Hao Strong Nao Trust Bilong Iu Long God?
“Gohed for aftarem kingdom . . . firstaem.”—MATTHEW 6:33.
1, 2. Wanem nao wanfala young man disaed for duim saed long waka bilong hem, and why nao hem duim datwan?
WANFALA young man hem laek for duim samfala samting moa for help insaed kongregeson bilong hem, bat hem feisim wanfala problem. Waka bilong hem mekem hem hard for attendim olketa meeting evritaem. So, wanem nao hem duim? Hem mekem laef bilong hem simpol and hem lusim datfala waka. Gogo, hem kasem wanfala waka wea no affectim Christian waka bilong hem insaed kongregeson. Distaem, nomata hem no kasem staka selen olsem bifor, hem still provaedem samting wea famili bilong hem needim and hem savve barava sapotim kongregeson tu.
2 Waswe, iu minim why nao datfala young man disaed for duim datwan? Waswe sapos iu kasem semkaen samting olsem datfala man, bae iu duim sem samting tu? Barava nambawan samting hem wei wea plande Christian duim diswan finis, and diswan hem showimaot olketa trustim disfala promis bilong Jesus: “Gohed for aftarem kingdom and raeteous fasin bilong hem firstaem, and iufala bae kasem olketa nara samting hia.” (Matthew 6:33) Winim wei for trustim disfala world, olketa trustim hao Jehovah nao bae givim samting wea olketa needim for mekem olketa stap gud.—Proverbs 3:23, 26.
3. Wanem nao mekem samfala daotem sapos man fit for aftarem Kingdom bilong God firstaem?
3 From iumi distaem stap long olketa hardfala taem, samfala maet daotem sapos datfala young man mekem wise disison. Distaem, staka pipol long world olketa barava poor tumas, bat long semtaem, staka nara pipol garem barava haefala standard long living wea winim eni narataem bifor. Klosap evriwan wea stap long olketa poor kantri bae hapi tumas sapos olketa kasem chance for mekem living bilong olketa kamap moabeta. Long narasaed, staka pipol long olketa rich kantri kasem bigfala hevi from olketa trae hard for garem haefala standard saed long living. Diswan maet olsem bikos economy start for nogud, olketa waka change olowe, and olketa boss mekem olketa man waka hard tumas. From hem no isi for kasem inaf selen for fitim need, samfala maet ting olsem, ‘Waswe, man still fit for aftarem Kingdom firstaem?’ For helpem iumi kasem ansa for datfala kwestin, tingim hu nao Jesus story long hem taem hem talem datfala toktok.
“No Gohed for Wari”
4, 5. Hao nao Jesus showimaot pipol bilong God no need for wari tumas abaotem samting wea olketa needim evriday?
4 Jesus hem long Galilee, and hem story long staka pipol wea kam from olketa didifren ples. (Matthew 4:25) Maet tu-thri long olketa nomoa rich. Luk olsem klosap evriwan poor. Nomata olsem, Jesus encouragem olketa for no tingse material samting nao important, bat hem sei olketa mas hipimap olketa spiritual riches wea hem nao samting wea moa important. (Matthew 6:19-21, 24) Hem sei: “No gohed for wari abaotem soul bilong iufala saed long wanem iufala bae kaikaim or wanem iufala bae drinkim, or abaotem body bilong iufala saed long wanem iufala bae werem. Soul hem moa important winim kaikai and body hem moa important winim kaleko.”—Matthew 6:25.
5 Plande long olketa wea lisin long Jesus maet tingse toktok hia no fitim olketa. Olketa savve hao sapos olketa no waka hard bae famili bilong olketa safa. Bat Jesus talem olketa for tingim olketa bird. Evriday olketa bird need for faendem kaikai and ples for stap. Nomata olsem, Jehovah lukaftarem olketa. Jesus storyim tu wei wea Jehovah lukaftarem olketa flaoa, wea lukluk bilong olketa naes winim glory wea Solomon garem. Sapos Jehovah savve lukaftarem olketa bird and flaoa, for sure bae hem lukaftarem iumi tu! (Matthew 6:26-30) Olsem Jesus talem, laef (soul) and body bilong iumi hem moa important winim kaikai wea iumi peim for keepim iumi laef and kaleko wea iumi kasem for kavarem body bilong iumi. Sapos iumi iusim evri strong bilong iumi for faendem kaikai and kaleko nomoa, wea mekem iumi no garem strong for servem Jehovah, diswan minim iumi nating luksavve long reason why iumi laef.—Ecclesiastes 12:13.
Balance Tingting
6. (a) Wanem responsibility nao olketa Christian garem? (b) Hu nao olketa Christian trustim evribit?
6 Jesus no talem olketa wea lisin long hem for no waka and weit nomoa for God givim samting wea famili bilong olketa needim. Nomata bird tu mas lukaotem kaikai for olketa seleva and pikinini bilong olketa. Dastawe, sapos olketa Christian laek for kaikai, olketa mas waka for kasem datwan. Olketa mas duim olketa responsibility bilong olketa insaed famili. Olketa wea waka olsem servant or slave, mas waka hard for masta bilong olketa. (2 Thessalonians 3:10-12; 1 Timothy 5:8; 1 Peter 2:18) Plande taem aposol Paul wakem olketa tent for kasem selen for lukaftarem hemseleva. (Acts 18:1-4; 1 Thessalonians 2:9) Nomata olketa Christian hia mas waka for selen, olketa no depend long datwan for mekem olketa stap gud. Olketa trustim Jehovah. From datwan, olketa no wari olsem olketa nara pipol. Man wea raetem psalm hem sei: “Olketa wea trustim Jehovah, olketa olsem Maunt Zion, wea hard for eni samting mekem hem foldaon, and wea bae stap for olowe.”—Psalm 125:1.
7. Maet wanem nao tingting bilong olketa wea no trustim Jehovah evribit?
7 Man wea no trustim Jehovah evribit maet garem difren tingting. Klosap evriwan tingse selen nao main samting for mekem man kasem samting wea hem needim. Diswan mekem parents encouragem pikinini bilong olketa for aftarem bigfala education bikos olketa tingse datwan nao bae helpem olketa pikinini kasem waka wea garem big pei. Sorre nao, samfala Christian famili wea encouragem pikinini for aftarem big education kasem sorre samting bikos gogo olketa pikinini hia lusim wei for interest long olketa spiritual samting and aftarem material samting.
8. Olketa Christian gohed for balance long wanem samting?
8 Olketa wisefala Christian luksavve hao kaonsel bilong Jesus hem no just fitim olketa long taem bilong hem nomoa, bat hem barava fitim distaem tu. Diswan mekem olketa trae hard for balance saed long diswan. Nomata sapos olketa mas waka staka hour for kasem selen wea olketa needim for duim olketa responsibility wea Bible talem, olketa no letem diswan stopem wei for duim olketa spiritual samting wea moa important.—Ecclesiastes 7:12.
“No Wari”
9. Hao nao Jesus showimaot olketa wea trustim Jehovah evribit no need for wari?
9 Long Sermon long Maunten, Jesus sei olsem long olketa wea lisin long hem: “No wari and sei, ‘Wanem nao bae mifala kaikaim?’ or, ‘Wanem nao bae mifala drinkim?’ or, ‘Wanem nao bae mifala werem?’ From evri samting hia nao olketa nation barava aftarem. Bat Dadi bilong iufala long heven hem savve iufala needim evri samting hia.” (Matthew 6:31, 32) Tru nao, datfala toktok barava encouragem man! Sapos iumi trustim Jehovah evribit bae hem sapotim iumi evritaem. Bat, disfala toktok bilong Jesus hem mekem iumi for tingting tu. Hem remindim iumi hao sapos iumi “barava” aftarem olketa material samting, tingting bilong iumi hem olsem tingting bilong “olketa nation,” wea hem nao pipol wea no tru Christian.
10. Taem wanfala young man askem advaes from Jesus, hao nao Jesus showimaot samting wea datfala young man lovem tumas?
10 Wantaem, wanfala barava rich young man hem askem Jesus wanem nao hem need for duim mekem hem kasem laef olowe. Jesus remindim hem abaotem olketa samting wea Law talem man for duim, bikos long datfala taem olketa still stap anda long Law. Datfala young man hem sei olsem long Jesus: “Mi followim evri samting hia; bat wanem moa mi mas duim?” Samfala pipol maet tingse ansa wea Jesus talem for datfala man hem hard for man duim. Hem sei: “Sapos iu want for kamap perfect, go and salem evri samting bilong iu and givim long poor pipol mekem iu bae garem olketa richfala samting long heven, and kamap follower bilong mi.” (Matthew 19:16-21) Datfala young man hem lusim Jesus and hem sorre tumas bikos hem barava no laek for lusim olketa material samting bilong hem. Nomata hem lovem Jehovah, love bilong hem for olketa material samting hem moa big.
11, 12. (a) Wanem warning nao Jesus talem abaotem wei for rich? (b) Hao nao wei for garem olketa material samting savve stopem iumi for servem Jehovah?
11 Datfala samting wea happen mekem Jesus talem wanfala samting wea olketa no expectim. Hem sei: “Bae hem hard tumas for wanfala rich man go insaed long kingdom bilong heven. . . . Hem moa isi for wanfala camel for go insaed long hol bilong nila for sewing winim for wanfala rich man go insaed long kingdom bilong God.” (Matthew 19:23, 24) Waswe, diswan minim no eni rich man nao bae go insaed Kingdom? Nomoa, from hem sei moa bihaen: “God savve duim eni samting.” (Matthew 19:25, 26) Tru nao, from Jehovah helpem olketa, samfala wea rich long datfala taem olketa kamap anointed Christian. (1 Timothy 6:17) Nomata olsem, Jesus garem reason for talem datfala sapraesing toktok. Datwan hem wanfala warning.
12 Olsem datfala rich young man, taem man lovem tumas olketa material samting wea hem garem datwan savve stopem hem for servem Jehovah witim full heart. Diswan savve happen long olketa wea rich finis, and tu, long olketa wea “laekem tumas for kamap rich.” (1 Timothy 6:9, 10) Wei for trustim tumas olketa material samting savve mekem man no ‘luksavve gud long spiritual need bilong hem.’ (Matthew 5:3) From datwan, maet hem tingse hem no barava need for depend long Jehovah. (Deuteronomy 6:10-12) Gogo maet hem start for tingse olketa long kongregeson shud deal witim hem long wei wea difren from olketa narawan. (James 2:1-4) And maet hem busy for enjoyim nomoa olketa riches bilong hem winim wei for busy for servem Jehovah.
Trae Hard for Garem Stretfala Tingting
13. Wanem tingting wea rong nao olketa long Laodicea garem?
13 Wanfala sekson bifor wea garem rong tingting abaotem diswan hem olketa long kongregeson bilong Laodicea. Jesus sei long olketa: “Iu sei: ‘Mi rich and kasem staka samting and no needim eni samting moa,’ bat iu no savve iu barava no fit and iu no stap gud and iu poor and blind and naked.” No wei for rich nao spoelem spiritual saed bilong olketa long Laodicea. Samting wea spoelem olketa hem wei wea olketa trustim selen winim wei for trustim Jehovah. From datwan, olketa hafhaf long spiritual wei, and Jesus sei hem klosap ‘toroaotem olketa’ from mouth bilong hem.—Revelation 3:14-17.
14. Why nao olketa Hebrew Christian fit for kasem praise from Paul?
14 Long narasaed, Paul hem praisem olketa Hebrew Christian bikos olketa garem stretfala tingting taem olketa kasem persecution. Hem sei: “Iufala showimaot sorre long olketa wea stap insaed long prison, and tu, nomata pipol stealim evri samting wea iufala ownim iufala hapi nomoa, bikos iufala savve iufala garem wanfala samting wea moabeta and wea bae stap for olowe.” (Hebrews 10:34) Nomata olketa Christian hia lusim evri samting wea olketa garem, olketa no feel nogud tumas. Olketa gohed for hapi nomoa bikos olketa hol strong long samting wea hem moa important, wea hem nao datfala “samting wea moabeta and wea bae stap for olowe.” Olsem datfala bisnisman long parabol bilong Jesus wea willing for salem evri samting wea hem garem mekem hem kasem wanfala pearl wea garem hae price, olketa tu no laek for lusim disfala hope bilong olketa long Kingdom nomata sapos olketa mas lusim evri nara samting. (Matthew 13:45, 46) Datwan hem wanfala nambawan wei for tingting!
15. Hao nao wanfala Christian sista long Liberia hem aftarem Kingdom firstaem?
15 Plande distaem garem gudfala tingting olsem olketa hia tu. Olsem example, long Liberia wanfala young Christian sista hem kasem chance for go skul long university. Long datfala kantri, pipol ting long datwan olsem samting wea bae mekem man kasem gudfala future. Bat, disfala sista hem wanfala pioneer, wea minim hem evritaem duim disfala waka for preach. Hem kasem tu wanfala invitation for serve olsem spesol pioneer for lelebet taem. Disfala sista chus for aftarem Kingdom firstaem and hem disaed for gohed for pioneer. Hem go long assignment bilong hem and insaed thrifala month nomoa hem startim 21 Bible study. Disfala young sista, and tu, plande thousand narawan olsem hem, olketa aftarem Kingdom firstaem, nomata diswan maet minim olketa lusim chance for kasem olketa material samting. Wanem nao mekem olketa garem diskaen tingting nomata olketa stap insaed disfala world wea aftarem olketa material samting? Olketa trae hard for garem olketa gudfala fasin. Bae iumi story raonem samfala long olketa fasin hia.
16, 17. (a) For iumi trustim Jehovah, why nao hem important for garem hambol fasin? (b) Why nao iumi shud mekem trust bilong iumi long olketa promis bilong God kamap moa big?
16 Hambol fasin: Bible sei: “Trust long Jehovah witim full heart bilong iu and no depend long savve bilong iuseleva. Long evri samting iu duim, lisin long hem, and hemseleva nao bae mekem olketa wei wea iu followim hem kamap stret. No tingse iuseleva nao wise.” (Proverbs 3:5-7) Samfala taem, samting iumi chus for duim maet luk stret nomoa sapos iumi garem tingting olsem olketa long world. (Jeremiah 17:9) Bat, wanfala tru Christian bae depend long Jehovah for leadim hem. (Psalm 48:14) ‘Long evri samting hem duim’—saed long kongregeson, education, waka for selen, hapitaem, or eni nara samting—hem hambol and hem lukaotem help from Jehovah.—Psalm 73:24.
17 Trustim olketa promis bilong Jehovah: Paul hem sei: “Man wea kam long God mas bilivim hao hem stap and hem kamap datwan for givim reward long olketa wea barava lukaotem hem.” (Hebrews 11:6) Sapos iumi daotem wei wea Jehovah bae fulfillim olketa promis bilong hem, maet iumi tingse hem wise for ‘iusim evribit disfala world.’ (1 Corinthians 7:31) Bat long narasaed, sapos faith bilong iumi hem strong, bae iumi disaed strong for aftarem Kingdom firstaem. Hao nao iumi savve mekem faith bilong iumi kamap strong? Thru long wei for fren gud witim Jehovah taem iumi prea from heart and duim study seleva evritaem. (Psalm 1:1-3; Philippians 4:6, 7; James 4:8) Iumi tu savve prea olsem King David, wea sei: “Long iu nao mi putim trust bilong mi, O Jehovah. Mi talem finis: ‘Iu nao God bilong mi.’ Gudfala fasin bilong iu hem staka tumas!”—Psalm 31:14, 19.
18, 19. (a) Hao nao wei for waka hard hem strongim wei wea iumi trust long Jehovah? (b) Why nao wanfala Christian shud willing for sakrifaesim olketa samting?
18 Busy insaed service bilong Jehovah: Paul joinim wei for trustim olketa promis bilong Jehovah witim wei for waka hard taem hem sei olsem: “Mifala laekem evriwan long iufala for showimaot semkaen fasin for waka hard mekem iufala savve garem full trust long datfala hope go kasem end.” (Hebrews 6:11) Sapos iumi busy insaed service bilong Jehovah, hem bae sapotim iumi. Evritaem wea iumi feelim sapot bilong hem, trust bilong iumi kamap moa strong and datwan mekem iumi ‘strong, and no seksek.’ (1 Corinthians 15:58) Faith bilong iumi kamap niu moa, and hope bilong iumi bae barava strong.—Ephesians 3:16-19.
19 Iumi mas willing for sakrifaesim olketa samting: Paul hem willing for lusim chance for kasem bigfala waka for mekem hem followim Jesus. Hem klia tumas hao hem chusim stret samting nomata laef bilong hem hard samfala taem saed long material samting. (1 Corinthians 4:11-13) Jehovah no promis for givim iumi rich living, and tru nao, samfala long olketa servant bilong hem mas deal witim olketa barava hard taem. Wei wea iumi willing for mekem laef simpol and givim iumiseleva long hem pruvim hao iumi barava disaed strong for servem Jehovah.—1 Timothy 6:6-8.
20. Why nao hem important for man wea putim Kingdom firstaem hem mas patient?
20 Patient fasin: Disaepol James hem barava encouragem olketa Christian for ‘showimaot patient fasin, go kasem taem wea Lord hem stap moa.’ (James 5:7) Long disfala world wea pipol busy tumas, samfala taem hem hard for patient. Iumi laekem olketa samting for happen kwiktaem. Bat Paul encouragem iumi for followim example bilong olketa wea “thru long faith and patient fasin kasem olketa promis.” (Hebrews 6:12) Iumi mas willing for weit for Jehovah. Tru nao, laef olowe hem samting wea iumi bae barava willing for weit for hem!
21. (a) Wanem nao iumi showimaot taem iumi putim Kingdom firstaem? (b) Wanem nao bae iumi storyim long next article?
21 Tru, encouragement bilong Jesus for aftarem Kingdom firstaem hem barava fitim iumi. Taem iumi duim datwan, iumi showimaot hao iumi barava trustim Jehovah, and chusim only sef wei for wanfala Christian followim. Bat, Jesus givim kaonsel tu for iumi gohed “aftarem . . . raeteous fasin [bilong God] firstaem.” Long next article, bae iumi lukim why nao iumi barava need for duim diswan distaem.
Waswe, Iu Savve Explainim?
• Saed long material samting, wanem wei for balance nao Jesus encouragem iumi for garem?
• Wanem nao iumi lanem from tokpiksa bilong Jesus abaotem datfala camel and hol bilong nila for sewing?
• Olketa wanem Christian fasin nao bae helpem iumi for aftarem firstaem Kingdom bilong God?
[Piksa long page 21]
Plande pipol wea lisin long Jesus olketa poor
[Piksa long page 23]
Datfala rich young man lovem olketa material samting winim wei wea hem lovem God
[Piksa long page 23]
Datfala bisnisman long parabol bilong Jesus hem givim evri samting hem garem for kasem wanfala pearl wea garem hae price
[Piksa long page 24]
Sapos iumi busy for servem Jehovah, hem bae sapotim iumi