumi. (Ephesians 4:26, 27) Nomata iumi hard for kontrolem samting wea pipol duim long iumi, iumi savve kontrolem wanem iumiseleva duim. Sapos iumi garem faith hao Jehovah bae stretem olketa problem long taem bilong hem, diswan bae mekem hem moa isi for iumi lusim feeling for kros and feel nogud.—Romans 12:17-19.
Duim Samting wea Iu Fit for Duim
Mek-tu leson wea iumi savve lanem nao hem for no letem samting wea kasem iumi for spoelem laef bilong iumi. Maet iumi busy tumas for tingim olketa samting iumi no savve duim gogo iumi forgetim samting wea iumi fit for duim. Hem olsem samting wea kasem iumi hem start for kontrolem iumi. Diswan fit for happen long Joseph. Bat, hem chus for duim samting wea hem fit for duim. Taem Joseph serve olsem slave, hem “mekem [masta bilong hem] hapi and [Joseph] go ahed for servem hem, gogo hem markem hem for keepim haos bilong hem, and evriting wea hem garem hem givim long hand bilong [Joseph].” Taem Joseph stap long prison hem duim sem samting. Bikos long blessing from Jehovah and hard waka bilong Joseph, “bigman bilong prison haos givim long hand bilong Joseph evri prisoner wea stap long prison haos; and evri ting wea olketa duim long there hem kamap bikos long hem.”—Genesis 39:4, 21-23.
Long taem wea David stap olsem man wea ranawe, hem tu duim samting wea hem fit for duim. Taem hem stap long drae ples bilong Paran, hem and olketa man bilong hem protectim sheep bilong Nabal from olketa pipol for steal. Wanfala shepherd bilong Nabal sei: “Olketa kamap olsem wanfala wall raonem mifala long naetaem and daytaem.” (1 Samuel 25:16) And, taem David stap long Ziklag, hem attakim olketa taon wea olketa enemy bilong Israel long south kontrolem, diswan protectim spialaen bilong Judah.—1 Samuel 27:8; 1 Chronicles 12:20-22.
Waswe, iumi need for trae hard moa for duim samting wea iumi fit for duim nomata wanem samting kasem iumi? Nomata maet hem luk olsem hem hard for duim, iumi savve win. Taem aposol Paul lukluk bak long laef bilong hem, hem raet olsem: “Mi lanem finis, nomata wanem kasem mi, mi satisfae nomoa long wanem mi garem. . . . Long evri samting and long evri wei mi lanem secret long hao nao for fulap and hao nao for hangre, hao nao for garem planti samting and hao nao for garem need.” Hao nao gogo Paul garem diskaen tingting long laef? From hem go ahed for depend long Jehovah. Hem sei: “Long evri samting mi kasem strong from datwan wea givim paoa long mi.”—Philippians 4:11-13.
Weitim Jehovah
Winim wei for duim samting wea no followim Bible for changem samting wea kasem iumi, iumi mas weitim Jehovah, hem nao mek-thri leson. Disaepol James raet: “Letem fasin for go ahed strong finisim waka bilong hem, mekem iufala fit long evri wei and no short long eni samting.” (James 1:4) Iumi mas letem fasin for stand strong for “finisim waka bilong hem” taem iumi letem datfala test for go ahed and no trae for finisim datfala test thru long wei for followim samting wea no kam from Bible. Then faith bilong iumi bae kasem test and kamap strong moa, and paoa bilong hem bae showaot. Joseph and David garem diskaen fasin for stand strong. Tufala nating trae for stretem samting long wei wea maet mekem Jehovah nating hapi long tufala. Bat, tufala duim samting wea tufala fit for duim nomata wanem nao kasem olketa. Tufala weitim Jehovah and tufala kasem olketa nambawan blessing! Jehovah iusim tufala for sevem and leadim pipol bilong hem.—Genesis 41:39-41; 45:5; 2 Samuel 5:4, 5.
Iumi tu maet feisim samfala samting wea maet testim iumi for stretem samting long wei wea no followim Bible. Olsem example, waswe, from iu no faendem yet wanfala marit partner diswan mekem iu feel wikdaon? Sapos olsem, stap klia long eni test for againstim komand bilong Jehovah for marit “only insaed long Lord.” (1 Corinthians 7:39) Waswe, iu garem problem insaed marit bilong iu? Winim wei for followim tingting bilong world wea encouragem wei for separate and divorce, waka tugeta long taem bilong trabol for stretem olketa problem. (Malachi 2:16; Ephesians 5:21-33) Waswe, iu garem problem for lukaftarem famili bilong iu bikos hem hard for kasem selen? Sapos iu weitim Jehovah diswan minim for no tekpart long olketa wei for kasem selen wea againstim law. (Psalm 37:25; Hebrews 13:18) Tru nao, iumi evriwan mas waka hard for duim samting wea iumi fit for duim and givim Jehovah samting wea bae fit for iumi kasem blessing from. Taem iumi duim olsem, iumi mas go ahed for weitim Jehovah for finisim evri problem bilong iumi.—Micah 7:7.
Jehovah Bae Sapotim Iu
Sapos iumi ting raonem pipol wea Bible storyim, olsem Joseph and David, wea win for feisim olketa trabol bilong olketa diswan bae savve helpem iumi. Nomata story bilong olketa stap long tu-thri page bilong Bible nomoa, trabol bilong olketa stap for planti year. Askem iuseleva: ‘Hao nao olketa servant bilong God hia deal witim samting wea kasem olketa? Hao nao olketa keepim hapi? Wanem kaen fasin nao olketa mekem grow?’
Iumi savve kasem gud samting tu sapos iumi ting raonem fasin bilong olketa servant bilong Jehovah wea stand strong distaem. (1 Peter 5:9) Evri year Wastaoa and Wekap! magasin garem staka laef story. Waswe, iu savve readim and ting raonem olketa example bilong olketa faithful Christian hia? Insaed olketa kongregeson wea iumi joinim tu, iumi garem olketa wea stand strong long faithful wei nomata laef bilong olketa no isi. Waswe, iu savve kaban evritaem witim olketa long olketa kongregeson meeting and lane from olketa?—Hebrews 10:24, 25.
Iu savve sure hao taem iu feisim olketa hard challenge long laef, Jehovah hem kea and bae sapotim iu. (1 Peter 5:6-10) Waka hard for no letem samting wea kasem iu for kontrolem laef bilong iu. Followim example bilong Joseph, David, and olketa narawan wea lusim wei for keepim kros, duim samting wea iu fit for duim, and weitim Jehovah for finisim evri problem bilong iumi. Kam klos long hem thru long prea and olketa spiritual waka. From diswan, iu tu bae lukim hao iu savve kasem hapi nomata long olketa hard taem distaem.—Psalm 34:8.
[Piksa long page 20, 21]
Joseph waka hard for duim samting wea hem fit for duim
[Piksa long page 23]
David weitim Jehovah for finisim olketa problem bilong hem