Garem Balance Tingting Abaotem Alcohol
“Wine hem mekfani long man, alcohol hem no savve stap kwaet, and evriwan wea foldaon long hem no wise.”—PROVERBS 20:1.
1. Wanem nao man wea raetem psalm talem for sei thankiu for samfala gudfala present wea Jehovah givim?
DISAEPOL James hem raet olsem: “Evri gudfala present and evri perfect present hem from antap, from hem kam from Dadi bilong olketa laet long heven.” (James 1:17) Man wea raetem psalm hem tinghae tumas long staka gudfala present wea God givim so hem sei: “Hem mekem green grass grow for olketa animal, and olketa plant for olketa man iusim, for mekem earth garem kaikai, and wine wea mekem heart bilong man hapi, for mekem feis shaen witim oil, and bred wea mekem man laef.” (Psalm 104:14, 15) Wine and nara alcohol drink olketa hia gudfala present from God, olsem olketa plant, bred, and oil tu. Hao nao iumi shud iusim olketa present hia?
2. Wanem nao olketa kwestin wea iumi bae storyim saed long wei for drinkim alcohol?
2 Naesfala present hem gudfala sapos iumi iusim long stretfala wei. Olsem example, honey hem “gudfala,” bat “wei for kaikaim tumas honey hem nogud.” (Proverbs 24:13; 25:27) Wei for drinkim “lelebet wine” hem gud, bat wei for ova tumas long alcohol hem wanfala serious samting. (1 Timothy 5:23) Bible givim disfala warning: “Wine hem mekfani long man, alcohol hem no savve stap kwaet, and evriwan wea foldaon long hem no wise.” (Proverbs 20:1) Bat, wanem nao hem minim for foldaon long alcohol?a Hao nao iumi savve haomas alcohol hem ova tumas? Wanem nao balance tingting saed long diswan?
Long Wanem Wei Nao Alcohol Mekem Man “Foldaon”?
3, 4. (a) Wanem nao showimaot Bible tambuim wei for drink gogo man drunk? (b) Wanem nao samfala saen wea showimaot man hem drunk?
3 Long Israel bifor, sapos wanfala man garem wanfala son wea ova tumas long kaikai and man for drunk, olketa mas sutim dae datfala son witim ston. (Deuteronomy 21:18-21) Aposol Paul hem givim disfala kaonsel long olketa Christian: “No kaban witim eniwan wea olketa kolem wanfala brata wea duim fornication or wea hem greedy or worshipim idol or tok againstim narafala man or wea savve drunk or forcem narawan for givim selen, nomata for kaikai witim man olsem, iufala mas no duim.” Hem klia tumas, Bible sei hem tambu for man drink gogo hem drunk.—1 Corinthians 5:11; 6:9, 10.
4 Bible storyim olketa saen bilong man wea drunk olsem: “No luk long wine taem hem garem redfala kala, taem hem shaen insaed kap, taem hem smooth for go daon. End bilong hem baet olsem wanfala snek, and hem poisonim man olsem wanfala snek. Eye bilong iu bae lukim enikaen nogud samting, and heart bilong iu bae talem olketa dirty samting.” (Proverbs 23:31-33) Wei for ova tumas long drink hem savve baet olsem wanfala poison snek long wei wea hem mekem man sik, konfius olobaot, and savve haf dead tu. Man wea drunk savve lukim “enikaen nogud samting” wea minim hem dream krangge. Taem hem drunk hem no hol bak tu for talemaot olketa nogud tingting and feeling wea hard for hem talem sapos hem no drunk.
5. Hao nao wei for ova tumas long alcohol savve spoelem man?
5 Waswe sapos man drinkim staka alcohol bat hem careful for nara man no luksavve hem drunk? For samfala pipol, hem hard for luksavve sapos olketa drunk nomata olketa drinkim staka alcohol. Nomata olsem, man wea tingse kaen wei olsem hem gud nomoa hem laea long hemseleva. (Jeremiah 17:9) Gogo, maet hem start for depend long alcohol and “drinkim tumas wine.” (Titus 2:3) Wanfala woman for raet, Caroline Knapp, hem sei olsem abaotem wei wea man gogo for depend long alcohol: “For kamap man wea depend long alcohol hem samting wea isisi nomoa kamap, hem no samting wea happen kwiktaem.” Tru nao, wei for ova tumas long alcohol hem wanfala trap wea savve barava spoelem man!
6. Why nao man mas stap klia long wei for ova tumas long alcohol and kaikai tu?
6 Tingim tu disfala warning bilong Jesus: “Lukluk gud long iufala seleva, nogud heart bilong iufala kamap hevi from iufala ova tumas for kaikai and drink and from wari bilong living, and seknomoa datfala day kasem iufala kwiktaem olsem wanfala trap. From hem bae kasem evriwan wea stap long earth.” (Luke 21:34, 35) Man no need for drunk bifor hem sleep and kamap lesy—long body and tu long spiritual saed. Waswe sapos taem hem olsem, day bilong Jehovah kam nao?
Ova Tumas Long Alcohol Savve Lead Go Long Wanem?
7. Why nao wei for ova tumas long alcohol hem barava againstim komand wea stap long 2 Corinthians 7:1?
7 Wei for ova tumas long alcohol savve mekem man stap insaed staka danger—long body and spiritual saed. Samfala sik wea savve kamap from man ova tumas long alcohol, hem nao sik long liver, hepatitis, and kaen sik wea mekem body seksek, man wari and dream krangge from alcohol affectim nervous system bilong hem. Sapos man ova tumas long alcohol for longtaem, diswan savve kosim cancer, sugar diabetes, and samfala sik long heart and bele. Wei for ova tumas long alcohol hem barava againstim disfala komand from Bible: “Iumi mas klinim iumiseleva from evri samting wea mekem body and spirit dirty, mekem holy fasin kamap perfect taem iumi fraet long God.”—2 Corinthians 7:1.
8. Olsem Proverbs 23:20, 21 hem talem, wanem nao savve happen long man wea ova tumas long alcohol?
8 Wei for ova tumas long alcohol savve mekem man westem selen and maet hem lusim waka bilong hem for selen tu. King Solomon long Israel bifor givim disfala warning: “No stap midolwan long olketa wea savve drinkim tumas wine, midolwan long olketa wea ova tumas for kaikaim meat.” Why nao olsem? Hem sei: “Bikos man for drunk and man wea ova tumas long kaikai bae kamap poor, and wei for lesy bae mekem man werem rabis kaleko.”—Proverbs 23:20, 21.
9. Why nao hem wise for man no drinkim alcohol sapos hem bae draevem trak?
9 Datfala buk The Encyclopedia of Alcoholism hem storyim narafala danger taem hem sei: “Olketa wea duim research faendaot hao alcohol hem mekem man no savve draev gud. Hem mekem man slow for duim samting taem hem lukim danger, hem no tingting gud, hem no luksavve wanem nao gohed raonem hem and hem no savve mekem gudfala disison.” Barava nogud samting nao kamaot from wei for drink and draev. Long United States nomoa, staka thousand pipol dae and garekil evri year long olketa accident wea happen from wei for drink and draev. Olketa young wan nao barava stap insaed big danger long diswan, from olketa no garem bigfala savve saed long wei for draev and saed long wei for drinkim alcohol tu. No eniwan wea draev bihaen hem drinkim alcohol fit for sei hem respectim laef olsem wanfala present from Jehovah God. (Psalm 36:9) From laef hem holy, hem moabeta for man no drinkim eni alcohol taem hem mas draev.
10. Long wanem wei nao alcohol savve affectim mind, and why nao datwan hem danger samting?
10 Wei for ova tumas long alcohol hem no spoelem pipol long body nomoa, bat long spiritual saed tu. Bible sei: “Wine and swit wine nao aotem gudfala tingting.” (Hosea 4:11) Alcohol hem affectim mind bilong man. Wanfala buk wea U.S. National Institute on Drug Abuse pablisim hem sei: “Taem man drink, alcohol go insaed long body and insaed long blood and kwiktaem insaed long brain. Part long brain wea kontrolem tingting and feeling bilong man start for slow for waka. Man bae no feel shame and no hol bak for duim samting.” Sapos iumi olsem, bae hem moa isi for iumi “foldaon” for duim samting wea no fitim, and tu, for kasem staka temptation.—Proverbs 20:1.
11, 12. Hao nao wei for ova tumas long alcohol savve spoelem man long spiritual wei?
11 Nara samting moa, Bible givim disfala komand: “Nomata iufala kaikai or drink or duim eni samting, duim evri samting long wei wea givim glory long God.” (1 Corinthians 10:31) Waswe, wei for ova tumas long alcohol hem givim glory long God? Christian laek for stap klia long wei for pipol ting long hem olsem man for ova tumas long alcohol. For garem kaen nem olsem bae mekem nem bilong Jehovah no kasem glory bat bae kasem shame.
12 Waswe sapos wei wea wanfala Christian ova tumas long alcohol hem mekem nara brata stambol, maet wanfala niu wan? (Romans 14:21) Jesus givim disfala warning: “Eniwan wea mekem wanfala long olketa smol wan hia wea putim faith long mi for stambol, hem moabeta for taemapem wanfala millstone raonem nek bilong hem, olsem diskaen wea donkey savve tanem raon, and torowem hem long deep sea.” (Matthew 18:6) Wei for ova tumas long alcohol savve mekem man lusim olketa privilege insaed kongregeson tu. (1 Timothy 3:1-3, 8) Nara nogud samting hem wei wea diswan savve affectim evriwan insaed famili.
Hao for Stap Klia Long Olketa Danger
13. Wanem nao man mas duim for stap klia long wei for ova tumas long alcohol?
13 Wanfala key for stap klia long olketa danger bilong wei for ova tumas long alcohol, hem for markem goal for no stap klia long wei for drunk nomoa, bat for stap klia long wei for drink tumas tu. Hu nao savve disaedem wanem hem balance for iu and wanem hem ova tumas? From staka samting nao insaed long diswan, iumi kanduit sei haomas drink nao hem ova tumas. Each wan mas savve wanem nao balance for hemseleva, and no ovarem datwan. Wanem nao bae helpem iu for disaedem haomas alcohol hem ova tumas? Waswe, eni principle stap wea iu savve followim?
14. Wanem main principle nao bae helpem iu for luksavve wanem hem balance and wanem nao ova tumas?
14 Bible hem sei: “Keepim wisdom wea helpem man and wei for tingting gud, and olketa bae givim laef long iu and luk naes tumas long nek bilong iu.” (Proverbs 3:21, 22) Main principle for followim hem diswan: Saed long iumi wanwan, nomata sapos lelebet alcohol nomoa spoelem wei wea iumi mekem gudfala disison and garem gudfala tingting, datwan hem ova tumas nao. Bat iu mas honest long iuseleva and luksavve wanem nao balance for iuseleva and followim datwan!
15. Wanem taem nao maet hem wise for no drinkim eni alcohol?
15 Samfala taem, maet hem wise for no drinkim eni alcohol. From wei wea alcohol savve spoelem baby insaed bele, woman wea babule maet disaed for no drink nao. Iu bae showimaot kaenfala fasin tu sapos iu no drink front long samwan wea garem problem witim wei for depend long alcohol or conscience bilong hem feel nogud long wei for drink. Jehovah givim disfala komand long olketa wea duim waka olsem priest long tabernacle: “No drinkim wine or alcohol taem iufala kam insaed tent for meeting, mekem iufala no dae.” (Leviticus 10:8, 9) So, stap klia long wei for drinkim eni alcohol bifor iu attendim olketa Christian meeting and taem iu duim ministry or olketa narafala spiritual responsibility. And tu, long olketa kantri wea law putim tambu for drinkim alcohol sapos iu no kasem age wea fitim, olketa Christian mas followim olketa law bilong datfala kantri.—Romans 13:1.
16. Wanem nao first samting iumi mas duim taem samwan givim alcohol long iumi?
16 Taem samwan givim alcohol long iu, first kwestin for askem iuseleva nao diswan: ‘Waswe, bae mi drinkim diswan?’ Sapos iu disaed for drinkim alcohol, iu mas savve wanem nao balance fitim iu and no ovarem datwan. No letem kaenfala fasin bilong man wea givim alcohol long iu changem wanem iu disaedem finis. And keakea long olketa wantok wea offerim free beer or nara alcohol long iu. Long staka kantri, law letem young pipol for drinkim alcohol. Hem responsibility bilong parents for teachim olketa young wan saed long wei for drinkim alcohol and lukluk gud long olketa saed long diswan.—Proverbs 22:6.
Iu Savve Winim Disfala Problem
17. Wanem nao savve helpem iu for luksavve sapos iu garem problem saed long wei for ova tumas long alcohol?
17 Waswe, iu garem problem saed long wei for ova tumas long wine and alcohol? Sapos wei for ova tumas long alcohol hem wanfala sin wea iu duim haed evritaem, gogo diswan bae affectim iu. Barava lukluk gud long iuseleva. Askem iuseleva olketa kwestin olsem: ‘Waswe, distaem mi drinkim alcohol staka taem winim bifor? Waswe, drink wea mi drinkim distaem hem garem moa alcohol insaed winim bifor? Waswe, mi drinkim alcohol for forgetim olketa wari, hevi or problem? Waswe, eni famili member or klos fren talemaot wei wea hem warim mi from mi drink tumas? Waswe, wei wea mi drink hem kosim olketa problem insaed famili bilong mi? Waswe, mi faendem hard for no drink for wan week, wan month, tu-thri month? Waswe, mi haedem from nara pipol haomas wine or alcohol nao mi drinkim? Sapos iu ansa ‘Ia’ long samfala kwestin hia, wanem nao bae iu duim? No kamap olsem man wea ‘lukluk long feis bilong hem insaed long mirror and stretawe forgetim wanem kaen man nao hem.’ (James 1:22-24) Duim samting for stretem datfala problem. Wanem nao iu savve duim?
18, 19. Wanem nao bae helpem iu for winim problem for ova tumas long alcohol?
18 Aposol Paul givim disfala kaonsel long olketa Christian: “No kamap drunk witim wine, wea savve spoelem man, bat gohed for fulap witim spirit.” (Ephesians 5:18) Disaedem haomas alcohol nao ova tumas for iu and markem spialaen. Strong for no ovarem spialaen hia, and kontrolem seleva. (Galatians 5:22, 23) Waswe, iu garem olketa fren wea putim hevi long iu for ova tumas for drink? Iu mas barava careful. Bible sei: “Man wea wakabaot witim wise pipol bae kamap wise, bat man wea kaban witim krangge pipol bae kasem trabol.”—Proverbs 13:20.
19 Sapos iu iusim alcohol for forgetim eni problem, deal witim datfala problem. Iu savve winim olketa problem taem iu followim kaonsel from Word bilong God. (Psalm 119:105) No hol bak for askem help bilong wanfala Christian elder. Iusim gud olketa samting wea Jehovah provaedem for mekem iuseleva kamap strong long spiritual saed. Strongim wei wea iu fren witim God. Prea evritaem long hem—main samting nao for iu storyim disfala wik point long hem. Askem God for ‘klinim kidney and heart bilong iu.’ (Psalm 26:2) Olsem iumi storyim long article bifor diswan, traem best for wakabaot long faithful wei.
20. Wanem nao maet iu need for duim sapos problem saed long wei for ova tumas long alcohol hem gohed?
20 Waswe sapos problem saed long wei for ova tumas long alcohol hem gohed nomata iu traem best for winim? Sapos olsem iu mas followim disfala advaes bilong Jesus: “Sapos hand bilong iu mekem iu stambol, katem aot; hem moabeta for iu kasem laef witim wanfala hand winim wei for go long Gehenna witim tufala hand.” (Mark 9:43) Ansa for diswan hem: No drinkim eni alcohol. Hem nao samting wea wanfala woman wea iumi bae kolem hem Irene disaed for duim. Hem sei: “Bihaen klosap tu and haf year wea mi no drinkim eni alcohol, mi start for ting sapos mi drinkim wanfala nomoa bae hem olraet. Bat taem mi feel olsem, stretawe mi prea long Jehovah abaotem diswan. Mi disaed for no drinkim eni alcohol go kasem niu system, maet long datfala taem bae mi no drink tu.” Wei for lusim alcohol evribit hem no hard tumas sapos iumi markem witim laef insaed raeteous niu world bilong God.—2 Peter 3:13.
“Ran Long Wei wea Iufala Savve Kasem”
21, 22. Wanem samting nao savve stopem iumi for kasem end bilong resis for laef, and hao nao iumi savve stap klia long datwan?
21 Aposol Paul markem laef bilong Christian witim wanfala resis taem hem sei: “Waswe, iufala no savve hao evriwan wea insaed long resis ranran, bat wanfala nomoa kasem prize? Ran long wei wea iufala savve kasem. And tu, evri man wea tekpart long wanfala game hem kontrolem hemseleva long evri samting. Tru nao, olketa duim diswan for kasem crown wea savve rotten, bat iumi for crown wea no savve rotten. Dastawe, wei wea mi ran hem no olobaot; wei wea mi hit hem no for hitim air nating; bat mi whipim body bilong mi and leadim olsem wanfala slave, from nogud bihaen mi preach long narafala pipol, miseleva nao duim samting wea mekem God no appruvim mi.”—1 Corinthians 9:24-27.
22 Olketa wea finisim resis nomoa savve winim prize. Long datfala resis for laef, wei for ova tumas long alcohol savve stopem iumi for kasem end bilong resis. Iumi mas showimaot fasin for kontrolem seleva. For no olobaot taem iumi ran minim iumi mas no “ova tumas long wine.” (1 Peter 4:3) Tru nao, iumi need for showimaot fasin for kontrolem seleva long evri samting. Long saed bilong alcohol, hem wise for iumi “rejectim fasin wea no followim God and olketa samting wea world wantem and for live followim stretfala tingting and raeteous fasin and fasin for lovem God.”—Titus 2:12.
[Footnote]
a Long disfala article, “alcohol” hem minim beer, wine, and olketa nara alcohol drink.
Waswe Iu Remember?
• Wanem nao hem minim for ova tumas long alcohol?
• Wanem nogud samting nao savve kamaot from wei for ova tumas long alcohol?
• Hao nao iu savve stap klia long olketa danger saed long wei for ova tumas long alcohol?
• Hao nao man savve deal witim problem bilong wei for ova tumas long alcohol?
[Piksa long page 19]
Wine hem “mekem heart bilong man hapi”
[Piksa long page 20]
Iumi mas savve wanem nao balance for iumiseleva and no ovarem datwan
[Piksa long page 21]
Disaed firstaem haomas alcohol nao hem balance fitim iu
[Piksa long page 22]
Prea long Jehovah evritaem abaotem wik point bilong iu
[Piksa long page 23]
Dadi and mami garem responsibility for teachim pikinini bilong olketa saed long wei for drinkim alcohol