Waswe, Devil Hem Wanfala Really Man?

WANEM nao tingting bilong iu abaotem Devil? Waswe, iu ting long hem olsem wanfala really man wea switim pipol for duim olketa wicked samting, or hem minim wicked fasin nomoa? Waswe, fitim iumi for fraetem Devil, or iumi shud ting long hem olsem wanfala idea or kastom story nomoa? Waswe, datfala word “devil” hem minim wicked paoa long universe? Waswe, hem wanfala word for wicked fasin wea olketa man garem, olsem staka savveman bilong religion distaem olketa talem?

Iumi no sapraes hao olketa man garem difren tingting saed long hu nao Devil. Tingim hao hem bae barava hard for luksavve long samwan wea savve tumas for haedem hu nao hem, and wea disaed strong for no letem eniwan savve long hem! Bible storyim Devil hem kaen man olsem. Bible kolem hem Satan taem hem sei: “Satan gohed for changem hemseleva for kamap wanfala angel bilong laet.” (2 Corinthians 11:14) Nomata hem wicked, Devil showim hemseleva olsem samwan wea gud mekem hem savve giamanim pipol. And sapos hem savve mekem pipol biliv hem no really stap, datwan barava fitim plan bilong hem.

So, really, hu nao Devil? Wanem taem nao hem kamap, and hao nao hem start? Wanem nao hem duim for spoelem olketa man distaem? Waswe, iumi savve duim eni samting for againstim hem? Bible hem showim trufala history bilong Devil from taem hem start and Bible givim olketa trufala ansa for olketa kwestin hia.

[Piksa long page 3]

Hem bae barava hard for luksavve long samwan wea savve tumas for haedem hu nao hem!