Laef Story
Mifala Iusim Wei wea Mifala Muv Evritaem for Witness Long Olketa Farawe Ples
STORY BILONG RICARDO MALICSI
Taem mi lusim waka bilong mi bikos long Christian wei for no teksaed, mi and famili bilong mi askem Jehovah for helpem mifala planim future bilong mifala. Long prea, mifala talem Hem hao mifala laek duim moa samting long ministry. No longtaem bihaen, mifala startim wankaen niu living for muv evritaem and stap long olketa difren ples. Diswan mekem mifala stap long eitfala difren kantri. Samting wea kamaot from diswan nao, mifala savve duim ministry bilong mifala long olketa farawe ples.
MI BORN long Philippines long 1933, and famili bilong mi olketa member bilong Philippine Independent Church. Evriwan long famili bilong mi, 14-fala evriwan, member bilong datfala church. Taem mi samting olsem 12 year, mi askem God long prea for leadim mi go long tru religion. Wanfala teacher bilong mi joinim mi insaed wanfala class for lotu, and mi kamap wanfala strong Catholic. No enitaem mi miss for go long Saturday confession or Mass long Sunday. Bat, mi start for no sure and no satisfae witim datwan. Mi evritaem garem kwestin long mind bilong mi abaotem samting wea happen long man bihaen hem dae, and tu, abaotem hellfire and Trinity. Ansa wea olketa bigman bilong religion givim no mekem mi feel satisfae.
Kasem Olketa Ansa wea Mekem Mi Satisfae
Taem mi skul long college, mi joinim wanfala sekson wea mifala savve evritaem faet, gambol, smoke, and duim olketa nara rabis samting. Wanfala evening, mi meetim mami bilong wanfala skulfren bilong mi. Hem wanfala Jehovah’s Witness. Mi askem hem olketa sem kwestin wea mi askem olketa bigman bilong religion. Hem ansarem evri kwestin hia from Bible, and mi barava sure hao samting hem talem mi hem tru.
Mi baem wanfala Bible and start for studyim Bible witim olketa Witness. No longtaem bihaen mi attendim evri meeting bilong Olketa Jehovah’s Witness. Mi followim datfala wise kaonsel insaed Bible wea sei, “wei for kaban witim nogud pipol hem spoelem gudfala fasin,” and mi stop for kaban witim olketa nogud fren bilong mi. (1 Corinthians 15:33) Diswan helpem mi for muv ahed long Bible study bilong mi, and gogo mi dedicate long Jehovah. Bihaen mi baptaes long 1951, mi serve olsem wanfala full-taem minister (pioneer) for lelebet taem. Then long December 1953, mi maritim Aurea Mendoza Cruz, wea kamap faithful partner bilong mi wea waka witim mi for duim ministry.
Ansa for Olketa Prea Bilong Mifala
Mifala barava laek for serve olsem olketa pioneer. Bat, mifala no fit for duim moa samting for servem Jehovah stretawe. Nomata olsem, mifala no stop for askem Jehovah for mekem eni chance kamap saed long service bilong hem. Long datfala taem mifala garem hard living. Nomata olsem, mifala no forgetim olketa spiritual goal bilong mifala, and taem mi 25 year, mi kasem appointment olsem kongregeson servant, wea hem nao overseer wea lead insaed wanfala kongregeson bilong Olketa Jehovah’s Witness.
Taem mi muv ahed for kasem moa Bible savve and mi minim gud olketa principle bilong Jehovah, mi luksavve hao waka bilong mi hem againstim Christian wei for no teksaed. (Isaiah 2:2-4) Mi disaed for finis from datfala waka. Diswan hem samting wea traem faith bilong mifala. Hao nao bae mi kea for olketa need bilong famili? Mifala prea moa long Jehovah abaotem datwan. (Psalm 65:2) Mifala talem hem olketa wari bilong mifala, bat tu, mifala talem hem hao mifala laek for duim ministry long ples wea garem bigfala need for pipol wea savve preach abaotem Kingdom. (Philippians 4:6, 7) Long datfala taem, mifala nating savve hao plande difren kaen chance bae kamap for mifala duim datwan!
Start Long Bigfala Gogo
Long April 1965, mi kasem waka long wanfala organization (International Civil Aviation Organization of the United Nations) wea sendem mi for go stap lelebet taem long olketa international airport wea mi bae duim waka saed long safety and for stopem fire or for killim dae fire sapos eni accident. Fasfala airport wea mi waka long hem nao, Vientiane International Airport, long Laos, so mifala go stap long there. Long taon bilong Vientiane, 24 Witness stap, and mifala enjoyim wei for duim preaching waka witim olketa missionary and tu-thri brata wea stap long there. Bihaen, mi waka long Udon Thani Airport, long Thailand. No eni nara Witness stap long Udon Thani. Mi and famili duim evri meeting tugeta. Mifala preach from haos tu haos, duim olketa return visit, and startim olketa Bible study.
Mifala rememberim hao Jesus encouragem olketa disaepol bilong hem for olketa mas “gohed for garem plande frut.” (John 15:8) So mifala disaed strong for followim example bilong olketa for gohed talemaot gud nius. No longtaem bihaen mifala kasem gud samting from datwan. Wanfala young girl from Thailand acceptim truth and hem kamap spiritual sista bilong mifala. Tufala man from North America acceptim truth and gogo kamap olketa Christian elder. Mifala gohed for preachim gud nius for winim tenfala year long north part bilong Thailand. Mifala barava hapi for savve hao distaem, wanfala kongregeson hem stap long Udon Thani! Samfala seed bilong truth wea mifala plantim gohed yet for garem frut.
Bat sorre tumas, mifala mas muv go moa long nara difren ples, so mifala prea long “Masta bilong harvest” for helpem mifala gohed for share long preaching waka. (Matthew 9:38) Organization wea mi waka for hem sendem mifala go long Tehran, wea hem kapitol bilong Iran. Long datfala taem, datfala Shah hem rul.
Preach Long Olketa Hard Territory
Taem mifala arrive long Tehran, stretawe mifala faendem olketa spiritual brata bilong mifala. Mifala kaban tugeta witim wanfala smol grup bilong olketa Witness wea kam from 13 difren kantri. Mifala mas changem wei wea mifala duim samfala samting mekem mifala savve preachim gud nius long Iran. Nomata no eniwan barava againstim mifala, mifala mas careful.
From olketa wea mifala study witim waka long enikaen difren shift, samfala taem mifala mas conductim Bible study long midolnaet or gogo for morning. Bat, mifala barava hapi for lukim gudfala frut wea kamaot from hard waka bilong mifala! Plande famili from Philippines and Korea acceptim Christian truth and olketa dedicate long Jehovah.
Next ples wea olketa sendem mi go long hem, hem Dhaka, Bangladesh. Mifala arrive long there long December 1977. Diswan hem narafala kantri wea hem no isi for duim preaching waka. Nomata olsem, mifala evritaem tingim hao mifala mas gohed busy long preaching waka. From spirit bilong Jehovah directim mifala, mifala faendem plande famili wea sei olketa Christian. Samfala hia thirsty for olketa wata bilong truth wea stap insaed Bible. (Isaiah 55:1) From diswan, mifala startim plande Bible study.
Mifala tingim evritaem hao hem will bilong God for “evri difren kaen man mas sev.” (1 Timothy 2:4) Mi hapi for talem hao no eniwan trae for mek trabol for mifala. For daonem wei wea maet samfala garem rong tingting abaotem mifala, mifala duim best for kaen long pipol taem mifala meetim olketa. Olsem aposol Paul, mifala trae for “kamap evri samting long evrikaen pipol.” (1 Corinthians 9:22) Taem pipol askem mifala why nao mifala visitim olketa, mifala explainim reason long kaenfala wei, and mifala faendem hao klosap evriwan hapi for acceptim mifala.
Long Dhaka mifala faendem wanfala Witness, and mifala encouragem sista hia for joinim mifala long olketa Christian meeting and bihaen for share long preaching waka. Waef bilong mi studyim Bible witim wanfala famili and invaetem olketa for kam long olketa meeting bilong mifala. From loving-kaeness bilong Jehovah, full famili hia kamap olketa servant bilong hem. Bihaen, tufala dota bilong olketa help for transleitim olketa Bible buk long Bengali languis, and plande relative bilong olketa start for savve long Jehovah tu. Plande nara Bible student acceptim truth. Klosap evriwan hia serve olsem elder or pioneer distaem.
From taon bilong Dhaka garem staka pipol long hem, mifala invaetem samfala relative bilong mifala for kam and helpem mifala duim preaching waka. Samfala acceptim and olketa kam joinim mifala long Bangladesh. Mifala barava hapi and thankiu long Jehovah for chance wea mifala kasem for share for preachim gud nius long datfala kantri! Fastaem, wanfala pablisa nomoa stap long there, bat distaem, Bangladesh garem tufala kongregeson.
Long July 1982, mifala mas lusim Bangladesh. Taem mifala baebae long olketa brata mifala krae nao. No longtaem bihaen, mi kasem waka long Entebbe International Airport, long Uganda, wea hem nao ples mifala stap for foa year and sevenfala month. Mifala tingting, wanem nao mifala savve duim for honorim nambawan nem bilong Jehovah long disfala ples?
Servem Jehovah Long East Africa
Taem mifala arrive long Entebbe International Airport, wanfala draeva hem pikim waef and mi for tekem mitufala go long ples wea mifala bae stap. Mi start for preach long hem abaotem Kingdom bilong God. Hem askem mi: “Waswe, iu wanfala Jehovah’s Witness?” Taem mi sei, ia, draeva hem sei: “Wanfala brata bilong iufala hem waka long kontrol taoa.” Stretawe mi askem hem for tekem mi go long there. Mifala meetim datfala brata wea barava hapi for lukim mifala, and mifala mekem olketa arrangement saed long olketa meeting and field service.
Long datfala taem, 228 Kingdom pablisa nomoa stap long Uganda. Long fasfala year mifala waka witim nara tufala brata long Entebbe for plantim olketa seed bilong truth. From pipol long there laekem tumas for read, mifala fit for offerim staka literature, wea insaed diswan hem plande handred magasin tu. Mifala invaetem olketa brata long Kampala, wea hem nao kapitol, for helpem mifala preach long territory bilong Entebbe long olketa weekend. Long fasfala pablik tok wea mi givim, faevfala nomoa attend—wea mi tu insaed datfala namba.
Insaed next thrifala year, mifala kasem barava bigfala hapi taem mifala lukim olketa wea mifala teachim barava muv ahed kwiktaem. (3 John 4) Long wanfala circuit assembly, sixfala Bible student bilong mifala baptaes. Plande long olketa hia talem hao olketa kasem encouragement for aftarem full-taem service bikos olketa lukim mifala pioneer nomata mifala waka full taem.
Mifala luksavve hao ples wea mifala waka savve kamap gudfala territory for witness long pipol tu. Wantaem, mi story witim wanfala airport fire officer abaotem hope insaed Bible for laef long wanfala paradaes earth. Mi showim hem long Bible bilong hemseleva hao olketa man bae stap tugeta long peace and wan mind, and bae no safa from poor living, wei for no garem haos, war, sik, or dae. (Psalm 46:9; Isaiah 33:24; 65:21, 22; Revelation 21:3, 4) Taem hem readim diswan insaed Bible bilong hemseleva, hem laek savve long moa samting abaotem datwan. Mifala startim Bible study witim hem stretawe. Hem attendim evri meeting. No longtaem bihaen, hem dedicatem hemseleva long Jehovah and hem baptaes. Bihaen, hem joinim mifala long full-taem ministry.
Taem mifala long Uganda, ethnic tension hem kamap tufala taem, bat datwan no stopem spiritual waka bilong mifala. Olketa organization bilong nara kantri wea waka long Uganda, sendem famili bilong olketa wakman bilong olketa go long Nairobi, Kenya, for sixfala month. Mifala wea stap yet long Uganda gohed witim olketa Christian meeting and preaching waka, bat mifala mas careful.
Long April 1988, waka wea mi duim long there hem finis, so mifala muv moa. Mifala lusim Entebbe Kongregeson witim feeling for barava satisfae bikos long olketa gudfala spiritual samting wea kamap long there. Long July 1997, mifala kasem chance for visitim Entebbe moa. Long datfala taem, samfala wea mifala study witim bifor serve olsem olketa elder. Mifala barava hapi for lukim 106 attendim Pablik Meeting!
Muv Go Long Territory wea No Eniwan Preach Long Hem
Waswe, bae mifala fit for mekius long olketa niu chance wea bae kamap? Ia, olketa sendem mi go long Mogadishu International Airport, long Somalia. Mifala barava laek for mekius long disfala chance for serve long territory wea no eniwan preach long there yet.
Olketa main wan wea mifala savve preach long olketa hem olketa wea waka long olketa Hae Commission, olketa wakman from Philippines, and olketa nara pipol from difren kantri. Plande taem mifala meetim olketa long market. Mifala visitim olketa long haos bilong olketa tu. From mifala iusim olketa kleva idea, careful, wise, and depend evribit long Jehovah, mifala fit for sharem olketa Bible truth witim pipol, and plande long olketa hia from difren kantri acceptim datwan. Bihaen tufala year, mifala lusim Mogadishu—just bifor war hem kamap long there.
Next ples wea datfala International Civil Aviation Organization sendem mi go long hem, hem Yangon, Myanmar. Long there tu, olketa nambawan chance kamap for mifala savve helpem pipol wea garem honest heart lane abaotem olketa plan bilong God. Bihaen long Myanmar, olketa sendem mifala go long Dar es Salaam, Tanzania. Hem barava moa isi for preach from haos tu haos long Dar es Salaam bikos wanfala community stap long there wea tok English.
Long evri kantri wea mifala waka long hem, hem no hard for duim ministry bilong mifala, nomata gavman long plande kantri hia putim samfala tambu long waka bilong Olketa Jehovah’s Witness. From waka wea mi duim hem join witim gavman or organization wea waka long olketa difren kantri, pipol no kwestinim samting wea mifala duim.
Waka wea mi duim mekem mi and waef bilong mi go stap long plande difren ples insaed 30 year. Nomata olsem, mifala ting long waka bilong mi olsem wei for mifala savve kasem goal bilong mifala. Fasfala goal hem evritaem for duim waka for Kingdom bilong God. Mifala thankiu long Jehovah for wei wea hem helpem mifala barava mekius long living bilong mifala wea change evritaem, and for enjoyim nambawan privilege for spredim datfala gud nius go long olketa farawe ples.
Kasem Bak Ples wea Mifala Start
Taem mi 58 year, mi disaed for lusim datfala waka and go bak long Philippines. Taem mifala arrive bak long there, mifala prea long Jehovah for gohed leadim mifala. Mifala start for serve long wanfala kongregeson long Trece Martires City, long Cavite province. Long fastaem wea mifala arrive long there, 19-fala nomoa stap wea talemaot Kingdom bilong God. Mifala mekem arrangement for duim preaching evriday, and mifala startim plande Bible study. Kongregeson start for grow. Wantaem, waef bilong mi garem 19 Bible study, and mi garem 14.
No longtaem bihaen, Kingdom Hall hem start for smol tumas. Mifala prea long Jehovah abaotem diswan. Wanfala spiritual brata and waef bilong hem disaed for givim wanfala pis land, and branch office agree for mifala garem kaon for buildim niu Kingdom Hall. Disfala niu building hem barava helpem preaching waka, and namba bilong olketa wea attend hem kamap moa big evri week. Distaem, mifala travel for winim wan hour for helpem narafala kongregeson wea garem 17 pablisa.
Mi and waef bilong mi barava tinghae long privilege wea mifala garem for serve long staka difren kantri olsem. Taem mifala ting go bak long wei wea mifala stap long olketa difren ples, mifala barava hapi for savve hao mifala iusim laef bilong mifala for duim best samting wea mifala savve duim—helpem olketa narawan for lane abaotem Jehovah!
[Map long page 24, 25]
(For formatted text, lukim pablikeson)
TANZANIA
UGANDA
SOMALIA
IRAN
BANGLADESH
MYANMAR
LAOS
THAILAND
PHILIPPINES
[Piksa long page 23]
Witim waef bilong mi, Aurea