Wei wea Gud Fasin Bae Winim Wicked Fasin
King David hem wanfala gud man. Hem barava lovem God, hem laekem tumas justice, and hem tingim and kea for olketa wea poor. Nomata olsem, disfala gud king duim adultery witim waef bilong wanfala man bilong hem wea hem trustim. And bihaen, taem David faendemaot hao hem givim pikinini long datfala marit woman, Bath-sheba, hem mekem plan for killim dae hasband bilong hem. Then hem maritim Bath-sheba for trae haedem olketa nogud samting wea hem duim.—2 Samuel 11:1-27.
HEM klia hao olketa man fit for duim plande gudfala samting. So why nao olketa duim plande wicked samting? Bible storyim samfala main reason for diswan. Hem storyim tu hao God bae iusim Christ Jesus for finisim wicked fasin for olowe.
Heart Bilong Man Saedem Nogud Samting
King David talem stret wanfala samting wea kosim wicked fasin. Bihaen sin bilong hem showaot, hem acceptim full responsibility for samting wea hem duim. Hem sorre tumas and hem raet: “Taem mami bornem mi, hem kasem bigfala pain and mi garem sin, and start from taem wea mami karem mi, mi garem datfala sin.” (Psalm 51:5) Hem no plan bilong God for olketa mami bornem olketa pikinini wea bae duim sin. Bat taem Eve, and then Adam chus for againstim God, olketa no savve garem olketa pikinini wea no savve sin. (Romans 5:12) Taem namba bilong olketa man wea no perfect hem kamap big, hem showaot klia hao “heart bilong man hem saedem nogud samting start from taem hem young.”—Genesis 8:21.
Sapos man no kontrolem wei wea heart saedem nogud samting, samting wea kamaot from diswan nao hem ‘fornication, . . . fasin for heit, faet, jealous fasin, fasin for kros, raoa, fasin for divaed, olketa sect, fasin for heitim man bikos long wanem hem garem,’ and olketa nara nogud fasin wea Bible sei hem “samting wea kamaot from sin.” (Galatians 5:19-21) Saed long King David, hem followim samting wea body bilong hem laekem and hem duim fornication, and staka trabol kamaot from datwan. (2 Samuel 12:1-12) Hem fit for rejectim datfala nogud samting wea heart bilong hem laekem. Bat from hem no rejectim datfala feeling for laekem Bath-sheba, David duim samting wea disaepol James storyim bihaen: “Each wan hem kasem test taem samting wea hem barava wantem pullim and switim hem. Then taem disfala feeling for barava wantem samting hem start for grow, hem mekem man duim sin, and dae hem kamaot from sin.”—James 1:14, 15.
Wei for killim dae staka pipol, rape, and spoelem evri samting wea pipol garem wea firstfala article story abaotem, hem example bilong olketa nogud samting wea savve happen taem pipol letem feeling for laekem nogud samting bossim samting wea olketa duim.
Fasin for No Savve Mekem Man Duim Wicked Samting
Experience bilong aposol Paul hem mekhae long mek-tu reason why pipol duim olketa wicked samting. Kasem taem wea hem dae, pipol savve long Paul olsem wanfala man wea kaen and showimaot love. Hem no hol bak for givim hemseleva for servem olketa Christian brata and sista bilong hem. (1 Thessalonians 2:7-9) Bat, bifor datwan, taem nem bilong hem Saul, hem “kros tumas and laek killim dae” olketa hia. (Acts 9:1, 2) Why nao Paul agree witim and join insaed long olketa wicked samting wea pipol duim long olketa firstfala Christian? Hem sei: “From mi no savve.” (1 Timothy 1:13) Tru nao, bifor, Paul garem “strong for God; bat wea no followim stretfala savve.”—Romans 10:2.
Olsem Paul, plande pipol tingse olketa duim stret samting taem olketa duim wicked samting from olketa no garem stretfala savve abaotem will bilong God. Olsem example, Jesus talem disfala warning long olketa follower bilong hem: “Taem bae kam wea evriwan wea killim iufala dae bae tingse hem duim wanfala holy service long God.” (John 16:2) From samting wea kasem olketa Witness bilong Jehovah distaem, olketa savve hao toktok bilong Jesus hem barava tru. Long plande kantri, pipol wea sei olketa servem God persecutim olketa Witness and killim dae samfala long olketa tu. Hem klia tumas hao nomata olketa man olsem tingse olketa duim stret samting, tru God hem nating hapi long datwan.—1 Thessalonians 1:6.
Man wea Startim Wicked Fasin
Jesus talemaot main reason why wicked fasin hem stap. Hem sei olsem long olketa bigman bilong religion wea laek killim hem dae: “Iufala kam from dadi bilong iufala Devil, and iufala laek duim samting wea dadi bilong iufala laekem. Hem man for killim dae man from taem wea hem first start.” (John 8:44) Satan nao man wea selfish fasin muvim hem for switim Adam and Eve for go againstim God. Datfala bighed fasin nao start bilong sin and dae wea kasem evri man.
Fasin bilong Satan for killim man dae hem showaot klia tu long wei wea hem deal witim Job. Taem Jehovah letem hem testim faithful fasin bilong Job, Satan no satisfae for aotem from Job evri samting wea hem ownim. Hem killim dae tenfala pikinini bilong hem tu. (Job 1:9-19) Insaed handred year wea go pas, wicked fasin hem barava kamap big from olketa man no perfect and no savve, and tu, from Satan affectim go moa samting wea olketa man long earth duim. Bible talem hao Jesus ‘torowem Devil kam daon long earth, and torowem olketa angel bilong hem kam daon witim hem.’ Datfala sem profesi talem stret tu hao Satan bae mekem “trabol for earth” wea big winim enitaem bifor. Nomata Satan kanduit forcem pipol for duim olketa wicked samting, hem savve tumas for “leadim rong olketa man long earth.”—Revelation 12:9, 12.
Aotem Feeling Long Heart wea Saedem Nogud Samting
For finisim for olowe wicked fasin midolwan olketa man, feeling bilong heart bilong man wea saedem nogud samting, wei wea hem no garem stretfala savve, and wei wea Satan affectim olketa man mas finis. First samting, wanem nao savve aotem sin from heart bilong man?
No eni doctor or medicine bilong olketa man savve duim datwan. Bat, Jehovah God provaedem samting wea savve finisim sin and wei for no perfect for evriwan wea willing for acceptim datwan. Aposol John hem raet: “Blood bilong . . . Jesus klinim iumi from evri sin.” (1 John 1:7) Taem datfala perfect man Jesus willing for dae for iumi, hem “karem olketa sin bilong iumi long body bilong hemseleva long post, mekem iumi finis for duim sin and followim raeteous wei.” (1 Peter 2:24) Wei wea Jesus dae olsem wanfala sakrifaes bae aotem nogud samting wea kamaot from wicked samting wea Adam duim. Paul talem hao Christ Jesus kamap “wanfala ransom wea barava fit for changem samting wea Adam duim.” (1 Timothy 2:6) Tru nao, dae bilong Christ openem wei for olketa man kasem bak wei for perfect wea Adam nao hem lusim.
Bat maet iu ask, ‘Sapos dae bilong Jesus 2,000 year bifor mekem olketa man fit for kamap perfect moa, why nao wicked fasin and dae gohed kam kasem distaem?’ For kasem ansa for datfala kwestin savve help for aotem mek-tu reason why wicked fasin hem stap—wei wea olketa man no savve long olketa plan bilong God.
Stretfala Savve Hem Strongim Gudfala Fasin
For kasem stretfala savve abaotem samting wea Jehovah and Jesus duim distaem for finisim wicked fasin savve stopem man wea tingse hem duim stret samting for appruvim wicked samting, or for barava faet “againstim God.” (Acts 5:38, 39) Jehovah God hem willing for forgivim olketa rong samting wea pipol duim taem olketa no savve. Long Athens, aposol Paul hem sei: “God hem willing for no tingim moa wei wea pipol bifor no savve gud, bat distaem hem talem evriwan evriwea for olketa mas repent. Bikos hem markem wanfala day wea hem bae judgem evriwan long earth long raeteous fasin thru long wanfala man wea hem appointim, and hem mekem diswan samting wea iumi savve trustim taem hem resurrectim hem from dae.”—Acts 17:30, 31.
From samting wea Paul experiencem finis, hem savve Jesus hem laef bak from dae, from Jesus nao wan wea story long Paul and stopem hem for persecutim olketa Christian. (Acts 9:3-7) Taem Paul kasem stretfala savve abaotem plan bilong God, hem change and kamap wanfala barava gud person followim example bilong Christ. (1 Corinthians 11:1; Colossians 3:9, 10) And tu, Paul hem strong for preachim “disfala gud nius bilong kingdom.” (Matthew 24:14) Insaed klosap 2,000 year bihaen taem wea Jesus dae and resurrect, Christ hem chusim samfala man and woman long earth, wea olsem Paul, wea bae rul witim hem long Kingdom bilong hem.—Revelation 5:9, 10.
Insaed long last century kam kasem distaem, Olketa Jehovah’s Witness strong for fulfillim disfala komand bilong Jesus: “So go and mek disaepol long pipol bilong evri nation, baptaesim olketa long nem bilong Father and bilong Son and bilong holy spirit, and teachim olketa for duim evri samting wea mi komandim long iufala.” (Matthew 28:19, 20) Olketa wea acceptim disfala message garem chance for stap olowe long earth anda long gavman bilong Christ long heven. Jesus hem sei: “For kasem laef olowe, olketa mas kasem savve abaotem iu, datfala only tru God, and abaotem datwan wea iu sendem kam, Jesus Christ.” (John 17:3) For helpem samwan kasem disfala savve hem best samting wea wanfala man savve duim for narawan.
Olketa wea acceptim disfala gud nius bilong Kingdom showimaot olketa fasin olsem “love, hapi, peace, long-safaring, kaenfala fasin, gudfala fasin, faith, kwaet fasin, [and] fasin for kontrolem seleva,” nomata wicked fasin stap evriwea raonem olketa. (Galatians 5:22, 23) Olketa followim example bilong Jesus long wei for “no peim bak nogud samting witim nogud samting long eniwan.” (Romans 12:17) Olketa wanwan trae for “winim nogud fasin witim gud fasin.”—Romans 12:21; Matthew 5:44.
Taem Wicked Fasin Hem Finis Evribit
Olketa man seleva bae nating savve finisim datfala main wan wea bihaenem wicked fasin, Satan. Bat, klosap nao, Jehovah bae iusim Jesus for smasem hed bilong Satan. (Genesis 3:15; Romans 16:20) And tu, Jehovah bae talem Christ Jesus for “smasem and finisim” evri difren kaen gavman, wea plande long olketa nao bihaenem staka wicked samting wea happen long history bilong olketa man. (Daniel 2:44; Ecclesiastes 8:9) Long disfala judgment day wea bae kam, olketa wea ‘no obeyim gud nius abaotem Lord bilong iumi Jesus bae finis evribit.’—2 Thessalonians 1:8, 9; Zephaniah 1:14-18.
Bihaen Jesus aotem Satan and olketa wea sapotim hem, from heven Hem bae helpem olketa wea stap laef long datfala taem for mekem disfala earth kamap paradaes moa. And tu, Christ bae resurrectim evriwan wea fit for laef bak long earth. (Luke 23:32, 39-43; John 5:26-29) Taem hem duim datwan, hem bae stretem samfala nogud samting wea olketa man safa long hem wea kamaot from wicked fasin.
Jehovah bae no forcem pipol for obeyim gud nius abaotem Jesus. Nomata olsem, hem givim chance long pipol for kasem savve wea lead go long laef. Hem important tumas for iu mekius long datfala chance distaem! (Zephaniah 2:2, 3) Sapos iu duim datwan, bae iu lanem hao for deal witim eni wicked samting wea mekem laef bilong iu hard distaem. Bae iu lukim tu hao Christ nao datwan wea bae finisim wicked fasin for olowe.—Revelation 19:11-16; 20:1-3, 10; 21:3, 4.
[Piksa long page 5]
From hem no garem stretfala savve, Saul agree witim olketa wicked samting wea narawan duim
[Piksa long page 7]
For helpem samwan kasem stretfala savve abaotem God hem best samting wea wanfala man savve duim for narawan