Duim Samting wea Wise and Fraet Long God!

“Wei for fraet long Jehovah hem start bilong wisdom.”—PROVERBS 9:10.

1. Why nao plande pipol no minim wei for fraet long God?

LONG bifor, sapos man sei samwan hem garem fasin for fraet long God, hem olsem hem praisem hem. Distaem, plande pipol ting long wei for fraet long God olsem naesfala toktok from bifor bat olketa no minim wanem nao datwan. Maet olketa ting olsem: ‘Sapos God hem love, why nao mi shud fraet long hem?’ Olketa ting long wei for fraet olsem nogud feeling wea savve spoelem man. Bat, trufala wei for fraet long God hem garem bigfala mining, and bae iumi lukim hao hem no wanfala feeling nomoa.

2, 3. Wanem nao hem minim for garem gudfala wei for fraet long God?

² Taem Bible story abaotem wei for fraet long God, datwan hem wanfala gud fasin. (Isaiah 11:3) Hem minim for garem barava bigfala respect for God, and strongfala feeling for no laek mekem hem feel nogud. (Psalm 115:11) Insaed diswan hem for acceptim and followim evribit olketa standard bilong God saed long fasin, and for obeyim hem saed long samting wea hem sei hem stret and no stret. Wanfala buk talem hao gudfala wei olsem for fraet long God hem muvim man for garem “tingting abaotem God wea leadim hem for duim wise samting and for stap klia long evri wicked samting.” Dastawe Bible talem iumi hao “wei for fraet long Jehovah hem start bilong wisdom.”—Proverbs 9:10.

³ Tru nao, wei for fraet long God hem affectim and join witim staka samting insaed long living bilong man. Hem savve mekem man wise, and tu, savve mekem hem hapi, garem peace, hope, trust, gudfala living, laef longtaem, and wei for feel sure long samting. (Psalm 2:11; Proverbs 1:7; 10:27; 14:26; 22:4; 23:17, 18; Acts 9:31) Hem barava join long klos wei witim faith and love. For tok stret, diswan join witim wei wea iumi fren witim God and olketa nara man. (Deuteronomy 10:12; Job 6:14; Hebrews 11:7) Wei for fraet long God hem minim tu for barava biliv strong hao Dadi bilong iumi long heven hem lovem iumi and hem redi for forgivim olketa sin bilong iumi. (Psalm 130:4) Olketa wicked pipol wea no repent nomoa shud garem nogud wei for fraet long God.a—Hebrews 10:26-31.

Lane for Fraet Long Jehovah

4. Wanem nao savve helpem iumi for “lane for fraet long Jehovah”?

⁴ From wei for fraet long God hem barava important for disaedem samting long wisefala wei and for God blessim iumi, hao nao iumi savve “lane for fraet long . . . Jehovah” long stretfala wei? (Deuteronomy 17:19) Staka example bilong olketa man and woman wea fraet long God stap insaed Bible for “teachim iumi.” (Romans 15:4) For helpem iumi minim wanem nao hem barava minim for fraet long God, bae iumi lukluk long laef bilong wanfala hia, hem nao King David bilong Israel bifor.

5. Taem David lukaftarem olketa sheep, hao nao datwan help for teachim hem abaotem wei for fraet long Jehovah?

⁵ Jehovah rejectim Saul, firstfala king bilong Israel, bikos hem fraetem pipol and no fraet long God. (1 Samuel 15:24-26) Long narasaed, laef bilong David and wei wea hem barava fren gud witim Jehovah showimaot hem man wea really fraet long God. From taem hem young, plande taem David lukaftarem olketa sheep bilong dadi bilong hem. (1 Samuel 16:11) Staka naet wea hem stap long aotsaed for lukaftarem olketa sheep hem helpem David for luksavve wanem nao mining bilong wei for fraet long Jehovah. Nomata David lukim smolfala part nomoa bilong bigfala universe, hem lanem from datwan hao hem barava fitim for iumi respectim and worshipim God. Bihaen hem raet olsem: “Taem mi luk go ap long skae bilong iu, olketa samting wea iu wakem, moon and olketa star wea iu wakem, why nao iu tingim man wea savve dae, and lukaftarem son bilong man long earth?”—Psalm 8:3, 4.

6. Taem David luksavve wei wea Jehovah nambawan, datwan mekem hem feel hao?

⁶ Taem David markem wei wea hem barava smol witim skae wea fulap witim olketa star, hem barava tinghae long Jehovah. Disfala savve no mekem hem fraet bat muvim hem for praisem Jehovah and sei: “Skae talemaot glory bilong God; and full skae talemaot waka bilong hand bilong hem.” (Psalm 19:1) Disfala wei for respectim God mekem David laek for fren gud witim Jehovah and lane for followim olketa perfect wei bilong Hem. Trae tingim feeling bilong David taem hem sing olsem long Jehovah: “Iu nao nambawan and iu duim olketa nambawan samting; iu nao God, iu nomoa. Teachim mi, O Jehovah, long wei bilong iu. Mi bae wakabaot long truth bilong iu. Mekem full heart bilong mi fraet long nem bilong iu.”—Psalm 86:10, 11.

7. Hao nao wei for fraet long God hem helpem David for faet witim Goliath?

⁷ Taem olketa Philistine go insaed land bilong Israel, Goliath, wea hem best soldia bilong olketa wea samting olsem thri meter tol, hem tok spoelem olketa Israelite. Hem olsem hem sei: ‘Chusim wanfala man bilong iufala for mitufala faet! Sapos hem win, bae mifala servem iufala.’ (1 Samuel 17:4-10) Saul and full army bilong hem fraet fogud, bat David no fraet. Hem savve man shud fraet long Jehovah, no long eni man nomata hem strong. David hem sei olsem long Goliath: “Mi kam long iu witim nem bilong Jehovah wea komanda bilong olketa army . . . and olketa wea hipap long hia bae savve hao Jehovah sevem pipol bilong hem no witim sword or spia, from disfala faet hem bilong Jehovah.” From Jehovah helpem hem, David iusim wanfala sling and wanfala ston nomoa for killim dae datfala giant.—1 Samuel 17:45-47.

8. Olketa example insaed Bible abaotem olketa wea fraet long God teachim iumi wanem samting?

⁸ Olsem David, maet iumi feisim olketa hard taem or olketa enemy wea laek for spoelem iumi. Wanem nao iumi savve duim? Iumi savve deal witim olketa samting hia olsem David and olketa nara faithful wan bifor. Olketa fraet long God. Wei for fraet long God savve mekem iumi no fraetem man. Faithful servant bilong God, Nehemiah, hem encouragem olketa nara Israelite wea kasem hard taem from pipol wea againstim olketa taem hem sei olsem: “No fraet long olketa. Tingim Jehovah wea nambawan and Wan wea iumi fraet long hem.” (Nehemiah 4:14) From Jehovah sapotim olketa, David, Nehemiah, and olketa narafala faithful servant bilong God win for duim assignment wea God givim long olketa. Iumi tu savve olsem sapos iumi fraet long God.

Fraet Long God Taem Iumi Deal Witim Olketa Problem

9. David gohed for fraet long God nomata hem mas deal witim olketa wanem samting?

⁹ Bihaen David hem killim dae Goliath, Jehovah mekem hem winim staka moa faet. Bat Saul hem jealous and laek for killim dae David. Firstaem hem kros and seknomoa duim samting, then hem trae for trikim David, and then hem iusim army. Nomata Jehovah talem David finis bae hem nao king, David mas ranawe, faet, and weit for plande year for taem wea Jehovah bae mekem hem kamap king. Long full taem hia, David showimaot hem fraet long trufala God.—1 Samuel 18:9, 11, 17; 24:2.

10. Hao nao David showimaot hem fraet long God taem hem stap long danger?

¹⁰ Wantaem David ranawe go long Achish, wea hem king long Gath, wanfala taon bilong olketa Philistine wea hem nao hom bilong Goliath. (1 Samuel 21:10-15) Olketa servant bilong king accusim David and sei hem wanfala enemy bilong nation bilong olketa. Wanem nao David duim taem hem stap long danger hia? Hem prea strong long Jehovah. (Psalm 56:1-4, 11-13) Nomata David mas act olsem hem mentol mekem hem savve ranawe, hem savve hao Jehovah nao really wan wea sevem hem long wei for blessim samting wea David duim. Wei wea David depend evribit long Jehovah and trustim hem showimaot David hem barava fraet long God.—Psalm 34:4-6, 9-11.

11. Olsem David, hao nao iumi savve showimaot iumi fraet long God taem iumi kasem hard taem?

¹¹ Olsem David, iumi savve showimaot iumi fraet long God taem iumi trustim promis bilong hem for helpem iumi deal witim olketa problem bilong iumi. David hem sei: “Letem Jehovah leadim gogo bilong iu, and depend long hem, and hem nao bae duim samting.” (Psalm 37:5) Diswan no minim iumi givim go olketa problem bilong iumi long Jehovah and no duim eni samting for stretem olketa and expectim hem nao for stretem olketa problem bilong iumi. David hem no prea long God and then no duim eni samting. Hem duim samting wea hem fit for duim and hem iusim tu savve wea Jehovah givim long hem for deal witim problem wea kasem hem. Nomata olsem, David savve hao hem hard for man win from samting wea hemseleva duim. Iumi tu shud garem sem tingting. Bihaen iumi duim evri samting wea iumi fit for duim, iumi mas weit for Jehovah nao for duim samting. Tru nao, plande taem samting iumi fit for duim nomoa hem for depend long Jehovah. Long taem olsem nao iumi barava showimaot iumi fraet long God. Disfala toktok bilong David barava comfortim iumi: “Olketa wea fraet long Jehovah barava fren gud witim hem.”—Psalm 25:14.

12. Why nao iumi need for ting long olketa prea bilong iumi olsem barava important, and wanem kaen tingting nao iumi mas no garem?

¹² Iumi shud ting long olketa prea bilong iumi and wei wea iumi fren witim God olsem olketa samting wea barava important. Taem iumi story witim Jehovah, iumi mas “bilivim hao hem stap and hem kamap datwan for givim reward long olketa wea barava lukaotem hem.” (Hebrews 11:6; James 1:5-8) And olsem aposol Paul talem, taem hem helpem iumi, iumi shud ‘showimaot thankiu.’ (Colossians 3:15, 17) Iumi mas no kamap olsem pipol wea wanfala anointed Christian sei olsem abaotem olketa: ‘Olketa ting God hem wanfala servant long heven. Taem olketa needim samting, olketa laekem hem for duim stretawe. And taem olketa kasem samting, olketa laekem hem for go nao.’ Kaen tingting olsem showimaot man hem no fraet long God.

Taem Wei for Fraet Long God Hem Kamap Wik

13. Wanem taem nao David fail for showimaot respect for Law bilong God?

¹³ Taem Jehovah helpem David long taem wea hem kasem trabol, diswan strongim wei wea hem fraet long God and trust wea hem garem long hem tu. (Psalm 31:22-24) Nomata olsem, thrifala taem nao wei wea David fraet long God hem kamap wik, and diswan lead go for hem duim bigfala sin. First wan hem taem hem arrange for olketa karem ark bilong covenant bilong Jehovah go long Jerusalem antap long wanfala wagon and hem no followim Law bilong God wea sei olketa Levite nao mas karem datwan long shoulder bilong olketa. Taem Uzzah, wea go long front bilong datfala wagon hem holem go Ark wea klosap foldaon, hem dae stretawe bikos samting wea hem duim barava no showimaot respect. Tru nao, Uzzah hem duim bigfala sin, bat really, wei wea David fail for respectim Law bilong God nao mekem datfala nogud samting happen. For fraet long God hem minim for duim samting followim arrangement bilong hem.—2 Samuel 6:2-9; Numbers 4:15; 7:9.

14. Wanem nao kamaot from wei wea David kaontem olketa Israelite?

¹⁴ Long mek-tu taem, Satan bihaenem wei wea David kaontem olketa man wea insaed long army bilong Israel. (1 Chronicles 21:1) Disfala samting wea David duim showimaot wei wea hem fraet long God hem wikdaon, and 70,000 Israelite nao dae from diswan. Nomata David repent, hem and olketa wea stap witim hem barava safa.—2 Samuel 24:1-16.

15. Wanem nao mekem David foldaon long sin for duim dirty fasin?

¹⁵ Narataem moa wea David kamap wik saed long wei for fraet long God hem duim dirty fasin witim Bath-sheba, waef bilong Uriah. David savve adultery or nomata feeling for laekem partner bilong narawan hem rong. (Exodus 20:14, 17) Disfala problem hem start taem David lukim Bath-sheba taem hem swim. Stretfala wei for fraet long God shud muvim David for luk difren and tingim difren samting. Bat, David ‘gohed lukluk’ long hem go kasem taem feeling bilong hem winim wei wea hem fraet long God. (Matthew 5:28; 2 Samuel 11:1-4) David forgetim wei wea Jehovah hem insaed evri samting wea hem duim long laef bilong hem.—Psalm 139:1-7.

16. Wanem nao olketa samting wea kamaot from rong samting wea David duim?

¹⁶ Samting wea kamaot from diswan nao Bath-sheba bornem wanfala pikinini boy. No longtaem bihaen diswan Jehovah sendem profet bilong hem Nathan for talemaot sin bilong David. Datwan mekem David kasem bak gudfala tingting and wei for fraet long God and hem repent. Hem barava askem Jehovah for no lusim hem or aotem holy spirit bilong Hem from hem. (Psalm 51:7, 11) Jehovah forgivim David and hem no dae, bat Hem no protectim David from evri nogud samting wea kamaot from wanem hem duim. Son bilong David nao dae, and sorre and bigfala trabol kasem famili bilong hem start long datfala taem. Staka nogud samting kamaot taem hem lusim wei for fraet long God!—2 Samuel 12:10-14; 13:10-14; 15:14.

17. Givim example bilong bigfala sorre and pain wea kamaot taem man duim sin.

¹⁷ Distaem, wei for no fraet long God saed long olketa standard bilong hem savve mekem man kasem barava nogud samting wea savve gohed for longfala taem. Tingim bigfala pain saed long feeling bilong wanfala waef taem hem faendemaot Christian hasband bilong hem duim adultery taem hem waka long nara kantri. From hem seke fogud and sorre tumas, hem krae big. Maet hem hard tumas for trustim and respectim moa hasband bilong hem! Sapos man really fraet long God, hem savve missim kaen nogud samting olsem.—1 Corinthians 6:18.

Wei for Fraet Long God Stopem Iumi for Duim Sin

18. Wanem nao goal bilong Satan and wanem nao hem iusim for duim diswan?

¹⁸ Satan hem mekem olketa standard bilong world kwiktaem go daon, and olketa main wan hem laek spoelem nao hem olketa tru Christian. Hem duim datwan taem hem mekius long eye and ear bilong iumi for kwiktaem affectim heart and mind bilong iumi. (Ephesians 4:17-19) Wanem nao bae iu duim taem seknomoa iu lukim dirty piksa, herem dirty toktok, and lukim pipol duim dirty fasin?

19. Hao nao wei for fraet long God helpem wanfala Christian for winim temptation?

¹⁹ Tingim story bilong André,b wanfala Christian elder wea garem famili and hem doctor long Europe. Taem André hem stand-bae doctor for full naet long hospital, olketa woman wea waka witim hem savve evritaem raetem olketa smol note for invaetem hem for durong witim olketa. André strong for rejectim wanem olketa askem. And tu, mekem hem no stap long datfala ples wea pipol garem dirty tingting, hem faendem waka long narafala ples. Disfala wei for fraet long God hem barava wise samting for duim and lead go for hem kasem olketa blessing, bikos distaem André waka part-taem long branch office bilong Olketa Jehovah’s Witness long kantri bilong hem.

20, 21. (a) Hao nao wei for fraet long God helpem iumi for stap klia long wei for duim sin? (b) Wanem nao bae iumi storyim long next article?

²⁰ Taem man evritaem tingim olketa rong samting, diswan savve leadim hem for garem tingting wea mekem hem willing for lusim spesol wei for fren witim Jehovah and kasem samting wea hem no garem right for kasem. (James 1:14, 15) Long narasaed, sapos iumi fraet long Jehovah, bae iumi go from pipol, olketa ples, eniting wea happen, and hapitaem wea savve lead go long wei for spoelem gudfala fasin bilong iumi. (Proverbs 22:3) Nomata iumi mas sakrifaesim samting or feel shame, diswan hem smol samting nomoa sapos iumi markem datwan witim wei for Jehovah no hapi long iumi. (Matthew 5:29, 30) Sapos iumi fraet long God hard for iumi min for lukim eni samting wea join witim dirty fasin, wea wanfala nao hem olketa dirty piksa, bat bae iumi ‘mekem eye bilong iumi no lukim iusles samting.’ Sapos iumi duim datwan, iumi sure Jehovah bae ‘keepim iumi laef’ and givim iumi evri samting wea iumi barava needim.—Psalm 84:11; 119:37.

²¹ Tru tumas, taem man duim samting wea showimaot hem fraet long God, datwan hem evritaem wise samting for duim. Datwan hem givim hem trufala hapi tu. (Psalm 34:9) Next article bae storyim diswan.

[Footnotes]

Waswe, Iu Savve Explainim?

• Wanem nao olketa Christian fasin wea join witim wei for fraet long God?

• Hao nao wei for fraet long God savve mekem man no fraetem man?

• Hao nao iumi savve showimaot iumi garem stretfala wei for ting long prea?

• Hao nao wei for fraet long God savve mekem iumi no duim sin?

[Piksa long page 25]

David lane for fraet long God taem hem lukluk long creation bilong Jehovah

[Piksa long page 26]

Wanem nao bae iu duim sapos seknomoa iu feisim wanfala temptation?