Kwestin From Reader

Deuteronomy 14:21 read olsem: “Iufala mas no kaikaim meat bilong wanfala animal wea dae seleva.” Waswe, diswan hem againstim Leviticus 11:40, wea sei: “Eniwan wea kaikaim meat bilong datfala animal bae wasim kaleko bilong hem, and mas no klin go kasem evening”?

Tufala verse hia no againstim each other. Long Deuteronomy 14:21 hem storyim moa datfala tambu for no kaikaim animal wea dae seleva, wea maet wanfala wild animal nao killim dae. (Exodus 22:31; Leviticus 22:8) Bat long Leviticus 11:40, hem explainim samting wea wanfala Israelite savve duim sapos hem duim samting from hem no savve, and from datwan hem brekem datfala law.

Nomata Law Bilong Moses mekem samfala tambu, datwan no minim man bae no brekem law samfala taem. Olsem example, samfala law stap wea againstim wei for steal, killim man dae, givim witness wea no tru, and for samfala nara samting moa. Long semtaem, law markem samfala difren kaen panis for man taem hem brekem olketa law hia wea kam from God. Wei for kasem panis olsem hem strongim wei wea law hem barava important and hem serious samting.

Man wea brekem law wea stopem man for kaikaim meat bilong animal wea dae taem hem faendem bae no klin front long Jehovah, and hem mas followim wei wea law markem for kamap klin. Sapos hem no duim datwan, hem mas “ansa for rong bilong hem.”—Leviticus 17:15, 16.