Marit Savve Win Nomata World Distaem Nogud
“Iufala mas werem love, from hem nao perfect wei for keepim wan mind.”—Colossians 3:14.
1, 2. (a) Wanem nao iumi lukim insaed Christian kongregeson wea encouragem iumi? (b) Wanem nao mekem marit hem win?
TAEM iumi lukluk long olketa difren wan insaed Christian kongregeson, iumi hapi tumas for lukim staka hasband and waef wea faithful long partner bilong olketa for 10, 20, 30 or plande moa year! Olketa loyal long each other nomata olketa feisim staka hard samting.—Genesis 2:24.
2 Staka bae talem hao samfala taem olketa feisim hard taem insaed marit bilong olketa. Wanfala woman hem raet olsem: “Nomata marit wea hapi, hem savve garem wari and trabol tu. Olketa kasem gud taem and hard taem . . . Bat . . . olketa win for stap tugeta nomata laef distaem hem barava hard.” Olketa hasband and waef wea win, lane for deal witim trabol wea kamaot from olketa hevi long laef and diswan hem moa tru sapos olketa garem pikinini. Olketa hasband and waef olsem lane from samting wea olketa feisim hao trufala love “hem nating savve fail.”—1 Corinthians 13:8.
3. Wanem nao happen long world distaem saed long marit and divorce, and diswan mekem olketa wanem kwestin kamap?
3 Long narasaed, staka million marit brekdaon. Wanfala report hem sei: “Haf long evriwan wea marit long U.S.A. distaem bae divorce. And haf long olketa divorce hia bae happen insaed fasfala 7.8 year wea tufala marit . . . 75 percent long olketa hia bae marit moa, and 60 percent long olketa hia wea marit moa bae divorce moa.” Nomata long olketa kantri wea bifor no staka pipol divorce, distaem hem change nao. Olsem example, no longtaem go nomoa long Japan, namba bilong olketa wea divorce hem kamap tufala taem moa big. Wanem nao samfala hevi wea savve mekem diswan kamap, and wea samfala taem affectim olketa insaed Christian kongregeson tu? Wanem nao man needim for mekem hem win long marit nomata Satan hem traem best for spoelem arrangement hia?
Olketa Trap for Stap Klia Long Hem
4. Wanem nao samfala samting wea savve spoelem marit?
4 Word bilong God helpem iumi for minim olketa samting wea savve spoelem marit. Olsem example, tingim toktok bilong aposol Paul abaotem laef long olketa last day distaem: “Insaed long olketa last day nogud taem wea hard for deal witim bae stap. From olketa man bae lovem olketa seleva, lovem selen, mekhae long seleva, bighed, tok daonem God, no obeyim dadi and mami, no savve sei thankiu, no loyal, no garem love, no savve agree, tok laea againstim narawan, no savve kontrolem seleva, raf tumas, no lovem gudfala fasin, brekem trust, followim mind bilong seleva, fulap long praod fasin, lovem hapitaem winim wei for lovem God, olketa luk olsem olketa worshipim God bat olketa nating followim hem; so tanawe from olketa samting hia.”—2 Timothy 3:1-5.
5. Why nao ‘man wea lovem hemseleva’ savve mekem marit bilong hem no hapi, and wanem kaonsel nao Bible talem saed long diswan?
5 Taem iumi ting raonem toktok bilong Paul, iumi lukim staka samting wea savve mekem marit for brekdaon. Olsem example, olketa wea “lovem olketa seleva,” olketa selfish and no tingim feeling bilong nara pipol. Hasband or waef wea lovem seleva barava laek for kasem samting for olketa seleva nomoa. Olketa no laek for daon or change. Waswe, kaen tingting olsem bae help for mekem marit hem hapi? Barava nomoa nao. Aposol Paul givim disfala wise kaonsel long evri Christian, wea staka long olketa marit: “[Iufala shud] no duim eni samting from iufala laek winim narawan or from iufala tinghae long seleva, bat witim hambol tingting, tingim narafala pipol olsem hae winim iufala, no interest long olketa samting bilong iufala seleva nomoa, bat interest long olketa samting bilong narafala pipol tu.”—Philippians 2:3, 4.
6. Hao nao wei for lovem selen savve spoelem marit?
6 Wei for lovem selen savve mekem hasband and waef divaed. Paul talem disfala warning: “Olketa wea laekem tumas for kamap rich bae foldaon insaed test and trap and wei for barava wantem olketa samting wea krangge and kosim pain, wea gogo barava spoelem man. From fasin for lovem selen hem start bilong plande nogud samting, and taem samfala trae for kasem datfala love olketa lusim faith and mekem olketa seleva kasem bigfala pain.” (1 Timothy 6:9, 10) Sorre tumas, from olketa no followim datfala warning bilong Paul staka wea marit distaem kasem samting wea hem talem. From olketa aftarem richfala samting, staka no tingim olketa need bilong partner bilong olketa, wea insaed diswan hem need for kasem sapot saed long feeling and gudfala wei for fren evritaem.
7. Wanem kaen fasin nao savve mekem wanfala partner for no faithful?
7 Paul talem tu hao samfala long olketa last day distaem bae “no loyal, no garem love, no savve agree.” Taem man talem disfala marit promis, hem wanfala barava serious samting wea shud lead go long wei for tufala stap tugeta for olowe and no for spoelem trust bilong narawan. (Malachi 2:14-16) Nomata olsem, samfala start for laekem narawan. Wanfala waef wea winim 30 year wea hasband bilong hem lusim hem, talem hao bifor datwan happen, hasband bilong hem fren klos tumas witim olketa nara woman. Hem no luksavve long fasin wea no fitim marit man. Waef hia sei hem feel nogud tumas taem hem lukim datwan, and trae for warnim hasband bilong hem long gudfala wei abaotem datfala danger samting. Nomata olsem, hasband bilong hem duim adultery. Hem kasem olketa kaenfala warning, bat hem no laek for lisin. Hem barava foldaon insaed long datfala trap.—Proverbs 6:27-29.
8. Wanem nao savve lead go long adultery?
8 Bible givim kliafala warning saed long adultery! “Heart bilong eniwan wea duim adultery witim wanfala woman hem no garem eni gud fasin; and man wea duim diswan hem spoelem soul bilong hem.” (Proverbs 6:32) Staka taem adultery hem no samting wea man seke nomoa duim. James wea raetem wanfala buk long Bible sei plande taem, man wea duim adultery hem duim datwan bihaen hem tingting abaotem fastaem. (James 1:14, 15) Datwan wea duim adultery hem isisi no faithful long partner bilong hem wea hem promis finis for faithful long hem for full laef. Jesus sei: “Iufala herem hao olketa sei, ‘Iufala mas no duim adultery.’ Bat mi sei long iufala, evriwan wea gohed lukluk long wanfala woman for barava laekem hem, hem duim adultery finis witim hem insaed long heart bilong hem.”—Matthew 5:27, 28.
9. Wanem wise kaonsel nao stap long Proverbs 5:18-20?
9 Dastawe man wea wise and faithful hem followim disfala toktok from buk bilong Proverbs: “Mekem ples wea iu kasem wata hem kasem blessing, and hapi witim waef wea iu tekem taem iu young. Wanfala mere deer wea iu savve lovem and wanfala naes maunten goat. Susu bilong hemseleva nao shud switim iu evritaem. Witim love bilong hem iu shud fulap witim bigfala hapi olowe. So son bilong mi, why nao iu shud feel hapi witim difren woman or holem difren woman?”—Proverbs 5:18-20.
No Kwiktaem for Marit
10. Why nao hem wise for tek taem for savve long datwan wea iu laek maritim?
10 Olketa problem savve kamap sapos tufala kwiktaem for marit. Maet tufala young tumas and no really savve gud abaotem laef. Or maet tufala no tek taem for savve gud long each other, olsem wei for savve long samting narawan laekem and no laekem, wanem nao olketa goal bilong narawan, and famili wea tufala kam from. Hem wise for patient, tek taem for savve long datwan wea iu laek maritim. Tingim Jacob, son bilong Isaac. Hem mas waka sevenfala year for dadi bilong Rachel bifor dadi hia letem Jacob for maritim Rachel. Hem willing for duim datwan bikos hem really lovem Rachel, and no from Rachel luk naes nomoa.—Genesis 29:20-30.
11. (a) Marit hem joinim tugeta tufala pipol wea hao? (b) Why nao wei wea man toktok hem important insaed marit?
11 Marit hem moa samting winim wei for tufala laekem each other nomoa. Marit hem joinim tugeta tufala wea garem fasin and feeling wea difren from each other, wea kam from difren famili, and wea staka taem garem difren education tu. Samfala taem marit hem joinim tufala from difren ples, and maet tufala garem difren languis tu. Nomata sapos tufala wea marit semsem saed long olketa samting hia, tufala garem difren tingting long staka samting. Tufala difren tingting hia hem important part long wanfala marit. Wei wea tufala talemaot tingting bilong tufala savve mekem wei for komplen and tok againstim narawan kamap, or savve encouragem and buildimap each other. Tru nao, toktok bilong iumi savve spoelem or healim partner bilong iumi. Toktok wea man no bossim savve mekem marit garem bigfala hevi.—Proverbs 12:18; 15:1, 2; 16:24; 21:9; 31:26.
12, 13. Why nao man shud no expectim tumas samting saed long marit?
12 Dastawe, hem wise samting for tek taem for savve gud long datwan wea iu laek maritim. Wanfala mature Christian sista hem sei: “Taem iu lukluk long samwan wea iu laek maritim, tingim maet tenfala main mark wea iu laekem hem for garem. Sapos hem garem sevenfala nomoa, askem iuseleva olsem, ‘Waswe, mi willing for no warim thrifala mark wea hem no garem? Waswe, mi savve acceptim thrifala wik point hia evriday?’ Sapos iu daot, tingting gud fastaem.” Bat no expectim tumas samting. Sapos iu laek for marit, iu mas savve hao iu bae no faendem wanfala partner wea perfect. And tingim tu, hao sapos hem maritim iu, iu tu no perfect.—Luke 6:41.
13 Man mas mekem sakrifaes insaed marit. Paul hem strongim diswan taem hem sei: “Mi wantem iufala for free from wari. Man wea no marit hem wari for olketa samting bilong Lord, hao hem savve mekem Lord hapi. Bat man wea marit hem wari for olketa samting bilong world, hao hem savve mekem waef bilong hem hapi, and hem divaed. And tu, woman wea no marit, and young gele, hem wari for olketa samting bilong Lord, for hem savve holy long body bilong hem and long spirit bilong hem. Bat marit woman hem wari for olketa samting bilong world, hao hem savve mekem hasband bilong hem hapi.”—1 Corinthians 7:32-34.
Why Samfala Marit Brekdaon
14, 15. Wanem nao savve mekem marit wikdaon?
14 No longtaem go nomoa wanfala Christian woman hem kasem barava sorre samting taem hasband bilong hem divorcem hem bihaen tufala marit for 12-fala year. Hasband hia hem frenim moa narafala woman. Waswe, waef lukim eni saen bifor marit hia brekdaon? Hem sei olsem: “Gogo hem no savve prea nao. Hem talem enikaen excuse for missim olketa Christian meeting and preaching waka. Hem sei hem busy tumas or taed fogud dastawe hem no savve spendem taem witim mi. Hem no savve story long mi. Mitufala no savve storyim nao olketa spiritual samting. Sorre nao, gogo wei bilong hem kamap difren tumas. Hem barava difren from taem wea mitufala just marit.”
15 Olketa narawan talem sem samting tu olsem wei for no studyim Bible seleva, prea, or attendim olketa Christian meeting. Diswan minim hao bifor man lusim partner bilong hem, wei wea hem fren witim Jehovah hem kamap wik. From diswan, olketa no ting strong long olketa spiritual samting. Olketa no ting long Jehovah olsem wanfala God wea laef. Promis insaed Bible abaotem niu world wea raeteous fasin bae stap hem no olsem wanfala really samting long olketa nao. Samfala taem, disfala wei for wikdaon long spiritual saed hem happen bifor datwan wea no faithful hem frenim samwan wea no partner bilong hem.—Hebrews 10:38, 39; 11:6; 2 Peter 3:13, 14.
16. Wanem nao savve strongim marit?
16 Long narasaed, wanfala hasband and waef wea barava hapi sei marit bilong tufala win bikos tufala mekem spiritual saed bilong tufala gohed strong. Tufala prea and study tugeta. Hasband hem sei: “Mitufala readim Bible tugeta. Mitufala go aot long ministry tugeta. Mitufala laek tumas for duim samting tugeta.” So samting wea iumi lanem nao hem olsem: Wei for fren gud witim Jehovah bae barava help for mekem marit hem strong.
No Expectim Tumas Samting and Story Tugeta
17. (a) Wanem nao tufala samting wea savve help for mekem marit win? (b) Paul sei Christian love hem hao?
17 Tufala nara samting wea help for mekem marit win nao: Christian love and story tugeta. Taem man and woman laekem tumas each other, hem normal for no want for luksavve long wik point bilong each other. Maet taem tufala startim marit laef tufala garem hope wea ova tumas, wea kam from wei for readim olketa love story buk or lukim olketa movie. Bat gogo tufala mas feisim really samting. Olketa smol wik point or fasin wea mekem narawan feel nogud savve kamap bigfala problem. Sapos datwan happen, olketa Christian need for showimaot olketa frut bilong spirit, wea wanfala nao hem love. (Galatians 5:22, 23) Tru nao, Christian love hem barava strong. Paul storyim Christian love hia olsem: “Love hem long-safaring and kaen. . . . Hem no luk aotem samting for hemseleva nomoa, hem no savve kros. Hem no tingim olowe rong wea samwan duim. . . . Hem kavarem evri samting, bilivim evri samting, hope long evri samting, hem gohed strong thru long evri samting.” (1 Corinthians 13:4-7) Tru tumas, trufala love hem acceptim olketa wik point bilong narawan. Hem no expectim man for perfect.—Proverbs 10:12.
18. Hao nao wei for story tugeta hem strongim marit?
18 Wei for story tugeta hem barava important tu. Nomata hasband and waef marit for staka year finis, tufala shud story witim each other and really lisin long each other. Wanfala hasband hem sei: “Mitufala feel free for talemaot feeling bilong mitufala long kaenfala wei.” Gogo, hasband or waef savve herem no just samting wea partner talem nomoa, bat samting wea hem no talem tu. Diswan minim taem tufala marit for staka year, hasband and waef wea garem hapi marit lane for luksavve long tingting or feeling bilong partner bilong olketa. Samfala waef sei hasband bilong olketa no really lisin long olketa. Samfala hasband komplen hao waef bilong olketa laek for story long taem wea olketa busy. Wei for story tugeta minim tufala mas garem fasin for kea and fasin for minim each other. Gudfala wei for story tugeta savve helpem hasband and waef.—James 1:19.
19. (a) Why nao wei for sei sorre hem no isi? (b) Wanem nao bae muvim iumi for sei sorre?
19 Samfala taem wei for story tugeta hem minim tu for sei sorre. Datwan hem no isi evritaem. Man needim hambol fasin for sei hem rong. Bat, diswan savve mekem marit barava strong! For barava sei sorre savve stopem hasband and waef for raoa bihaen, and tu, hem savve openem wei for forgive from heart and help for stretem datfala problem. Paul hem sei: “Gohed for patient witim each other and willing for forgivim each other sapos eniwan garem reason for komplen againstim narawan. Olsem Jehovah hem willing for forgivim iufala, iufala mas duim olsem tu. Bat, witim evri samting hia, iufala mas werem love, from hem nao perfect wei for keepim wan mind.”—Colossians 3:13, 14.
20. Hao nao Christian shud deal witim marit partner bilong hem taem tufala stap seleva and front long nara pipol?
20 Narafala important part long marit hem for sapotim each other. Olketa Christian hasband and waef shud fit for trustim each other, for depend long each other. No eniwan long tufala shud daonem or spoelem feeling bilong narawan. Olketa shud givim loving praise long partner bilong olketa; no tok daonem olketa. (Proverbs 31:28b) Tru nao, iumi no mekfani long olketa long wei wea mekem olketa feel shame and wea showimaot iumi no tingim feeling bilong olketa. (Colossians 4:6) Wei for sapotim each other olsem hem kamap moa strong tu taem tufala evritaem talemaot and showimaot love bilong tufala. Taem olketa duim datwan, hem olsem olketa sei: “Mi hapi mi maritim iu.” Olketa hia nao samfala samting wea savve helpem marit for win long world distaem wea nogud. Samfala nara samting stap tu, and next article bae givim olketa Bible advaes long hao for win long marit.a
[Footnote]
a For moa information, lukim datfala buk Secret for Kasem Hapi Famili, wea olketa Jehovah’s Witness pablisim.
Waswe, Iu Savve Minim?
• Wanem nao samfala samting wea savve spoelem marit?
• Why nao hem no wise for marit kwiktaem?
• Hao nao spiritual saed bilong hasband and waef affectim marit bilong tufala?
• Wanem nao olketa samting wea help for strongim marit?
[Piksa long page 12]
Marit hem moa samting winim wei for tufala laekem each other nomoa
[Piksa long page 14]
Wei for fren gud witim Jehovah hem helpem hasband and waef for win long marit