Kwestin From Reader

Why nao Samson savve gohed for stap olsem wanfala Nazirite nomata hem tasim body bilong man wea dae?

Long Israel bifor, man savve promis for kamap wanfala Nazirite and disaed hao long nao bae hem duim diswan.a Wanfala tambu for man wea mekem promis hia hem olsem: “Evriday wea hem stap separate for Jehovah hem mas no kam klosap long eni soul wea dae finis. Nomata for dadi bilong hem or mami bilong hem or brata bilong hem or sista bilong hem, hem mas no spoelem hemseleva taem olketa dae.” Wanem nao bae happen sapos “wanfala man seknomoa dae saed long hem”? Sapos hem tasim datfala dead body, hem spoelem promis bilong hem for stap olsem Nazirite nao. Dastawe Bible sei: “Olketa day wea hem serve finis hem lus nao.” Hem mas duim samfala samting for hem kamap klin and startim moa datfala promis bilong hem.—Numbers 6:6-12.

Wei wea Samson kamap Nazarite hem difren. Bifor Samson born, angel bilong Jehovah sei olsem long mami bilong hem: “Lukim! Bae iu babule and wanfala boy nao bae iu bornem, and no eni reza bae kasem hed bilong hem, bikos datfala pikinini bae kamap Nazirite bilong God from taem hem lusim bele, and hem nao man wea bae lead for sevem Israel from hand bilong olketa Philistine.” (Judges 13:5) Samson nating mekem eni promis for kamap Nazirite. God nao chusim hem for kamap wanfala Nazirite for full laef bilong hem. Sapos hem stap anda datfala tambu and hem tasim body bilong man wea dae, bae hem hard for startim moa wei wea hem kamap Nazirite wea start taem hem born. Hem klia tumas, olketa wea promis for kamap Nazirite and olketa wea Nazirite for full laef bilong olketa bae no stap anda long sem tambu.

Tingim komand bilong Jehovah insaed Bible for Samson, Samuel, and John Baptaesa wea Nazirite for full laef bilong olketa. For Samson, hem mas no katem hair long hed bilong hem. Hannah mekem wanfala promis olsem bifor hem babule long Samuel: “Mi bae givim hem long Jehovah for full laef bilong hem, and no eni reza bae kasem hed bilong hem.” (1 Samuel 1:11) Angel bilong Jehovah sei olsem for saed bilong John Baptaesa: “Hem mas no drinkim eni wine and strongfala drink.” (Luke 1:15) Witim datwan, “kaleko bilong hem nao hair bilong camel and hem werem leather strap raonem bele bilong hem; kaikai bilong hem grashopa and wild honey.” (Matthew 3:4) No eniwan long thrifala man hia kasem komand for no kam klosap long body bilong man wea dae.

Nomata Samson hem Nazirite, hem wanfala judge wea Jehovah chusim for sevem Israel from pipol wea spoelem olketa. (Judges 2:16) Taem hem fulfillim assignment bilong hem, hem tasim body bilong man wea dae. Wantaem, Samson killim dae 30-fala Philistine and aotem kaleko bilong olketa. Bihaen, hem killim dae enemy and “hipim olketa long wan ples.” And tu, hem killim dae wan thousand man witim bon bilong mouth bilong wanfala donkey. (Judges 14:19; 15:8, 15) Jehovah appruvim and sapotim evri samting Samson duim. Bible story abaotem hem olsem man wea showimaot nambawan example saed long faith.—Hebrews 11:32; 12:1.

Bible sei Samson brekem lion long tufala haf “olsem wanfala man brekem young man goat long tufala haf.” Waswe, hem minim wei for brekem young goat long tufala haf hem samting olketa duim evritaem?

No eni pruv stap for showaot wei for brekem young goat long tufala haf hem samting olketa duim evritaem long taem bilong olketa judge bilong Israel. Judges 14:6 sei: “Spirit bilong Jehovah mekem [Samson] for duim samting, so hem brekem [wanfala young man lion] long tufala haf, olsem wanfala man brekem young man goat long tufala haf, and no eniting stap long hand bilong hem.” Luk olsem disfala toktok hem for markem wan samting witim nara samting.

Disfala toktok “brekem long tufala haf” savve minim tufala samting. Samson maet brekem mouth bilong datfala lion or brekem aot full body bilong hem. Sapos diswan minim hem brekem mouth bilong datfala lion, maet eni man fit for duim sem samting long wanfala young goat tu. So, olketa markem wei wea Samson killim dae wanfala young lion witim hand nating olsem hem killim wanfala young goat nomoa, for showim hao samting wea hem duim, hem isi for hem. Bat, waswe sapos Samson brekem aot full body bilong datfala lion? Diswan mas minim olketa markem wei wea hem killim datfala lion witim wei wea hem hard for eni man brekem aot full body bilong wanfala young goat witim hand nating. So, datfala toktok minim spirit bilong Jehovah nao strongim Samson for duim wanfala samting wea no eni man savve duim witim strong bilong hemseleva. Nomata wanem, toktok wea stap long Judges 14:6 showimaot, witim help bilong Jehovah, wanfala strongfala lion hem samting nating nomoa long Samson olsem wanfala young man goat hem samting nating nomoa long eni man.

[Footnote]