Kwestin From Reader

Wanem nao Jesus minim taem hem sei long olketa disaepol bilong hem: “Mi lukim Satan hem foldaon finis olsem laetning from heven”?

Jesus hem just chusim 70 disaepol, and hem “sendem olketa go, tu bae tu, for go firstaem long hem insaed long evri taon and ples wea hem bae kasem.” Taem 70 hia kam bak, olketa barava hapi long wei wea olketa win for duim assignment bilong olketa. Olketa sei: “Lord, olketa demon tu obeyim mifala taem mifala iusim nem bilong iu.” Long datfala taem nao, Jesus tok olsem: “Mi lukim Satan hem foldaon finis olsem laetning from heven.”—Luke 10:1, 17, 18.

Long firstaem, hem maet luk olsem Jesus tok abaotem samting wea happen finis. Bat, 60 year bihaen Jesus talem olketa toktok antap, olo aposol John iusim semkaen toktok taem hem raet: “Olketa torowem go daon datfala bigfala dragon, datfala firstfala snek, datwan wea olketa kolem Devil and Satan, wea hem trikim olketa man long earth; olketa torowem hem kam daon long earth, and olketa torowem olketa angel bilong hem go daon witim hem.”—Revelation 12:9.

Taem John raetem toktok hia, Satan stap long heven yet. Hao nao iumi savve? Bikos Revelation hem buk bilong profesi, no history. (Revelation 1:1) So, long datfala taem wea John stap, olketa no torowem kam daon Satan long earth yet. Tru nao, pruv showimaot hao diswan hem happen no longtaem bihaen Jesus kamap King long Kingdom bilong God long 1914.a—Revelation 12:1-10.

So, why nao Jesus storyim wei wea olketa aotem Satan from heven olsem samting wea happen finis? Samfala savveman talem hao Jesus tok strong long olketa disaepol bilong hem from olketa showimaot praod fasin. Olketa tingse toktok bilong hem minim: ‘Iufala win ovarem olketa demon, bat no kamap man for tokplas. Satan kamap man wea praod tumas, and datwan nao mekem hem foldaon.’

Iumi no barava sure long diswan. Bat, hem luk olsem Jesus hem hapi witim olketa disaepol bilong hem and hem tok abaotem dae bilong Satan long future. Jesus barava savve, winim olketa disaepol bilong hem, hao Devil hem garem strongfala wei for heit. Tingim hapi bilong Jesus taem hem herem hao olketa demon hia wea garem paoa stap anda long olketa disaepol bilong hem wea no perfect! Disfala wei for mekem olketa demon for stap anda, hem piksarem long smolfala wei nomoa wanfala taem long future wea Jesus, olsem Michael datfala chief angel, bae faetem Satan and torowem hem kam daon from heven long earth.

Taem Jesus sei hem lukim Satan “foldaon finis,” hem strongim hao hem barava sure long wei wea Satan bae foldaon. Diswan hem semsem witim olketa nara Bible profesi wea storyim olketa samting wea bae happen long future olsem olketa samting wea happen finis. Olsem example, lukim hao Isaiah storyim samfala part long datfala profesi abaotem Messiah long Isaiah 52:13–53:12, olsem samting wea happen finis. Luk olsem Jesus talemaot wei wea hem biliv strong hao wei wea Satan bae aot from heven bae happen followim purpose bilong Dadi bilong Hem. Jesus hem sure tu hao long taem wea God markem, Satan and olketa demon bilong hem bae go insaed hol and bihaen bae finis evribit.—Romans 16:20; Hebrews 2:14; Revelation 20:1-3, 7-10.

[Footnote]