Creation Bilong Jehovah wea Luk Naes

“Olketa Waka Bilong Iu Staka Tumas, O Jehovah!”

NOMATA sapos iumi stap long vilij or long taon, antap long wanfala maunten or barava saed long sea, olketa creation bilong Jehovah wea luk naes stap raonem iumi. Dastawe, 2004 Calendar of Jehovah’s Witnesses hem garem olketa didifren piksa bilong olketa nambawan creation bilong Jehovah God.

Olketa man wea tinghae long creation evritaem interest long olketa waka bilong God. Olsem example, tingim Solomon, wea wisdom bilong hem “moa big winim evriwan long Orient.” Bible sei: “Hem savve story abaotem olketa cedar wea stap long Lebanon, hyssop wea savve grow kamaot long wall and evri nara tree; and tu, hem story abaotem olketa animal and samting wea flae and samting wea muv and olketa fish.” (1 Kings 4:30, 33) King David, dadi bilong Solomon, planti taem savve ting raonem olketa nambawan creation bilong God. Dastawe hem tok olsem long Creator: “Olketa waka bilong iu staka tumas, O Jehovah! Evriwan long olketa iu wakem long wisdom. Earth hem fulap witim olketa samting wea iu wakem.”—Psalm 104:24.a

Iumi tu shud lukluk gud and ting raonem olketa creation. Olsem example, maet iumi savve “luk go ap” and ask olsem: “Hu nao creatim evri samting hia?” Datwan hem Jehovah God, wea garem “barava bigfala paoa for duim samting” and wea barava garem “strongfala paoa”!—Isaiah 40:26.

Hao nao wei for ting raonem olketa creation bilong Jehovah savve helpem iumi? Hem savve helpem iumi long thrifala wei, (1) mekem iumi tinghae long laef bilong iumi, (2) muvim iumi for helpem nara pipol for lane from creation, and (3) encouragem iumi for savve and ting moa hae long Creator bilong iumi.

Laef bilong iumi man, wea hem moa hae winim laef bilong “olketa animal wea no garem tingting,” mekem iumi fit for lukim and tinghae long olketa nambawan samting long creation. (2 Peter 2:12) Eye bilong iumi savve lukim naesfala ples. Iumi savve herem naesfala singsing bilong olketa bird witim ear bilong iumi. And iumi savve tingim olketa hapi memory. Nomata laef bilong iumi distaem hem no perfect, iumi savve barava enjoyim!

Parents savve hapi for lukim pikinini bilong olketa interest long creation. Olketa pikinini savve barava enjoyim wei for faendem olketa sela long saedsea, for keepim wanfala animal, for klaemap wanfala tree! Parents bae laek for helpem pikinini bilong olketa for minim hao olketa creation hia kam from Creator. Disfala wei for sapraes and respect wea pikinini garem for olketa creation bilong Jehovah savve stap witim hem for full laef.—Psalm 111:2, 10.

Sapos iumi tinghae long creation bat no praisem Creator diswan bae showimaot iumi nating tingting gud. Profesi bilong Isaiah helpem iumi for ting raonem diswan taem hem sei: “Waswe, iu no savve or iu no herem? Jehovah, Creator bilong full earth, hem wanfala God for olowe. Hem no savve kamap taed or wikdaon. No eniwan savve minim wei bilong hem for luksavve.”—Isaiah 40:28.

Tru nao, olketa waka bilong Jehovah pruvim nambawan wisdom bilong hem, paoa bilong hem wea no eniwan moa garem, and deep love wea hem garem for iumi. Taem iumi lukim olketa naesfala samting raonem iumi and luksavve long fasin bilong Man wea wakem evriting hia, diswan bae muvim iumi for talem olketa toktok bilong David: “No eniwan olsem iu . . . , O Jehovah, and no eni waka hem olsem waka bilong iu.”—Psalm 86:8.

Iumi savve sure olketa man wea obey bae gohed for barava interest long olketa creation bilong Jehovah. Taem iumi laef for olowe bae iumi garem staka chance for lanem moa samting abaotem Jehovah. (Ecclesiastes 3:11) And taem iumi lanem moa samting abaotem hem, diswan bae muvim iumi for lovem go moa Creator bilong iumi.

[Olketa Footnote]

[Box long page 9]

Toktok wea Apim Creator

Staka scientist wea tinghae long creation luksavve hao God nao wakem. Samfala toktok bilong olketa long hia:

“Part long science wea join witim waka bilong mi wea mekem mi satisfae and hapi hem taem mi lanem niu samting and mi savve sei long miseleva, ‘So hem nao hao God wakem.’ Goal bilong mi nao for minim smol haf long plan bilong God.”—Henry Schaefer, professor long chemistry.

“Samting wea kosim Universe for gohed kamap moa big, man wea read nao mas disaedem seleva, bat sapos iumi no tingim Hem [God] bae hem hard tumas for iumi minim.”—Edward Milne, man from Britain wea studyim Universe.

“For minim samting wea God creatim iumi mas iusim maths wea moa hard.”—Alexander Polyakov, man from Russia wea studyim maths.

“Taem iumi studyim creation iumi ting raonem tingting bilong Creator, luksavve long olketa idea bilong hem, minim samting wea Hem nao wakem and no iumi.”—Louis Agassiz, biologist from America.

[Piksa long page 8, 9]

Olketa Gentoo penguin, Antarctic Peninsula

[Piksa long page 9]

Grand Teton National Park, Wyoming, U.S.A.

[Credit Line]

Jack Hoehn/Index Stock Photography