Kasem Gud Samting From Wei for Followim Spiritual Standard
“Man wea lovem silver bae no satisfae witim silver nomoa, olsem eniwan wea lovem richfala samting bae no satisfae witim wages.”—Ecclesiastes 5:10.
HEVI savve kamap from wei for ova tumas saed long waka, and diswan savve kosim olketa problem saed long health, wea samfala taem lead go long dae. Divorce mekem olketa famili long staka kantri for no stap tugeta. Planti taem samting wea kosim diswan hem wei for wari tumas abaotem olketa material samting. Winim wei for hapi long wanem hem garem, man wea busy tumas for kasem staka samting bae evritaem laekem samfala samting moa, nomata diswan bae spoelem health bilong hem. Wanfala buk for help saed long diswan sei: “Hem wei bilong pipol for trae hard tumas for kasem sem samting wea narawan garem nomata hem mas waka hard gogo hem kasem heart attak taem hem young nomoa.”
Feeling for laekem staka samting savve mekem man for no hapi. Advertisment hem strongfala samting wea olketa bisnis iusim for switim iumi. Olketa advertisement long television and radio evritaem encouragem iu for peim olketa samting wea maet iu no needim and no garem selen for peim. Evriting hia savve spoelem iu long bigfala wei.
Wei for no hol bak for satisfaem seleva hem savve barava affectim iumi long physical and spiritual saed, nomata iumi maet no luksavve firstaem. Olsem example, King Solomon wea wise sei: “Wanfala kwaet heart hem laef bilong body bilong man.” (Proverbs 14:30) Long narasaed, wei for ova tumas, wari, and hevi bilong wei for hipimap riches savve spoelem health and mekem iumi no hapi. Taem olketa material samting kamap main samting long laef hem savve spoelem wei for fren insaed famili and witim nara pipol. And taem datwan happen, hem barava affectim full laef bilong man.
Spiritual Standard Hem Moabeta
Winim tu thousand year go finis aposol Paul talem disfala warning toktok: “Finis for followim disfala world.” (Romans 12:2) World lovem tumas pipol wea followim standard bilong hem. (John 15:19) Wei bilong world hem for switim iu long wanem iu lukim, tasim, teistim, smelem and herem, and hem trae for mekem iu ting for laekem tumas material samting. Hem mekhae long “samting wea eye wantem” mekem iu and olketa narawan laekem tumas material samting.—1 John 2:15-17.
Samting wea barava important hem stap wea winim selen, bignem, and riches. Planti handred year bifor, King Solomon hipimap evri material samting bilong world. Hem buildim olketa haos, garem olketa garden flaoa, frut tree, servant, animal, man and woman for singsing, and barava staka gold and silver. No eniwan wea stap firstaem long Solomon garem riches olsem hem. Hem barava rich tumas. Hem garem evriting wea hem laekem. Nomata olsem, taem hem lukluk long evriting wea hem duim, hem sei: “Evri samting hem iusles nomoa and hard waka for aftarem wind.”—Ecclesiastes 2:1-11.
Spesol wisdom wea Jehovah givim Solomon mekem hem savve hao wei for followim spiritual standard nao savve mekem man barava satisfae evribit. Hem raet olsem: “From iumi herem finis evri samting, main samting nao hem: Fraet long trufala God and obeyim olketa komandment bilong hem. From diswan nao hem samting man mas duim.”—Ecclesiastes 12:13.
Toktok wea stap insaed Word bilong God, Bible, hem garem hae price winim gold or silver. (Proverbs 16:16) Olsem olketa spesol ston, olketa deepfala truth stap for iu faendem. Waswe, iu bae luk aotem and dig for olketa? (Proverbs 2:1-6) Datwan wea markem olketa trufala standard, Creator bilong iumi, encouragem iu for duim datwan, and hem bae helpem iu. Long wanem wei?
Jehovah provaedem olketa spesol truth thru long Word, spirit, and organization bilong hem. (Psalm 1:1-3; Isaiah 48:17, 18; Matthew 24:45-47; 1 Corinthians 2:10) Iu garem chance for tingting gud bifor iu chusim best and nambawan wei bilong laef, taem iu lukluk gud long olketa samting hia wea garem hae price. Jehovah, Creator bilong iumi, savve long wanem iumi needim for barava hapi, so bae hem no hard for iumi chus.
Bible Mekhae Long Best Standard
Bible garem nambawan advaes wea no eniting gud winim and hem savve helpem man. Olketa standard bilong hem saed long fasin hem hae narawe. Man evritaem kasem gud samting from advaes wea stap long Bible. For longfala taem finis pruv showimaot hao Bible hem tru evribit and givim help. Olketa nambawan advaes long Bible hem for waka hard, garem honest fasin, iusim gud selen, and no lesy.—Proverbs 6:6-8; 20:23; 31:16.
For join witim datwan, Jesus sei: “No go ahed for hipimap for iufala seleva olketa riches long earth, wea moth and rasta savve kaikaim, and wea olketa man for steal savve kam insaed and stealim. Winim datwan, hipimap for iufala seleva olketa riches long heven, wea no eni moth or rasta savve kaikaim, and wea olketa man for steal no savve kam insaed and stealim.”—Matthew 6:19, 20.
Datfala encouragement barava fitim distaem olsem hem fitim 2,000 year go finis. Iumi savve garem laef wea barava nambawan distaem sapos iumi no busy for laekem tumas material samting. For hipimap olketa richfala spiritual samting hem key for garem trufala hapi and wei for satisfae. Wanem nao iumi savve duim for kasem datwan? Readim Word bilong God, Bible, and duim samting wea hem talem.
Spiritual Standard Givim Reward
Iumi kasem gud samting saed long spiritual, physical, and feeling taem iumi barava followim spiritual standard. Long sem wei wea ozone protectim iumi from sun, olketa gudfala principle saed long fasin protectim iumi long wei for mekem iumi savve long olketa danger bilong wei for laekem material samting. Christian aposol Paul raet olsem: “Olketa wea wantem tumas for kamap rich bae foldaon insaed test and trap and wei for barava wantem olketa samting wea krangge and kosim pain, wea gogo barava spoelem man. From fasin for lovem selen hem start bilong planti nogud samting, and from samfala trae for kasem datfala love olketa lusim faith finis and givim planti pain long olketa seleva.”—1 Timothy 6:9, 10.
Wei for lovem material samting switim pipol for luk aotem richfala samting, bignem, and paoa. For kasem diswan, staka taem olketa duim samting long wei wea haed and no honest. Iumi westem taem, strong, and savve sapos iumi laekem tumas material samting. Maet iumi no sleep gud long naet tu. (Ecclesiastes 5:12) Iumi no savve muv ahed gud long spiritual wei sapos iumi laekem tumas material samting. Jesus Christ, nambawan man wea stap bifor showimaot klia best wei taem hem sei: “Hapi nao olketa wea luksavve long spiritual need bilong olketa.” (Matthew 5:3) Hem savve hao olketa material samting stap for lelebet taem nomoa bat spiritual riches barava important and reward bilong datwan hem for olowe.—Luke 12:13-31.
Waswe, Hem Waka Gud?
Greg ting bak olsem: “Parents bilong mi trae hard for changem tingting bilong mi for sei spiritual standard bae no givim eni gud samting long mi. Bat, mi garem peace taem mi trae hard for kasem olketa spiritual goal bikos mi free from wari saed long wei for laekem tumas material samting.”
Spiritual standard savve helpem iumi tu for garem gudfala wei for fren witim olketa narawan. Olketa trufala fren laekem iu no from wanem iu garem bat olketa laekem wei bilong iu. Bible sei: “Stap witim man wea wise and iu bae kamap wise.” (Proverbs 13:20, Today’s English Version). And tu, no material samting bat love and wisdom nao mekem wanfala gudfala famili.—Ephesians 5:22–6:4.
Iumi no born kam witim savve abaotem wanem nao important long laef. Iumi mas lanem diswan from olketa narawan or from Bible. Hem nao why full tingting bilong iumi abaotem olketa material samting savve change taem iumi studyim Bible. Don, wea bifor garem hae position long bank sei: “Mi kasem help for tingting moa abaotem wanem hem important, and mi lane for hapi nomoa for garem wanem mi needim.”
Aftarem Spiritual Riches wea Stap for Olowe
Spiritual standard mekhae long reward wea stap for olowe and no hapi wea stap for lelebet taem nomoa. Paul raet olsem: “Samting wea eye lukim [material samting] stap for lelebet taem nomoa, bat samting wea eye no lukim [spiritual riches] stap for olowe.” (2 Corinthians 4:18) Hem tru hao wei for aftarem olketa material samting maet satisfaem feeling bilong man for lelebet taem, bat greedy fasin bae no helpem man for olowe. Spiritual standard stap for olowe.—Proverbs 11:4; 1 Corinthians 6:9, 10.
Bible tok strong againstim wei wea pipol tinghae tumas long material samting distaem. Hem teachim iumi hao for kontrolem selfish fasin taem iumi mekem eye bilong iumi simpol. Hem mekhae long spiritual riches wea barava important. (Philippians 1:10) Hem showimaot hao greedy fasin hem wei for mekhae long man seleva. Iumi barava hapi taem iumi followim wanem iumi lanem from Word bilong God. Iumi changem tingting bilong iumi for givim samting and no for kasem nomoa. Hem barava strongfala reason for changem fasin for tingim seleva witim spiritual standard!
Hem tru hao, long samfala wei, selen hem samting wea savve protectim iumi. (Ecclesiastes 7:12) Bat Bible tok stret taem hem sei: “Selen bilong iu savve finis kwiktaem, wea olsem hem garem wing and flae olsem wanfala eagle.” (Proverbs 23:5, TEV). For kasem staka material samting, pipol no tingim nao olketa important samting olsem health, famili, and gudfala conscience. From datwan, olketa kasem barava nogud samting. Long narasaed, olketa spiritual samting satisfaem olketa barava important need bilong iumi—feeling for garem love, laef wea garem mining, and need for worshipim loving God, Jehovah. Hem showim tu hao for kasem laef olowe long paradaes earth wea man bae kamap perfect—hope wea God promisim iumi.
Klosap nao gudfala living wea man laekem bae kamap tru long niu world bilong God. (Psalm 145:16) Full earth bae “fulap witim savve bilong Jehovah” long datfala taem. (Isaiah 11:9) Spiritual standard nomoa bae stap. Wei for laekem tumas material samting and olketa nogud samting wea kamaot from datwan bae nomoa nao. (2 Peter 3:13) Then perfect health, waka wea mekem man satisfae, gudfala hapitaem, famili stap hapi, and wei for fren witim God for olowe, evri samting hia bae mekem olketa man hapi for olowe.
[Box/Piksa long page 6]
Iusim Gud Selen Bilong Iu!
Luksavve long wanem iu needim. Jesus teachim iumi for prea olsem: “Givim mifala bred for disfala day for fitim need bilong disfala day.” (Luke 11:3) No giamanim iuseleva for tingse samting wea iu laekem hem samting wea iu needim tumas. Laef bilong iu no depend long wanem iu garem.—Luke 12:16-21.
Planim wei for iusim selen. Tingting gud firstaem bifor iu peim eniting. Bible sei: “Olketa plan bilong man wea careful bae kasem reward, bat evriwan wea kwiktaem tumas for duim samting bae garem need.” (Proverbs 21:5) Jesus advaesem olketa wea lisin for savve long full kost firstaem bifor olketa duim eniting wea kostim selen.—Luke 14:28-30.
No kaon olobaot. Sapos hem fitim, keepim selen for peim eniting and no kaon. Wanfala proverb sei olsem: “Man wea garem kaon hem servant long man wea givim.” (Proverbs 22:7) Plan bilong iu for peim olketa samting wea kost tumas savve win sapos iu kontrolem iuseleva for no spendem selen winim wanem iu garem.
Lukaftarem gud. No westem eniting taem iu lukaftarem gud olketa samting iu garem mekem hem stap for longfala taem. Jesus showimaot gudfala wei for keepim samting wea hem iusim.—John 6:10-13.
Important samting mas firstaem. Wanfala wise man bae ‘iusim taem bilong hem long gudfala wei’ for duim olketa samting wea barava important.—Ephesians 5:15, 16.
[Box/Piksa long page 7]
Best Wei for Lane Hem No From Samting wea Kasem Man
Samting wea kasem man—gud and nogud—savve helpem hem. Bat waswe, best wei for lane hem from samting wea kasem man? Nomoa, wei wea moabeta hem stap for directim iumi. Man wea raetem psalm hem point go long diswan taem hem sei: “Word bilong iu hem wanfala lamp for leg bilong mi, and laet for road bilong mi.”—Psalm 119:105.
Why nao wei for lane from God hem moabeta winim wei for lane from samting wea kasem iumiseleva? Wan samting nao, taem man lane from samting wea kasem hem—lane from olketa mistek—diswan kosim problem and givim pain. Bat diswan samting wea hem savve missim nomoa. God hem talem olketa Israelite bifor: “O sapos iufala barava obeyim olketa komandment bilong mi! Then peace bilong iufala bae kamap olsem wanfala river, and raeteous fasin bilong iufala olsem olketa wave long sea.”—Isaiah 48:18.
Word bilong God hem best ples for kasem instruction from insaed long hem nao olketa barava old and tru story abaotem olketa samting wea kasem man. Iu luksavve hao wei for lane from nara pipol taem olketa win and fail hem moabeta winim wei for iuseleva duim sem mistek. (1 Corinthians 10:6-11) Samting wea moa important, insaed Bible God givim olketa nambawan law and principle wea iumi fit for trustim, wea savve leadim iumi. “Law bilong Jehovah hem perfect . . . Man fit for trustim reminder bilong Jehovah, mekem man wea no garem savve kamap wise.” (Psalm 19:7) Tru tumas, best wei for lane hem for lane from wisdom bilong loving Creator bilong iumi.
[Olketa Piksa long page 4]
World trae for mekem iu laekem tumas material samting
[Piksa long page 5]
Toktok insaed Bible garem hae price winim gold or silver