Wanem Nao Givim Laef Trufala Mining?
TAEM olketa askem Jesse, wanfala hae skul student wea hem 17 year, abaotem mining bilong laef, hem sei, “Barava enjoyim laef, taem iu laef yet.” Suzie garem difren tingting. Hem sei: “Long tingting bilong mi, iu savve mekem laef minim eni samting wea iu chusim.”
Waswe, enitaem iu ting raonem wanem nao mining bilong laef? Waswe, wanfala purpose nomoa stap for evri man? Or waswe, Suzie hem stret—laef savve garem eni mining wea iumi wanwan chusim? Nomata pipol go ahed for garem moa savve saed long science, wanfala samting insaed long iumi laek for savve long mining bilong laef. Gogo, klosap evriwan kasem disfala tingting, ‘Why nao iumi laef?’
Science distaem trae hard for ansarem datfala kwestin. Wanem nao ansa? Wanfala professor long psychology (studyim fasin bilong pipol) and zoology (studyim animal), David P. Barash sei: “Long saed bilong evolution, no eni important mining hem stap abaotem why iumi laef.” For olketa savveman saed long evolution, olketa samting wea laef garem wanfala purpose nomoa: for go ahed laef and garem pikinini. Dastawe, Professor Barash sei: “Insaed long wanfala big universe wea no garem purpose and wea no kea abaotem pipol, hem waka bilong olketa man nao for givim mining long laef bilong iumiseleva thru long olketa samting wea iumi chus for duim.”
Samting wea Givim Mining and Purpose
Waswe, hem nomoa mining bilong laef—iumi each wan duim wanem hem laekem? Winim wei for iumi no garem eni goal long world wea no garem purpose or mining, Bible showimaot for longfala taem hao iumi laef for wanfala reason. Iumi no laef from seknomoa wanfala samting happen long universe. Bible talem iumi hao Creator iusim staka billion year for preparem disfala earth for olketa man. No eni samting kamap seleva. Hem mek sure evriting hem “gud tumas.” (Genesis 1:31; Isaiah 45:18) Why nao olsem? Hem bikos God garem wanfala purpose for man.
Bat, interesting samting, God nating iusim paoa bilong hem for markem future bilong man wanwan or samting wea iumi born witim. Nomata samting wea iumi born witim savve affectim iumi, long bigfala wei iumi savve kontrolem wanem iumi duim. Iumi evriwan free for chusim wanem kaen laef nao iumi laekem.
Nomata iumi wanwan savve chusim wanem bae iumi duim witim laef bilong iumi, sapos iumi no tingim Creator taem iumi mekem olketa plan bilong iumi, datwan bae hem wanfala mistek. For tok stret, staka luksavve hao wei for garem mining and purpose long laef hem join witim wei for fren witim God. Nem bilong God, Jehovah, wea minim, “Hem Mekem Kamap,” hem mekhae long important samting wea joinim purpose bilong laef bilong iumi witim God. (Exodus 6:3; Psalm 83:18) Diswan minim hem go ahed for fulfillim samting wea hem promisim and hem evritaem duim wanem hem plan for duim. (Exodus 3:14; Isaiah 55:10, 11) Tingim datwan. Disfala nem Jehovah hem olsem promis for iumi evriwan hao hem nomoa Datwan wea Givim purpose wea garem mining wea bae stap for olowe.
Wei for luksavve hao Creator hem stap savve barava affectim wei wea man ting abaotem laef. Linet, wanfala girl wea 19 year, sei: “Taem mi lukim evri nambawan samting wea Jehovah wakem and purpose bilong olketa diswan mekem mi luksavve hem creatim mi for wanfala purpose tu.” Amber sei tu: “Taem pipol sei olketa no savve sapos God stap, diswan mekem mi tingim hao mi savve. Olketa samting wea Jehovah wakem pruvim hem stap.” (Romans 1:20) For luksavve Creator hem stap hem gud, bat for mekem grow wei for fren witim hem wea garem mining hem moa important.
Fren Witim God
Bible savve helpem iumi long diswan tu. Olketa firstfala chapter bilong hem showimaot klia hao Jehovah God hem wanfala loving Dadi. Olsem example, hem nating creatim Adam and Eve and then no talem tufala hu nao hem. Bat, hem story evritaem witim tufala. Hem nating lusim tufala long Eden for tufala disaedem wanem olketa bae duim long laef, and then hem go ahed for duim olketa narafala samting wea hem laek duim. Bat, hem givim olketa klia instruction long best wei for followim. Hem givim tufala waka wea mekem tufala satisfae, and hem go ahed for teachim tufala. (Genesis 1:26-30; 2:7-9) Hem nao wanem iumi expectim wanfala loving dadi for duim. Ting raonem wanem datwan hem minim. Denielle sei: “Taem mi savve hao Jehovah nao creatim earth and hem wakem iumi long wei for enjoyim creation bilong hem, diswan showimaot long mi hao hem laekem iumi for hapi.”
Winim datwan, Jehovah, olsem wanfala loving dadi laekem evri pikinini bilong hem for fren gud witim hem. Saed long diswan, Acts 17:27 promisim iumi: “Hem no farawe from iumi wanwan.” Waswe, diswan hem important? Amber hem sei: “Wei wea mi kasem savve abaotem Jehovah mekem mi sure hao mi no stap seleva enitaem. Nomata wanem nao happen, mi evritaem garem samwan wea mi savve depend long hem.” And tu, taem iu savve long Jehovah, bae iu lukim hao hem kaen, raeteous, and gud. Iu savve depend long hem. Jeff hem sei: “Taem Jehovah kamap wanfala klos fren, mi savve hao no eniwan moa fit olsem hem for givim help long mi long taem mi needim.”
Sorre tumas, pipol talem staka nogud samting abaotem Jehovah. Pipol sei hem nao garem blame for bigfala wei wea pipol safa and for olketa problem wea kamap from dirty and nogud fasin wea olketa bigman bilong religion duim. Olketa talem tu hao God nao garem blame for samfala barava nogud samting wea happen long history. Bat Deuteronomy 32:4, 5 explainim olsem: “Evri wei bilong hem followim justice. . . . Olketa seleva nao duim nogud samting; olketa no pikinini bilong hem, olketa nao rong.” Dastawe, iumiseleva mas lukluk gud and pruvim wanem nao tru.—Deuteronomy 30:19, 20.
Purpose Bilong God Hem Fulfill
Bat, nomata wanem nao iumi disaedem, no eni samting bae savve stopem God for barava fulfillim purpose bilong hem for disfala earth and olketa man. Iumi mas no forgetim hao hem nao Creator. Sapos olsem, wanem nao datfala purpose? Jesus Christ storyim datwan long Sermon bilong hem long Maunten, taem hem sei: “Hapi nao olketa wea garem kwaet fasin, from olketa bae kasem earth.” Bihaen, taem hem story witim aposol bilong hem, John, hem sei God bae barava “finisim olketa wea spoelem earth.” (Matthew 5:5; Revelation 11:18) From Jesus stap witim God long taem bilong creation, hem savve hao from start, purpose bilong God nao for perfect famili bilong man stap olowe long paradaes earth. (Genesis 1:26, 27; John 1:1-3) And God nating change. (Malachi 3:6) God promisim iumi olsem: “Barava olsem hao mi tingim, hem mas olsem nao; and olsem mi talem, datwan nao bae kamap tru.”—Isaiah 14:24.
Long taem bilong iumi, Jehovah hem start finis for putim faondeson for wanfala sekson bilong pipol wea garem wan mind. Love for God and neiba nao muvim olketa hia and no greedy fasin and wei for tingim seleva wea kamap big long world distaem. (John 13:35; Ephesians 4:15, 16; Philippians 2:1-4) Hem wanfala sekson bilong olketa barava willing volunteer wea faith bilong olketa nao muvim olketa for fulfillim purpose bilong olketa—for preachim gud nius bilong Kingdom bilong God bifor disfala system hem end. (Matthew 24:14; 28:19, 20) Long winim 230 kantri, winim six million Christian go ahed for worship tugeta witim love and wan mind.
Mekem Laef Bilong Iu Garem Mining
Sapos iu luk aotem wei for laef bilong iu garem moa mining, iu shud savve hao Jehovah God hem go ahed for invaetem iu distaem for kaban witim pipol bilong hem, datfala “raeteous nation” bilong hem. (Isaiah 26:2) Bat, maet iu laek savve ‘hao nao living bilong disfala Christian sekson? Waswe, mi barava laek joinim olketa?’ Lukim wanem nao tingting bilong samfala young wan:
Quentin: “Kongregeson hem protectim mi from disfala world. Taem mi luksavve hao Jehovah hem part long laef bilong mi, diswan helpem mi for lukim hao hem stap and hem laekem mi for hapi.”
Jeff: “Kongregeson nao best ples for mi go long hem for kasem encouragement. Olketa brata and sista bilong mi stap long there for helpem and praisem mi. Olketa nao really famili bilong mi.”
Linet: “Hapi wea mi kasem taem samwan acceptim truth from Bible and disaed for servem Jehovah hem samting wea hard for mi markem witim eni nara samting. Diswan barava mekem laef bilong mi satisfae.”
Cody: “Laef bilong mi bae iusles sapos Jehovah no stap. Bae mi olsem olketa narawan wea go ahed for luk aotem hapi long enikaen samting, bat nating faendem. Bat, Jehovah givim mi nambawan privilege for fren witim hem, and diswan nao givim mining long laef bilong mi.”
Waswe, iu laek for faendaot seleva? Bae iu luksavve hao taem iu kam klos long Creator bilong iu, Jehovah God, laef bilong iu tu bae garem mining.
[Piksa long page 31]
Wei for fren witim God givim mining long laef bilong iumi
[Piksa Credit Line long page 29]
NASA photo