Waswe, Iu Remember?
Waswe, iu enjoyim olketa Wastaoa wea iu readim insaed olketa month wea go pas finis? Sapos olsem, trae for ansarem olketa kwestin long daon:
• Why nao olketa chusim December 25 for celebratem day wea Jesus hem born?
Word bilong God no talem day wea Jesus hem born. Datfala Enciclopedia Hispánica hem sei: “Date for celebratem Christmas long December 25 hem no day wea Jesus born, bat hem day wea olketa long Rome bifor celebratem start bilong winter season.” Olketa Roman bifor celebratem diswan long wei for mekem feast, party, and givim olketa present.—12/15, page 4-5.
• Waswe, Stephen prea long Jesus long Acts 7:59?
Nomoa. Bible showim hao iumi mas prea go long Jehovah God nomoa. From hem lukim Jesus long vision, luk olsem Stephen hem feel free for ask stret long Jesus: “Lord Jesus, tekem spirit bilong mi.” Stephen hem savve Jesus kasem finis paoa for resurrectim olketa wea dae finis. (John 5:27-29) So Stephen askem Jesus for keepim gud laef paoa bilong hem go kasem taem Jesus resurrectim hem.—1/1, page 31.
• Hao nao iumi savve God no disaedem finis samting wea bae happen long man wanwan?
God letem iumi for free for chus, so wei for sei hem disaedem finis future bilong iumi, hem no stret. Sapos Jehovah God markem fastaem evri samting iumi bae duim long laef bilong iumi bifor iumi born and then hem askem iumi for ansa for wanem iumi duim, diswan bae showimaot hao hem no garem love and justice fasin. (Deuteronomy 32:4; 1 John 4:8)—1/15, page 4-5.
• Why nao man no fit for sei mirakol no savve happen?
From samfala scientist luksavve olketa garem lelebet savve nomoa saed long creation bilong God, distaem olketa no savve sei samting hem hard for happen. Olketa willing for talem nomoa hao samting maet no happen.—2/15, page 5-6.
• Why nao Judge Samson talem parents hem laek for maritim wanfala dota bilong olketa Philistine? (Judges 14:2)
Hem againstim Law bilong God for maritim samwan wea worshipim olketa giaman god. (Exodus 34:11-16) Nomata olsem, datfala woman “barava fitim mind” bilong Samson. Samson “luk aotem chance for killim dae olketa enemy,” and datfala woman hem barava fitim plan bilong hem. Spirit bilong God hem bihaenem samting wea Samson duim. (Judges 13:25; 14:3, 4, 6)—3/15, page 26.
• Waswe, Christian fit for givim selen or wanfala present long wakman bilong gavman for samting hem duim?
Hem rong for givim bribe long wanfala wakman long gavman, wea hem nao for givim selen or present long hem for switim hem for brekem law, duim samting wea no followim justice, or for mekem hem favorim man wea givim datfala bribe. Bat hem no rong for givim selen or wanfala present long wanfala wakman bilong gavman taem hem duim waka wea hem shud duim, or for deal witim iumi long wei wea fitim.—4/1, page 29.