Hao Nao Iu Savve Disaed Fitim Samting wea God Laekem?
WANFALA man long United States go long bank witim wanfala cheque for $25,000. Plan bilong hem for putim selen hia insaed wanfala bank account for kasem interest. Bat, wanfala man long bank advaesem hem for baem olketa share and stock long stock market. Hem sei bae hem kasem moa selen bikos hard for lusim selen long stock market. Datfala man hem disaed for followim advaes bilong hem. No longtaem bihaen datwan, hem lusim klosap evri selen bilong hem nao.
Disfala experience showimaot hem no isi for disaedem samting long wisefala wei. Waswe long staka nara samting wea iumi mas disaedem long laef? Staka samting wea iumi disaedem savve lead go for win or lus, and gogo, olketa savve lead go long laef or dae tu. So, hao nao iumi savve sure iumi disaedem samting long wisefala wei?
“Diswan Nao Wei”
Evriday iumi disaedem wanem for kaikaim, kaleko for werem, wea for go, and olketa nara samting. Nomata maet luk olsem samfala samting for disaedem no important tumas, olketa nogud samting savve kamaot from olketa disison olsem. Olsem example, disison for traem smoke for firstaem savve lead go for smoke for full laef. Iumi shud nating tingse olketa smol samting for disaedem hem no important.
Wea nao iumi savve kasem help for disaed long wisefala wei, nomata long olketa smol samting tu? Hem bae gud tumas for garem samwan wea iumi fit for trustim wea bae givim advaes taem iumi feisim hard samting! Help olsem hem stap. Wanfala old buk wea fitim taem bilong iumi tu hem sei olsem: “Sapos iufala go long raet or sapos iufala go long left, bae ear bilong iufala herem wanfala voice bihaen long iufala wea sei: ‘Diswan nao wei. Wakabaot followim, iufala pipol.’” (Isaiah 30:21) Diswan hem toktok bilong hu? And hao nao iumi sure iumi fit for trustim advaes bilong hem?
Promis antap hem stap insaed long Bible, and plande million pipol wea studyim Bible luksavve hao Creator, Jehovah God, hem nao wan wea muvim olketa man for raetem. (2 Timothy 3:16, 17) Jehovah savve wanem nao iumi needim saed long body, tingting, feeling, and fasin, so hem nao best wan for givim advaes. Hem savve tu wanem bae happen long future, from hem “savve finis end bilong samting wea just start, nomata bifor kam [hem] savve finis long olketa samting wea no happen yet; [Hem] nao sei, ‘Plan bilong mi bae kamap tru.’” (Isaiah 46:10) Wanfala man wea raetem psalm hem sei olsem abaotem trust wea hem garem long Word bilong Jehovah: “Toktok bilong iu hem wanfala lamp for leg bilong mi, and wanfala laet for road bilong mi.” (Psalm 119:105) Bat hao nao Jehovah helpem iumi for gohed stret and stap sef insaed disfala world wea laef hem savve hard tumas? Hao nao iumi savve disaedem samting fitim samting wea God laekem?
Followim Olketa Bible Principle
Jehovah God givim olketa principle long olketa Christian mekem olketa savve disaedem samting long gudfala wei. Wei for lanem and followim olketa Bible principle hem olsem for lanem wanfala languis and iusim for story. Taem iu savve gud long datfala languis, plande taem iu bae luksavve sapos samwan hem tok rong bikos samting hem talem hem no here stret. Maet iu no savve explainim why nao hem no here stret, bat iu savve hem rong. Taem iu lanem olketa Bible principle and savve hao for followim olketa long stretfala wei long laef bilong iu, hem isi for iu luksavve sapos wanfala samting iu disaedem hem no stret, wea minim hem no fitim olketa principle bilong God.
Olsem example, wanfala young man hem disaedem wanem kaen hair kat nao bae hem duim. No eni Bible komand hem tambuim wankaen type hair stael or wei for katem hair. Bat tingim wanfala Bible principle saed long diswan. Aposol Paul hem raet olsem: “Mi laekem olketa woman for garem gudfala wei for werem kaleko, witim fasin wea showimaot respect and stretfala tingting, no long wei for staelem hair and for garem gold or olketa pearl and kaleko wea kostim staka selen, bat long wei wea fitim olketa woman wea sei olketa honorim God, wea olketa duim datwan thru long olketa gudfala waka.” (1 Timothy 2:9, 10) Long hia Paul hem raet for olketa woman, bat disfala principle hem fitim olketa man and woman. Wanem nao disfala principle? Lukluk bilong iumi shud showimaot respect and stretfala tingting. So datfala young man savve askem hemseleva olsem, ‘Waswe, disfala hair stael bae showimaot respect wea fitim wanfala Christian for showimaot?’
And wanem gudfala principle nao wanfala young wan savve kasem from disfala toktok bilong disaepol James? “Waswe, iufala wea duim adultery no savve hao wei for fren witim world hem minim man kamap enemy bilong God? So, eniwan wea laek for kamap fren bilong world hem mekem hemseleva kamap enemy bilong God.” (James 4:4) Olketa Christian heitim wei for fren witim world, bikos wei for duim datwan bae mekem olketa enemy bilong God. Sapos hem garem hair stael wea semsem witim olketa nara young wan, waswe, datwan bae mekem hem fren bilong God or fren bilong world? Young man wea ting raonem wanem kaen hair stael for garem savve iusim olketa Bible principle olsem for disaed long wisefala wei. Tru tumas, olketa Bible principle savve helpem iumi for disaedem samting. And taem iumi getius for disaedem samting followim olketa Bible principle, hem moa isi for duim samting wea wise wea mekem iumi missim olketa nogud samting.
Iumi savve faendem staka principle insaed long Word bilong God. Hem tru, maet iumi no faendem wanfala scripture wea talem ansa for problem wea iumiseleva feisim. Nomata olsem, iumi savve read abaotem wei wea samfala obeyim advaes bilong God and wei wea samfala no laek obeyim olketa warning bilong God. (Genesis 4:6, 7, 13-16; Deuteronomy 30:15-20; 1 Corinthians 10:11) Taem iumi readim olketa story olsem and ting raonem, bae iumi luksavve long olketa Bible principle wea savve helpem iumi for disaedem samting wea mekem God hapi.
Olsem example, tingim wanfala taem wea Jesus and Peter story tugeta. Olketa man wea kolektem datfala tufala drachma tax askem Peter olsem: “Waswe, teacher bilong iu savve peim tufala drachma tax tu?” Peter ansa: “Ia, hem savve peim.” Bihaen, Jesus askem Peter: “Olketa king bilong earth kasem selen or hed tax from hu nao? From olketa son bilong olketa or from olketa stranger?” Taem Peter sei: “From olketa stranger,” Jesus sei long hem: “So, really, olketa son no need for peim tax. Bat for iumi no mekem olketa stambol, iu go long sea, torowem go wanfala fishing laen, and tekem firstfala fish wea iu pullim and, taem iu openem mouth bilong hem, iu bae faendem wanfala stater coin. Tekem datwan and givim long olketa for mi and iu.” (Matthew 17:24-27) Wanem nao olketa principle long disfala story?
Wei wea Jesus askem Peter olketa kwestin helpem hem for minim disfala samting: From Jesus hem son bilong God, hem no need for peim tax. Nomata long firstaem Peter hem no minim, Jesus showimaot kaenfala fasin long wei for helpem hem minim datwan. Taem olketa narawan duim mistek, iumi shud followim example bilong Jesus long wei for deal witim olketa long kaenfala wei and no tok raf long olketa abaotem rong olketa duim and judgem olketa.
Samting wea Jesus duim helpem Peter for luksavve long reason for peim datfala tax—hem nao for no mekem nara pipol stambol. Tingim narafala principle wea iumi savve lanem from disfala story. Wei for tingim conscience bilong nara pipol hem moa important winim wei for duim samting wea iumi garem raet for duim nomata datwan bae mekem narawan feel nogud.
Wanem nao muvim iumi for disaedem olketa samting wea bae showimaot respect for conscience bilong nara pipol? Fasin for lovem olketa neiba. Jesus Christ teachim hao only wanfala komandment wea moa important winim komandment for lovem neiba, hem nao for lovem God bilong iumi witim full soul. (Matthew 22:39) Bat iumi stap insaed world wea mekhae long selfish fasin, and from iumi sinner, hem isi for iumi savve selfish. So for man lovem neiba olsem hemseleva, hem mas changem tingting bilong hem.—Romans 12:2.
Staka pipol changem finis tingting bilong olketa, dastawe, taem olketa disaedem samting, nomata big or smol, olketa tingim conscience bilong nara pipol. Paul hem raet olsem: “Hem tru olketa brata, iufala kamap free; bat no iusim disfala freedom for duim samting wea body laekem, bat servem each other from love nao muvim iufala.” (Galatians 5:13) Hao nao iumi savve duim datwan? Tingim wanfala young gele wea muv long wanfala ples long bush for teachim Word bilong God long pipol. Kaleko wea hem werem hem fitim tingting bilong pipol long taon, bat taem hem story witim pipol long datfala ples, hem start for luksavve hao plande long community story nogud abaotem kaleko bilong hem. Kaleko and lukluk bilong hem showimaot respect, bat hem disaed for werem olketa kaleko wea no stael tumas “mekem no eniwan savve tok spoelem word bilong God.”—Titus 2:5.
Waswe sapos iu nao hem, bae iu duim sem samting sapos iu mas disaedem samting saed long lukluk bilong iu or nara samting wea man seleva fit for disaedem? Sapos olsem, Jehovah bae hapi taem samting iu disaedem hem showimaot iu tingim conscience bilong nara pipol.
No Tingim Distaem Nomoa Bat Tingim Future Tu
For join witim olketa Bible principle and conscience bilong nara pipol, wanem nara samting nao iumi savve tingim taem iumi disaedem samting? Nomata laef bilong olketa Christian hem barava no isi, God letem olketa for disaedem plande samting seleva bat insaed olketa spialaen bilong hem. (Matthew 7:13, 14) Iumi need for tingim hao olketa samting wea iumi disaedem bae affectim spiritual saed, tingting, feeling and body bilong iumi long future.
Tingim sapos iu laek for acceptim wanfala waka. Maet waka hia hem fitim Christian for duim. Iu bae garem taem for attendim olketa Christian meeting and convention. Pei hem barava gud. Boss laek for barava iusim savve bilong iu for helpem company. And tu, iu bae enjoyim datfala waka. Waswe, eni samting shud mekem iu hol bak for acceptim datfala waka? Waswe sapos iu luksavve bae iu lovem tumas datfala waka and iusim evri strong bilong iu long datwan. Boss sei bae hem no forcem iu for duim ovataem. Bat for finisim wanfala project, waswe, bae iu willing for duim moa samting winim wanem iu shud duim? Waswe gogo maet iu ovataem olowe? Waswe, datwan bae mekem iu lusim famili bilong iu and olketa spiritual waka wea iu shud duim?
Tingim example bilong Jim wea disaedem big samting saed long waka bilong hem for selen. Hem waka hard gogo hem kasem barava hae position long company. Hem kamap bigman long olketa branch bilong company hia long east part bilong Asia, United States, and olketa kantri bilong Europe. Bat taem economy bilong Japan hem go daon, hem luksavve wei wea hem iusles nomoa for aftarem selen and paoa. Kwiktaem nomoa, selen wea hem waka hard for kasem hem finis nao. Hem feel olsem laef bilong hem no garem eni mining. Hem askem hemseleva olsem: ‘Bae mi hao bihaen nara tenfala year?’ Then hem luksavve hao waef and olketa pikinini bilong hem busy witim olketa goal wea moa important. For plande year finis, olketa kaban witim Olketa Jehovah’s Witness. Jim laek tu for kasem hapi and wei for satisfae wea famili hem bilong hem garem. So hem start for studyim Bible.
No longtaem bihaen Jim start for luksavve hao living bilong hem stopem hem for garem laef wea garem mining olsem wanfala Christian. From hem evritaem travel long Asia, United States, and Europe, hem no garem inaf taem for studyim Bible and kaban witim olketa brata and sista. Hem mas mekem disison: ‘Waswe, bae mi gohed and duim samting wea mi duim for 50 year finis or bae mi aftarem samting wea moa important?’ Bihaen hem prea abaotem wei wea diswan savve affectim future bilong hem, hem disaed for keepim wanfala waka and finis from evri nara waka mekem hem garem taem for aftarem olketa spiritual goal. (1 Timothy 6:6-8) Samting wea hem disaedem mekem hem moa hapi, and givim hem chance for busy long olketa Christian waka.
Nomata olketa samting iu disaedem hem smol or big, olketa hia important. Samting wea iumi disaedem distaem savve lead go for win or lus, and maet lead go long laef or dae tu. Sapos iu tingim olketa Bible principle, conscience bilong nara pipol, and hao samting iu duim bae affectim future bilong iu, evri samting hia bae mekem iu disaed long wisefala wei. Disaedem samting followim wanem God laekem.
[Piksa long page 18]
Nomata maet luk olsem samfala disison no important tumas, olketa nogud samting savve kamaot from disison bilong iumi
[Piksa long page 19]
Hao nao olketa Bible principle savve helpem hem for disaed long wisefala wei?
[Piksa long page 20]
Jesus tok kaen long Peter