Mekem Grow Sem Tingting Olsem Christ Abaotem Wei for Win

“Eniwan wea want for kamap big midolwan long iufala mas kamap minister bilong iufala.”—MATTHEW 20:26.

1. Wanem nao tingting bilong world abaotem wei for win?

KLOSAP long wanfala taon long Egypt bifor wea olketa kolem Thebes (distaem hem Karnak), samting olsem 500 kilometer south from Cairo, wanfala statue bilong Pharaoh Amenhotep III wea 18 meter tol hem stap. Man savve barava feel smol taem hem luk go ap long datfala maeti statue. Disfala statue, wea olketa wakem for mekem datfala ruler kasem praise, hem showimaot tingting bilong disfala world abaotem wei for win—hem nao for trae hard for mekem seleva big and important and for mekem olketa narawan feel smol and no important.

2. Jesus showimaot wanem example for olketa follower bilong hem, and wanem nao olketa kwestin wea iumi need for askem iumiseleva?

² Markem diswan witim samting wea Jesus Christ teachim. Nomata hem “Lord and Teacher” bilong olketa follower bilong hem, Jesus teachim olketa hao wei for win hem kamaot from wei for servem nara pipol. Long last day bilong laef bilong hem long earth, Jesus duim samting wea showimaot mining bilong teaching bilong hem taem hem wasim leg bilong olketa disaepol. Datwan barava hambol wei for serve! (John 13:4, 5, 14) For servem narawan or for narawan servem iu—which wan nao iu laekem? Waswe, example bilong Christ muvim iu for laek hambol olsem hem? Sapos olsem, iumi lukluk long tingting bilong Christ abaotem wei for win and markem datwan witim tingting bilong planti pipol long world.

Stap Klia Long Tingting Bilong World Abaotem Wei for Win

3. Olketa wanem example long Bible showimaot sorre samting wea kasem olketa wea laekem tumas for kasem glory from olketa man?

³ Staka example stap long Bible wea showimaot hao tingting bilong world abaotem wei for win hem lead go long nogud samting. Tingim Haman wea garem paoa and important position anda long king bilong Persia long taem bilong Esther and Mordecai. Gogo, Haman kasem shame and hem dae from wei wea hem barava laekem glory for hemseleva. (Esther 3:5; 6:10-12; 7:9, 10) Waswe long praodfala Nebuchadnezzar wea kamap mentol taem hem kasem bigfala paoa? Krangge tingting bilong hem abaotem wei for win hem showaot long disfala toktok: “Waswe, diswan no Bigfala Babylon, wea miseleva buildim for haos bilong king witim paoa bilong strong bilong mi and for honor bilong glory bilong mi?” (Daniel 4:30) Nara example hem praodfala Herod Agrippa I, wea acceptim glory for hemseleva wea no fitim winim wei for givim glory long God. “Olketa worm kaikaim hem and hem dae nao.” (Acts 12:21-23) From evri man hia fail for minim tingting bilong Jehovah abaotem wei for win, olketa kasem shame and lusim paoa bilong olketa.

4. Hu nao bihaenem praod fasin bilong pipol long disfala world?

⁴ Hem stret for iumi laek iusim laef bilong iumi long wei wea mekem iumi kasem honor and respect. Bat, Devil mekius long diswan long wei for trae mekem iumi kamap praod olsem hem. (Matthew 4:8, 9) No forget, hem nao “god bilong disfala system,” and hem barava wantem pipol long disfala earth for garem sem tingting olsem hem. (2 Corinthians 4:4; Ephesians 2:2; Revelation 12:9) From olketa Christian savve finis hao tingting bilong world abaotem wei for win hem kam from Devil, olketa barava stap klia from datfala tingting.

5. Waswe, wei for kasem olketa goal, bignem, and riches savve mekem man satisfae for olowe? Explainim diswan.

⁵ Wanfala idea wea Devil laekem pipol for bilivim hem hao wei for garem bignem long world, praise from olketa man, and staka selen, savve mekem man garem hapi laef. Waswe, datwan really tru? Waswe, wei for kasem goal, bignem, and riches savve mekem man satisfae long laef? Bible warnim iumi for no letem tingting olsem giamanim iumi. Wisefala King Solomon hem raet: “Miseleva lukim finis evri hard waka and evri bigfala savve long waka, wea mekem man hem trae for winim narawan; diswan tu hem iusles nomoa and hard waka for aftarem wind.” (Ecclesiastes 4:4) Planti pipol wea iusim full laef bilong olketa for kasem bignem and riches long disfala world savve talem hao datfala Bible kaonsel hem tru tumas. Wanfala example nao man wea help for designim, buildim, and testim rocket wea olketa man iusim for flae go long moon. Hem ting go bak and sei: “Mi waka hard and barava savve long waka bilong mi. Bat datwan nating givim mi hapi for olowe and peace long mind.”a Tingting bilong world abaotem wei for win, nomata saed long bisnis, sports, and hapitaem, hem no mekem man satisfae for olowe.

Man Savve Win Taem Love Muvim Hem for Servem Narawan

6. Wanem nao showimaot James and John garem rong tingting abaotem wei for win?

⁶ Samting wea happen long laef bilong Jesus showimaot wanem nao really mining bilong wei for win. Jesus and olketa disaepol bilong hem gogo long Jerusalem for Passover long 33 C.E. Taem olketa wakabaot long road, tufala kasin brata bilong Jesus, James and John, showimaot olketa garem rong tingting abaotem wei for win. Olketa talem mami bilong olketa for askem Jesus: ‘Talem hao tufala son bilong mi bae sidaon, wanfala long raet saed bilong iu and wanfala long left saed bilong iu, long kingdom bilong iu.’ (Matthew 20:21) Olketa Jew ting long wei for sidaon long raet saed or left saed bilong samwan olsem ples bilong honor. (1 Kings 2:19) James and John barava aftarem hae position. Olketa no laekem narawan for kasem position hia and winim olketa. Jesus savve finis long tingting bilong olketa and hem iusim datfala chance for stretem rong tingting bilong olketa abaotem wei for win.

7. Olsem Jesus talem, wanem nao really mekem wanfala Christian win?

⁷ Jesus savve hao long disfala world wea praod fasin hem big tumas, pipol tingse man wea win hem nao man wea kontrolem and bossim nara pipol and taem hem givim komand nomoa, hem stretawe savve kasem eni samting wea hem laekem. Bat midolwan olketa follower bilong Jesus, man wea hambol for serve nao hem win. Jesus hem sei: “Eniwan wea want for kamap big midolwan long iufala mas kamap minister bilong iufala, and eniwan wea want for first midolwan long iufala mas kamap slave bilong iufala.”—Matthew 20:26, 27.

8. Wanem nao wanfala minister, and wanem nao olketa kwestin wea iumi savve askem iumiseleva?

⁸ Insaed long Bible, Greek word wea olketa transleitim “minister” hem minim man wea duim best bilong hem evritaem for servem nara pipol. Jesus teachim olketa disaepol bilong hem wanfala important leson: Wei for givim komand for pipol duim samting no mekem man hem win; man wea win hem servem nara pipol from love nao muvim hem for duim olsem. Askem iuseleva: ‘Wanem bae mi duim sapos mi nao James or John? Waswe, bae mi minim hao trufala wei for win hem kam from wei for servem nara pipol witim love?’—1 Corinthians 13:3.

9. Jesus showimaot wanem example long wei wea hem deal witim nara pipol?

⁹ Jesus showim olketa disaepol bilong hem hao samting wea world sei mekem man win hem difren tumas from wei for win wea Christ showimaot. Hem nating act olsem hem moa important winim olketa wea hem servem and hem no mekem olketa feel olsem olketa man nating. Evri difren kaen pipol—olketa man, woman, and pikinini, olketa wea rich, poor, olketa wea garem paoa, and tu, olketa sinner—no fraetem hem. (Mark 10:13-16; Luke 7:37-50) Planti taem pipol no patient witim olketa wea no savve duim samfala samting. Jesus hem no olsem. Nomata samfala taem olketa disaepol bilong hem raoa and no tingting gud, long patient wei hem teachim olketa, wea showimaot hem nao barava hambol and garem kwaet fasin.—Zechariah 9:9; Matthew 11:29; Luke 22:24-27.

10. Hao nao full laef bilong Jesus showimaot fasin for servem nara pipol and no tingim seleva?

¹⁰ Example bilong disfala nambawan Son bilong God for no tingim seleva hem showimaot really mining bilong wei for win. Jesus no kam long earth for nara pipol servem hem. Hem kam for servem olketa, for healim “olketa difren kaen sik” and mekem pipol free from wei wea olketa demon kontrolem olketa. Nomata hem savve taed and needim taem for rest, hem evritaem tingim need bilong nara pipol firstaem and hem trae hard for comfortim olketa. (Mark 1:32-34; 6:30-34; John 11:11, 17, 33) Love bilong hem muvim hem for helpem pipol long spiritual wei and for travel go long olketa farawe ples long olketa nogud road for preachim gud nius bilong Kingdom. (Mark 1:38, 39) Jesus ting long wei for servem nara pipol olsem barava important samting.

Garem Hambol Fasin Olsem Christ

11. Olketa brata wea kasem appointment for serve olsem olketa overseer long kongregeson mas garem olketa wanem fasin?

¹¹ Long last part bilong mek-19 century, Zion’s Watch Tower storyim stretfala tingting wea olketa Christian overseer shud garem wea bae mekem olketa fit for kamap olketa traveling overseer for servem need bilong pipol bilong God. Issue bilong September 1, 1894, bilong datfala magasin talem hao olketa man hia mas “garem kwaet fasin—mekem olketa no kamap bighed . . . , garem hambol tingting wea apim Christ and no olketa seleva—no for talemaot savve bilong olketa seleva, bat talemaot Word bilong hem wea simpol and garem paoa.” Hem klia, olketa tru Christian mas no aftarem samfala responsibility for satisfaem olketa seleva or for kasem bignem, paoa, or for kontrolem nara pipol. Wanfala overseer wea hambol bae no forgetim hao olketa responsibility bilong hem nao “gudfala waka,” no wanfala hae position for mekem hemseleva kasem glory. (1 Timothy 3:1, 2) Evri elder and ministerial servant shud duim best bilong olketa for servem nara pipol long hambol wei and for lead long holy service, olsem gudfala example for olketa narawan followim.—1 Corinthians 9:19; Galatians 5:13; 2 Timothy 4:5.

12. Wanem nao olketa kwestin wea hem gud for olketa wea reach aot for olketa privilege long kongregeson savve askem olketa seleva?

¹² Hem gud for eni brata wea reach aot for olketa privilege for askem hemseleva: ‘Waswe, mi luk aotem olketa chance for servem narawan, or waswe, mi laekem nara pipol servem mi? Waswe, mi willing for duim samting wea helpem narawan nomata nara pipol no luksavve?’ Olsem example, wanfala young man maet willing tumas for givim olketa tok long Christian kongregeson bat maet hol bak for helpem olketa olo. Maet hem laekem tumas for kaban witim olketa man long kongregeson wea garem responsibility bat hol bak for share long preaching waka. Hem gud for young man olsem for askem hemseleva: ‘Waswe, mi laekem nomoa for duim samting long service bilong God wea mekem pipol luksavve and praisem mi? Waswe, mi trae for luk important front long nara pipol?’ Wei for luk aotem glory for iumiseleva hem barava no followim example bilong Jesus.—John 5:41.

13. (a) Hao nao example bilong hambol fasin bilong wanfala overseer savve affectim nara pipol? (b) Why nao hem stret for sei hambol fasin, or hambol tingting, hem wanfala fasin wea olketa Christian mas garem?

¹³ Taem iumi trae hard for garem hambol fasin olsem Christ, diswan savve muvim iumi for servem nara pipol. Tingim example bilong wanfala zone overseer wea visitim wanfala branch office bilong Olketa Jehovah’s Witness. Nomata hem garem busy schedule and bigfala responsibility, disfala overseer hem helpem wanfala young brata wea stragol for mekem wanfala machine wea sewim olketa magasin for waka gud. Datfala young brata hem ting bak and sei: “Mi barava sapraes! Hem talem mi hao hem tu waka long semkaen machine taem hem serve olsem young man long Bethel, and hem remember hao hem hard for mekem datfala machine waka gud. Hem waka tugeta witim mi for longtaem lelebet nomata hem garem planti nara important samting for duim. Datwan mekem mi tinghae tumas long hem.” Datfala brata, wea distaem hem wanfala overseer long wanfala branch office bilong Olketa Jehovah’s Witness, hem rememberim hambol fasin bilong datfala overseer. No enitaem iumi shud tingse iumi wanfala important man, wea mekem iumi no willing for duim olketa smol waka. Winim wei for ting olsem, iumi mas garem “hambol tingting.” Saed long diswan iumiseleva no savve chus. Hem part bilong “datfala niufala fasin” wea wanfala Christian mas garem.—Philippians 2:3; Colossians 3:10, 12; Romans 12:16.

Hao for Kasem Sem Tingting Olsem Christ Abaotem Wei for Win

14. Hao nao wei for ting raonem hao God winim iumi and hao iumi no winim nara pipol savve helpem iumi for mekem grow stretfala tingting abaotem wei for win?

¹⁴ Hao nao iumi savve kasem stretfala tingting abaotem wei for win? Wanfala wei hem for ting raonem hao glory, paoa, and wisdom bilong Jehovah hem barava winim iumi olketa man. (Isaiah 40:22) For ting raonem hao iumi semsem witim nara pipol tu savve helpem iumi for mekem grow hambol tingting. Olsem example, maet long samfala wei iumi savve winim narawan, bat olketa maet winim iumi saed long samting wea barava moa important, or maet olketa Christian brata bilong iumi garem samfala fasin wea iumi no garem. For tok stret, maet iumi no luksavve long planti brata and sista wea spesol long eye bilong God from olketa garem kwaet and hambol fasin.—Proverbs 3:34; James 4:6.

15. Hao nao faithful fasin bilong pipol bilong God showimaot no eniwan garem reason for feel hem moa important winim narawan?

¹⁵ Olketa experience bilong Olketa Jehovah’s Witness wea kasem test bikos long faith bilong olketa barava showimaot hao diswan hem tru. Staka taem, pipol wea world tingse olketa man nating, olketa nao go ahed faithful long God taem olketa kasem strongfala test. For ting raonem olketa example olsem savve helpem iumi go ahed hambol and teachim iumi ‘for no tinghae tumas long seleva winim wanem hem fitim.’—Romans 12:3.b

16. Hao nao evriwan insaed long kongregeson savve mekem grow stretfala wei for win followim example bilong Jesus?

¹⁶ Evri Christian, olketa young wan and olo, shud trae for mekem grow tingting bilong Christ abaotem wei for win. Staka difren waka stap long kongregeson. No feel nogud taem samwan askem iu for duim samting wea luk olsem smol waka. (1 Samuel 25:41; 2 Kings 3:11) Parents, waswe, iufala encouragem olketa pikinini and young wan bilong iu for hapi for duim eni assignment olketa kasem, nomata hem long Kingdom Hall, assembly, or ples wea convention kamap? Waswe, olketa lukim iu duim smol waka? Wanfala brata, wea distaem serve long world headquarter bilong Olketa Jehovah’s Witness, hem barava rememberim example bilong parents bilong hem. Hem sei: “From wei wea olketa duim waka for klinim Kingdom Hall or ples wea convention kamap, mi luksavve olketa ting long hem olsem hem important. Planti taem olketa volunteer for duim olketa waka wea helpem kongregeson or olketa brata, nomata hao smol nao datwan. Wei bilong olketa helpem mi for willing for acceptim eni assignment wea mi kasem hia long Bethel.”

17. Hao nao olketa hambol woman savve kamap wanfala blessing long kongregeson?

¹⁷ Saed long wei for tingim nara pipol firstaem, Esther, wea hem queen bilong Rul Bilong Persia long mek-faev century B.C.E., showimaot nambawan example for iumi. Nomata hem stap long haos bilong king, hem willing for putim laef bilong hem long danger for helpem pipol bilong God for fitim will bilong hem. (Esther 1:5, 6; 4:14-16) Nomata sapos olketa garem rich or poor living, olketa Christian woman distaem savve showimaot semkaen fasin olsem Esther taem olketa encouragem olketa wea feel sorre, visitim olketa wea sik, share long preaching waka, and waka tugeta witim olketa elder. Olketa hambol sista olketa olsem wanfala barava blessing long kongregeson!

Olketa Blessing wea Kam From Tingting Bilong Christ Abaotem Wei for Win

18. Taem iumi showimaot tingting bilong Christ abaotem wei for win, wanem gud samting nao iumi kasem?

¹⁸ Bae iu kasem staka blessing taem iu go ahed for garem tingting bilong Christ abaotem wei for win. Wei for servem narawan and no tingim seleva hem mekem olketa hapi and iu tu. (Acts 20:35) Wei wea iu willing for waka hard for olketa brata bilong iu hem mekem love bilong olketa for iu hem grow. (Acts 20:37) Samting wea moa important, Jehovah ting long samting wea iu duim for helpem olketa Christian brata and sista bilong iu olsem wanfala sakrifaes wea givim praise long hem.—Philippians 2:17.

19. Iumi shud disaed strong for duim wanem saed long tingting bilong Christ abaotem wei for win?

¹⁹ Each wan long iumi need for lukluk gud long heart bilong iumiseleva and ask olsem: ‘Waswe, bae mi story nomoa abaotem wei for mekem grow tingting bilong Christ abaotem wei for win, or bae mi trae hard for duim diswan?’ Feeling bilong Jehovah abaotem olketa wea praod hem barava klia. (Proverbs 16:5; 1 Peter 5:5) Samting wea iumi duim mas showimaot iumi hapi for garem tingting bilong Christ abaotem wei for win, nomata long Christian kongregeson, long famili bilong iumi, or wei wea iumi deal witim nara pipol evriday—evri samting iumi duim hem for givim glory and praise long God.—1 Corinthians 10:31.

[Olketa Footnote]

Waswe, Iu Savve Minim?

• Why nao iumi shud stap klia long tingting bilong world abaotem wei for win?

• Wanem nao tingting bilong Jesus abaotem wei for win?

• Hao nao olketa overseer savve garem hambol fasin olsem Christ?

• Wanem nao savve helpem iumi for garem tingting bilong Christ abaotem wei for win?

[Box long page 17]

Hu Nao Garem Tingting Bilong Christ?

Man wea laekem pipol servem hem or man wea willing for servem narawan?

Man wea laek for olsem main man or man wea willing for acceptim smol waka?

Man wea mekhae long hemseleva or man wea mekhae long nara pipol?

[Piksa long page 14]

Bigfala statue bilong Pharaoh Amenhotep III

[Piksa long page 15]

Waswe, iu savve wanem nao spoelem Haman?

[Olketa Piksa long page 16]

Waswe, iu luk aotem olketa chance for servem narawan?