Waswe, Bae Iu Wakabaot Witim God?

“No ova tumas taem iu wakabaot witim God bilong iu.”—Micah 6:8.

1, 2. Hao nao iumi savve markem feeling wea Jehovah garem for iumi witim feeling bilong dadi or mami wea teachim pikinini for wakabaot?

WANFALA baby wea no standap strong hem hol go for hand bilong dadi and mami and start for wakabaot. Diswan hem olsem smol samting nomoa, bat mami and dadi ting long hem olsem wanfala important samting wea mekem olketa luk forward long future. Tufala barava luk forward for wakabaot and holem hand bilong pikinini bilong tufala long olketa month and year bihaen. Olketa barava hope for provaedem direction and sapot for datfala pikinini insaed olketa year wea hem growap.

² Jehovah God garem semkaen feeling for olketa pikinini bilong hem long earth. Wantaem hem sei olsem abaotem pipol bilong hem Israel, wea nara nem for olketa hem Ephraim: “Mi teachim Ephraim for wakabaot, mi holem olketa . . . Witim rope bilong olketa man long earth mi gohed for pullim olketa kam, witim string bilong love.” (Hosea 11:3, 4) Long hia Jehovah story abaotem hemseleva olsem wanfala dadi wea patient for teachim pikinini bilong hem for wakabaot, wea maet Hem go holem and karem pikinini hia taem hem foldaon. Jehovah, wea hem nao best dadi, barava want for teachim iumi hao for wakabaot. Hem hapi tumas tu for wakabaot witim iumi taem iumi gohed for muv ahed. Olsem theme bilong iumi showimaot, iumi savve wakabaot witim God! (Micah 6:8) Bat for wakabaot witim God hem minim wanem? Why nao iumi need for duim datwan? Hao nao iumi savve duim datwan? And wanem nao olketa blessing wea kamaot from wei for wakabaot witim God? Bae iumi storyim ansa for fofala kwestin hia.

For Wakabaot Witim God Hem Minim Wanem?

3, 4. (a) Wanem nao mekem tokpiksa abaotem wei for wakabaot witim God hem barava fitim? (b) Wanem nao hem minim for wakabaot witim God?

³ Hem tru wanfala man long earth no savve wakabaot long really wei witim Jehovah wea hem wanfala spirit. (Exodus 33:20; John 4:24) So taem Bible story abaotem wei wea olketa man wakabaot witim God, hem minim long tokpiksa wei. For sure, diswan hem samting wea evriwan savve minim nomata long wanem taem olketa stap or long wea olketa stap. Disfala tokpiksa mekem man tingim klos wei for fren witim samwan, iaman? Kaen feeling olsem mekem iumi luksavve wanem hem minim for wakabaot witim God. Bat, iumi storyim samfala example.

⁴ Rememberim tufala faithful man, Enoch and Noah. Why nao Bible sei olketa wakabaot witim God? (Genesis 5:24; 6:9) Long Bible, datfala word “for wakabaot” hem plande taem minim for followim wanfala plan. Enoch and Noah chus for mekem evri samting wea tufala duim for wan mind witim will bilong Jehovah God. Tufala no olsem pipol wea laef long taem bilong tufala, bat tufala depend long Jehovah for leadim tufala and obeyim wanem hem talem. Tufala trustim hem. Waswe, diswan minim Jehovah nao disaedem samting for olketa? Nomoa. Jehovah givim free will long olketa man, and hem laekem iumi for iusim datfala present witim ‘paoa bilong iumi for tingting stret.’ (Romans 12:1) Nomata olsem, taem iumi disaedem samting, iumi letem tingting bilong Jehovah wea barava winim tingting bilong iumi for leadim paoa bilong iumi for tingting stret. (Proverbs 3:5, 6; Isaiah 55:8, 9) Hem olsem iumi stap klosap long Jehovah taem iumi wakabaot long laef bilong iumi.

5. Why nao Jesus story abaotem wei for addim wanfala cubit long laef bilong man?

⁵ Staka taem Bible sei laef hem olsem wanfala gogo. Samfala taem, hem talem diswan stret, bat olketa narataem hem talem toktok wea point go long datwan. Olsem example, Jesus sei: “Hu nao long iufala wea wari tumas savve addim wanfala cubit long laef bilong hem?” (Matthew 6:27) Maet toktok hia mekem iu konfius. Why nao Jesus sei for addim “wanfala cubit,” wea hem wei for measurem long bilong samting, witim “laef” bilong man, wea iumi savve measurem diswan followim taem?a Luk olsem Jesus hem storyim wei wea laef hem olsem wanfala gogo. Really, hem teachim iumi hao wei for wari bae no helpem iumi for addim nara extra step long wakabaot bilong iumi long laef. Bat waswe, fitim iumi for sei iumi no savve changem hao far nao iumi savve wakabaot witim God? Nomoa nao! Diswan hem leadim iumi go long disfala mek-tu kwestin, Why nao iumi need for wakabaot witim God?

Why Nao Iumi Need for Wakabaot Witim God?

6, 7. Olketa man wea no perfect barava needim wanem, and why nao iumi shud depend long Jehovah saed long datfala need?

⁶ Wanfala reason why iumi need for wakabaot witim Jehovah God hem stap long Jeremiah 10:23, wea sei: “Olketa wei bilong man hem no for hemseleva chusim. Man wea wakabaot no garem right for chusim seleva gogo bilong hem.” So iumi olketa man no fit and no garem right for chusim seleva gogo bilong iumi long laef. Iumi barava needim samwan for leadim iumi. Olketa wea laek disaed seleva wanem olketa bae duim long laef, wea datwan hem for independent from God, olketa duim sem mistek olsem Adam and Eve. First man and woman hia tingse tufala garem right for disaedem seleva samting wea gud and samting wea nogud. (Genesis 3:1-6) Iumi barava ‘no garem datfala right’!

⁷ Waswe, iu luksavve long need wea iumi garem for samwan leadim iumi long laef? Evriday iumi mas disaedem olketa smol and big samting. Samfala disison barava hard and savve affectim future bilong iumi, and tu, future bilong olketa wea iumi lovem. Bat, tingim hao samwan wea barava moa olo and moa wise hem hapi for leadim iumi long loving wei taem iumi disaedem olketa samting hia! Sorre samting nao, staka pipol distaem laek for trustim tingting bilong olketa seleva and disaed seleva hao olketa bae wakabaot. Olketa no laek for lisin long disfala trufala toktok long Proverbs 28:26: “Man wea trustim heart bilong hemseleva hem stupid, bat man wea wakabaot long wisdom hem man wea bae stap sef.” Jehovah laekem iumi for missim olketa barava nogud samting wea kamaot from wei for trust long heart bilong iumi wea savve trikim iumi. (Jeremiah 17:9) Hem laekem iumi for wise taem iumi wakabaot, for trustim hem olsem Man for leadim and teachim iumi. Taem iumi duim datwan, gogo bilong iumi long laef hem sef, hem mekem iumi satisfae, and garem mining.

8. Sin and wei for no perfect hem leadim olketa man go long wea, bat Jehovah laekem iumi for hao?

⁸ Nara reason why iumi need for wakabaot witim God, hem saed long hao long nao datfala wakabaot wea iumi laek for duim witim God. Bible talem tru samting taem hem storyim wei wea evri man wea no perfect wakabaot go long sem ples. Ecclesiastes 12:5 storyim olketa hard samting wea man kasem taem hem olo taem hem sei: “Man hem wakabaot go for kasem haos bilong hem wea stap olowe and olketa wea tok sorre march raon long road.” Wanem nao disfala ‘haos wea stap olowe’? Hem nao grev, ples wea iumi bae go long hem from iumi sin and no perfect. (Romans 6:23) Nomata olsem, Jehovah no laekem iumi for garem shortfala laef wea fulap witim trabol. (Job 14:1) Only wei for iumi savve laef olowe, wea hem nao samting wea God markem for iumi firstaem, hem for wakabaot witim hem. Waswe, datwan nao samting wea iu laek for duim? Sapos olsem, iu need for wakabaot witim Dadi bilong iu.

Hao Nao Iumi Savve Wakabaot Witim God?

9. Why nao samfala taem Jehovah haed from pipol bilong hem, bat wanem promis nao hem talem long pipol bilong hem long Isaiah 30:20?

⁹ Hem barava fitim for iumi tingting gud long mek-thri kwestin. Hao nao iumi savve wakabaot witim God? Iumi savve faendem ansa long Isaiah 30:20, 21, wea sei: “Barava Nambawan Teacher bilong iufala bae no haedem hemseleva moa, and eye bilong iufala mas kamap eye wea lukim Barava Nambawan Teacher bilong iufala. And ear bilong iufala bae herem wanfala voice bihaen long iufala wea sei: ‘Diswan nao wei. Wakabaot followim, iufala pipol,’ taem iufala go long raet or taem iufala go long left.” Long disfala scripture wea encouragem man, toktok bilong Jehovah long verse 20 maet mekem pipol bilong hem tingim moa hao taem olketa againstim hem, hem olsem Hem haed from olketa. (Isaiah 1:15; 59:2) Bat verse hia hem showimaot hao Jehovah no haed, hem standap front long faithful pipol bilong hem. Maet iumi tingim wanfala teacher wea standap front long olketa student bilong hem and showim olketa samting wea hem laekem olketa for lanem.

10. Long wanem wei nao iu savve “herem wanfala voice bihaen long iu” from Nambawan Teacher bilong iu?

¹⁰ Long verse 21, hem showimaot wei wea Jehovah wakabaot bihaen long pipol bilong hem and givim instruction long stretfala wei for olketa followim. Olketa savveman wea studyim Bible sei maet disfala toktok kam from wei wea wanfala shepherd savve wakabaot bihaen olketa sheep bilong hem samfala taem, and singaot long olketa mekem olketa followim stretfala road. Hao nao diswan fitim iumi? Taem iumi depend long Word bilong God for leadim iumi, iumi readim olketa toktok wea pipol raetem staka thousand year go finis. Hem olsem iumi herem olketa toktok hia from bihaen long iumi, from olketa raetem longtaem finis. Nomata olsem, olketa toktok hia fitim distaem long sem wei wea hem fitim long taem wea Isaiah raetem. Kaonsel bilong Bible savve leadim iumi long samting iumi disaedem evriday and hem savve helpem iumi for planim gogo bilong iumi long future. (Psalm 119:105) Taem iumi barava strong for lukaotem kaonsel olsem and followim, datwan minim Jehovah nao leadim iumi. Iumi wakabaot witim God.

11. Olsem Jeremiah 6:16 talem, wanem naesfala samting nao Jehovah talem long pipol bilong hem, bat wanem nao olketa duim?

¹¹ Waswe, iumi letem Word bilong God for barava leadim iumi? Samfala taem hem gud for lukluk long iumiseleva long honest wei. Tingim wanfala verse wea bae helpem iumi for duim datwan: “Diswan nao samting wea Jehovah hem talem: ‘Standap long olketa road, iufala pipol, and lukim, and ask wea nao olketa road bilong taem bifor, wea nao datfala gudfala road hem stap distaem; and wakabaot followim, and soul bilong iufala bae stap gud.’” (Jeremiah 6:16) Maet toktok hia mekem iumi tingim wanfala man wea travel wea kasem olketa difren road and askem samwan wanem road nao for hem followim. Long spiritual wei, olketa bighed pipol bilong Jehovah long Israel need for duim sem samting. Olketa need for faendem moa wea nao “olketa road bilong taem bifor.” Datfala “gudfala road” nao hem road wea bifor olketa faithful laen dadi bilong olketa wakabaot followim, bat wea bihaen datfala nation krangge for lusim and followim difren road. Sorre tumas, Israel hem bighed and no followim disfala loving reminder from Jehovah. Datfala sem verse hem sei: “Bat olketa gohed for sei: ‘Mifala bae no wakabaot.’” Nomata olsem, pipol bilong God distaem followim datfala kaonsel.

12, 13. (a) Hao nao olketa anointed follower bilong Christ followim kaonsel long Jeremiah 6:16? (b) Hao nao iumi savve chekim iumiseleva saed long wei wea iumi wakabaot distaem?

¹² Start long end bilong mek-19 century, olketa anointed follower bilong Christ ting long datfala kaonsel long Jeremiah 6:16 olsem kaonsel for olketa seleva. Olsem wanfala sekson, olketa strong for leadim wei for go bak moa long “olketa road bilong taem bifor.” Long wei wea difren tumas from olketa false Christian church wea apostate, olketa faithful for “followim datfala plan bilong healthy toktok” wea Jesus Christ startim and wea olketa faithful follower bilong hem sapotim long first century C.E. (2 Timothy 1:13) Kam kasem distaem, olketa anointed wan helpem each other and olketa “nara sheep,” for aftarem laef wea healthy and hapi, wea olketa false Christian lusim.—John 10:16.

¹³ Taem olketa givim spiritual kaikai long barava taem, datfala slave sekson helpem plande million for faendem “olketa road bilong taem bifor” and for wakabaot witim God. (Matthew 24:45-47) Waswe, iu tu insaed disfala sekson wea olketa helpem? Sapos olsem, wanem nao iu savve duim for no isisi go difren long wei for followim gogo bilong iuseleva? Hem wise for stop samfala taem and lukluk long wanem road nao iu wakabaot followim long laef bilong iu. Sapos iu faithful for readim Bible and olketa Bible buk and attendim olketa program wea olketa anointed wan arrangem distaem, iu kasem training for wakabaot witim God. And taem iu hambol for followim kaonsel wea iu kasem, iu barava wakabaot witim God nao, and followim “olketa road bilong taem bifor.”

Wakabaot Olsem Iu “Lukim Datwan wea Man No Savve Lukim”

14. Sapos iumi barava bilivim hao Jehovah hem stap, hao nao datwan bae showaot long olketa samting wea iumi disaedem?

¹⁴ For wakabaot witim Jehovah, iumi mas barava biliv hem really stap. Tingim hao Jehovah talem klia long olketa bilong Israel wea faithful hao hem no haed from olketa. Distaem tu hem showim hemseleva long pipol bilong hem olsem datfala Barava Nambawan Teacher. Waswe, iu barava biliv God hem stap, olsem hem barava stap front long iu and teachim iu? Iumi needim faith olsem for wakabaot witim God. Moses garem kaen faith olsem “from hem gohed for stand strong olsem hem lukim Datwan wea man no savve lukim.” (Hebrews 11:27) Sapos iumi barava bilivim hao Jehovah hem stap, bae iumi tingim feeling bilong hem taem iumi disaedem eni samting. Olsem example, bae iumi nating ting for duim dirty fasin and then trae for haedem datwan from olketa Christian elder or famili member. Bat, iumi duim best for wakabaot witim God nomata taem olketa narawan no savve lukim iumi. Olsem King David bifor, iumi sei: “Mi bae wakabaot witim heart wea faithful long haos bilong mi.”—Psalm 101:2.

15. Hao nao wei for kaban witim olketa Christian brata and sista bae helpem iumi for barava bilivim hao Jehovah hem stap?

¹⁵ Jehovah savve iumi no perfect and stap long physical world wea maet samfala taem datwan mekem hem hard for iumi bilivim samting wea iumi no lukim. (Psalm 103:14) Hem duim staka samting for helpem iumi winim wik point olsem. Olsem example, hem hipimap “wanfala pipol for nem bilong hem” from evri nation bilong earth. (Acts 15:14) Taem iumi servem hem tugeta witim wan mind, iumi strongim each other. Taem iumi herem hao Jehovah helpem wanfala spiritual brata or sista for winim wanfala wik point or hardfala test, diswan mekem iumi barava biliv go moa hao God hem stap.—1 Peter 5:9.

16. Hao nao wei for lane abaotem Jesus hem helpem iumi for wakabaot witim God?

¹⁶ Main samting nao, Jehovah givim iumi example bilong Son bilong hem. Jesus hem sei: “Mi nao datfala wei and truth and laef. Only wei for kam long Father hem thru long mi.” (John 14:6) Wanfala best wei for mekem iumi barava bilivim hao Jehovah stap hem for studyim laef bilong Jesus taem hem stap long earth. Evri samting wea Jesus talem or duim hem showimaot fasin and olketa wei bilong Dadi bilong hem long perfect wei. (John 14:9) Taem iumi disaedem eni samting, hem gud for ting raonem gud firstaem hao nao Jesus bae disaedem datfala sem samting. Taem olketa samting iumi disaedem showimaot kaen wei olsem for ting raonem samting witim prea, datwan showimaot iumi followim Christ long klos wei. (1 Peter 2:21) Sapos iumi duim olsem, iumi wakabaot witim God nao.

Wanem Blessing Nao Bae Iumi Kasem?

17. Sapos iumi wakabaot followim wei bilong Jehovah, wanem wei for “stap gud” nao soul bilong iumi bae kasem?

¹⁷ Iumi bae garem laef wea mekem iumi satisfae sapos iumi wakabaot witim Jehovah God. No forgetim samting wea Jehovah promisim for pipol bilong hem sapos olketa lukaotem “datfala gudfala road.” Hem sei: “Wakabaot followim, and soul bilong iufala bae stap gud.” (Jeremiah 6:16) Wanem nao “stap gud” hem minim? Waswe, hem minim laef wea fulap witim hapitaem and rich living? Nomoa. Jehovah givim samting wea barava moabeta, samting wea plande man wea barava rich olketa no savve faendem. For stap gud hem minim for garem peace long mind, hapi, wei for satisfae, and garem wanem iu needim long spiritual saed. Diswan minim iu savve barava sure iu chusim best road for followim long laef. Wei for garem peace long mind olsem hem wanfala barava spesol blessing insaed disfala nogud world!

18. Wanem blessing nao Jehovah laek for givim long iu, and wanem nao iu disaed strong for duim?

¹⁸ Tru nao, laef hem wanfala nambawan blessing, nomata sapos man laef for shortfala taem nomoa. Hem no plan bilong Jehovah for iu wakabaot long laef for shortfala taem nomoa—start from taem iu young and strong go kasem taem iu olo and kasem enikaen nogud samting. Nomoa, Jehovah laekem iu for kasem barava nambawan blessing. Hem laekem iu for wakabaot witim hem for olowe! Diswan hem showaot klia long Micah 4:5, wea sei: “Evri pipol, for saed bilong olketa, bae wakabaot long nem bilong god bilong olketa; bat iumi, for saed bilong iumi, bae wakabaot long nem bilong God bilong iumi Jehovah, for longfala taem, yes for olowe.” Waswe, bae iu barava tinghae long datfala blessing? Waswe, iu laek for garem laef wea Jehovah kolem “datfala really laef”? (1 Timothy 6:19) Sapos olsem, disaed strong for wakabaot witim Jehovah tuday, tumoro, and for olowe!

[Footnote]

Hao Nao Bae Iu Ansa?

• Wanem nao hem minim for wakabaot witim God?

• Why nao iu tingse hem important for wakabaot witim God?

• Wanem nao bae helpem iu for wakabaot witim God?

• Olketa wea wakabaot witim God bae kasem olketa wanem blessing?

[Piksa long page 23]

Thru long Bible, iumi herem voice bilong Jehovah bihaen long iumi hem sei, “Diswan nao wei”

[Piksa long page 25]

Iumi kasem spiritual kaikai long barava taem long olketa meeting