Science and Religion​—Wanfala Raoa Start Midolwan Tufala

WANFALA olo man wea studyim universe hem gohed for read nomata hem klosap for dae. Hem holem olketa pepa wea hem bin raetem, wea olketa redi for wakem for kamap wanfala buk. Maet hem no savve, bat datfala buk wea hem raetem bae affectim tingting bilong evri man abaotem universe. And tu, hem bae startim wanfala bigfala raoa midolwan olketa Christian religion, wea affectim pipol kam kasem distaem.

Nem bilong datfala man wea redi for dae hem Nicolaus Copernicus, wanfala Roman Catholic from Poland, and disfala samting wea iumi just storyim hem happen long 1543. Insaed buk bilong Copernicus, wea nem bilong hem On the Revolutions of the Heavenly Spheres, hem sei sun, and no earth, nao hem stap midol long solar system. Thru long wanfala buk nomoa, Copernicus changem evribit datfala teaching wea hard for minim, wea sei earth nao midol long solar system, and hem teachim wanfala niu idea wea moa isi for minim.

Fastaem, luk olsem no eni raoa bae kamap. Diswan from Copernicus careful for no talem olobaot olketa idea bilong hem. And tu, Catholic Church, wea followim teaching for sei earth nao midol long solar system, hem willing lelebet long datfala taem for acceptim samfala tingting saed long science. Pope tu talem Copernicus for wakem wanfala buk abaotem samting wea hem faendem. Gogo, man wea wakem buk bilong Copernicus, hem fraet and hem raet insaed front long buk and sei hao disfala teaching abaotem wei wea sun nao midol long solar system hem wanfala idea saed long mathematics nomoa, and hem maet no really tru samting saed long universe.

Datfala Raoa Kamap Moa Big

Next man wea join insaed datfala raoa hem Galileo Galilei (1564-1642), wanfala Catholic man bilong Italy wea studyim universe, and hem savveman saed long mathematics and physics tu. Hem iusim olketa telescope wea hemseleva wakem, wea garem olketa niu samting insaed wea olketa kolem lens. From datwan hem savve lukim olketa samting long skae long barava kliafala wei winim eni man bifor. Samting wea hem lukim mekem hem barava bilivim hao idea bilong Copernicus hem stret. Galileo lukim tu hao sun hem garem olketa mark long hem, wea distaem olketa kolem sun spots. Diswan tu barava difren from teaching wea olketa savveman and religion barava tinghae long hem, wea sei sun no savve change or kamap nogud.

Galileo hem difren from Copernicus, from hem no fraet and hem strong for talemaot olketa idea bilong hem. And tu, from Catholic Church talemaot finis hao olketa no acceptim teaching bilong Copernicus, olketa start for againstim kaen tingting olsem. Dastawe, taem Galileo talemaot hao disfala teaching hem stret and followim samting wea Bible teachim, Catholic Church sei hem againstim teaching bilong olketa.a

Galileo hem go long Rome for defendim hemseleva bat hem no win. Long 1616 church komandim hem for no defendim teaching bilong Copernicus. From datwan Galileo hem stop for talemaot olketa idea bilong hem for lelebet taem. Then long 1632 hem raetem wanfala nara buk wea sapotim tingting bilong Copernicus. Long year bihaen datwan, datfala Inquisition, wea hem kot bilong Roman Catholic Church, hem putim Galileo long prison for full laef bilong hem, bat bikos hem olo finis olketa muvim hem go stap olsem prisoner long wanfala haos.

Plande pipol ting disfala raoa wea kamap midolwan Galileo and church hem showimaot hao science hem winim religion and from datwan olketa sei hem winim Bible tu. Bat olsem iumi bae lanem long next article, diskaen tingting hem ova tumas, from samfala trufala point stap wea man mas ting raonem.

[Footnotes]

[Piksa long page 3]

Copernicus

[Credit Line]

Taken from Giordano Bruno and Galilei (German edition)

[Piksa long page 3]

Galileo defendim hemseleva long kot bilong Roman Catholic Church

[Credit Line]

From the book The Historian’s History of the World, Vol. IX, 1904

[Piksa Credit Line long page 3]

Background: Chart depicting Copernicus’ concept of the solar system